Mateo 11

Soua lamaxa'shi so nachilaxanataxanaq l'enaxat Juan

(Lucas 7.18-35)

1Qaq so Jesús co'ollaq imat da ÿanema soua doce lapaxaguenataqa da lqataxac, nachi ca'ai yi hueta'a, da yaqto' dapaxaguenataxaalguete qataq da'aqtaxaalguete naua lÿa't 'ale'u yi'iyi qanayiuta'a 'alhua.

2Qaq so Juan mayi netaigui aso ncoñitaxanaxaqui, somayi ividau'a da ÿaÿaten 'enauac nam i'otpi so Cristo. Huaña, nachi huo'oi soua ÿama'q som quetague'pi somayi, da yaqto' nqo'ooda so Jesús, 3da yaqto' ina't, 'eeta':

–¿Peta'a nachi'am mayi 'am nta'a nca'alaxaqui mayi qoÿiitega 'auanac co'ollaxa, loqo' chaq ña seuataqtaique ca lÿa?

4Nachi so Jesús 'enapeco':

–Qauesomiÿa, qau'aqtaxañiim qome ca Juan 'enauac nam qami' qauauañiichigui qataq nam qau'aqaichigui. 5Qau'axachiim camayi da na qaicaua naua l'ai'te, qalaq nlouec, qataq nam ñi'iidauo naua lchil, qalaq queuoÿapigui', qataq nam nchiga na l'oc, qalaq qaiÿouec da lalolaxa, qataq nam sa hua'aqa, qalaq ishit da hua'aqa, qataq na mashi ileu, qalaq nca'aleec qanqoÿin, qataq nam choxodaqpi, qalaq qai'axatem da n'aqtac mayi chigaqaigui da nca'alaxa. 6Qaq ÿataqta machiguiñi qome cam sa ishit da aÿim ÿoqolguet.

7Qaq co'ollaq mashi je'c soomayi, nachi so Jesús cot da i'axattapeguem na shiÿaxauapi so Juan, 'eeta':

–¿Négue't som qami' qaumejnaxañiitapeuga yim tojlec 'alhua? ¿Peta'a coqta ÿacholaxaatac na l'at somaxa? 'A'i. 8Qaq ¿négue't som qami' qaumejnaxañiitapeuga? ¿Peta'a ÿataqta no'o'n naua alogo somaxa? Qami' qauaÿajñi da na shiÿaxauapi mayi ÿataqta no'o'n naua alogo, namayipi netaiguilo naua lma'te na nta'alpi. 9Qaq ¿chaq négue'to' som qami' qaumejnaxañiitapeuga? ¿Peta'a l'aqtaxanaxanec ñi Dios somaxa? Aja', ÿoqta 'eesa n'aqtaxanaxanec. Qaq somayi ÿataqta napacalec cam l'aqtaxanaxanec ñi Dios. 10Qaq so Juan nachiso som i'axa't co'ollaxa naua ñiyigui'shi l'aqtaqa ñi Dios, mayi 'eeta':

Aÿim samaq qome ca i'aqtaxanaxanec da sa'auaxangue dam 'ata'ague,

da yaqto' ÿaqataxanai' ca 'anqa'aic.

11Qaq ÿataqta 'eesa de'eda shinapec da 'enauac nam shiÿaxauapi co'ollaxa da chigoqta'ague, chochi ivitta'a nagui, da qaica ca ishit da napacalec da l'amaqchic so Juan mayi nachilaxanataxanaq. Qalaxayi nam ÿapacteec da qaica ca l'amaqchic da huetaigui dam l'onataxanaxac ñi Dios mayi neta'ague da piguem, namayipi napacalec somayi.

12Qaq chigoqta'a co'ollaq nvi' so Juan mayi nachilaxanataxanaq, qaq chochi ivitta'a nagui, da de'eda l'onataxanaxac ñi Dios mayi neta'ague da piguem da ÿataqta huo'o da ncogaxanataguec; qaq nam do'onataxaatega da yi'oqchigui l'añaxac, namayipi nshitaique da deuotaxanec damayi. 13Qaq 'enauac som l'aqtaxanaxanecpi ñi Dios qataq nam lqataxacpi so Moisés, naamayi i'axatta'agueta co'ollaxa de'eda n'onataxanaxac, chochi ivitta'a da nvi' so Juan. 14Qaq da qami' qanshiitaique da qau'amaqchiñi, qaq so Juan nachiso som lqui'i som l'aqtaxanaxanec ñi Dios l'enaxat Elías mayi qoÿiitega da ñi'iguelaq. 15Qaq cam ÿaÿaten da n'axaÿaxanaxac, qaq no'on da ÿataqta n'axaÿaxaachiguiñi.

