Gálatas 6
6
Ñi 'oonolec itauan ca lÿa
1Qami' ÿaqaÿa't, da huo'o ca 'oonolec da qoñiita huo'o ca ilamaxata'aguet lasouaxashit, nachi qami' mayi qami' netanguita so Espíritu ishit da qautauañi camayi, da yaqto' ishit da ñishiguem. Qalaxayi ÿataqta huesottac da qadquiyaqteÿaxaqui. Qataq ñi 'oonolec ÿataqta ntelañi. Ten, sa iuena'a camayi da nataq'en qaÿauo'o ca ñi'iguenataguec. 2Ñi 'oonolec da qoñiita itauan qome ca lÿa da nachishiguem ca lli'ac, qaq yaqto' ishit da qaupaquiichigui da l'aqtac so Cristo.
3Cha'ayi ca ipi'itaxaatega da 'amaqtaqaic, qamaq qaica ca naigui, qaq camayi 'eeta'am da maichi natenachittapeguela't. 4Qaq ÿoqo'oyi ñi 'oonolec ishit da maichi nmit da maichi lataxac, yaqto' ishit da machiguiñi souaxat da maichi lataxac, qaq sa ishit da nachida da lataxac ca lÿa. 5Cha'ayi ñi 'oonolec maichi nachishiguem ca lli'ac.
6Qaq cam ÿaconguet da napaxaguenataguec da l'aqtac ñi Dios, qaq camayi no'on da nhuaate' ca napaxaguenaxala' 'enauac nam hueto'ot lsallaxa.
7Qami' sa ishit qome da qanatenachiitapeguela't, cha'ayi qaica ca ishit da ÿi'inai' ñi Dios. Cha'ayi cam ÿaañi ca shiÿaxaua, qaq nachica cam nqat ca alaÿaxac. 8Ca shiÿaxaua da nqopita da ÿaañi cam 'eetapeguec da lapachiyaxac, nachi camayi nqat ca naigui nleuaxa de'eda lapachiyaxac mayi ÿaañi. Qalaxayi da huo'otaq ÿaañi cam ÿaÿamaxadeeta so Espíritu, nachi so Espíritu ÿanem camayi da nqat ca achaalataxac mayi qaica ca loga't. 9Qaq ÿoqo'oyi sa ishit qome da ñasamaxañi da so'otaq ca ÿaÿamaqchiguiñi. Cha'ayi qom huo'otaq sa ñasamaxañi, nachi qom ivita ca naloqnec, nachi ñaqataq cam naigui ca so'otaqtac. 10Qaq ÿoqo'oyi da ivita da huo'o ca qaddaqa', nachi 'enauac so'otaxac ca ÿaÿamaqchiguiñi na shiÿaxauapi, lamaaxa da nachina na qad'amqajnataxanaxauapi.
Nqataxac qataq da pa'ateec nquinaxanaxac
11Ña qauloÿa da ÿataqta lta'al naua maichi ÿidaqa mayi shilyiñi nagui da qami' samaxalo. 12Nam shiÿaxauapi mayi qami' ÿileeta'pe da yaqto' qami' ishit da qaÿauo'o ca qan'anaxachi, namayipi 'eetec de'eda, cha'ayi chochi nshitaique da qaica ca da naq'en na shiÿaxauapi, da yaqto' sa ishit da qaicanapec souaxat so Cristo co'ollaq qaiuaxanguet so npe'enaxaqui. 13Cha'ayi ivida'a nam shiÿaxauapi mayi nañanguet da qaÿauo'o na n'anaxat na l'oc, namayipi sa ishit da i'ot 'enauac nam 'enapec na nqataxacpi. Qalaxayi namayipi chochi nshitaique da qami' qaÿauo'o na qan'anaxachi, yaqto' namayipi ishit da n'amaqten da ishit da qami' ÿile'n da yaqto' qaÿauo'o ca qan'anaxachi. 14Qaq aÿim, qalaxayi sa ishit da huo'o ca ñi'amqajnaxac; chaqdata da l-leuaxa so qadataxala' Jesucristo co'ollaq qaiuaxanguet so npe'enaxaqui. Cha'ayi nachi chigoqchigui de'eda l-leuaxa so Cristo co'ollaq qaiuaxaneuo da huo'o mshi 'enauac na huetalec ana 'alhua 'eeta'am ñaq'en da leuaxaic, qataq aÿim 'eeta'am naq'en da aÿim leuaxaic. 15Cha'ayi da mashi ñi'adaqtau'a so Cristo Jesús, nachi ÿataqta qaica ca naigui da qaÿauo'o ca n'anaxat ca shiÿaxaua, huo'otaq da jegatai'. Cha'ayi da ÿataqta huo'o ca naigui, nachida da qanadalaxataguec da qomi' qanadalaxa't. 16Qaq 'enauac qome nam quetegue de'eda ñiquiaxac, qataq 'enauac nam lalamaxatpi ñi Dios, namayipi ÿaconguet qome da nlagaxayic qataq da nchoxonnataxanaxa.
17Qaq ÿoqo'oyi nachi tachiguiña nagui da sa ishit qome da huo'o ca aÿim nqanaxattac, cha'ayi nam lliguiñipi na i'oc na ñiuaxanec, namayi i'axat da ÿoqta 'eesa da aÿim lamaxashic so qadataxala' Jesús.
18Qami' ÿaqaÿa't, so qadataxala' Jesucristo qami' ÿanema qome da lqouagaxanaqtaic 'enauac da qoñiita. Aja', nachi 'eetec.
Currently Selected:
Gálatas 6: TBSNT
Highlight
Share
Copy
Want to have your highlights saved across all your devices? Sign up or sign in
Nuevo Testamento Toba Qom, Dios Nvita Na Shiỹaxauapi © Sociedades Bíblicas Unidas, 1981.
