Lucas 5

So nalliguishic nÿaqpi mayi sa qaÿauanapega

(Mateo 4.18-22; Marcos 1.16-20)

1Qaq huo'o so na'a'q so Jesús hueto'ot na loigue aso lapel late'edai mayi huaña yi Genesaret. Nachi ÿataqta qalota so anac shiÿaxauapi, ivitta'a da qanpataxagui somayi, cha'ayi somayipi huotaique da n'axaÿaxana da l'aqtac ñi Dios. 2Nachi so Jesús ila'alo soua dos barco qui'itchiguilo, neto'oto na loigue asa'aso lapel late'edai, cha'ayi som ÿi'acoxoicpi huenoteeguesopa soomayi. Qaq iÿota'pe soua lasagoxonqa'te. 3Nachi so Jesús huenojñigui aso 'oonole se'esoua barco asom lalamaqte so Simón, nachi iÿaxanot somayi da cada'ac da nquigaxattaxasom. Ime, nachi so Jesús nso'oongui aso barco, nachi cot da ÿapaxaguen na shiÿaxauapi co'ollaq huaña se'eso loigue. 4Qaq co'ollaq ime da ltaxaÿaxac, nachi 'enapega so Simón, 'eeta':

–'Auauegaxaama yi laiñi ana lapel añi barco. Ime, qaq qaualliquiiñi na qadasagoxonaxachi.

5Nachi so Simón 'enapeco':

–'Am mayi 'auapaxaguenataxaatac, qomi' imauec so pe da shi'acoqtac, qalaq qaica ca qadalliguishic. Qalaxayi 'am yi qomi' 'auama'q, qaq nagui aÿim sasaxañi na ÿasagoxonaxat.

6Qaq co'ollaq mashi qaÿasaxañi so naleguec, nachi ÿataqta qalota so nalliguishic nÿaq. Qaq ÿoqo'oyi huotaique da colaqa'ague so naleguec. 7Nachi soomayi ÿatecapeguetalo soua lÿa't mayi netanguilo aso lÿa barco, da yaqto' ana'c da itaua'n soomayi. Nachi se'esoua lÿa't ana'c, nachi ÿataqta qanlaxatchiguilo soua dos barco. Qaq ÿoqo'oyi huac da iyiiyiñi soua barco. 8Qaq co'ollaq noma de'eda so Simón, nachi i'adoto naua l-llicte so Jesús. Nachi 'enapega, 'eeta':

–Aÿim 'auÿojlec qome, 'am ÿataxala', cha'ayi aÿim ÿataqta aÿim ÿale 'itaxaloxoic.

9Cha'ayi so Simón ÿataqta ñi'i, nataq'en 'enauac som hueta'aguetpi souaxat da 'eetec som nalliguishicpi. 10Nataq'en ñi'i't so Santiago qataq so Juan som llalqa so Zebedeo mayi lÿa't so Simón. Qalaxayi so Jesús 'enapega so Simón, 'eeta':

–Sa ishit qome da 'ayi'i, cha'ayi nagui qami' sanaguilo da qami' ÿi'acoxoiqa da qanmichiÿaique na shiÿaxauapi.

11Nachi co'ollaq mashi qaÿaueguetra soua barco, nachi imauec da qan'onaxatchiguilo, nachi qaica'ategue so Jesús.

So Jesús nataden so nchiga na l'oc

(Mateo 8.1-4; Marcos 1.40-45)

12Qaq co'ollaq hueta'a so 'oonolec som pueblopi so Jesús, nachi anac so shiÿaxaua nchiga na l'oc. Nachi i'adoto naua l-llicte, ividaxata'aguet na latap naq'en na 'alhua. Nachi nachoxodeetot somayi, 'eeta':

–'Am ÿataxala', da 'aushit, qaq no'on da 'auÿouec da ÿalolaxa.

13Nachi so Jesús ipoteu'a somayi, nachi 'enapega, 'eeta':

–Aja', seshit. Nagui 'am qui'itta.

