Mateo 24

So Jesús i'axata'a da qanlaxajñi qome aso n'onaxanaxaqui late'edai

(Marcos 13.1-2; Lucas 21.5-6)

1Qaq so Jesús co'ollaq ca'ai aso n'onaxanaxaqui late'edai da jec, nachi ana'c soua lapaxaguenataqa, nachi qaÿachaxaatega somayi na coma' mayi l'oxonaxat asa'aso n'onaxanaxaqui. 2Qalaxayi so Jesús 'enapeco':

–¿Qami' qauloita'a peta'a ne'ena? Aÿim ÿataqta 'eesa de'eda qami' sa'axatema nagui da ne'ena coma' sa ishit qome da huo'o ca coma' da nachi 'eetai' da huetalec ca lÿa. Namayipi ÿataqta 'enauac qome da qailaxachigui.

Na n'anecpi mayi i'axata'a ca loga'tna

(Marcos 13.3-23; Lucas 21.7-24; 17.22-24)

3Nachi nqo'ooyishiguemec aso saqaÿoqotchiguemec 'alhua mayi nanqa' ana olivos. Nachi so Jesús co'ollaq nso'ootañi, nachi soua lapaxaguenataqa isoxoototo somayi da ina't, 'eetra':

–Sauoqtaique da qomi' 'au'axatema chaq lagui qaq ivita de'eda. ¿Chaq négue't qome ca l'anaxat ca 'ayi'iguelaxasoxoc qataq cam loga't ana 'alhua?

4Nachi so Jesús 'enapeco':

–Maxatchaxa qome, sa ishit da huo'o ca qami' ÿatenachi't. 5Cha'ayi ÿataqta qalota qome na chochi n'enaqchingui da i'enaxat, 'eeta': “Aÿim mayi nachaÿim qadta'ai qadca'alaxaquii,” nachi ÿataqta qalota qome na ÿatenachit. 6Qami' qau'aqaitapeguelec qome da chimaqchiguiñalo na alaataxac. Qalaxayi sa ishit qome da qayi'ii, cha'ayi damayi nachi qoÿina'ac. Qalaxayi saxanaxa qome da ivita ca laloqo'na. 7Cha'ayi ca qompi maichi delogui' ca sa lauo' l'ecpi, qataq ca nta'a maichi delogui' ca lÿa nta'a. Qataq huo'o ca nqouaxa qataq naua nalolaxaco, qataq qalota na 'alhuapi na huo'o na nacholaxanaxa. 8Qaq 'enauac ne'ena nachina na chigoqchiguiña na que'ejnaxacpi.

9Huaña, nachi qami' qoÿaadeuo, da yaqto' qami' qaiuaxaata'pe, qataq da qami' qaÿalauat. Qataq 'enauac na shiÿaxauapi ÿataqta qami' nquiÿalo, souaxat da aÿim qoquiitague'. 10Nachi que'eca na'a'q ÿataqta qalota qome na ÿaxaneec da lpi'iÿaxac, nachi nquiÿa ca lÿa qataq da imenguet ca sa lataxac. 11Qataq qalota qome na tenataxanaxaicpi na nachaxan, 'eetega da l'aqtaxanaxanecpi ñi Dios, nachi ÿataqta qalota qome na ÿatenachit shiÿaxauapi. 12Qataq ÿataqta qalota qome na sa ÿaÿamaxañisat, qaq ÿoqo'oyi huo'o qome na ÿaxaañi da ÿauotec ca lÿa. 13Qalaxayi ca qaica ca ÿoqocha'a, chochi ividaxatta'a ca loga't da nachaalataxac, qaq nachica ca qanca'alaxateec. 14Qaq de'eda no'on n'axaÿaxac mayi i'axat da n'aqtaguec da l'onataxanaxac ñi Dios mayi ilo'ogue 'enauacna, damayi qai'axateec qome 'enauac ana 'alhua, da yaqto' 'enauac nam ÿotta'a't shiÿaxauapi ÿaÿaten damayi. Huaña, nachi ivita ca loga'tna.

