Marcos 12

Qaÿaloqnaxana so 'onataxanaxaicpi qauemaicpi

(Mateo 21.33-46; Lucas 20.9-19)

1Nachi so Jesús ÿauota'a so laloqnaxanaxat da da'aqtaxanem so shiÿaxauapi, 'eeta':

–Huo'o so shiÿaxaua ÿaañi aso languishi uvas. Ime, nachi npaxateu'a, qataq i'ot aso laÿi' da qanlom na lli'i, qataq i'ot aso nalloxolate da yaqto' ishit da qaÿallitalec 'enauac asomayi.

Qaq co'ollaq ime, nachi huo'o so i'aalaxanaxanec 'onataxanaxaicpi se'eso n'alhua. Nachi somayi jec, qaÿoqta ca taÿa. 2Qaq co'ollaq ivita so laloqo' da qanqat ana nanguishi, nachi somayi namaq so lamaxashic, da yaqto' iÿaxanot se'eso 'onataxanaxaicpi, da icolaxateuga acam talec somayi qanqoÿin. 3Qalaxayi se'eso 'onataxanaxaicpi ÿaconeu'a somayi, nachi iuaxaatac, nachi qaÿi'iguelaxat, qaica ca qoÿami'. 4Nachi se'eso lalamaxat so 'alhua qaltaq ÿauo'o so lÿa ÿamaq, qalaxayi somayi nataq'en qaÿasaqtalec na coma', qaicolaxat na lqaic, qataq qaishiueetac. 5Nachi se'eso lalamaxat so 'alhua qaltaq ÿamaq so lÿa lamaxashic, qalaxayi somayi qaÿalauat. Qaq co'ollaq ime, nachi qaltaq qalota na ÿamaq lamaxashicpi, qalaxayi huo'o na qaiuaxaatac namayipi, qataq huo'o na qaÿalauat.

6Qaq somayi ñaq huo'o so maichi lalamaxat llalec, ÿataqta lauotaxat. Nachi somayi ipa'axaateec da ÿamaq, cha'ayi 'enapeco': “Ÿoqta qome da qaÿoqochi'iguet ñi ÿalec.” 7Qalaxayi som 'onataxanaxaicpi 'enapeco': “'Ena cha'aguet nam qaÿauotaique da talec qome qanqoÿin na 'alhua. Namayi salauataq, yaqto' qomi' talguete ne'ena 'alhua da qadalamaxat.” 8Nachi qaÿaconeu'a somayi, nachi qaÿalauat. Ime, qaq qaÿasaxaueegue da laÿi so 'alhua.

9Nachi so Jesús denataxan, 'eeta':

–Qaq ¿chaq huá'ague qome ca 'eetec som lalamaxat se'eso 'alhua? Qomyi somayi anac, nachi ÿalauat se'eso 'onataxanaxaicpi, nachi se'eso n'alhua i'aalaxanaxanec so laÿipi 'onataxanaxaicpi.

10¿Qami' peta'a sa ishito' da qautaxaÿaxañiÿa'pe naua nanettrañi l'aqtaqa ñi Dios? Mayi 'eeta':

Som coma' mayi i'otan nam noÿic l'opi,

nachiso nagui som nllañi qanqoÿin ca noÿic.

11Qaq damayi chigoqchigui da i'ot ñi qadataxala'.

Qaq damayi ÿataqta qaica ca 'en'am ñaqshinaq da lli'oxoyic.

12Nachi namayipi ÿauotaique da icoñi' so Jesús, cha'ayi ÿaÿaten da somayi i'ot de'eda daloqnaxana da tachigui naq'en namayipi. Qalaxayi namayipi ÿataqta ñi'iÿa'aguet na shiÿaxauapi. Nachi qaÿauaqta'a somayi, nachi qanayica'ai.

