Mateo 26

Qaÿauotaique da qaÿaconeu'a so Jesús

(Marcos 14.1-2; Lucas 22.1-2; Juan 11.45-53)

1Qaq so Jesús co'ollaq imat da i'axattac 'enauac de'eda, nachi 'enapegalo soua lapaxaguenataqa, 'eeta':

2–Qami' qauaÿajñi da qom inoxoodeec ne'enaua dos na'axa'te, nachi nnoxoneuo ca na'a'q mayi huetoigui da qaiuennate so na'a'q co'ollaq qanayica'ai yi Egipto. Nachi na shiÿaxaua llalec qome qoÿaneuo, da yaqto' qaiuaxaneuo.

3Nachi se'eso na'a'q nam lataxala'pi na ntaxaÿaxanaxanecpi da qaitaxaÿapegue' ñi Dios, qataq nam dapaxaguenataxaatapeguec na nqataxacpi, qataq nam lquedoxonecpi na judiopi, namayipi lapona't, hueta'a yi nqasoxoc so lma' lta'adaic so Caifás mayi lataxala' nam ntaxaÿaxanaxanecpi. 4Qaq huaña yimayi, nachi qaitaqtapigui cam natenataxanaxac, da yaqto' qaÿaconeu'a so Jesús da qaÿalauat. 5Qalaxayi somayipi 'enapeco':

–Sa ishit qome da huetoigui ñaqashinaq naua na'axa'te naponaxaqui', yaqto' sa ishit da i'elaxa't na shiÿaxauapi.

Aso 'alo mayi icodelec na lqaic so Jesús

(Marcos 14.3-9; Juan 12.1-8)

6So Jesús hueta'a yi Betania, hueta'a yi lma' so Simón mayi qaÿamata'ac da nchiga na l'oc. 7Nachi nqochineu'a somayi aso 'alo, ÿachitac aso coma' l'enaxat alabastro, laÿi'ole na codaxat mayi ÿataqta qaÿoqteu'a. Qaq so Jesús co'ollaq datatalec so nqui'axala', nachi asomayi icodelec na lqaic som codaxat mayi ÿataqta ama na laita. 8Nachi soua lapaxaguenataqa co'ollaq ÿauaachiyigui de'eda, nachi dalematai'. Nachi huo'o da l'aqta'c, 'eeta':

–¿Chi 'eeto' da chochi qaÿi'en de'eda codaxat? 9Cha'ayi de'eda codaxat ishíttaxa da ÿataqta late'edai qanqoÿin aca lashiue da qaimen, da yaqto' ishit da qaitauan na choxodaqpi.

10Qaq so Jesús hua'aqchigui de'eda, nachi 'enapeco':

–¿Tá'ainco' qami' yi sa qaualemaxachi ada'ada 'alo? Cha'ayi de'eda aÿim i'otec, damayi ÿataqta ÿaÿamaqchiguiñi. 11Qaq nam choxodaqpi, qalaq nachi 'eetai' qome da qami' hueta'agueta; aÿim, qalaxayi sa ishit da nachi 'eetai' qome da qami' hueta'agueta; aÿim, qalaxayi sa ishit da nachi 'eetai' da qami' soota'agueta. 12Cha'ayi de'eda i'ot ada'ada 'alo da icodelec da i'oquiaxac som codaxat, damayi ÿaqataxanai' nagui da aÿim icodelec da ñaq saxanaxa da aÿim qailayiñi. 13Qaq ÿataqta 'eesa de'eda qami' sa'axatema da cam pa'aigue naua laÿil ana 'alhua da qai'axattac de'eda n'aqtac mayi chigaqaigui da nca'alaxa, nachi nataq'en qai'axattac qome de'eda i'ot ada'ada 'alo, yaqto' nachi 'eetai' qome da qaiuennatapega adamayi.

