Marcos 10
10
So Jesús i'axat da lataxac ca nalate' aca lhua
(Mateo 19.1-12; Lucas 16.18)
1So Jesús ca'ai yi Capernaum, nachi nqo'ona yi 'alhua l'enaxat Judea qataq yim 'alhua mayi pa'aigue da nala' lliguishiguem so tala Jordán. Huaña yimayi, nachi na shiÿaxauapi qaltaq laponeu'a ca hueta'a. Nachi somayi qaltaq dapaxaguenataxaatac, cha'ayi nachi n'onataxac. 2Nachi na fariseopi nachaateu'a somayi da qaÿauotaique da chochi huo'o qanqoÿin ca lasouaxashit. Nachi qainattac somayi da huo'otaq qaÿaÿamaxadeeta ca shiÿaxaua da nalate' aca lhua. 3Nachi somayi 'enapeco':
–¿Négue't ca qami' ÿamaxalguete co'ollaxa so Moisés?
4Nachi somayipi 'enapeco':
–Qomyi so Moisés ÿashiitem ca shiÿaxaua da huo'otaq ÿalat aca lhua, nachi ÿauo'o aca lmalate da ÿalat, nachi camayi ishit da dalataxan.
5Nachi so Jesús 'enapego' somayipi, 'eeta':
–So Moisés qami' ÿanema co'ollaxa de'eda lamaxasoxonaxac, souaxat da ÿataqta qadamchiguilo naua qadquiyaqchilli'. 6Qalaxayi dam chigoqchiguiña co'ollaq ñi Dios chita'ague da i'ot 'enauacna, qalaq ñimayi “i'ot so shiÿaxaua qataq aso 'alo.” 7“Qaq ÿoqo'oyi ca shiÿaxaua, camayi ca'ai ca lta'a qataq aca late'e, da yaqto' lmayaxaua aca lhua. 8Huaña, nachi caamayi 'eeta'am da 'oonolec da lataxa'c.” Nachi caamayi sa ishit da 'eeta'am da dos, nda'a't da 'eeta'am da 'oonolec. 9Qaq ÿoqo'oyi ca shiÿaxaua sa ishit da isoguilo cam ÿadonaxanaxana't ñi Dios.
10Qaq co'ollaq huetra'a so lma', nachi soua lapaxaguenataqa qaltaq inatta'pe so Jesús, qainataxaatapeguec de'eda. 11Nachi so Jesús 'enapeco':
–Ca shiÿaxaua da ÿalat aca lhua qaltaq huadonguet aca lÿa 'alo, nachi camayi huo'o da lasouaxashit, cha'ayi huadoolec aca hua'auchiguiñi lhua. 12Qaq aca 'alo da ÿalat ca lhua, nachi huadonguet ca lÿa ÿale, nataq'en acamayi huo'o da lasouaxashit, cha'ayi huadonaxai.
So Jesús ÿanem da no'on lliquiaxac so ñaqpiolec
(Mateo 19.13-15; Lucas 18.15-17)
13Nachi huo'o na qanauegueu'a ñaqpiolec so Jesús, da yaqto' somayi ÿashil-lec, qalaxayi soua lapaxaguenataqa nachi nlaqtrega na nauectapegueuo namayipi. 14Qaq so Jesús co'ollaq ÿauaachigui de'eda, nachi denoÿai'. Nachi 'eetegalo soomayi, 'eeta':
–Ña qauauaqaita'a na ñaqpiolec da aÿim nau'a, sa ishit da sa qanashiñiiguet, cha'ayi de'eda l'onataxanaxac ñi Dios nam huetaigui nachina na 'eeta'am namayipi. 15Qaq ÿataqta 'eesa de'eda qami' sa'axatema, da ca sa ishit da i'enaxat ca nogotolec da ÿaconguet da l'onataxanaxac ñi Dios da ilo'ogue 'enauacna, nachi camayi sa ishit da inoxoneuo.
16Nachi so Jesús naueguela't na ñaqpiolec da nsoqtauo, nachi ÿanem da no'on lliquiaxac, qataq 'enauac ÿashil-lec.