Qainataxaatapeguec da nshiitenaguec ca nta'a

(Mateo 22.15-22; Lucas 20.20-26)

13Qaq co'ollaq ime, nachi huo'o na qanamaxa so Jesús nam quetague'pi na fariseopi qataq nam quetague'pi so Herodes, da qaÿauotaique da qaisomaxanaqchit ca l'aqtac somayi, nachi ishit da qaÿachigoxotchigui qanqoÿin ca lasouaxashit. 14Nachi somayipi anac, nachi qainat somayi, qoÿiita':

–'Am mayi 'auapaxaguenataxaatac, qomi' saÿajnaq da naua 'ad'aqtaqa ÿataqta 'eesoda, qataq sa ishit da 'auqochitega cam 'enapec na shiÿaxauapi, cha'ayi sa ishit da 'aulotapigui ca yi'oqchigui lataxac na shiÿaxauapi, chaqdata da 'auapaxaguenataxaatapeguec ca llic da no'on nataxac mayi ÿaÿamaxadeeta ñi Dios. Qaq ¿peta'a ÿaÿamaqchiguiñi da qaishiiten ñim lta'a nam nta'alpi, loqo' chaq sa ishit? ¿Seshiitenaq, qalqo' sa ishit?

15Qalaxayi so Jesús ÿauattooteguet dam lli'iguenataxanaxac somayipi. Nachi 'enapega, 'eeta':

–¿Tá'ainco' yi aÿim qavi'iguiñiitac? Ñaq aÿim qandoÿa aca 'oonole lcatole, da yaqto' semeten.

16Nachi qanda'a aso 'oonole. Qaq co'ollaq ilolec, nachi denataxan, 'eeta':

–¿Négue't ca lashic yi'iyi huetalec ana'ana, qataq yim n'enaxat mayi nanettalec?

Nachi somayipi 'enapeco':

–Qomyi nachiñi ñim lta'a na nta'alpi.

17Nachi so Jesús 'enapeco' somayipi, 'eeta':

–Qai'añiim qome ñim lta'a na nta'alpi cam maichi lalamaxat, qataq ñim Dios qai'añiim ca maichi lalamaxat.

Nachi somayipi ÿataqta i'aalac da l'aqtac somayi.

Qainataxaatapeguec ca lataxac da qaltaq nca'aleec ca shiÿaxaua

(Mateo 22.23-33; Lucas 20.27-40)

18Nachi qaltaq huo'o na anaÿa so Jesús nam saduceopi. Qaq namayipi 'eetega da sa ishit qome da qaltaq qanca'alaxateec na leuaxaicpi. Nachi inattac somayi, 'eeta':

19–'Am mayi 'auapaxaguenataxaatac, so Moisés ÿiyiñi co'ollaxa da huo'otaq ileu ca shiÿaxaua, qaq no'oichigui aca lhua, qalaxayi qaica ca llalec, nachi ca lqaÿa n'asa huadonguet acamayi, da yaqto' huo'o naq'en ca llalec som lqaÿa mayi saqca. 20Qaq huo'o so siete nqaÿañicpi. Som ÿi somayipi huadon, qalaxayi somayi ileu, qataq qaica ca llalec. 21Nachi som lqaÿa mayi lpa'axaua, somayi huadonguet aso lli'oxoua. Qalaxayi somayi nataq'en ileu, qataq qaica ca llalec. Ime, qataq jec so lÿa lqaÿa, qalaxayi nachi 'en'am. 22Qaq 'enauac se'eso siete nqaÿañicpi huadonguet asomayi, qalaxayi sa ishit da huo'o ca llalec ñi 'oonolec. Qaq pa'ateec da ileu aso 'alo. 23Qaq qom ivita ca laloqo' da qaltaq qanca'alaxateec na leuaxaicpi, qaq ¿chaq négue't ca ÿoqta lhua asa'aso 'alo, cha'ayi 'enauac se'eso siete nqaÿañicpi huadonguet asomayi?