16¿Negue'tom cam saloqnaxanem nam shiÿaxauapi mayi huetaiguilo nagui ne'enaua na'axa'te mayi souaqtaiguilo? Qomyi 'eeta'am peta'a nam ñaqpiolec mayi hueta'a ca n'ashaqa', nachi i'alaxalec nam laÿipi, 'eeta': 17“Sashiidaqtapiguilo naua qadashiide, qalaq qami' sa ishit da qauasochi; qataq so'onaqta'pe naua lalaco na huasouaxaicpi, qalaq sa ishit da qanoÿiñiitac.” 18Cha'ayi anac so Juan, qalaq somayi sa ishit da deque'e, qataq sa ishit da nÿomtac, nachi qami' qoñiitega da huo'o ca l'ec leguemaxaic. 19Ime, qataq anac na shiÿaxaua llalec, qaq namayi deque'etac, qataq nÿomtac, nachi qami' qoñiitega da namayi qui'axaic, nÿomaxaic, qataq nauochaxaua nam 'itaxaloxoicpi qataq nam ÿacootapeeguet ana nshiitenaqte ca nta'a. Qalaxayi da laÿajnec ñi Dios yi'oq cam naigui.

Soua pueblo mayi sa ÿala'q

(Lucas 10.13-15)

20Nachi so Jesús ÿataqta ividaxattega nam netaña na pueblopi mayi huaña da ÿacteec na i'ot mayi sa qaÿauanapega, cha'ayi nam shiÿaxauapi netañalo, naamayi sa ishit da ÿaxaadeec naua n'onataxaco. Nachi 'eeta':

21–¡Ÿataqta qami' choxodaxasodo', qami' mayi qoñiitaña yi pueblo Corazín! ¡Nataq'en qami' mayi qoñiitaña yi pueblo Betsaida! Cha'ayi nam netaña yi la ciudad Tiro qataq yi Sidón, da huo'otaq huañáctaxa nam qai'otpi mayi qami' huaiguilo, qaq sogotéctaxa quesom yimayipi da ca'aisalo naua n'onataxaco, qataq da nachaxaata da ÿaayiñi naua alogo na huasouaxaic qataq da nmettala't na alo. 22Qaq ÿoqo'oyi qami' shinapegalo da que'eca pa'ateec na'a'q qom qaÿauo'o ca nhuaxanaguecna, nachi qami' ÿataqta ÿacteec ca qanhuaxanaguiiqui, qaq saq 'en'am nam netaña yi Tiro qataq yi Sidón. 23Qataq 'am pueblo Capernaum, ¿'am 'aupi'itaxaatega peta'a da ÿataqta 'avido'ot na piguem? Qalaxayi 'am qañi'iguelaxajñi qome, nachi ÿataqta 'avidaña cam laponqa' na leuaxaicpi. Cha'ayi yi la ciudad Sodoma da huo'otaq huañáctaxa nam so'otpi mayi huaigui da qoñiita, nachi se'eso la ciudad ishíttaxa da ivittaiguilo naua na'axa'te mayi souaqtaiguilo. 24Qaq aÿim qami' shinapegalo da que'eca pa'ateec na'a'q qom qaÿauo'o ca nhuaxanaguecna, nachi qami' ÿataqta ÿacteec ca qanhuaxanaguiiqui, qaq saq 'en'am se'eso shiÿaxauapi mayi netaña yi'iyi 'alhua Sodoma.

Aÿim 'auanau'a, yaqto' 'anmateec

(Lucas 10.21-22)

25Nachi se'eso na'a'q so Jesús 'eeta':

–'Am ita'a mayi 'am lataxala' na neta'ague da piguem qataq ana 'alhua, 'am shi'oxoden, cha'ayi 'am 'auachaxana nam qaica ca ÿaÿajnapec da 'ad'onataxanaxac mayi 'ai'oxoochiisop co'ollaxa nam ÿajnaxanaxaicpi qataq nam huattonaxanaxaicpi. 26Aja', 'am ita'a, cha'ayi nachida dam maichi 'adhuennataxac.

27Ñi ita'a aÿim imato'ot 'enauac da l'onataxanaxac. Qaq qaica ca ishit da ÿauatton na llalec, chaqñita ñimayi mayi ÿauatton. Qataq qaica ca ishit da ÿauatton ñimayi, chaqnata na llalec mayi ÿauatton, qataq cam ÿauattonaxanaxanec ñimayi nam llalec. 28Qauanaiua'a aÿim 'enauac da qoñiita mayi qanasamiitañi souaxat da qad'onataxanaxaqui qataq souaxat na qayi'aqui, nachi aÿim qami' ñimataxanaxaadeec. 29Qaq qauacoñiiguet qome dam ÿachoxonaxala' mayi qami' sachilguete, qataq aÿim qanapaxaguiñiÿa, cha'ayi ÿataqta aÿim hualaxauaic qataq da iquiyaqteÿaxac sa ishit da n'amqajnaxaic, nachi ishit qome da qauanachiÿa ca nmataxac da qanachaalataxaqui. 30Qaq dam ÿachoxonaxala' mayi qami' sachilguete, damayi ÿataqta qaica ca lqalaic da qaÿachi, qataq dam qayi'aqui mayi qami' sachilguete ÿataqta huaÿoxootac da qaÿachi.

Currently Selected:

Mateo 11: TBSNT

Highlight

Copy