Debtere ba'ad waa ba'ad voo nɔ 22

1“Dag sá̧ŋ́ vu̵, ba'á vu̵, i ki sı̵́nná! Mí o̧d ví la moo waaná'. I gbɔ mí sɔ do̧do̧o̧ míí pȩ́ń.”

2Sey dúú ku̵u̵ ki ka dɨd vu̵ moo o̧lȩ́ kan ya̧g eebərə́ə máa, vu̵ mbaa simná du̵u̵lı̵́ na'a, ma Pól duu o̧d vu̵: 3“Mí nán Yúúdaɨ. Vu̵ ha̧a̧n kaa Társəlı̵́, hág Silisíilí, a̧máa mí na' Yerúsalemmé yɛlı̵́. Akaw míí wu̵ Gamaliɛ́llu̵, wu̵ tú'un debtere a ba ví yée voo du̵u̵lı̵́ na'a á̧ḿ. Ká mí duu Tayɨɨ kan zó̧ó̧ míí 'waapád kɔ́ ı̵́ ya víí 'waapád kíí dɨ kɔ́lı̵́ zá̧ga̧ ɓəə yɛ wɔgɔ á̧ḿ. 4Mí duun nán ku̵u̵ duu Yesu máa vu̵ kan moo, há̧á̧ bi nɔɔ vu̵ ú̵. Mí má'a wayée vu̵ kan wakȩ́ȩ́ vu̵ dɔd lig púúsinalȩ́. 5Ɨ́ nii hȩn ha"ı̵́ kan ı̵́ nii moo sə̧"ȩ́ vu̵ 'waapád vú̵ń du̵n ya̧g ba mín o̧ moo yȩ́ńne. Ká mí nuŋ ɗerwəl voolı̵́ nagá á̧ḿ, vu̵ ba'ada ı̵́ nii Yúúda vu̵ kaa Damásdı̵́. Ká mí laa kaa Damás sú̵u̵lı̵́ moo bi la má'a nán kirtȩ́n vu̵ wu̵lı̵́ dɔgɔn Yerúsalemmé, moo u̵u̵ si̧'i̧d vu̵ wu̵lı̵́.

Pól pá'ad nán Yúúda vu̵ hȩn ka tiiwu̵ zó̧ó̧ máa

(Debtere ba'ad waa ba'ad voo nɔ 9:1-19; 26:12-18)

6“A̧máa káń dɨ laalı̵́ hi̧naalȩ́ máa, zá̧ga̧ sa̧a̧mé, mí séé la bə́' dáŋ́ kaa Damásdı̵́. Ma zag zaa pɛ́lı̵́, túlí tóó zu̵u̵ be"ı̵́ za̧y, tú gbɔ kan mí daa. 7Mí wá̧á̧ zu̵u̵ hágá, mí ki yɛ́g tóó vin: ‘Sól, Sól, moo ȩn mɔ́ duun mí kan moolá?’ 8Mí vigi: ‘Ɨ́ 'yɛ́lı̵́ míí, ví nɔ́nná?’ Ma duu o̧n: ‘Mí Yesu nán Naazaréddú̵, mɔ́ duun míw kan moo yȩ nɔ.’ 9Nán ku̵u̵ laa kan mí yȩ, vu̵ ho̧ ya túlí yȩ, a̧máa vu̵ kin yɛ́g nán ka o̧n mí moo yȩ woo né. 10Ma mí vigi: ‘Yee tée míń kɔ́ nɛ́nná, ı̵́ 'yɛ́lı̵́ míí?’ Ɨ́ 'yɛ́lı̵́ o̧n: ‘A̧m lúú dɔg, mɔ́ dɔ́ la kaa Damásdı̵́, tée vú̵ń la o̧m hȩn Tayɨɨ ka hí̧í̧ a̧m kɔ́ máa wu̵lı̵́.’ 11Ya túlí yȩ ka sáan nɔ́lȩ́ máa, mí ho̧n sı̵́ nɔ́ɔ́ né. Ma dan 'yȩ́m pee vu̵ teen dɔ́nna kaa Damásdı̵́.

12“Nán tóó ká du̵u̵lı̵́, yéé woo Ananía. Baa duu moo Tayɨɨ woo á̧ḿ. Nán Yúúda kaa Damásdı̵́ vu̵ 'waapád vu̵ gaa ba nán to̧o̧ȩ. 13Ananía sú̵u̵ ya maan, dii dáŋ́ míílí̧, o̧n: ‘Dan sá̧ŋ́ Sól, a̧m duu ho̧ nɔ́ɔ́ la ú̵.’ Ma mí ho̧ zu̵u̵ nɔ́ɔ́ ya̧g woolı̵́. Mí tə́ggu̵, 14ma duu o̧n: ‘Tayɨɨ a ba ví yée voo, wu̵ yeem moo a̧m gaa hȩn hí̧í̧lí̧ bii, a̧m ho̧ ı̵́ ba ka kɔ́ hȩn hí̧í̧lí̧ bii yɛ, a̧m ki moo ka moo kan ya̧g woo yȩ á̧ḿ, 15moo mɔ́ń mbaa nán ya̧g du̵lı̵́ woo, mɔ́ń o̧d nán vu̵ 'waapád hȩn káḿ ho̧, káḿ ki yɛ vu̵. 16Mɔ́ duu laa ȩn 'ya̧'a̧ yɛlá? A̧m lúú dɔg, mɔ́ ɓá' Yesu, mɔ́ woo mam Tayɨɨ, tée Tayɨɨ wú̵ń tɛ hȩn ɓı̵́d móó vu̵ ú̵.’