24Nachi so Jesús 'enapeco':

–Qami' qausomiÿapec, cha'ayi sa ishit da qauaÿajñi' naua ñiyigui'shi l'aqtaqa ñi Dios qataq da l'añaxac ñimayi. 25Cha'ayi qom ivita da qaltaq qanca'alaxateec na leuaxaicpi, nachi sa ishit da huo'o ca huadon qataq sa ishit da huo'o ca ÿadonaxanaxan aca llale, cha'ayi namayipi 'eeta'am da lataxac na namaxashicpi mayi hueta'ague da piguem. 26Qaq de'eda lataxac da qaltaq qanca'alaxateec na leuaxaicpi, qalaq ¿sa ishito' peta'a da qautaxaÿaxañiÿa'pe naua lliyigui'shi l'aqtaqa so Moisés, da 'eetec co'ollaq ñi Dios detaqtague' somayi, detaqtapoigui aso qo'ipaq lapole mayi ÿavictaigui? Qaq ñimayi 'enapeco': “Aÿim mayi nachaÿim nDios so Abraham, qataq so Isaac qataq so Jacob.” 27Qaq sa ishit da nDios ñimayi nam leuaxaicpi, chaqnata nam nca'altauecpi. Qaq ÿoqo'oyi qami' ÿataqta qausomiÿapec.

Da nqataxac mayi ÿacteec da qaÿalaxalec

(Mateo 22.34-40)

28Qaq huo'o so anac nam dapaxaguenataxaatapeguec na nqataxacpi da anaÿa so Jesús, somayi n'axaÿaxaatega co'ollaxa so qalligotaxac. Qaq cha'ayi ÿaÿaten da so Jesús ÿaÿamaqchiguiñi da l'aqtac co'ollaq qainattac, nachi somayi denataxan, 'eeta':

–¿Négue't ca ÿoqta ÿacteec da qaÿalaxalec 'enauac nam nqataxacpi?

29Nachi so Jesús 'enapeco':

–Qomyi dam ÿacteec da qaÿalaxalec 'enauac nam nqataxacpi 'eeta': “Qan'axayaxañiÿo' qome, qami' Israel llalaqpi, ñi qadataxala' Dios, ñimayi nachaqñita 'oonolec nataxala'. 30Ÿataqta 'auauotec qome ñi qadataxala' Dios, imauec 'anqa'en da 'adquiyaqteÿaxac, qataq da 'anachaalataxac, qataq da 'adhuennataxa, qataq 'enauac da 'ad'añaxac.” Qaq 'eda dam ÿacteec da qaÿalaxalec nam nqataxacpi. 31Qaq da lÿa mayi nachi 'eeta'am damayi 'eeta': “'Auauotec ca 'adÿa, 'eeta'am 'anqa'en da maichi 'anauojla't.” Qaq qaica ca lÿa nqataxac mayi ÿacteec da qaÿalaxalec, nachinauate' ne'enaua.

32Nachi som dapaxaguenataxaatapeguec na nqataxacpi 'enapeco':

–'Am mayi 'auapaxaguenataxaatac, ÿataqta ÿaÿamaqchiguiñi da 'ad'aqtac. Ÿoqta 'eesa de'eda qonapec, da 'oonolec ñi Dios, nachaqñita, qaica ca lÿa. 33Qataq da ÿataqta qaÿauotec ñi qadataxala' Dios, imauec qanqoÿin da nquiyaqteÿaxac, qataq da nhuennataxa, qataq da achaalataxac, qataq 'enauac da n'añaxac, qataq qaÿauotec ca nÿa, 'eeta'am da 'eetec da maichi nauojla't ca shiÿaxaua. Nachi damayi ÿataqta napacalec 'enauac na nachitaqtaxanaxat mayi qoÿanot ñi Dios, qataq ana nachitaqtaxanaqte mayi qaÿachalec aca nca'atoxonaxalate da qaÿavigaxat.

34Nachi so Jesús co'ollaq ila'a somayi da ÿataqta ÿaÿamaqchiguiñi da l'aqtac, nachi 'enapego', 'eeta':

–'Am mashi sa qaÿapeque da 'aunoxoneu'a da l'onataxanaxac ñi Dios da ilo'ogue 'enauacna.