So Judas huotaique da ÿaneuo so Jesús

(Marcos 14.10-11; Lucas 22.3-6)

14Nachi so 'oonolec soua doce lapaxaguenataqa, l'enaxat Judas Iscariote, somayi jec da detaxaÿapegue' som lataxala' na ntaxaÿaxanaxanecpi da qaitaxaÿapegue' ñi Dios. 15Nachi 'enapego' somayi, 'eeta':

–¿Chaq négue't aca aÿim qai'añiim, da aÿim qami' saneu'alo ñi Jesús?

Nachi somayipi ÿanem somayi aso treinta lcatpiole mayi chigaqaigui na plata. 16Huaña, nachi so Judas ilotaique ca lataxac da ÿaneu'a somayipi so Jesús.

Da lqui'axac so qadataxala'

(Marcos 14.12-25; Lucas 22.7-23; Juan 13.21-30; 1 Corintios 11.23-26)

17Qaq som l'auaxanec na'a'q mayi huetoigui da qanallic ana pan mayi sa qaÿauo'o ana lalecte, nachi soua lapaxaguenataqa so Jesús inattrac somayi, 'eetra':

–¿Chaq huá'ague ca 'anshitaique huaña da qomi' saqataxanqai', da yaqto' 'am 'auque'e ca na'a'q mayi huetoigui da qaiuennate da qanayica'ai yi Egipto?

18Nachi so Jesús 'enapeco':

–Qanqo'oñiu'a qome yi la ciudad, nachi qaiteu'a yi lma' que'eca shiÿaxaua. Nachi qoñiÿapega, qoñiita': “Ñim qanapaxaguenaxala' 'eeta': Yi ÿaloqo' mashi sa qaÿapeque. Qaq na 'adma' qome huaña da sachic ca nallic mayi naigui da qaiuennate co'ollaq qanayica'ai yi Egipto, da sequi'iÿa'ai'salo naua ÿapaxaguenataqa.”

19Nachi soua lapaxaguenataqa nachi i'enaxatchiyigui dam lamaxasoxonaxac so Jesús da ÿaqataxaadai' so nqui'axac.

20Qaq co'ollaq mashi ivita so pe, nachi so Jesús datatalec so nqui'axala', qataq soua doce lapaxaguenataqa. 21Qaq co'ollaq ña deque'eta'pe, nachi 'enapeco':

–Ÿataqta 'eesa de'eda qami' sa'axatema da ñi 'oonolec da qoñiita aÿim ÿaneuo.

22Nachi somayipi ÿataqta daquicota. Huaña, nachi ñi 'oonolec inattac somayi, 'eeta':

–'Am qadataxala', ¿peta'a nachaÿim?

23Nachi so Jesús 'enapeco':

–Ñim ÿauoltenaxanaxaua ne'ena qadqui'axaqui, nachiñi qome ñim aÿim ÿaneuo. 24Qalaxayi ne'ena shiÿaxaua llalec, namayi ÿataqta quetegue dam lliquiaxac mayi i'axat naua ñiyigui'shi l'aqtaqa ñi Dios. Qalaxayi ¡ÿataqta choxodaxaso' ñim shiÿaxaua mayi ÿaneuo namayi! Ñi mayi 'onaxáictaxa co'ollaxa da sa ishit da ñiguiñi.

25Nachi detaqa so Judas mayi nachiso so ÿaneuo, 'eeta':

–'Am qadataxala', ¿peta'a nachaÿim?

Nachi so Jesús 'enapeco':

–Aja', nachi'am.

26Qaq co'ollaq ña deque'eta'pe, nachi so Jesús ÿacona aso pan. Qaq co'ollaq ime da icolaxachigui, nachi ÿanot da n'achiquiaxac ñi Dios. Ime, nachi ÿanoiguilo soua lapaxaguenataqa, nachi 'eeta':

–Qolliqui ana'ana, anamayi nachida da i'oquiaxac.

