Mateo 20
20
Qaÿaloqnaxana so 'onataxanaxaicpi
1Da l'onataxanaxac ñi Dios mayi neta'ague da piguem, damayi 'eeta'am cam lalamaxat ca nanqa' ana uvas mayi 'otta da nte'etom da ilaique ca l'onataxanaxanecpi, da yaqto' nqat ana ala aso languishi uvas. 2Nachi somayi detaxaÿapegue' se'eso 'onataxanaxaicpi da do'onataxaalec naq'en aso 'oonole denario yi 'oonolec na'a'q. Ime, nachi ÿamaxauga so lanaxanqa' da do'onataxan. 3Qaq co'ollaq mashi qaÿata'ague aso nala' se'eso nte'eta, nachi qaltaq ÿi'iguelaxauec se'eso 'aco'. Nachi somayi ilalec so laÿipi 'onataxanaxaicpi, somayipi hueta'a so naponqa', qaica ca l'onatac. 4Nachi 'enapega somayipi, 'eeta': “Qami' nataq'en qanqo'oñiuga qome yi ÿanaxanqa' da qauqataxañi. Aÿim ÿataqta sepagaqchiichigui qome aca lashiue ca qad'onataxanaxaqui.” Nachi somayipi jec. 5Qaq co'ollaq mashi na'a'q laiñi, nachi qaltaq ÿi'iguelaxauec se'eso 'aco'. Qataq so mashi laiñi se'eso avit, qaltaq ÿi'iguelaxauec da i'enaxatchigui naq'en so hua'auchiguiñi. 6Qataq so mashi inoxootapiguiñi aso nala', nachi qaltaq ÿi'iguelaxauga se'eso 'aco' so naponqa'. Nachi qaltaq ilalec so laÿipi 'onataxanaxaicpi qaica ca l'onatac. Nachi 'enapega, 'eeta': “¿Tá'ainco' yi qoviita'a ne'ena so na'axalom, qaica ca qad'onataxanaxaqui?” 7Nachi somayipi 'enapeco': “Cha'ayi qaica ca qomi' i'onataxanaxa'n ÿoqo'oyi.” Nachi se'eso 'aco' 'enapeco': “Qami' nataq'en qanqo'oñiuga qome yi ÿanaxanqa' da qauqataxañi. Aÿim ÿataqta sepagaqchiichigui qome aca lashiue ca qad'onataxanaxaqui.” 8Qaq co'ollaq mashi pe, nachi se'eso 'aco' 'enapega som ilotague' de'eda l'onataxanaxac, 'eeta': “'Auÿaxaneuga ca i'onataxanaxanecpi. Ime, qaq 'aushiiten, 'auamataxaachiguiñi qome da 'aushiiten cam pa'ateec da do'onataxan, chochi ivitta'a 'anqa'en nam hua'auchiguiñi da do'onataxan.” 9Ime, nachi anac som do'onataxanpi co'ollaq mashi inoxootapiguiñi aso nala'. Nachi ñi 'oonolec somayipi ÿaconguet aso 'oonole denario mayi nshiitenaqte ca do'onataxan yi 'oonolec na'a'q. 10Qaq co'ollaq mashi iviteuga som l'auaxanecpi da do'onataxan, nachi somayipi ipi'itaxano' da huo'otaq ÿagueec qanqoÿin aca nshiitenaqte. Qalaxayi nataq'en somayipi ÿaconguet aso 'oonole denario ñi 'oonolec. 11Qaq co'ollaq ÿaconguet aso nshiitenaqte, nachi qainoÿa so 'aco'. Nachi qoÿinapega, 12qoÿiita': “Se'eso pa'ateecpi chochi cada'acolec da do'onataxan, qalaq 'am 'eeta'am 'anqa'en añi qadashiue da 'aushiiten. Qamaq qomi' imauec so na'a'q da ñique'etaxanaqchigui so ntap da so'onataxanaqtac.” 13Qalaxayi se'eso 'aco' 'enapega so 'oonolec somayipi, 'eeta': “'Am shinapega da aÿim sa ishit da sa sepagaqchingui aso 'adashiue. Cha'ayi can 'am ñi'aqtaxane', qalaq 'am shinapega da 'au'onataxaalec aso 'oonole denario yi na'a'q. 14Qaq ÿoqo'oyi 'am no'on da 'auaconguet ana 'anshiitenaqte, ime, qaq qojec. Cha'ayi aÿim ñishitaique da 'eeta'am aso 'anshiitenaqte aca sanem som pa'ateec da do'onataxan. 15Cha'ayi ¿sa ishito' peta'a da aÿim maichi soiqueetac ca sangui aca maichi aÿom? ¿Loqo' chaq 'am 'adquiÿatega peta'a da souaxat da aÿim choxonnataxanaxaic?” 16Qaq 'eda qome da 'eetec nam nagui pa'ateec, qalaq namayipi qome l'auaxanecpi. Qaq nam nagui l'auaxanecpi, qalaq namayipi qome pa'ateec. Cha'ayi nagui ÿataqta qalota nam qaiÿaxanapi, qalaxayi saq 'amaqtaq qome nam nca'aguishicpi.