Pól duu pá'ad nán Yúúda vu̵ hȩn Tayɨɨ ka ba"u̵ nán ı̵́ ku̵u̵ Yúúda pɛ́lı̵́ máa voolı̵́ á̧ḿ

17“Mí vȩ́' ya Yerúsalemmé. Bá' tóólı̵́ káń dɨd Tayɨɨ moo o̧lȩ́ lig hȩn ha"ı̵́lı̵́ máa, mí ho̧ hȩn sa̧ga̧, 18mí ho̧ ı̵́ 'yɛ́lı̵́ o̧n: ‘A̧m ha fó̧ó̧ lúú Yerúsalemmé vaŋná, moo nán kaa yɛ vú̵ń fȩȩn moo míí káḿ dɨn vu̵ o̧lȩ́ yɛ né.’ 19Ma mí hí̧i̧du̵: ‘Ɨ́ 'yɛ́lı̵́ míí, aga vu̵ gaa ká ba mín laa lig sú̵ggı̵́ nán Yúúda voolı̵́, ba mín má'a nán ı̵́ ku̵u̵ duum wu̵lı̵́ máa vu̵, ba mín tú̵' vu̵ lig púúsinalȩ́, ba mín gbɔ́ tóó vu̵ kan loo á̧ḿ. 20Sey ku̵u̵ nɔɔ Itȩ́n, ı̵́ ya̧g du̵lı̵́ móó yȩ máa, mí du̵u̵lı̵́ á̧ḿ. Mí hí̧í̧ moo maa nán ku̵u̵ nɔɔ Itȩ́n yȩ vu̵; míi tu̵d vu̵ sa̧a̧m voo vu̵ á̧ḿ.’ 21A̧máa ı̵́ 'yɛ́lı̵́ duu o̧n: ‘A̧m laa la ú̵. Míń ba'am la ya ɗiilílí, nán ku̵u̵ Yúúda pɛ́lı̵́ máa voolı̵́.’ ”

Pól vu̵ kan kolonɛ́llú̵

22Dúú vu̵ mbaa simná, vu̵ ki moo moolȩ́ Pól woo há̧á̧ la ya̧ sey ka za' moo yȩ; ma vu̵ dəŋ móó dɔg moo yúba, vu̵ o̧: “A̧m nɔɔ nán yȩ la ú̵; maan mbaalı̵́ zá̧a̧d né.”

23Vu̵ wá̧á̧ wa̧ya̧g, vu̵ yaga sa̧a̧m voo vu̵, vu̵ sa' hád zu̵m hu̵u̵ dɔg be"ı̵́ á̧ḿ. 24Ma kolonɛ́l o̧d só̧ó̧ze u̵u̵ pa̧ŋ Pól dɔgɔn lig go̧ŋŋı̵́, ba u̵u̵ gbɔ́gɔ kan loo, ba a o̧ hȩn ba ka kɔ́ pȩ́ń, dúú ba ku̵u̵ dáb moo yúú woolı̵́ na'a yȩ, bi ki pȩ́ń.

25Sey ku̵u̵ taga kan zaŋ moo gbɔ́lı̵́ woo máa, Pól vi ı̵́ nii só̧ó̧ze tóó ka mbaa wu̵lı̵́ máa: “Dooká o̧d ba ví ba i gbɔ́ nán Róma tóó té', u̵u̵ sə̧'ə̧n moo yúú woolı̵́ né si̧"a̧a̧?”

26Sey ı̵́ nii só̧ó̧ze pee ka ki la moo yȩ ná' máa, la o̧d kolonɛ́l: “Ví dɨ sı̵́ moo soolı̵́ ú̵. Nán pee, nán Rómaɨ.”

27Ma kolonɛ́l ya vi Pól: “Mɔ́ nán Rómaa? A̧m o̧n ya ú̵.”

Pól hí̧i̧du̵: “Ee.”

28Ma kolonɛ́l o̧ddu̵: “Ɨ́ míí, mí sú̵ú̵ sɨɨde ɓu̵u̵lı̵́ na'a, ma mí tii nán Róma yɔ.”

Pól duu hí̧i̧du̵: “Ɨ́ míí, mí waa Rómaɨ kəd.”

29Ma nán vu̵n bi gbɔ́gɔ ú̵ pee, vu̵ lúú gbɔgɔ vaŋná, vu̵ daa la mbaa ka'adı̵́. Dú̵ú̵ kɔ́ kolonɛ́l pee á̧ḿ, moo ku̵u̵ ga' Pól kan ɗág, ma ku̵u̵ ya gaa ba waa hág Rómaɨ má nɔ.

Pól dɨ ı̵́ nii moo sə̧"ȩ́ voolı̵́ tíŋ́

30Kolonɛ́l pee hí̧í̧ bi gaa hȩn ku̵u̵ doo Pól wu̵lı̵́ yȩ pȩ́ń. Moo woo nɔ ya̧g ka̧'a̧m woo máa, o̧d gbanaa hȩn ha"ı̵́ vu̵ kan ı̵́ nii moo sə̧"ȩ́ vu̵ 'waapád u̵u̵ sú̵ggú̵. O̧d só̧ó̧ze vu̵ u̵u̵ ɗa' Pól vud ɗággı̵́ la ú̵. Ma vu̵ la pa̧ŋ Pól ya 'yɛ́d ı̵́ nii vu̵ tíŋ́.

Currently Selected:

Debtere ba'ad waa ba'ad voo nɔ 22: DIINT

Highlight

Copy