15So l'aqtaxanaxanec ñi Dios l'enaxat Daniel, somayi ÿiyiñi co'ollaxa dam 'eetec ca ishit da deshipaxanaqtaxan qataq delaqtaxan. Qaq qom qami' qauloÿa'a camayi da huetaña cam sa ishit da lma' –qaq cam itaxaÿaxan ne'ena, qaq no'on da ÿaÿateeteguet,– 16qaq nam hueta'a yi Judea nachi naneltaxaashiguemec qome ana qasoxonaxapi. 17Qaq nam huetalec na l-laq ca lma', qaq no'on qome da sa ishit da imelec da taigui ca lma' da huo'o ca ÿachi. 18Qataq cam huetalec na n'onaxa, qalaq sa ishit qome da ÿi'iguelaxau'a ca lma' da yaqto' ÿachi ca lapo'. 19¡Ÿataqta choxodaxaso' qome na 'alpi mayi hualaxaipi que'eca na'a'q, huo'otaq aca huo'o ca llalec ñaq lliptac! 20Ÿoqo'oyi qauÿaxañiÿot qome ñi Dios, da yaqto' sa ishit da huetoigui naq'en ca latomaxa, huo'otaq ca mataxaqui, da qananeltaxañi. 21Cha'ayi ÿataqta qalota qome da que'ejnaxac. Sa ishit da huo'o ca 'eeta'am da qaÿachigoqta'ague co'ollaq chita'ague da qai'ot ana 'alhua, qataq sa ishit da qaltaq qanauane' qome de'eda que'ejnaxac. 22Qaq ñi Dios da huo'otaq ividaxattreec que'ecaua na'axa'te, nachi sa ishit qome da huo'o ca nca'aleec. Qalaxayi ñimayi sa ishit da ividaxattreec, souaxat da lauochi nam lca'aguishicpi.

23Qaq ÿoqo'oyi da huo'o ca qami' 'enapegalo da 'eeta': “Ña qauloÿa, 'ena na nta'a nca'alaxaqui, hueta'a ne'ena,” huo'otaq da 'eeta': “'Iñi cha'a ñimayi,” qalaq qami' sa ishit qome da qau'amaqchiñi. 24Cha'ayi ÿataqta qalota qome na anac da 'eetega nta'a nca'alaxaqui, huo'otaq 'eetega da l'aqtaxanaxanecpi ñi Dios. Nachi namayipi i'ot qome na lta'adaic n'anecpi qataq nam sa qaÿauanapega, da yaqto' datenataxan. Qaq sa iuena'a da ishit nataq'en qome da ÿañoxot da ÿatenachit nam lca'aguishicpi ñi Dios. 25Qaq damayi qami' sa'axatema nagui, yaqto' nachi 'eetai' qome da qauaÿajñiita'aguet. 26Qaq ÿoqo'oyi da huo'o ca qami' 'enapegalo da 'eeta': “Ña qauloÿa ñi qadta'a qadca'alaxaqui, ñimayi netalec yi tojlec 'alhua,” qalaq sa ishit qome da qanqo'oñiuga. Huo'otaq da 'eeta': “'Iñi ñimayi, netaigui ñi noÿic,” qalaq sa ishit qome da qau'amaqchiñi. 27Cha'ayi camayi 'eeta'am qome da qaila'a ca nqashilgaxa, da chigoqtegue da yi'oxoñi, nachi ividangui da avit, qaq 'eda qome da 'eetec da lvidaxac na shiÿaxaua llalec qom ñi'iguelaq. 28Qaq ca hueta'ague ca leuaxaic, qaq nachica ca huaña da lapona't na teguesanpi.

Da 'eetec da lli'iguelaxasoxoc na shiÿaxaua llalec

(Marcos 13.24-37; Lucas 21.25-33; 17.26-30, 34-36)

29Qaq qom chochi inoxoodeec que'ecaua na'axa'te mayi que'ejnaxaqui', nachi añi nala' 'om qataq so ca'agoxoic, qataq najñi ana huaqajñi, chigoqo'ot na piguem, qataq ivida'a na n'añaxacpi mayi hueto'ot na piguem ÿataqta cholaxan. 30Huaña, nachi qaila'a na piguem ca l'anaxat na shiÿaxaua llalec. Nachi 'enauac qome na ÿotta'a't shiÿaxauapi noÿiitagui, qom qaila'aguet na shiÿaxaua llalec da nactaigui na l'oc, ÿataqta lta'adaic da l'añaxac qataq da lli'oxoyic. 31Nachi ÿamaq qome na lamaxashicpi piguem l'ecpi, da yaqto' n'axannec na l-lamaxa ana lashiide da dashiidaxan, da yaqto' lapona't 'enauac na lca'aguishicpi mayi neta'aguelo naua cuatro llico na l'at. Qaq 'enauac namayipi ÿachigoxottalo naua loga'te ana 'alhua.

