Debtere ba'ad waa ba'ad voo nɔ 6
6
Vu̵ yee fó̧ó̧ gúndɛm moo u̵u̵ maa waa ba'ad Yesu woo vu̵ hȩn lálı̵́ yȩ"ȩ́ȩ
1Sey woo, waa duulí Yesu woo vu̵ há'ay ɓu̵u̵ sú̵'ú̵. Ka' tóó vu̵ moo ya̧g gɛrɛ́g, tóó vu̵ ya̧g eebərə́ə. Nán ı̵́ ku̵u̵ moo ya̧g gɛrɛ́g máa, vu̵ o̧d daga vu̵: “Nán ku̵u̵ dɨ hȩn lálı̵́ yȩ"ȩ́ zá̧ga̧ 'waapád tée, vu̵ tii nɔ́ɔ́ ho̧n wakȩ́ȩ́ yɛd vóó vu̵ né.”
2-3Ma waa ba'ad Yesu woo ı̵́ wa̧nɓó' zu̵u̵ idú pee vu̵ su̵g waa duulí vu̵ 'waapád, vu̵ o̧d vu̵: “Dan kirtȩ́n vu̵, oo kéé moo Tayɨɨ woo tú"í gbɔ, oo dii də́ń moo hȩn lálı̵́ wu̵ yȩ"ȩ́ tée, du̵u̵ né. Moo woo nɔ, i yee nán tóó vu̵ víílí sa̧a̧mé gúndɛm, nán to̧o̧, yigid Tayɨɨ woo ka hi̧' voolı̵́, ku̵u̵ gaa moo du̵u̵lı̵́ na'a máa vu̵ yu̵, ba gbɔd vu̵ ví ba'ad woo nagá, 4tée vɔ́ń baa o̧d vóó Tayɨɨ moo, kan ba'ad moo Tayɨɨ moolȩ́ á̧ḿ.”
5Nán sú̵ggı̵́ ku̵u̵ ki moo yȩ máa, vu̵ fȩȩ ya voo 'waapád, ma vu̵ yee Itȩ́n, ka 'yɛ́ zó̧ó̧ Tayɨɨ woolı̵́, ka hi̧' kan yigid Tayɨɨ woo na'a máa. Vu̵ yee Filíb á̧ḿ, kan Pookɔ́r kan Nikanɔ́r kan Timɔ́ŋ kan Paamenás kan Níkoláa nán Aŋtiós ká tii nán Yúúda tiilíi. 6Ma vu̵ pa̧ŋ vu̵ yaan waa ba'ad Yesu woo voolı̵́. Vu̵ o̧d Tayɨɨ moo, vu̵ bag vu̵ hȩn kan nag ha"ı̵́ yúlí á̧ḿ.
7Moo Tayɨɨ woo baa kiy laa woo tíŋ́ tíŋ́. Waa duulí Yesu woo vu̵ dɨ voo há'ayné laa tíŋ́ ɓu̵u̵lı̵́ na'a Yerúsalemmé. Nán hȩn ha"ı̵́ vu̵ ɓu̵u̵lı̵́ na'a á̧ḿ, vu̵ fȩȩ moo Yesu woo.
Vu̵ ma' Itȩ́n
8Itȩ́n Tayɨɨ ka baggu̵ woo hȩn na'a máa, nuŋ néélȩ́ hȩn zálı̵́ vu̵ kan hȩn sa̧ga̧ vu̵ kɔ́lı̵́ kə́dkə́d sa̧a̧m nán voolı̵́. 9A̧máa nán tóó vu̵ bé' voo moo fanné kannɔ. Vu̵ nán Yúúda vu̵ yu̵. Vu̵ baa sú̵g lig sú̵ggı̵́ nán Yúúda voo tóó ka mbaad gba'a vəg lee vu̵ máalȩ́, kan nán Siirɛ́n vu̵, kan nán Alegza̧ŋnderíi vu̵, kan nán hág Silisíilí vu̵, kan ı̵́ Aazíilí vu̵ á̧ḿ. 10A̧máa vu̵ dii ní sá̧ḿ, moo yigid Tayɨɨ woo tú'ud Itȩ́n moo du̵u̵lı̵́ na'a.
11Nán pee ku̵u̵ ho̧ ná' máa, vu̵ soo nán tóó vu̵, moo u̵u̵ pa moo la ú̵, u̵u̵ o̧: “Vɔ́ ki Itȩ́n haa Múúsa kan Tayɨɨ á̧ḿ.”
12Ma nán pee vu̵ kɔ́ ı̵́ yo̧go̧, vu̵ luu dúú vu̵ kan ı̵́ nii Yúúda vu̵ kan nán moo Tayɨɨ tú"í vu̵ á̧ḿ, vu̵ ma' Itȩ́n pa̧ŋ laan ı̵́ nii moo sə̧"ȩ́ voolı̵́. 13Ma vu̵ duu pa̧ŋ nán tóó vu̵ yaan moo u̵u̵ du̵ ya̧g vbád yúú Itȩ́n woolı̵́ á̧ḿ, vu̵ o̧: “Nán yȩ gbɔn moo ɓı̵́d moolȩ́ yúú lig hȩn ha"ı̵́lı̵́ né, kan yúú debtere Múúsa woolı̵́ á̧ḿ. 14Vɔ́ ki o̧ Yesu nán Naazaréd yȩ ban 'wɔ lig hȩn ha"ı̵́, ban píń hȩn dikab baa ví kaa nuŋ ví Múúsa woolı̵́ yȩ vu̵ á̧ḿ.”
15Nán ku̵u̵ mbaa lig ı̵́ nii moo sə̧"ȩ́ voolı̵́ 'waapád máa, nɔ́ɔ́ voo laa Itȩ́n woolı̵́, ma vu̵ ho̧ ya̧g túń woo tii mbaa kɔ́ ı̵́ maleeka tóó wɔgɔ.
Currently Selected:
Debtere ba'ad waa ba'ad voo nɔ 6: DIINT
Highlight
Share
Copy
Want to have your highlights saved across all your devices? Sign up or sign in
Nouveau Testament en Dii © Bible Society of Cameroon, 2001.
