1 Nán Koríńti vu̵ Moo dənée
Moo dənée
Sey Pól ka lúú gáá do' idú woo máa, la səə kaa gbaŋ Koríńtilí hág Gɛrɛ́ggı̵́ ve' dágá kan sȩȩ gúú. Nán sú̵ggı̵́ ká la mbɔ́g vu̵ wu̵lı̵́ yȩ, ká vu̵ nán gaa Tayɨɨ sá vu̵ yu̵; vu̵ nán naa vu̵ yu̵ pɛ́lı̵́ á̧ḿ.
Nán Koríńti ká vu̵ dɨ kan zó̧ó̧ dȩ"ȩ́ gbo̧o̧ gba'a, moo ká vu̵ dɨ kan ya nɛ́ŋ́ ɗaané idú ya̧g mam gbo̧o̧lȩ́. Nán vu̵ baa nuŋ hȩn lum voo vu̵ wu̵lı̵́ ɓu̵u̵lı̵́ na'a. Mbaalı̵́ voo du̵u̵ la wu̵lı̵́. Nánán hȩn gaalı̵́ vu̵ yá̧á̧n wu̵lı̵́ ɓu̵u̵lı̵́ na'a kan nán ku̵u̵ duu tayɨɨ vu̵ kə́dkə́d máa vu̵ á̧ḿ. A̧máa nánán vu̵ kɔ́ ɓáa wu̵lı̵́ mbaa ná'. Nán sú̵ggı̵́ ku̵u̵ mbaa wu̵lı̵́ yȩ, vu̵ dəŋŋá Yesu duulí yɔ, vu̵ nuŋ hȩn zo"ı̵́ vu̵ wu̵lı̵́ kə́dkə́d. Moo woo nɔ Pól gbɔ́ dam yúú voolı̵́ ɓu̵u̵lı̵́ na'a.
Pig Pól ka lúú sı̵́ kaa voolı̵́ ú̵ máa, ki hȩn zó̧ó̧ tó̧"ȩ́ yúú voolı̵́ ɓu̵u̵lı̵́ na'a. Ma Pól bíńda nán sú̵ggı̵́ pee vu̵ ɗerwəl ndaddú̵, ı̵́ tóó idú máa, ká vu̵ dɨ moo to̧o̧ 'maŋŋı̵́. Ɨ́ tóó idú yȩ Pól ká bíńda yúú voolı̵́ debtere 1 Nán Koríńti vu̵lı̵́ 5:9-13 kan 2 Nán Koríńti vu̵ 2:3 kan 7:8. Ɗerwəl ı̵́ idú kaa 'yɛ́ vu̵ ví yȩ, ká bíńda vu̵ sey gáá lúúlí woo do' ta̧a̧nɔ́ woo máalȩ́. Dágá máa bíńda diga kaa Ɛfɛ́ɛzlı̵́ (i ho̧ 1 Nán Koríńti vu̵ 16:8); idú woo yȩ, tóó tée bíńdawu̵ diga kaa Ɛfɛ́ɛzlı̵́ á̧ḿ, tóó tée hág Masedo̧wá̧nné.
Ɗerwəl Pól woo ka dəŋ bíńda pú̵ nán Koríńti vu̵ máa, vá' hȩn, dȩn Tayɨɨ nag wu̵lı̵́ á̧ḿ (1:1-9); ma Pól o̧d ı̵́ ka bíńda vu̵ ɗerwəl yȩ ba u̵u̵ mba hȩn zo"ı̵́ vu̵ yúú hı̵́'ɨné voolı̵́ sa̧a̧mé ú̵ (1:10—4:21); ba u̵u̵ nɛŋ nán ka éé kȩ́ȩ́ ba"oo woo máa vud ya sú̵ggı̵́ voolı̵́ (sapíitər 5); ba u̵u̵ vúd ya moo sə̧"ȩ́ nán gaa Tayɨɨ sá yȩ voolı̵́ ú̵ á̧ḿ (6:1-11); ba u̵u̵ kɔ́ ba'ad née kan fó̧ó̧ voo á̧ḿmá (6:12-20). Pig woolı̵́ máa Pól hí̧i̧d nán woo vu̵ ya̧g yúú moo vílí voo yȩ vu̵lı̵́:
—kȩ́ȩ́ éélı̵́ (sapíitər 7);
—pú̵g ı̵́ ku̵u̵ ha' vu̵ gbaalı̵́ máa, u̵u̵ lá vu̵ sá; u̵u̵ duu tayɨɨ lee vu̵ sá á̧ḿ (8:1—11:1);
—sú̵ggı̵́ nán kirtȩ́n voo kan hȩn lálı̵́ ı̵́ 'yɛ́lı̵́ woo (11:2-34);
—hȩn pú̵lı̵́ yigid Tayɨɨ woo ka pú̵ máa (sapíitər 12 kan 13 kan 14);
—nímní nánán voo nɔmmé (sapíitər 15).
Pól 'waa ɗerwəl woo kan moo 'maŋ tóó vu̵ (o̧d vu̵ moo yúú hȩn tóó ku̵u̵ dɨ pú̵lı̵́ yȩlȩ́, duu o̧d vu̵ hȩn ka hí̧í̧ bi kɔ́ máa vu̵ á̧ḿ); 'waa ɗerwəl woo kan hȩn vá"ı̵́ dáń woo vu̵ á̧ḿ (sapíitər 16).
Hȩn təəlı̵́ máa yȩ vu̵ 'waapád, waa ba'ad Pól moo moo vu̵ duu kan hi̧naa woo wu̵lı̵́. Pól tú' mbaalı̵́ nán yȩ́ń voo yúú zó̧ó̧ 'yɛ́lı̵́ Krístu woolı̵́, tú'ud vu̵ u̵u̵ mba hȩn təəlı̵́ vu̵ kan kɛb tóó nɔ. O̧ moo zó̧ó̧ nán kɔ́lı̵́ voolı̵́ sa̧a̧mé máa, ba wu̵ du̵u̵ mba hȩn (sapíitər 13).
Currently Selected:
1 Nán Koríńti vu̵ Moo dənée: DIINT
Highlight
Share
Copy
Want to have your highlights saved across all your devices? Sign up or sign in
Nouveau Testament en Dii © Bible Society of Cameroon, 2001.