27Qaq co'ollaq ime, nachi ÿacona aso ÿomaxaqui, nachi qaltaq ÿanot da n'achiquiaxac ñi Dios. Ime, nachi ÿanoiguilo soomayi, nachi 'eeta':

–Qanÿomiigui qome ana'ana ÿomaxaqui 'enauac da qoñiita. 28Cha'ayi na huetagui anamayi nachinaua na itago'q mayi ÿoqta 'itchiguiñi naq'en dam dalaxaic aÿamaxataxac. Nam itago'q taÿa'alo da qaicoldeec, da yaqto' ÿataqta qalota qome na qaÿapalaxat na lasouaxashitpi. 29Qalaxayi aÿim qami' shinapegalo da nagui nachi sa lÿa da shi'iguelaxalec da ñiÿomgui ne'ena lli'i ana uvas, to' qom mashi ivita ca na'a'q da qaltaq qami' ñiÿoma'ato, qom sootaigui ca l'onataxanaxac ñi ita'a da ilo'ogue 'enauacna.

So Jesús i'axata'a da nqolguetaxac so Pedro

(Marcos 14.26-31; Lucas 22.31-34; Juan 13.36-38)

30Qaq co'ollaq mashi ime da qai'on so n'onec, nachi qanqo'oneuga som saqaÿoqotchiguemec 'alhua mayi nanqa' ana olivos. 31Nachi so Jesús 'enapeco':

–'Enauac da qoñiita aÿim qaualachiÿa'a't na pe. Cha'ayi nachi 'enapec naua ñiyigui'shi l'aqtaqa ñi Dios, mayi 'eeta': “Salauat qome ñim ilotague' ana qagueta, nachi ana qaguetapi qome nlagaxattac.” 32Qalaxayi qom mashi qaltaq yica'aleec, nachi aÿim sa'auta'ague qome da Galilea.

33Nachi so Pedro 'enapeco':

–Nai'ctaxa da 'enauac 'am qaÿalata'a't, qalaxayi aÿim sa ishit da 'am salat.

34Nachi so Jesús 'enapeco':

–Aÿim ÿataqta 'eesa de'eda 'am sa'axatem, da nachina ne'ena pe da qom yaqta'a da noÿin ca 'olgaxa, qaq mashi tres qome da 'avi'iguelaxalec da 'anqolguet da qonetega aÿim sa 'auauatton.

35Nachi so Pedro 'enapeco':

–Nai'ctaxa da 'am seleutañi', qalaxayi sa ishit qome da ñoqolguettac.

Nachi 'enauac so laÿipi qai'enaxatchigui da l'aqtac somayi.

So Jesús nqouagaxaueetac, hueta'a yi Getsemaní

(Marcos 14.32-42; Lucas 22.39-46)

36Nachi so Jesús qataq soua lapaxaguenataqa ivitra so 'alhua l'enaxat Getsemaní. Nachi 'enapegalo soomayi, 'eeta':

–Qanso'oñiiñi qome, qoviita'a ne'ena; aÿim, qalaq saicda'atai' da ñoqouagaxauen.

37Nachi ÿauec so Pedro qataq soua dos llalqa so Zebedeo. Huaña, nachi somayi ÿataqta daquicota, qataq huo'o da nqui'ic. 38Nachi 'enapegalo' soomayi, 'eeta':

–Añi iquiyaqte ÿataqta daquico. Huotaique da yalauat da ÿaquicoxo. Qaq qoviita'a qome ne'ena, qataq sa ishit qome da qau'ochii.

39Nachi so Jesús taÿa ca qaÿata'a, nachi ÿataqta nqapaxanguet na 'alhua. Nachi nqouagaxaunot ñi Dios, 'eeta':

–'Am ita'a, da 'aushit, qaq no'on da sa ishit qome da aÿim 'aupagaqna'aguet de'eda que'ejnaxac mayi 'eeta'am da qanÿomgui ca deshinataxan. Qalaxayi sa ishit qome da 'au'ot cam maichi shiitapeguec, chaqcato' ca maichi qonetapeguec.