Huaña, nachi tachiguiña da sa ishit da huo'o ca qaltaq dechimaqtaxan.

¿Chaq négue't llalec cam nta'a mayi nca'alaxaqui?

(Mateo 22.41-46; Lucas 20.41-44)

35Qaq so Jesús dapaxaguenataxaatac, huetaigui aso n'onaxanaxaqui, nachi 'enapeco':

–¿Chaq tá'ainec nam dapaxaguenataxaatapeguec na nqataxacpi yi 'enac da ca nta'a mayi nca'alaxaqui, camayi llalec so David? 36Qalqo' so David co'ollaq i'aqtaxanaxan so Espíritu Santo, nachi 'enapeco':

Ñi qadataxala' Dios 'enapega ñi ÿataxala', 'eeta':

“'Anso'oota'ague qome da aÿoic,

to' qom mashi ime da sacho'oto naua 'adapia'te na 'am ipa'agueetacpi.”

37Qaq ¿huá'ago' ca 'eetec da ca nta'a mayi nca'alaxaqui da llalec so David, yi somayi ÿamata'ac da lataxala'?

Nachi som qalota shiÿaxauapi ÿataqta huo'o da lamanaxanaxa da n'axaÿaxaatega so Jesús.

So Jesús devitaqteetega nam dapaxaguenataxaatapeguec na nqataxacpi

(Mateo 23.1-36; Lucas 11.37-54; 20.45-47)

38Qaq so Jesús co'ollaq ÿapaxagueetac so shiÿaxauapi, nachi 'enapeco':

–Ÿataqta qadvichiÿa'a qome na dapaxaguenataxaatapeguec na nqataxacpi, cha'ayi namayipi ÿataqta nqopita da logodaiqa naua alogo, qataq nqopita da huo'otaq huetangui na nqa'aic nachi qaiyaata da qaiquin. 39Qataq namayipi nmitta'a na so'onqa' mayi ÿataqta ÿi'oxodaq anam laponaxaquipi na judiopi, qataq nataq'en nam nqui'aqa'. 40Qaq na mayipi ÿataqta iÿalaxa't naua lma'te ana pa'ai, qa nachi chochi nqañoxotoigui da ÿataqta logodaic naq'en da natamnaxac. Qaq namayipi qome nachina na ÿataqta ÿacteec da nhuaxanaguec.

Aso lachitaqtaxanaqte aso pa'ai mayi choxodaq

(Lucas 21.1-4)

41Huo'o so na'a'q so Jesús huetau'a aso n'onaxanaxaqui, nso'ootañi, sa qaÿapeque aso laÿi' ana nachitaqtaxanaqte. Nachi imeteetac na shiÿaxauapi mayi ÿasaqtapiguiñi ana lachitaqtaxanaqte. Qaq ÿataqta qalota nam sallaxanecpi mayi ÿaatapegueuo ana alom. 42Qa nachi nvideuo aso pa'ai mayi choxodaq. Nachi asomayi ÿasaxayiñi souatai' alo'miole, ÿasaxanguilo aso 'oonole anam laÿi'pi ana nachitaqtaxanaqte. Qaq soomayi ÿataqta saq 'amaqtaq da lashiichiÿaxa'c. 43Nachi so Jesús iÿaxanoiguilo soua lapaxaguenataqa, nachi 'enapegalo, 'eeta':

–Ÿataqta 'eesa de'eda qami' sa'axatema, da asa'aso pa'ai mayi choxodaq, asomayi ÿataqta ÿagueec aso ÿasaxañi, napacalec 'enauac na laÿipi mayi huo'o ana ÿasaxañi lachitaqtaxanaqte. 44Cha'ayi 'enauac namayipi ÿasaqtapiguiñi ana lli'iÿoqte. Qaq asomayi, qalaxayi nai'ctaxa da choxodaq, qalaxayi imatteuo 'enauac asom huo'o lhuenec lashiuole.

Currently Selected:

Marcos 12: TBSNT

Highlight

Copy