32Qaq qanapaxaguiñiÿa qome aca lchiyic ana higo mayi saloqnaxana: Da acamayi da ivita da ñaxateec ana lcouepi, nachi huo'o ana lauepi. Nachi qami' qauaÿajñi da mashi sa qaÿapiguii naua nta'pi. 33Qaq nachi 'eetec nataq'en qom qami' qauloÿa'a 'enauac ne'ena, nachi qami' qauaÿajñi da mashi sa qaÿapeque ca loga't 'enauacna. Camayi mashi nayiitai'. 34Qaq ÿataqta 'eesa de'eda qami' sa'axatema, da 'enauac qome ne'ena hua'auñi da yi'oq, qom huo'otaq saxanaxa da ileu na shiÿaxauapi mayi huetaiguilo nagui ne'enaua na'axa'te. 35Na piguem qataq ana 'alhua imeuo qome, qalaxayi da i'aqtac sa ishit da imeuo.

36Qalaxayi que'eca na'a'q qataq ca laloqo' de'eda, qalaq qaica ca ishit da ÿaÿaten, ivida'a na namaxashic piguem l'ecpi sa ÿaÿaten qataq na llalec ñi Dios. Chaqñita ñi ita'a mayi ÿaÿaten.

37'Eeta'am da 'eetec co'ollaxa soua na'axa'te mayi huetoiguilo so Noé, qaq nachi 'eetec nataq'en qom ivita da ñi'iguelaq na shiÿaxaua llalec. 38Se'esoua na'axa'te co'ollaq saxanaxa da npaxaashiguem ana 'alhua, qalaq na shiÿaxauapi i'ottac na lqui'axac, nÿomtac, qataq huadootega't, qataq da ÿadonaxanaxan na llalpi, chochi ivitta'a so na'a'q da so Noé huenoxonoigui aso nnotaxaqui. 39Qalaxayi sa ishit co'ollaxa da anoma de'eda somayipi, chochi ivitta'a co'ollaq anac so auot, nachi huaÿoxon naq'en 'enauac somayipi. Qaq 'eda da 'eetec nataq'en qom ivita da ñi'iguelaq na shiÿaxaua llalec. 40Qaq que'eca na'a'q caua dos shiÿaxa'u da huo'otaq huetrauga ca n'onaxa, nachi caamayi 'oonolec ca qaÿauec, qaq ca lÿa qalaq qan'onaxatañi. 41Qataq caua dos 'alo da damaicnaxaata'pe, qalaq 'oonole aca qaÿauec, qaq aca lÿa qalaq qan'onaxatañi.

42Qaq qami' ÿataqta qanloiteec qome, cha'ayi sa qauaÿajñi ca laloqo' da ñi'iguelaq na qadataxala'ai. 43Qalaxayi qami' qauaÿajñi da huo'otaq que'eca lma' ca noÿic, da huo'otaq ÿaÿaten ca laloqo' ca pe da nvi' ca cachaxaic, nachi camayi sa ishit da do'ochi, da yaqto' sa ishit da ÿashin da qainoxotau'a ca lma' da qaicachiÿot. 44Qaq ÿoqo'oyi qami' ÿataqta qanaÿamaxachiitai' qome. Cha'ayi qom mashi sa ishit da taÿapigui qadvilli de'eda, nachi nvi' na shiÿaxaua llalec.

Ca nlatac mayi ÿataqta ipactelec ca l'onatac qataq cam sa ipaguelec

(Lucas 12.41-48)

45¿Negue'tom ca nlatac da ÿataqta ipactelec ca l'onatac qataq huo'o na ÿaÿaten, da huo'otaq ca n'aco' ipataxalec camayi, da yaqto' iqui'axaatac nam hueta'a ca lma' da ivita yi laloqo' da nqui'axac? 46Qaq ÿataqta machiguiñi qome que'eca nlatac, da huo'otaq ivita da nvi' ca n'aco', qalaq ilalec da i'ottac cam qaÿamaxalec. 47Qaq ÿataqta 'eesa de'eda qami' sa'axatema da que'eca n'aco' ishit da ipataxalec camayi 'enauac nam lalamaxatpi. 48Qalaxayi que'eca nlatac, da huo'otaq qauemaic, nachi 'eeta': “Ca ñi'aco' ÿataqta qaÿaloqteguet.” 49Nachi jec da iuaxaatac na nlataxauapi, qataq i'ot da lqui'axac, qataq da nÿoma'ai' na taxaicpi. 50Nachi se'eso n'aco' ñi'iguelaq so na'a'q mayi sa ishit da ÿauotaique se'eso l-latac, qataq som laloqo' mayi sa ishit da ÿaÿaten. 51Nachi ÿataqta qaica ca 'en'am naq'en ca nhuaxanaguec, 'eeta'am, naq'en da nhuaxanaguec nam 'eetegapi da 'eesa. Huaña, nachi noÿiitac, qataq ÿataqta inaga't na lhue da nqui'ic.

Currently Selected:

Mateo 24: TBSNT

Highlight

Copy