So nsoq sallaxanec detaqtague' so Jesús
(Mateo 19.16-30; Lucas 18.18-30)
17Nachi so Jesús qaltaq jec, nachi anac so shiÿaxaua nqalgoqta'ague. Nachi i'adoto naua l-llicte, nachi inattac somayi, 'eeta':
–'Am soxodaic mayi 'auapaxaguenataxaatac, ¿huá'ago' ca shiitec, da yaqto' senoxoneu'a da nca'alaxa mayi qaica ca loga't?
18Nachi so Jesús 'enapeco':
–¿Tá'ainco' yi qonetega da aÿim soxodaic? Yi saqca ca soxodaic, 'oonolec ñim Dios mayi soxodaic. 19'Am 'auaÿaten peta'a na nqataxacpi mayi 'eeta': “Sa ishit da 'ancachitapeguelec aca 'adhua; sa ishit da 'aualaataxan; sa ishit da 'aucachi; sa ishit da 'anashipegaxan; sa 'auatenachit ca 'adÿa; 'aualaxalec ca 'adta'a qataq aca 'adate'e.”
20Nachi se'eso shiÿaxaua 'enapeco':
–'Am mayi 'auapaxaguenataxaatac, 'enauac ne'ena so'ottac, chigoqchiguiña co'ollaq aÿim nogotolec.
21Nachi so Jesús ÿataqta huo'o da lauochi co'ollaq ÿamato'ot somayi. Nachi 'enapego', 'eeta':
–Ñaq 'oonolec da saxanaxa da 'au'ot, 'eeta': 'auesoma, 'aumen qome 'enauac na 'am hueto'ot qataq 'ai'anoigui na choxodaqpi, yaqto' huo'o qome ca 'adsallaxa da piguem. Qaq qom 'adme, nachi aÿim qoquegue, nai'ctaxa da aÿim 'auleetalec.
22Qalaxayi somayi co'ollaq hua'axaÿa de'eda, nachi sa ÿamaqchit, nachi jec, daquigoigue, cha'ayi ÿataqta sallaxanec.
23Nachi so Jesús ÿamatapiguiñi, nachi 'enapegalo' soua lapaxaguenataqa, 'eeta':
–¡Ÿataqta huo'o da lqalaic na sallaxanecpi da inoxoneu'a da l'onataxanaxac ñi Dios da ilo'ogue 'enauacna!
24Nachi soua lapaxaguenataqa ÿataqta i'elaqchi't de'eda l'aqtac, qalaxayi so Jesús qaltaq ÿi'iguelaxalec da l'aqtac, 'eeta':
–Qami' ÿalaqpi, qami' shinapegalo da ¡ÿataqta huo'o da lqalaic da inoxoneu'a da l'onataxanaxac ñi Dios nam pe'etega da nsallaxa! 25Ÿataqta huo'o da lqalaic aca shiguiÿac l'enaxat camello da taigui qanqoÿin ca lauac aca qana, qalaxayi ÿataqta ÿapacteec da lqalaic ca sallaxanec da inoxoneu'a da l'onataxanaxac ñi Dios.
26Qaq co'ollaq hua'aqchiyigui de'eda soomayi, nachi ÿataqta i'elaqchi't. Nachi maichi nnattega't, 'eeta':
–Qaq ¿negue'tom qone' ca ishit da qanca'alaxateec?
27Nachi so Jesús ÿamataiguilo soomayi, nachi 'enapeco':
–Nam shiÿaxauapi sa ishit da ÿañoxot de'eda, qalaxayi ñi Dios ishit, cha'ayi ñimayi qaica ca ÿaqalanapec.
28Nachi so Pedro 'enapego' somayi, 'eeta':
–'Am qadataxala', qomi' mashi ñi'onaxataqchigui 'enauac nam qomi' hueto'oto, nachi 'am seca'ataqtague'.