Qaq co'ollaq nasaxauec de'eda l'aqtac, nachi so nalolaxa ca'ai na l'oc som sa no'on. 14Nachi so Jesús 'enapega somayi da sa ishit da huo'o ca i'axatem de'eda. Qataq 'enapega, 'eeta':

–Chaqdata da 'am qojec, 'anachaxaneu'a ñi ltaxaÿaxanaxanec na shiÿaxauapi da qaitaxaÿapegue' ñi Dios. Ime, qaq 'ai'aneuo aca 'adachitaqtaxanaqte mayi damaxasoxoolec co'olloxochiyi so Moisés acam naigui da mashi 'am qui'itta, yaqto' qaÿaÿaten 'enauac da mashi 'am qui'itta souaxat so 'adalolaxa.

15Qalaxayi da n'aqtaguec so Jesús ÿataqta nquictauec, nachi ÿataqta qalota na shiÿaxauapi anac da ÿauotaique da n'axaÿaxana qataq huotaique da nataden somayi nam lalolaxapi. 16Qalaxayi so Jesús tauga quenaxa cam tojlec mayi qaica na shiÿaxauapi. Huaña, nachi nqouagaxaueetac.

So Jesús nataden so sa da'añiigue

(Mateo 9.1-8; Marcos 2.1-12)

17Qaq huo'o so na'a'q so Jesús dapaxaguenataxaatac, nachi huo'o na ÿalectauo, nso'ootañi, nam ÿalectaigui na fariseopi qataq nam dapaxaguenataxaatapeguec na nqataxacpi mayi anac, chigaqa'alo naua 'ale'u yim Galilea qataq yi Judea qataq Jerusalén. Nachi da l'añaxac ñi Dios yi'oq da hueta'aguet somayi co'ollaq natadeetac na sa no'onpi. 18Huaña, nachi nvildeuo soua shiÿaxa'u npeetragui so lmala' so lÿa't mayi sa da'añiigue, nachi qaÿauotaique da qaipa'axaneuo so noÿic da qaidou'a so Jesús. 19Qalaxayi sa ishit da qaÿanata ca ñigueuo, cha'ayi ÿataqta qalota na shiÿaxauapi. Huaña, nachi qainotshiguemec na l-laq so noÿic, nachi qanqat so lapo'. Ime, nachi qaÿasaxañi so lmala' so sa no'on, tachiguingui qanqoÿin so shiÿaxauapi cam hueta'a so Jesús. 20Nachi so Jesús co'ollaq ila'a da lpi'iÿaxa'c soomayi, nachi 'enapega so sa no'on, 'eeta':

–'Am ÿaqaÿa, na 'adasouaxashitpi nagui 'enauac qaÿapalaxat.

21Nachi nam dapaxaguenataxaatapeguec na nqataxacpi qataq nam ÿalectaigui na fariseopi nachi deuennataxaatac, 'eeta': “¿Négue't dam da' shiÿaxaua? Yi ÿi'inai' ñim Dios nam l'aqtaqa. Yi qaica ca ishit da ÿapalaxat na nasouaxashitpi, nachaqñita ñi Dios mayi ishit.”

22Qalaxayi so Jesús ÿaÿaten da lhuennataxa somayipi, nachi 'enapeco':

–¿Tá'ainco' yi qadhuennataxaqui dam da'? 23¿Chaq negue't ca ÿoqta saq alaq da qoÿinapec, peta'a da qoÿiita': “Na 'adasouaxashitpi 'enauac qaÿapalaxat,” huo'otaq da qoÿiita': “Qoñishiguem, ime, qaq 'auqueuoÿapigui'?” 24Qalaxayi moxochaqa, nagui qami' nachaxanalo ne'ena shiÿaxaua llalec da namayi ÿataqta huo'o naq 'enec ana 'alhua da ishit da ÿapalaxat na nasouaxashitpi.

Huaña, nachi 'enapega som ÿale mayi sa da'añiigue, 'eeta':

–Nagui 'am shinapega, qoñishiguem, 'aunana't na 'admala'. Ime, qaq qojec, 'anqo'ona ca 'adma'.

25Nachi saqaÿaloq da ñishiguem som sa da'añiigue, ÿauaachigui 'enauac somayipi. Ime, nachi inana't so lmala' mayi nnaatalec, nachi nqo'ona ca lma', ÿataqta ÿi'oxodeetac ñi Dios. 26Nachi 'enauac so shiÿaxauapi ÿataqta huo'o da l'aalaxa, nataq'en ÿi'oxodeetac ñi Dios, qataq ÿataqta huo'o da lcolanaxa. Nachi 'enapeco':

–Na na'a'q ÿataqta qaica ca 'en'am da lli'oxoyic da sauanaqchigui.