40Ime, nachi qaltaq nqo'onalo soua lapaxaguenataqa, nachi ilalguete soomayi da do'ochite'. Nachi 'enapega so Pedro, 'eeta':

–¿Sa ishito' peta'a qami' da cada'ac da qanloitauec da qoñiita'am aÿim? 41Qami' qanloitauec qome, qataq qanqouagaxauñiitac, yaqto' sa ishit da qami' inoxonoiguilo ca qauem qadhuennataqai. Cha'ayi ca shiÿaxaua ÿataqta nasapatta da lquiyaqteÿaxac, qalaxayi da l'oquiaxac mayi qaica ca lasapachaxa.

42Nachi qaltaq ÿi'iguelaxalec da nqouagaxauen, 'eeta':

–'Am ita'a, qom huo'otaq ishit da sepaca'aguet da ñique'etaxangui de'eda ñi'iguenataguec, qalaxayi no'on qome da 'au'ot ca maichi qonetapeguec.

43Ime, nachi ÿi'iguelaxai', nachi qaltaq ilalguete soua lapaxaguenataqa da do'ochite', cha'ayi naua l'ai'te ÿataqta sa ishit da nlotraue'c, souaxat na l'ochaqa'. 44Nachi ca'aisalo soomayi, nachi qaltaq ñi'iguelaxai' da nqouagaxauen, qataq i'enaxatchigui so hua'auchiguiñi nqouagaxaunaxac. 45Nachi qaltaq nqo'onalo soua lapaxaguenataqa, nachi 'enapegalo, 'eeta':

–Hua', nagui mayi qau'ochii, qataq qanmachiiuec. Mashi ivita yi laloqo' da na shiÿaxaua llalec qoÿaneu'a na shiÿaxauapi 'itaxaloxoicpi. 46Qoñiishiguem qome, qolaq, mashi nvi' nam aÿim ÿaneuo.

So Jesús qaÿaconeu'a da qaicoñi'

(Marcos 14.43-50; Lucas 22.47-53; Juan 18.2-11)

47Qaq so Jesús ña detaqtac co'ollaq mashi nvi' so Judas, som 'oonolec soua doce lapaxaguenataqa. Qaq somayi ÿataqta qalota so nnaictague' shiÿaxauapi, nachitac na lainecpi qataq na nponpi. Somayipi nachi lamaxashicpi som lataxala' na ntaxaÿaxanaxanecpi da qaitaxaÿapegue' ñi Dios, qataq nam lquedoxonecpi na judiopi. 48Qaq so Judas mayi demenaxan, somayi ÿauo'o co'ollaxa da l'anec, 'eeta':

–Ca ñapigoqot qome, qaq nachica qaucoñiyi.

49Nachi somayi nqo'oneu'a so Jesús, nachi iquin, 'eeta':

–¡La', 'am ÿataxala'!

Nachi napigoqot. 50Nachi so Jesús 'enapego':

–'Am iÿa, ¿négue't ca 'alotaique?

Nachi somayipi nqochineu'a so Jesús, nachi ÿaconeu'a da icoñi'.

51Huaña, nachi so 'oonolec soua lÿa't so Jesús, somayi nqatshiguem so lainec. Nachi iquesoxouec ana ltela lÿa so lamaxashic so lataxala' na ntaxaÿaxanaxanecpi. 52Nachi so Jesús 'enapega somayi, 'eeta':

–'Ai'oxot qome na 'ainec. Cha'ayi 'enauac qome nam huota'a na lainec da deloqui, nachi namayipi qaÿauota'a ÿiilonec da qaÿalauat. 53¿Sa qauaÿajñiÿo' da aÿim ishit da seÿaxanot ñi ita'a, nachi ñimayi ishit da aÿim namaxa nagui ca napacalec ca doce mil lamaxashic piguem l'ecpi? 54Qalaxayi da nachi 'eetec de'eda, qaq ¿huá'ago' da ishit da ipacchigui cam 'enapec naua ñiyigui'shi l'aqtaqa ñi Dios, mayi i'axa't co'ollaxa da nachi qoÿiitec de'eda?