29Nachi so Jesús 'enapeco':
–Ÿataqta 'eesa de'eda qami' sa'axatema, da camachicague't shiÿaxaua da huo'otaq ÿalat ca lma', lqaÿa qataq aca lqaÿa, lta'a huo'otaq late'e, huo'otaq lhua qataq llalaqpi, huo'otaq ca n'alhua, souaxat aÿim qataq da n'aqtac mayi chigaqaigui da nca'alaxa, 30nachi camayi ÿaconguet nagui da ñaq hueta'a ana 'alhua ca cien lma'pi, qataq ca lqaÿañicpi, lqaÿanpi 'alpi, late'elpi, qataq llalaqpi, qataq na n'alhuapi. Qataq nai'ctaxa da huo'o na ncanagueguesat, qalaxayi cam ñaq natai' 'alhua camayi qoÿami' qome ca nca'alaxa mayi qaica ca loga't. 31Qalaxayi qalota qome nam nagui l'auaxanecpi nam pa'ateec qome qanqoÿin, qalaxayi nataq'en qalota qome nam nagui pa'ateecpi, nam l'auaxanecpi qome qanqoÿin.
So Jesús qaltaq i'axata'a da l-leuaxa
(Mateo 20.17-19; Lucas 18.31-34)
32Qaq mashi qanayiitangui so nqa'aic mayi taÿa'ague da Jerusalén, qaq so Jesús hua'auta, qaq soua lapaxaguenataqa nca'attrauo, qaq soomayi ÿataqta i'elaqtapigui'salo qataq ñi'itapigui'salo. Nachi so Jesús qaltaq iÿaxanoiguilo soua doce lapaxaguenataqa da iÿotaugalo, nachi ÿataqta da'aqtaxaatema soomayi dam huaigui qome somayi. 33'Eeta':
–Qami' qauaÿajñiita da nagui qomi' saxague da Jerusalén. Qaq huaña qome yimayi, nachi na shiÿaxaua llalec qoÿaneu'a na lataxala'pi na ntaxaÿaxanaxanecpi da qaitaxaÿapegue' ñi Dios qataq na dapaxaguenataxaatapeguec na nqataxacpi. Qaq namayipi qome nachi ÿauo'o ca ñalaataguec, qataq aÿim ÿaneu'a na chigoxouecpi. 34Nachi namayipi qome ÿataqta aÿim i'en, qataq aÿim iuaxaatalec, qataq nqaigoqtaigui na ÿashic qataq aÿim ÿalauat. Qalaxayi qom mashi ivi' caua tres na'axa'te, nachi qaltaq aÿim qanca'alaxateec.
Dam iÿaxaadaique soua Santiago qataq so Juan
(Mateo 20.20-28)
35Nachi so Santiago qataq so Juan som llalqa so Zebedeo, soomayi nqochiideu'a so Jesús. Nachi 'enapegalo', 'eeta':
–'Am mayi 'auapaxaguenataxaatac, ñishoqtaique da qomi' 'ai'anema cam seÿaxanaqaique.
36Nachi somayi ina't soomayi, 'eeta':
–¿Négue't ca qanshiitaique da qami' sanema?
37Nachi soomayi 'ena'po':
–Qomyi qomi' sauoqtaique da qom 'am qonalec ca 'ad'onataxanaxac mayi qaica ca 'en'am da lli'oxoyic da 'am nta'a, qaq no'on da ca 'oonolec da shinaqta nso'oota'ague qome na 'oic, qaq ca lÿa neta'ague na 'an'emaq.
38Nachi so Jesús 'enapegalo' soomayi, 'eeta':
–Qami' sa qauaÿajñi ca llic da qauÿaxañiitapegueu'a. ¿Peta'a ishito' da qauachii da que'ejnaxac mayi 'ico' da aÿim qanÿomaxangui qome, qataq dam achilaxac mayi saigui qanqoÿin?
39Nachi soomayi 'ena'po':
–Aja', seshitaq.
