Debtere ba'ad waa ba'ad voo nɔ Moo dənée
Moo dənée
Debtere ba'ad waa ba'ad voo máa, wu̵ debtere ı̵́ idú Lúg ka kɔ́ ba'ad yúú woolı̵́ má nɔ. Lúg dəŋ bíńda moo to̧o̧ 'maŋ woo yúú mbaalı̵́ Yesu woo hágá yɛlı̵́ wu̵lı̵́. Diga sey ɗáálı̵́ Yesu woo be"ı̵́ (sapíitər 1:1-11), Yesu mbaa kan waa duulí woo vu̵ kə́d; hȩn woo vu̵ tii sú̵'ú̵. Waa duulí woo vu̵ duu ho̧n sı̵́ fó̧ó̧ woo kan nɔ́ɔ́ né. Moo woo nɔ debtere ba'ad waa ba'ad voo yɛ tu̵'u̵ hi̧naa 'yɛ́d eglíizə; Yesu mbaa wu̵lı̵́ kan yigid woo, ma yigid woo nim waa duulí woo vu̵ wu̵lı̵́.
Ba ho̧ moo pa'ané Lúg woo vu̵ debtere yɛlı̵́ to̧o̧lȩ́ na'a. Zig Yesu woo ha̧y debtere yɛlı̵́ sa̧a̧m nán Yúúda voolı̵́, Piɛ́r vu̵ kɔ́ ba'ad yȩ Yerúsalemmé. Hú' nán zó̧ó̧ 'yɛ́lı̵́ tóó vu̵ ha̧y zig nán ku̵u̵ nán Yúúda pɛ́lı̵́ máa voolı̵́ á̧ḿ, kaa Aŋtiósdı̵́, kan Koríńtilí, kan Filíbbí. Ba ho̧ waa ba'ad Pól á̧ḿ há̧á̧ la ya̧ ya gáá woo vu̵lı̵́. Eglíizə pə̧́ə̧d yȩ kan kan hȩn təəlı̵́ vu̵ ɓu̵u̵lı̵́ na'a. Yigid Tayɨɨ woo mbíd hȩn təəlı̵́ yȩ vu̵ 'waapád kan zó̧ó̧ nán ı̵́ 'yɛ́lı̵́ woo nɔ.
Sa̧a̧m hȩn ku̵u̵ dɨ debtere yɛlı̵́ yɛ, ba səgən ví hȩn ku̵u̵ beewu̵ “moo pa'ané yúú gáá laalı̵́ Lúg woo” máa. Lúg bíńda “vɔ́...” “vɔ́...” moo bi o̧ moo gáá Pól woo ka dəŋ kaa Trowáddı̵́ la ya̧ kaa Filíbbí máa. (Ba ho̧ “Vɔ́ lúú vaŋná...” 16:10 woolı̵́; moo woo laa tíŋ́ há̧á̧ la 'wáa 16:40 woolı̵́.) Lúg gbɔn moo moolȩ́ “vɔ́...” né há̧á̧ ya̧lȩ́ Pól woo Yerúsalemmé, ya ku̵u̵ ma"o̧ máalȩ́ (dəŋ 20:5 há̧á̧ la 'wáa 21:18 woolı̵́); Lúg bíńda “vɔ́...” tóó sey Pól ka lúú Sezaréelı̵́ máalȩ́, há̧á̧ la ya̧ kaa Rómalȩ́. Pól la mbaa laa moo sə̧"ȩ́ wu̵lı̵́ há̧á̧ ve' idú (sapíitər 27 kan 28).
Dəné debtere yɛlı̵́ Lúg tú' dȩ"ȩ́ na'a hȩn bindigo woo ban kɔ́y nɛ́nná (1:8).
1) —Dəné eglíizə woo Yerúsalemmé pig ɗáálı̵́ Yesu woo dɔg be"ı̵́ (dəŋ 1:1 há̧á̧ la 'wáa 8:3 woolı̵́);
2) —moo to̧o̧ 'maŋ palı̵́ ya ka kéé hág Yúúdalı̵́ máalȩ́ (dəŋ 8:4 há̧á̧ la 'wáa 12:25 woolı̵́);
3) —moo to̧o̧ 'maŋ palı̵́ ya̧ hág tóó ku̵u̵ mbaa dáŋ́ mam Mediteranɛ́ɛlȩ́ 'waapád há̧á̧ la ya̧ kaa gbaŋ Rómalȩ́ hág gbanii woolı̵́ á̧ḿ (dəŋ 13:1 há̧á̧ la 'wáa 28:31 woolı̵́).
Moo waa duulí ku̵u̵ dɨ palı̵́ hág voolı̵́ 'waapád, vu̵ yee 'yɛ́ wu̵ yu̵ ya moo Tayɨɨ moolȩ́lȩ́ kan ya moo palı̵́ ı̵́ waa ba'ad voo debtere yɛlı̵́. Vu̵ vud Yesu tú'ud nán vu̵ 'waapád wu̵lı̵́, nán Yúúda vu̵, kan ı̵́ ku̵u̵ nán Yúúda pɛ́lı̵́ á̧ḿ. Yesu sú̵u̵ wu̵ nán ı̵́ ká mbaa hág Palestínní má nɔ. Yigid Tayɨɨ woo pa̧nnɔ ya waa duulí vu̵ gən nag né sá̧ḿ, kan moo woolı̵́ ya̧gá̧ vu̵, kan ba'ad woo vu̵.
Hȩn ku̵u̵ ya̧a̧ debtere ba'ad waa ba'ad voolı̵́ yɛ, tu̵'u̵ hi̧naa 'yɛ́d eglíizə a laan tíŋ́ kan ba'ad woo kɔ́lı̵́ á̧ḿ ná': nán sú̵ggı̵́ vu̵ pa moo to̧o̧ 'maŋ Yesu Krístu woo zig nán voolı̵́ 'waapád, há̧á̧ la ya̧ hág sí̧'í̧dí.
Currently Selected:
Debtere ba'ad waa ba'ad voo nɔ Moo dənée: DIINT
Highlight
Share
Copy
Want to have your highlights saved across all your devices? Sign up or sign in
Nouveau Testament en Dii © Bible Society of Cameroon, 2001.