Debtere ba'ad waa ba'ad voo nɔ 3

Piɛ́r za̧a̧ nán kpee tóó

1Zá̧ga̧ tóólı̵́, zá̧ga̧ ka 'yɨg máa, Piɛ́r vu̵ kan Yoohá̧na, vu̵ laad Tayɨɨ moo o̧lȩ́ lig hȩn ha"ı̵́lı̵́ kɔ́ ı̵́ kú̵u̵ baa kɔ́ see máa wɔgɔ. 2Nán kpee tóó du̵u̵lı̵́, diga sey ha̧a̧lȩ́ woolı̵́, 'yȩm né sá̧ḿ. Zá̧ga̧ 'waapád tée, nán vu̵ baa gaŋ la 'yɛ́gɛ ya̧gníim lig hȩn ha"ı̵́lı̵́, ı̵́ ku̵u̵ beewu̵ “ya̧gníim du̵u̵” máalȩ́. Nán yȩ mbaa wu̵lı̵́, ɓá' nán ku̵u̵ dɨ dɔ́lı̵́ na'am gbo̧o̧ lig hȩn ha"ı̵́lı̵́ máa vu̵ sɨɨde.

3Nán kpee pee ka ho̧ Piɛ́r vu̵ kan Yoohá̧na ku̵u̵ dɨ dɔ́lı̵́ la wu̵lı̵́ máa, ɓá' vu̵ hȩn. 4A̧máa Piɛ́r vu̵ kan Yoohá̧na vu̵ tə́gəwu̵, vu̵ o̧ddu̵: “A̧m tə́g vɔ́ dɔg nɔ́lȩ́.”

5Ma nán kpee pee tə́g vu̵ dɔg nɔ́lȩ́, moo ká taa ba bíń nuŋ hȩn tóó voolı̵́ nagá. 6Piɛ́r duu o̧ddu̵: “Mí 'yɛ́n sɨɨde né, kóó hȩn tóó. A̧máa hȩn káń dɨ kannɔ máa, míń pú̵m wu̵ yu̵. Mí o̧m kan yɛ́g Yesu Krístu nán Naazaréd woo nɔ, a̧m lúú dɔg, mɔ́ 'yȩmma ó̧.”

7Ma Piɛ́r ma"o̧ nag nánné, luuwu̵ dɔg yúba; vaŋná doo woo vu̵ sȩ́ń dɔg ŋga̧w. 8Nán kpee pee wa̧ŋ daa dii la kan doo woo, bé' 'yȩ́m, sú̵g dɔ́ la kan waa ba'ad Yesu woo yȩ vu̵ na'am gbo̧o̧ lig hȩn ha"ı̵́lı̵́, wá̧ŋ́ daa, na' Tayɨɨ. 9Dúú 'waapád vu̵ ho̧go̧ 'yȩm daa, na' Tayɨɨ. 10Vu̵ gaa ba nán ka baa ɓá' hȩn “ya̧gníim du̵u̵” lig hȩn ha"ı̵́lı̵́ pee nɔ; ya voo 'waapád dú̵ú̵ kɔ́ vu̵. Vu̵ mbaa yəbəə, moo nán ku̵u̵ za̧a̧wo̧ yȩ woolı̵́.

Piɛ́r pad dúú vu̵ moo na'am gbo̧o̧ lig hȩn ha"ı̵́lı̵́

11Hȩn yȩ kɔ́ nán vu̵ la ɓá'. Vu̵ ho̧ nán kpee pee lúun doo Piɛ́r woolı̵́ kan Yoohá̧na né, vu̵ kɛ ɗug sú̵g la voolı̵́, ya̧gníim faan tóó ku̵u̵ beewu̵ “ya̧gníim faan Súlemáánu woo” máalȩ́.