55Nachi so Jesús 'enapego' so shiÿaxauapi, 'eeta':

–¿Tá'ainco' qami' yi qauauoita'alo naua qainaqalli' qataq naua qanpo'ñilli', da aÿim qañi'iguiñiÿauga, 'eeta'amo' da aÿim cachaxaic? Qamaq 'enauaque naua na'axa'te ñiso'ootanguilo qami', sapaxaguenataxaatac da sootaigui añi n'onaxanaxaqui late'edai, qalaq ¿tá'ainco' yi aÿim sa qauacoñiu'a da aÿim qaucoñiyi? 56Qalaxayi 'enauac de'eda qau'ochi damayi, yaqto' ipacchigui dam ÿiyiñi co'ollaxa da l'aqtaxanaxanecpi ñi Dios.

Nachi soua lapaxaguenataqa n'onaxatchiguilo somayi. Nachi datadeec.

So Jesús qaÿataxanoigui so nta'alpi mayi i'ot na lataxacpi

(Marcos 14.53-65; Lucas 22.54-55, 63-71; Juan 18.12-14, 19-24)

57Nachi som icoñi' so Jesús, somayipi i'auaxaachiguiñi da ÿauegueu'a so Caifás mayi nachiso so lta'a na lataxala'pi na ntaxaÿaxanaxanecpi da qaitaxaÿapegue' ñi Dios, cha'ayi nachi laponqa' so lma' somayi nam dapaxaguenataxaatapeguec na nqataxacpi qataq nam lquedoxonecpi na judiopi. 58Qalaxayi so Pedro ca'attaueegue somayipi, qalaxayi qaÿoqteguet, chochi ivittau'a ca nqasoxoc ca lma' som lta'a na lataxala'pi na ntaxaÿaxanaxanecpi. Huaña, nachi pa'auo, nachi nso'ootañi, netangui so huataxanaqpi, cha'ayi ÿauotaique da ÿauaachigui ca loga't 'enauac de'eda.

59Nachi nam lataxala'pi na ntaxaÿaxanaxanecpi qataq so nquedoxonecpi qataq 'enauac nam nta'alpi mayi loicnatac na lataxacpi, namayipi nmittaique ca lataxac da huo'o ca chochi qaÿasaxalec lasouaxashit qanqoÿin so Jesús, nai'ctaxa da saq 'en, da yaqto' qaÿalauat. 60Qalaxayi sa ishit da huo'o ca qaÿanata, nai'ctaxa da qalota so shiÿaxauapi nachaateuo da i'ot na chochi latenataxanaxacpi da ÿasaxalec somayi. Qalaxayi co'ollaq mashi pa'ateec, nachi nachaatreuo soua dos ashipegaxanaxanqa. 61Nachi 'ena'po':

–De'eda shiÿaxaua huo'o so na'a'q nachi 'eeta': “Aÿim seshit da ñilaxajñi ñi'iñi lauo' ñi Dios, qataq ishit da ñi'oxooshiguem tres na'axa'te, nachi ime ñaq'en.”

62Nachi nachajñi so lta'a na lataxala'pi na ntaxaÿaxanaxanecpi, nachi 'enapega so Jesús, 'eeta':

–¿Tá'ainco' yi sa 'auasat? ¿Huá'ague ca 'eetec da n'aqtac mayi 'am qaÿasaxalec?

63Qalaxayi so Jesús sa ishit da ÿasat. Nachi so lta'a na lataxala'pi na ntaxaÿaxanaxanecpi 'enapega somayi, 'eeta':

–Seÿaxanot nagui ñi Dios mayi nca'altauec da ÿauo'o qome ca 'anhuaxanaguec qom sa ishit da 'en ca 'ad'aqtac. Ñaq qomi' 'au'aqtaxanema nagui qom 'eesa da nachi'am nta'a nca'alaxaqui mayi 'am llalec ñi Dios.

