YouVersion Logo
Search Icon

Marcos 7

7
Ca ishipaxanaqchit da nachaalataxac ca shiÿaxaua
(Mateo 15.1-20)
1Nachi nqochineu'a so Jesús na fariseopi, qataq huo'o na dapaxaguenataxaatapeguec na nqataxacpi mayi chigaqa'a yi Jerusalén. 2Se'eso ÿallippi ÿauaachigui co'ollaxa da huo'oi soua lapaxaguenataqa so Jesús da nshipaxa'n naua lhua'q co'ollaq deque'e'. Qaq damayi naigui da sa ishit da qaipaguelec da 'onataxac da qaiÿoi' naua nhua'q, qaq ÿoqo'oyi qanayictapeguelguete soomayi. 3(Cha'ayi na fariseopi qataq 'enauac na laÿi judiopi, namayipi quetague' da n'onataxac so hua'au lta'alpi da sa ishit da deque'e da huo'otaq saxanaxa da iÿoi' naua lhua'q, qaq ÿi'iguelaqtalec da nÿoxoc. 4Da huo'otaq chigaqa'a ca menqa', qalaq sa ishit da nachi deque'e da huo'otaq saxanaxa da i'ot da n'onataxac da iÿoi' naua lhua'q. Qataq huo'o na laÿipi 'onataxac mayi ÿaconguet da quegue: da n'onataxac da qaiÿo ana ÿomaxaqui, qataq ana naco'oña, qataq ana nataxagui, qataq na mala'.)
5Nachi se'eso fariseopi qataq nam dapaxaguenataxaatapeguec na nqataxacpi inattac somayi, 'eeta':
–¿Tá'ainco' naua 'adapaxaguenataqa yi sa ishit da queguelo da n'onataxac som hua'au qadta'alpi? Nda'a't da nshipaxa'n naxa naua lhua'q da deque'e'.
6Nachi so Jesús 'enapeco':
–Ÿataqta qami' tachiguilo naua l'aqtaqa so l'aqtaxanaxanec ñi Dios, l'enaxat Isaías, co'ollaq qami' i'axata'alo, qami' mayi qoñiitega da qami' llalqa ñi Dios, co'ollaq somayi ÿiyiñi da 'eeta':
Ne'ena shiÿaxauapi da aÿim ÿi'oxoden,
qalaq ndoteec na alap,
qalaxayi da lquiyaqteÿaxac ÿataqta qaÿoqta naq'en aÿim.
7Ÿataqta qaica ca naigui da aÿim ÿi'oxodeetac,
cha'ayi nam lapaxaguenataxanaxacpi maichi lqataxac na shiÿaxauapi.
8Cha'ayi qami' qaualachi' naua lqataxaco ñi Dios, nachi qoquiiguelo naua n'onataxaco na shiÿaxauapi: qoquiigue da 'onataxac da qaiÿo ana naco'oña, qataq ana ÿomaxaqui, qataq qalota na laÿipi mayi qau'ochi.
9Qaltaq jec da l'aqtac 'eeta':
–Qaq da qami' maichi qoquiiguelo naua qan'onataxacolli', nachi ÿataqta qaualachi' naua lqataxaco ñi Dios. 10Cha'ayi so Moisés co'ollaxa 'eeta': “Ÿataqta huo'o naq 'enec 'anqa'en ca 'adta'a qataq aca 'adate'e,” qaq “Ca ishiuen ca lta'a huo'otaq aca late'e, nachi camayi qaÿalauat.” 11Qalaxayi qami' qoñiÿapec yi ca shiÿaxaua ishit da 'enapega ca lta'a huo'otaq aca late'e da 'eeta': “Sa ishit da 'am setauan, cha'ayi 'enauac na aÿim hueto'ot qoÿinac corbán” (damayi naigui da mashi qoÿanot ñi Dios). 12Qaq da qoñiÿapec de'eda, nachi qami' 'eeta'am da sa qauashiñiim camayi da itauan ca lta'a qataq aca late'e. 13Qaq 'eda da 'eetec da qami' sa ishit da huo'o ca qai'añiÿaigui na lqataxacpi ñi Dios, souaxat da qoquiigue na 'onataxacpi mayi quetagui da qoñiita. Qataq qalota na laÿi qau'ochiitac mayi 'eeta'am ne'enapi.
14So Jesús qaltaq iÿaxanoigui so shiÿaxauapi. Nachi 'enapega, 'eeta':
–Aÿim qan'axaÿaxañiÿa qome 'enauac da qoñiita, qataq qauaÿajñiiteguet da shinapec, 'eeta': 15'Enauac nam aloq ca shiÿaxaua da deque'e qaica da huo'o ca 'oonolec da ishit da ishipaxanaqchit da nachaalataxac. Chaqnata nam chigaqaigui añi lquiyaqte mayi ishit da ishipaxanaqchit camayi. 16Qaq qami' mayi qauaÿajñi da qan'axaÿaxanaxaqui, no'on da qan'axaÿaxañiichiguiñi.
17Qaq so Jesús co'ollaq ca'ai so shiÿaxauapi, nachi pa'aigui so noÿic, nachi soua lapaxaguenataqa inatta'pe somayi ca naigui de'eda daloqnaxaatega. 18Nachi somayi 'enapeco':