12Piɛ́r ka ho̧ dúú vu̵ máa, o̧d vu̵: “Nán Izraɛ́l vu̵, moo ȩn nán kpee yȩ 'yȩ́m woo ka kɔ́ ví la ɓá' yȩlá? Moo ȩn ví 'yɛ́ nɔ́ɔ́ vóólı̵́lá? Moo ȩn ví ho̧ hȩn woo kɔ́ ı̵́ kóó wu̵ kɔ́ hȩn yȩ kan néélȩ́ dáń vóó, tóó tée moo kóó duu Tayɨɨ du̵u̵ na'a má nɔ wɔgɔlá? 13-14Tayɨɨ Ibrahí̧í̧ma woo kan Iizág woo kan Yaakúbu woo, kan a ba ví yée voo, wu̵ pú̵ nán ba'ad woo Yesu na"ȩ́. Ká ví dɔddu̵ nag kúḿ nánánné. Pilád ká hí̧í̧ bi buu gbɔgɔ ú̵ máa, ví sɛ́n né, ví ma nán Tayɨɨ woo ka kɔ́ hȩn hí̧í̧lí̧ Tayɨɨ woo yȩ, ví hí̧í̧ Pilád a vud nán nɔm nɔɔné yȩ pú̵ bi wu̵ yu̵. 15Gbanaa vágád máa, ví nɔɔ wu̵ yu̵. A̧máa Tayɨɨ nimmɔ sı̵́ nɔmmé ú̵. Ɨ́ vóó máa, vɔ́ nán ya̧g du̵lı̵́ woo vu̵ yu̵. 16Ví ho̧ nán kpee yȩ gaa á̧ḿ, ma yɛ́g Yesu woo pú̵gu̵ néélȩ́ fó̧lȩ́, moo ká 'yɛ́ zó̧ó̧ woo Yesu woolı̵́ má nɔ. Nán yȩ ká 'yɛ́ zó̧ó̧ Yesu woolı̵́, zó̧ó̧ 'yɛ́lı̵́ woo yȩ wu̵ kɔ́, ma ho̧o̧ ka̧"o̧ zu̵u̵ nɔ́ɔ́ víílí yɔ.”

17Piɛ́r duu o̧: “Nán Izraɛ́l vu̵, 'ya̧'a̧ yɛ máa mí gaa ká kíí kɔ́ hȩn yȩ kan gbanaa víí vu̵ á̧ḿ máa, ví gaa né. 18A̧máa Tayɨɨ kɔ́ hȩn woo dɔ́ sé' woolı̵́ sú̵'ú̵ kɔ́ ı̵́ ká pa moo ya̧g anábi voolı̵́ 'waapád máa wɔgɔ, o̧ ı̵́ nán sənné ba ii ba' ya máa, ba wú̵ń nuŋ hȩn ndɔ́gɔné nɔm pȩ́ń. 19I gbɔ mbaalı̵́ see víí vu̵ la, i tii ya Tayɨɨ woolı̵́, moo a na'ad hȩn ɓı̵́d kɔ́lı̵́ víí vu̵ gbɔ la, 20tée ı̵́ 'yɛ́lı̵́ Tayɨɨ wú̵ń kɔ́ bá' nəəlȩ́ wú̵ń yaa, wú̵ń ba'ad ví ı̵́ nán sənné woo ka yeed ví tíŋ́ yȩ, wu̵ Yesu wu̵. 21'Ya̧'a̧ yɛ máa, séý Yesu Krístu wú̵ń mbaa be"ı̵́ há̧á̧ a ya̧ bá' hȩn 'waapád a duu mbɔ́gɔy nag 'maŋná kɔ́ ı̵́ Tayɨɨ ká moo gbó̧ŋ́ na'a ya̧g anábi woo voolı̵́ máa wɔgɔ pȩ́ń. 22Múúsa ká o̧ woo: ‘Ɨ́ 'yɛ́lı̵́ víí Tayɨɨ wú̵ń ba'ad ví anábi tóó kɔ́ ı̵́ mí wɔgɔ sa̧a̧m dey sá̧ŋ́ voolı̵́. Tée i ki hȩn a o̧d ví máa 'waapád. 23Nánán ı̵́ u̵u̵ sɛ́n moo woo kilí ní tée, vú̵ń tud vu̵ zig Tayɨɨ woolı̵́ 'waapád.’ ”

24Piɛ́r duu o̧ tóó: “Anábi tóó vu̵ 'waapád dəŋ Samɛ́l woolı̵́ vu̵ baa moo moo yúú zá̧ga̧ yȩ voolı̵́ á̧ḿ. 25Ɨ́ víí máa, ví zig anábi voo nɔ. Ya̧g talı̵́ Tayɨɨ ka tad a ví yée vu̵ máa, tad víw. Ká o̧d Ibrahí̧í̧ma: ‘Míń bag zig nán hágá yȩ vu̵ hȩn 'waapád moo zig móó woo nɔ.’ 26Moo woo nɔ, Tayɨɨ mbɔ́g nán ba'ad woo dəŋ ba' ya víílí, moo a bag ví hȩn há̧á̧ i kéé ba'ad ɓı̵́d víí vu̵ gbɔ ú̵.”

Currently Selected:

Debtere ba'ad waa ba'ad voo nɔ 3: DIINT

Highlight

Copy