Juan 13

So Jesús iÿoi' naua lapia'te so lapaxaguenatacpi

1Qaq nachiso se'eso lÿa na'a'q so huetoigui so naponaxac da qaiuennate so na'a'q co'ollaq qanayica'ai yi Egipto. Qaq so Jesús mashi ÿaÿaten da ivita yi laloqo' da ca'ai ana 'alhua da ÿi'iguelaxa ñi lta'a. Qaq somayi nachi 'eetai' da lauotaxanaqtaic na lalamaxatpi mayi huetalec ana 'alhua, qaq nagui nachi ÿachaxana somayipi da 'eetec dam lta'adaic lauotaxanaqtaic.

2-4Qaq so shiÿaxaua mayi lma'na, somayi mashi sogote da ÿachaigui da lquiyaqteÿaxac so Judas Iscariote, som llalec so Simón, da lhuennataxac da yaqto' ÿaneuo so Jesús. Qaq so Jesús, somayi ÿaÿateeta da chigoqtot ñi Dios, qataq ÿaÿateeta da ÿi'iguelaxa ñimayi, qataq da ñi lta'a ÿanem somayi 'enauac da l'añaxac. Nachi co'ollaq mashi deque'etacpi somayipi, nachi so Jesús nachajñi, nachi nqat so lapo', qataq nsaachigui so pilotaxat. 5Nachi icoyingui so 'etaxat so pilotaxaqui, nachi iÿoi' naua lapia'te so lapaxaguenatacpi qataq da ÿaqaxaÿaxa't, huota'a naq'en se'eso pilotaxat mayi nsattagui.

6Qaq co'ollaq taÿa'a so Simón Pedro da huotaique da iÿoi' naua lapia'te, nachi somayi 'enapeco':

–'Am ÿataxala', ¿peta'a 'anshitaique da 'auÿoi' naua ÿapia'te?

7Nachi so Jesús 'enapeco':

–Nagui 'am sa ishit da 'auaÿaten da so'ottac, qalaxayi qom qaÿata'ague damayi, nachi ishit da 'auaÿaten.

8Qalaxayi so Pedro 'enapeco':

–'A'i, sa ishit da 'am sashinem da 'auÿoi' naua ÿapia'te.

Nachi so Jesús 'enapega somayi, 'eeta':

–Da sa ishit da 'am seÿo, nachi 'am sa ishit qome da 'am ÿapaxaguenatac.

9Nachi so Simón Pedro 'enapeco':

–Hua' qone', 'am ÿataxala', qalaxayi sa ishit qome da nachaqnauate' naua ÿapia'te da 'auÿoi', nataq'en naua iua'q qataq na ÿaqaic.

10Qalaxayi so Jesús 'enapeco':

–Cam ñaq chita'ague da nachiltac, camayi sa iuen da qaltaq nÿo, cha'ayi nachaqnauate' naua lapia'te iÿoi', cha'ayi camayi sogote da qui'itta. Qaq qami' sogote da qami' qui'itte', nai'ctaxa da sa imauec da ÿoqta qami' qui'itte'.

11Somayi 'enapec de'eda, 'eeta': “Sa ishit da imauec da ÿoqta qami' qui'itte',” cha'ayi somayi ÿaÿateetac da huo'o som huotaique da ÿaneuo somayi.

12Qaq co'ollaq imat da iÿoi' naua lapia'te somayipi, nachi so Jesús qataq napogoña so lapo', nachi nso'ooñi da datalec so nqui'axala', nachi 'enapeco':

–¿Qami' peta'a qauaÿajñi de'eda qami' so'oteque? 13Qami' naxa da aÿim qauÿaxañiÿa, qalaq qoñiÿapec da aÿim sapaxaguenataxanapec qataq aÿim qadataxala'ai. Qaq damayi sa ishit da soqolguet, ÿataqta 'eesa. 14Qaq aÿim mayi sapaxaguenataxaatac qataq aÿim nataxala', yi seÿota'pe naua qadapia'chilli', qaq nagui no'on da ñi 'oonolec da qoñiita nataq'en iÿoi' naua lapia'te ca lÿa. 15Aÿim qami' sachaxanalo de'eda, da yaqto' qauloilec, yaqto' qami' ishit da qauloilec da qau'ochi de'eda qami' so'oteque. 16Qaq ÿataqta 'eesa de'eda qami' sa'axatema, da qaica ca chochi nlatac da napacalec ca n'aco', qataq qaica ca namaxashic da ishit da napacalec cam ÿamaqtac camayi. 17Qaq qami' da qauaÿajñiita de'eda, qataq ishit da qau'ochi, nachi ÿataqta qami' machiyiñi qome.

18Qaq aÿim sa ishit da imauec da qoñiita da qami' setaqtapoiguilo, cha'ayi aÿim saÿateeta nam ÿataqta llica'aguishicpi. Qalaxayi ÿataqta ipacchigui qome da 'enapec naua ñiyigui'shi n'aqtaqa, mayi 'eeta': “Cam maichi iqui'axaua, qalaq camayi aÿim dataÿa'aguet da aÿim npa'aguene'.” 19Qaq aÿim qami' sa'axatema de'eda, yaqto' qom ivita da ipacchigui, nachi qami' ishit da qau'amaqchiñi da aÿim mayi nachaÿimta. 20Qaq ÿataqta 'eesa de'eda qami' sa'axatema, da ca ÿaconguet cam ÿamaxashic, qaq camayi nachaÿim da aÿim ÿaconguet. Qaq cam aÿim ÿaconguet, camayi ÿaconguet ñim aÿim namaq.