–¿Qachi ivido'o' da qoñiita da sa qauaÿajñi de'eda? ¿Peta'a sa qauaÿajñiÿo' da 'enauac nam chic ca shiÿaxaua da sa ishit da huo'o ca ishit da ishipaxanaqchit da nachaalataxac? 19Cha'ayi namayipi sa ishit da inoxoneu'a añi lquiyaqte. Chaqdata da tangui añi da'am. Ime, qaq inoxoneec.
Qaq 'eda da 'enapec so Jesús co'ollaq i'axattac da 'enauac na nallicpi qui'itta. 20Nataq'en 'enapeco':
–Ca chigaqaigui añi lquiyaqte ca shiÿaxaua mayi nachica ca ishipaxanaqchit da nachaalataxac. 21Cha'ayi añim lquiyaqte ca shiÿaxaua mayi nachañi añi chigaqaigui na qauem lhuennataxapi, da huotaique ncachitapegue' aca sa lhua, qataq da quishishaxac, nalaataxanaxac, 22qataq da ncachaxac, qanqopitta'a ca ÿaqa'a, qataq na qauemsat, natenataxanaxac, nqopitaxanaqtaic, nquiÿaxanaqtaic, qai'axat ca saq 'en, 'amqajnaxac, sa daÿajnataxan. 23Qaq 'enauac ne'ena qauemsat, namayi chigaqaigui ca shiÿaxaua, qaq nachina na ishit da ishipaxanaqchit da nachaalataxac.
Aso chigaqhuec 'alo i'amaqten so Jesús
(Mateo 15.21-28)
24Nachi so Jesús ca'ai ca hueta'a, nachi taÿa yi 'alhua Tiro qataq yi Sidón. Nachi co'ollaq taigui ca noÿic, nachi nshitaique da sa ishit da huo'o ca noma somayi, qalaxayi sa ÿañoxot da nqañoxojñi. 25Qaq saqaÿaloq da huo'o aso 'alo ÿaÿaten so Jesús. Asomayi late'e aso qa'añole mayi huo'o so l'ec leguemaxaic. Qaq asomayi anaÿa so Jesús, nachi i'adoto naua l-llicte. 26Qaq asa'aso 'alo chigaqhuec, asomayi chigaqaigui na Sirofenicia l'ecpi. Qaq asomayi anac da iÿaxanot so Jesús, da yaqto' i'odauec so l'ec leguemaxaic aso llale. 27Qalaxayi so Jesús 'enapego' asomayi, 'eeta':
–Ña 'au'axaÿa'a nam ÿoqta ñalaqpi da hua'auñi deque'e, cha'ayi sa ÿaÿamaxañi da qaiuotaxanec ca aloq namayipi, nachi qoÿami' na pioxotpi.
28Nachi asomayi 'enapeco':
–'Eesa da qonapec, 'am ÿataxala', qalaxayi ivida'a nam pioxotpi mayi hueto'ot na pa'aguiñi ca nqui'axala', namayi chicta'aguet na najñi aloq lsochi cam ñalaqpi.
29Nachi so Jesús 'enapego' asomayi, 'eeta':
–Ÿataqta ÿaÿamaqchiguiñi da qonapec. Qaq nagui no'on da 'avi'iguelaq, cha'ayi som n'ec leguemaxaic mashi ca'ai aca 'ai'ale.
30Nachi asomayi co'ollaq ivita ca lma', nachi asomayi ilalec aso llale da huetalec so lmala', qaq som l'ec leguemaxaic mashi ca'ai asomayi.
So Jesús nataden so sa hua'aqa qataq n'apdapeguec naua l'aqtaqa
31Nachi so Jesús qaltaq ca'ai yi 'alhua Tiro, nachi tajlec yi Sidón qataq nam pueblopi yim 'alhua Decápolis, chochi ivittaxaama aso lapel mayi huaña yi Galilea. 32Qaq huaña yimayi, nachi qanauegueu'a so ÿale mayi sa hua'aqa qataq n'apdapeguec naua l'aqtaqa. Nachi qaiÿaxanot somayi da yaqto' ÿashil-lec somayi. 33Qaq so Jesús nachi iÿotauga somayi, ca'ai naq'en so shiÿaxauapi, nachi ÿashileu'oguelo naua ltelalauaco qataq nqaigoxoguelo naua llaxaata. Nachi ipoteu'a na lachaxat. 34Ime, nachi ÿamato'ot na piguem, nachi ñaxaayishigue'm naua l'a'chi, nachi 'enapego' somayi, 'eeta':
–¡Efata! (Damayi naigui da 'eeta': ¡Nauatreec qome naua ntelalauaco!)
35Huaña, nachi ishit da hua'aqa se'eso ÿale, qataq ÿaÿamaxañi na lachaxat, nachi ishit da detaqa. 36Nachi so Jesús huaqattapeguelec da sa ishit da qai'axat de'eda. Qaq co'ollaq nquigaxatteec de'eda lqataxac, qalaq nachi 'en'am ÿataqta qanquigaxatteec da qai'axattac de'eda. 37Nachi ÿataqta lta'adaic da n'aalaxa, nachi qoÿiita':
–Ÿataqta ÿaÿamaqchiguiñi 'enauac na i'ot, cha'ayi ivida'a da hua'aqa naq'en na da'añaigui na lqaic, qataq na qaicaua naua l'aqtaqa.

Currently Selected:

Marcos 7: TBSNT

Highlight

Share

Copy

None

Want to have your highlights saved across all your devices? Sign up or sign in