So Jesús qaltaq i'axata'a da nalaataguec
(Marcos 10.32-34; Lucas 18.31-34)
17Qaq so Jesús co'ollaq mashi tata'ague da Jerusalén, nachi iÿotaugalo soua doce lapaxaguenataqa. Nachi 'enapegalo, 'eeta':
18–Qami' qauaÿajñiitac da qomi' nagui saqtashiguemgue da Jerusalén. Qaq huaña qome yimayi, nachi na shiÿaxaua llalec qoÿaneu'a na lataxala'pi na ltaxaÿaxanaxanecpi na shiÿaxauapi da qaitaxaÿapegue' ñi Dios qataq nam dapaxaguenataxaatapeguec nam nqataxacpi, da yaqto' namayipi ÿoicnapec ca nalaataguec namayi, 19qataq da ÿaneu'a nam ÿaqa'a ca chigaqa'ague, da yaqto' ÿi'enai' namayi, qataq da iuaxaatac, ime, qaq iuaxaneuo. Qalaxayi qom mashi ivi' caua tres na'axa'te, nachi namayi qaltaq nca'aleec.
Dam iÿaxanaique aso late'e' soua Santiago qataq so Juan
(Marcos 10.35-45)
20Nachi nqochineu'a so Jesús aso late'e' soua Santiago qataq so Juan som llalqa so Zebedeo. Nachi asomayi lÿatreuo soua llalqa da i'adoto na l-llicte so Jesús, da yaqto' iÿaxanot. 21Nachi so Jesús inattac asomayi, 'eeta':
–¿Négue't ca 'auauotaique?
Nachi asomayi 'eeta':
–'Ai'an qome nagui ca 'ad'aqtac, da yaqto' qom ivita ca laloqo' ca 'ad'onataxanaxac da 'am nta'a, nachi ca 'oonolec ne'enaua dos ÿalqa huo'o ca nso'oota'ague da 'oic, qaq ca lÿa, qalaq nso'oota'ague da 'an'emaq.
22Nachi so Jesús 'enapeco':
–Qami' sa ishit da qauaÿajñi cam naigui dam qauÿaxañiitapegueu'a. ¿Qami' peta'a ishit qome da qauachii da que'ejnaxac mayi 'ico' aÿim qanÿomaxangui qataq dam achilaxac mayi saigui?
Nachi soomayi 'ena'po':
–Aja', seshitaq.
23Nachi somayi 'enapeco':
–Aja', 'eesa qami' ishit da 'ico' qanÿomiigui cam que'ejnaxac mayi saigui qataq dam chilaxac. Qalaxayi de'eda lataxac da qanso'oota'ague da aÿoic qataq da ñi'emaq, qalaq damayi sa ishit da aÿim qoÿami' da san. Cha'ayi chaqcata cam sogote da ÿaqataxaatapigui' ñi ita'a mayi nachica ca ÿanem.
24Qaq soua lÿa't diez lapaxaguenataqa co'ollaq hua'axaida de'eda, nachi soomayi ÿataqta dalemataÿalo se'esoua dos nqaÿa't. 25Nachi so Jesús iÿaxanoiguilo soomayi, nachi 'enapegalo, 'eeta':
–Qami' qauaÿajñi na lataxala'pi na ÿotta'a't shiÿaxauapi da namayipi ÿataqta 'eeta'am na 'aco' da ÿamaqpec na laÿipi, qaq nam 'añaxaicpi, namayipi ÿataqta i'otec da ÿalaxaguet da lamaxasoxonaxac naq'en na laÿipi.
26Qami', qalaxayi sa ishit da nachi 'eetec de'eda da qadataxaqui. Chaqdata da ca nshitaique da 'amaqtaqaic da qoñiita, qalaq camayi huapegue' na laÿipi, 27qataq camachicague't 'oonolec da qoñiita da nshitaique da l'auaxanec, qalaq camayi nachica ca l-latac na laÿipi. 28Qaq 'eeta'am na shiÿaxaua llalec da namayi sa ishit da anac da yaqto' qanayiutapegue'. Chaqdata da namayi anac da yaqto' huapec, qataq ÿan da nachaalataxac, da 'eeta'am naq'en aca lashiue da yaqto' qalota na qanca'alaxateec.
So Jesús nauaayiñi naq'en soua dos qanamaiqa
(Marcos 10.46-52; Lucas 18.35-43)
29Qaq co'ollaq mashi queda'ai yi la ciudad Jericó soomayi, nachi ÿataqta qalota so shiÿaxauapi ca'attague' so Jesús. 30Qaq huo'oi soua dos qanamaiqa nso'ootrañi, netrau'a na laÿi so nqa'aic. Qaq soomayi co'ollaq hua'axaidapegue' so Jesús da nateuga se'eso huetra'a, nachi soomayi i'ala'q, 'eetra':
–¡'Am qadataxala' mayi 'am llalec so qadta'a David, qomi' 'auchoxode'n qome!
31Nachi so shiÿaxauapi 'eetegalo soomayi da yaqto' ÿi'imaqte'. Qalaxayi soomayi qaltaq nquigaxattreec da l'alaxa'c, 'eetra':
–¡'Am qadataxala' mayi 'am llalec so qadta'a David, qomi' 'auchoxode'n qome!
32Nachi so Jesús vi'iiguet, nachi iÿaxanalo se'esoua qanamaiqa. Nachi inatta'pe, 'eeta':
–¿Négue't ca qanshiitaique da qami' so'oteque?
33Nachi soomayi 'ena'po':
–'Am qadataxala', qomyi sauoqtaique da ñauanaxañi.
34Nachi so Jesús ÿataqta huo'o da lchoxonnataxanaxa soomayi, nachi ipoteu'alo naua l'ai'te. Nachi soomayi nauaayiñi, nachi ca'atregue somayi.
Currently Selected:
Mateo 20: TBSNT
Highlight
Share
Copy
Want to have your highlights saved across all your devices? Sign up or sign in
Nuevo Testamento Toba Qom, Dios Nvita Na Shiỹaxauapi © Sociedades Bíblicas Unidas, 1981.