Nachi so Jesús 'enapeco':
–'Eesa da qami' ishit qome da qauachii da que'ejnaxac mayi 'eeta'am da aÿim qanÿomaxangui, qataq da achilaxac mayi saigui qome. 40Qalaxayi da lataxac da yaqto' qanso'oota'ague na aÿoic qataq na ñi'emaq, qalaq damayi sa ishit da aÿim qoÿami' da yaqto' san. Cha'ayi nachicata cam sogote da qaÿaqataxaatapigui' mayi qoÿami' damayi.
41Nachi soua lÿa't diez lapaxaguenataqa co'ollaq hua'aqchiguilo de'eda, nachi qaÿalemataÿalo soua Santiago qataq so Juan. 42Nachi so Jesús iÿaxanoiguilo soomayi, nachi 'enapegalo, 'eeta':
–Qami' sogote da qauaÿajñi da lataxac na nta'alpi mayi ilotague' na ÿotta'a't shiÿaxauapi, da namayipi 'eeta'am ca 'aco' da ÿamaqtac na laÿipi, qaq nam 'añaxaicpi, namayipi ÿataqta i'otec da ÿalaxaguet naq'en da lamaxasoxonaxac nam laÿipi. 43Qaq da qoñiita, qalaxayi sa ishit da qoñiitec de'eda. Chaqdata da ca nshitaique da 'amaqtaqaic da qoñiita, qalaq camayi nachica ca huapegue' na laÿipi; 44qataq camachicague't da qoñiita, da nshitaique da nataxala', qalaq nachica ca l-latac 'enauac na laÿipi. 45Cha'ayi na shiÿaxaua llalec, namayi saq anac da yaqto' qanayiutapegue'. Chaqdata da huapec qataq da ÿan da nachaalataxac da 'eeta'am naq'en aca lashiue, da yaqto' qalota na qanca'alaxateec.
So Jesús nauaañi naq'en so Bartimeo
(Mateo 20.29-34; Lucas 18.35-43)
46Qaq mashi qaivita yi la ciudad Jericó. Nachi so Jesús co'ollaq mashi ca'ai yimayi, nnaictagueto soua lapaxaguenataqa qataq qalota so laÿipi shiÿaxauapi. Nachi huo'o so qanamaic l'enaxat Bartimeo. Somayi llalec so Timeo. Qaq somayi nso'ootañi, netau'a na laÿi so nqa'aic, dashilaxaatac. 47Qaq somayi co'ollaq hua'axaÿa'aguet so Jesús mayi Nazaret l'ec, nachi somayi i'alaq, 'eeta':
–¡'Am Jesús, mayi 'am llalec so David, aÿim 'auchoxoden qome!
48Nachi qalota na nlaqtega somayi, 'eetega da de'enaxaatai'. Qalaxayi somayi qaltaq nquigaxatteec da lÿaxanaxac, 'eeta':
–¡'Am llalec so David, aÿim 'auchoxoden qome!
49Nachi so Jesús vi'iiguet, nachi 'enapeco':
–Ña qauÿaxañiÿa ñimayi.
Nachi qaiÿaxana so qanamaic, nachi qoÿiitega, qoÿiita':
–'An'añaxat qome, qoñishiguem, cha'ayi 'am qanÿaxana.
50Nachi somayi ÿasaxauec so lapo', nachi npadenaxaashiguem da nqo'ona so Jesús. 51Nachi so Jesús inattac somayi, 'eeta':
–¿Négue't ca 'anshitaique da 'am so'otec?
Nachi se'eso qanamaic 'enapeco':
–'Am mayi 'auapaxaguenataxaatac, aÿim ñishitaique da ñauaañi.
52Nachi so Jesús 'enapeco':
–Qojec qome, mashi 'am no'oita, cha'ayi 'au'amqajnataxan.
Huaña, nachi se'eso qanamaic ishit da nauaañi, qanachi ca'ategue so Jesús.
Currently Selected:
Marcos 10: TBSNT
Highlight
Share
Copy
Want to have your highlights saved across all your devices? Sign up or sign in
Nuevo Testamento Toba Qom, Dios Nvita Na Shiỹaxauapi © Sociedades Bíblicas Unidas, 1981.