So Jesús i'axata'a so Judas da ÿaneuo somayi

(Mateo 26.20-25; Marcos 14.17-21; Lucas 22.21-23)

21Qaq co'ollaq ime da nasaxauec de'eda l'aqtac, nachi so Jesús nomteguet da sa nalo'oguet da lquiyaqteÿaxac. Huaña, nachi ÿataqta i'axatta de'eda, 'eeta':

–Ÿataqta 'eesa de'eda qami' sa'axatema, da 'oonolec da qoñiita ñi aÿim ÿaneuo qome.

22Nachi so lapaxaguenatacpi somayi namatapega't, cha'ayi sa ÿaÿaten chaq negue'tca cam qoÿiitega somayipi. 23Qaq huo'o so 'oonolec som lapaxaguenatacpi so Jesús, som ÿataqta nauochaxaua, qaq somayi nachi netau'a na laÿi da lqui'axaua. 24Nachi so Simón Pedro ÿatecapega somayi, da yaqto' inat so Jesús da chaq negue't ca 'eetega somayi. 25Nachi somayi ÿataqta nquigueu'a so Jesús, nachi inat, 'eeta':

–'Am ÿataxala', ¿chaq négue't camaxa?

26Nachi so Jesús 'enapeco':

–Aÿim qome ñauolchiiñi ca laÿi ana pan, qaq ca aÿim sami', qachi nachica.

Ime, nachi somayi nauolchiiñi so laÿi ana pan, nachi ÿami' so Judas Iscariote, som llalec so Simón. 27Qaq co'ollaq lcopa'a da ÿaconguet so laÿi aso pan so Judas, nachi so Satanás taigui da lquiyaqteÿaxac somayi. Nachi so Jesús 'enapego' somayi, 'eeta':

–Cam 'anshitaique da 'au'ot, no'on da 'auÿalapegue' da 'au'ot.

28Qalaxayi sa ishit da huo'o ca 'oonolec som lqui'axauapi mayi datatalec so nqui'axala' da huo'otaq ÿaÿaten da chaq ta'ainec da 'enapec de'eda. 29Cha'ayi so Judas, somayi nachiso so ilotague' aso laÿi' ana plata, qaq ÿoqo'oyi huo'o na ipi'itaxaatega da qoÿiitega somayi da huo'o ca queu'a nallic souaxat se'eso naponaxac, huo'otaq da huo'o aca ÿami' nam choxodaqpi. 30Nachi so Judas co'ollaq ime da ÿaconguet so pan, nachi pa'auec. Qalchaq mashi pe.

Da dalaxaic namaxasoxonaxac

31Qaq co'ollaq mashi pa'auec so Judas, nachi so Jesús 'enapeco':

–Nagui qaÿachaxan da lli'oxoyic na shiÿaxaua llalec, qataq da lli'oxoyic ñi Dios qaÿachaxan da chigoqchigui qanqoÿin namayi. 32Qaq ne'ena shiÿaxaua llalec da ÿachaxan da lli'oxoyic ñi Dios, qaq ñi Dios nachi ÿachaxan qome da lli'oxoyic namayi, qaq mashi saqaÿaloq qome da ÿachaxan damayi. 33Qami' ÿalqolqa, mashi sa ishit da loigui da qami' soota'agueta. Qaq qami' qome aÿim qanmichiitaique, qalaxayi nachi 'eeta'am de'eda i'aqtac co'ollaq shiitega na judiopi da shiita': Sa ishit qome da qauañoxochi da qanqo'oñiÿa cam saÿa. 34Qaq nagui qami' sanema da dalaxaic namaxasoxonaxac, 'eeta': Ñi 'oonolec qome da qoñiita ÿataqta ÿauotec ca lÿa. Qoñiita'am da shiitec da ÿataqta qami' sauoteque, qaq nachida qome da qoñiitec da ñi 'oonolec da qoñiita ÿataqta ÿauotec ca lÿa. 35Qaq da ñi 'oonolec da qoñiita ÿataqta ÿauotec ca lÿa, nachi 'enauac qome na huetalec ana 'alhua ÿaÿaten da ÿataqta 'eesa da qami' ÿapaxaguenataqa.

So Jesús i'axata'a da so Pedro 'enapec sa ÿauatton somayi

(Mateo 26.31-35; Marcos 14.27-31; Lucas 22.31-34)

36Nachi so Simón Pedro inat so Jesús, 'eeta':

–'Am ÿataxala', ¿chaq huá'ague qome ca 'auataigue?

Nachi so Jesús 'enapeco':

–Cam sataigue nagui, 'am sa ishit qome da 'auañoxot da 'aigue. Qalaxayi qom mashi lcopa'a, nachi 'am qome ishit da aÿim qoquegue.

37Nachi so Pedro 'enapeco':

–'Am ÿataxala', ¿tá'ainco' yi sa ishit da 'am seca'ategue nagui? Yi aÿim qaica ca shiga da nai'ctaxa da 'am saalec da ñachaalataxac.

38Nachi so Jesús 'enapego' somayi, 'eeta':

–¿Ÿoqta 'eesa peta'a da 'am ishit da aÿim 'ai'aalec da 'anachaalataxac? Ÿoqta 'eesa de'eda 'am sa'axatem nagui, da qom yaqta'a da noÿin ca 'olgaxa, qaq mashi sogote qome da ivi' tres da 'avi'iguelaxalec da qonetega aÿim sa 'auauatton.

Currently Selected:

Juan 13: TBSNT

Highlight

Copy