64Nachi so Jesús 'enapeco':

–Aja', nachaÿim, nachida dam qonapec. Nataq'en qami' shinapegalo da qami' qauloÿa'a qome na shiÿaxaua llalec da nso'oota'ague na aloic ñim Dios mayi qaica ca ÿaqalanapec, qataq qom anactaigui ca l'oc da ñi'iguelaq.

65Nachi som lta'a na lataxala'pi na ntaxaÿaxanaxanecpi, somayi icolaxata'aguelo naua alogo. Damayi naigui dam 'eeta lta'adaic. Nachi 'enapeco':

–De'eda shiÿaxaua, damayi naua l'aqtaqa ÿataqta npa'agueneto ñi Dios. ¿Negue'tom ca lÿa shiÿaxaua seuenaq da da'aqtaxan? Cha'ayi qami' qau'aqaichigui da l'aqtac da ÿataqta npa'aguene' ñi Dios. 66Qaq ¿chaq 'éetec cam qad'aqtaqui?

Nachi somayipi 'enapeco':

–Qomyi damayi huo'o da ÿasouaxat, qaÿalauat qome.

67Nachi qanqaigoxoigui na lashic somayi, qataq qaiuaxaatac. Qataq huo'o na iuaxanoigui na lashic. 68Nachi qoÿiitega, qoÿiita':

–'Am mayi 'am nta'a nca'alaxaqui, ¡ña 'au'axat négue't na 'am iuaxaatac!

So Pedro 'eetega da sa ÿauatton so Jesús

(Marcos 14.66-72; Lucas 22.56-62; Juan 18.15-18, 25-27)

69Qaq so Pedro ña nso'ootañi, netauga so qasoxoc, nachi anac aso namaxashi. Nachi 'enapega somayi, 'eeta':

–'Am nataq'en 'annaictague' da Jesús mayi l'ec yi Galilea.

70Qalaxayi so Pedro hua'aqchigui naq'en 'enauac so shiÿaxauapi co'ollaq nqolguet, 'eeta'

–Aque', sa saÿaten dam 'au'axattac.

71Qaq so Pedro mashi taÿa'a so lasom co'ollaq anac aso lÿa namaxashi. Nachi co'ollaq ila'a somayi, nachi asomayi 'enapego' som hueta'a so qasoxoc, 'eeta':

–De'eda shiÿaxaua, damayi nataq'en nnaictague' da Jesús mayi Nazaret l'ec.

72Nachi so Pedro qaltaq ÿi'iguelaxalec da ÿoqta 'en naq'en da l'aqtac da nqolguet, 'eeta':

–Aÿim sa ishit da sauatton de'eda shiÿaxaua.

73Qaq co'ollaq qaÿata'ague de'eda, nachi nam hueta'a se'eso qasoxoc, namayipi nqochineu'a so Pedro, nachi qoÿiitega, qoÿiita':

–Ÿoqta 'eesa peta'a da 'am nataq'en 'adaÿipi namayipi, cha'ayi 'am ivida'alo naua 'ad'aqtaqa 'eeta'ama namayipi.

74Nachi somayi ÿataqta n'axannec da nqolguet, qataq iÿaxaatega da qaÿalauat da huo'otaq ÿauatton somayi, nachi 'enapeco':

–Aque', aÿim sa sauatton de'eda shiÿaxaua.

Huaña, nachi noÿin so 'olgaxa. 75Nachi so Pedro tachigui yi lauel da l'aqtac so Jesús co'ollaq 'eeta': “Qom yaqta'a da noÿin ca 'olgaxa, qaq 'am mashi sogote qome da tres 'avi'iguelaxalec da qonetega da aÿim sa 'auauatton.” Nachi so Pedro pa'auec, nachi ÿataqta noÿiitac.

Currently Selected:

Mateo 26: TBSNT

Highlight

Copy