So Jesús iÿaxana so Leví

(Mateo 9.9-13; Marcos 2.13-17)

27Qaq co'ollaq ime de'eda, nachi so Jesús inoxoneec, nachi ilalec som ÿacootapeeguet ana nshiitenaqte ca nta'a. Somayi l'enaxat Leví, qaq nso'ootañi, netaña so lshiitenaxanqa' nam deshiitenaxaatac. Nachi 'enapego', 'eeta':

–Aÿim 'auca'ategue.

28Nachi somayi ñishiguem, qaica ca ipacapegue', nachi ca'ategue so Jesús.

29Ime, qaq i'ot so lta'adaic lqui'axac, huaña so lma' da lqui'axaua so Jesús. Nachi ÿataqta qalota na ÿalectauo nam ÿacootapeeguet ana nshiitenaqte ca nta'a, qataq qalota nam laÿipi nso'ootañi, datatalec se'eso nqui'axala'. 30Qalaxayi nam fariseopi qataq na laÿipi mayi dapaxaguenataxaatapeguec na nqataxacpi nachi quetapeguelguete soua nale't so Jesús. Nachi 'eetegalo, 'eeta':

–¿Tá'ainco' qami' yi qadqui'axauai nam 'itaxaloxoicpi qataq nam ÿacootapeeguet ana nshiitenaqte ca nta'a?

31Nachi so Jesús 'enapeco':

–Sa ishit da iuen ca natannataxanaq ca shiÿaxaua da qaica ca da qataq no'oita, chaqcata cam sa no'on mayi iuen. 32Aÿim sa ishit da ñanac da seÿaxana ca no'on shiÿaxaua, chaqcata ca 'itaxaloxoic da yaqto' ca'aisalo naua n'onataxaco.

Qainat so Jesús da chaq 'eetec ca lataxac ca shiÿaxaua da nqouaqchit

(Mateo 9.14-17; Marcos 2.18-22)

33Nachi somayipi inattac so Jesús, 'eeta':

–¿Tá'ainco' yi ÿapacteec da nqouaqchitaxac qataq da nqouagaxaunaxac nam ca'attague' so Juan qataq nam fariseopi, qaq nam 'adapaxaguenatacpi nda'a't da deque'etac qataq nÿomtac?

34Nachi so Jesús 'enapeco':

–¿Qami' peta'a ishito' da nqouaqchit qanqashiñi nam ÿalectau'a ca nadonaxac da huo'otaq ña ÿalectaigui camayipi cam huotaique da qaÿadonguet? 35Qalaxayi qom ivita ca laloqo' da qanqateu'a que'eca adonaq, huaña qome, qaqca ishit da nqouaqchit camayipi.

36Nataq'en ÿauo'o da daloqnaxana, 'eeta':

–Qaca aca ishit da ichigueec ca laÿi aca npoto dalaxaale, ime, qaq dapannaxana da napaden aca toguishi npoto. Cha'ayi da nachi 'eetec de'eda, qaq ishit da n'axat ca dalaxaicolec, cha'ayi que'eca dalaxaicolec sa ishit da taiguet acam toguishi npoto. 37Qataq nataq'en sa ishit da qaÿachangui aca shiguiÿac l'oc ltoxoi ca lataxa mayi saxanaxa da ime. Cha'ayi da nachi qoÿiitec de'eda, nachi que'eca lataxa mayi dalaxaic ishit da icolaxata'ague aca l'oc, nachi ishit da daqat som lataxa dalaxaic, nachi 'en'am aso laÿi' l'oc. 38Qaq ÿoqo'oyi que'eca dalaxaicolec lataxa, camayi qaÿachangui acam dalaxaale l'oc ca shiguiÿac, qaq yaqto' caamayi nachi 'eetai' da sa ishit da daqa't. 39Qataq nataq'en qaica ca ishit da nÿomgui ca toguishic lataxa, ime, qataq nshitaique ca dalaxaic lataxa, cha'ayi camayi 'eeta': “Na toguishic lataxa mayi no'on.”

Currently Selected:

Lucas 5: TBSNT

Highlight

Copy