Gálatas 5
5
Sa ishit qome da qai'axañiiuec da qami' huesochiyiñi
1So Cristo qomi' ÿanema da qansoxoc, da yaqto' qomi' huesochiyiñi. Qaq ÿoqo'oyi qami' no'on qome da sa ishit da qai'axañiiuec de'eda qansoxoqui. Qataq sa ishit qome da qavi'iguelaqÿa da chochi qami' nlataqa.
2Nagui aÿim qan'axaÿaxañiÿa. Aÿim Pablo, qami' shinapegalo da huo'otaq qanañañiiguet da qaÿauo'o ca n'anaxat na l'oc ñi 'oonolec da qoñiita, nachi so Cristo ÿataqta qaica ca naigui qanqashiñi. 3Qaq ÿoqo'oyi qaltaq shi'iguelaxalec da shinapec da ca camachaqca shiÿaxaua da nañanguet da qaÿauo'o ca n'anaxat na l'oc, nachi camayi ishit da i'ot 'enauac nam damaxasoxoolec na nqataxacpi mayi chigoqo'ot so Moisés. 4Qaq qami' mayi qaupi'itaxañiitega da qami' ÿaÿamaxadeete' ñi Dios souaxat da qau'ochiitac nam nqataxacpi, nachi qami' ÿataqta qoquiÿa'ai so Cristo qataq da lsoxoyic ñi Dios. 5Cha'ayi qomi' sachigoxotaqchigui so Espíritu Santo qataq dam qadpi'iÿaxac da huo'o mshi qomi' huo'o da qanaquitaxac da ishit da qomi' ÿaÿamaxadeete' ñi Dios. 6Qataq da mashi sogote da ñi'adaqtau'a so Cristo Jesús, nachi ÿataqta qaica ca naigui da qaÿauo'o ca n'anaxat na l'oc ca shiÿaxaua, huo'otaq jegatai'. Cha'ayi dam ÿataqta huo'o ca naigui, nachida dam qadpi'iÿaxac. Qaq de'eda qadpi'iÿaxac, nachida da qomi' nachaatoiguilo naq'en da nsoxoyic.
7Qaq qami' ÿataqta qauaÿamaqaichiguiñi co'ollaxa. Qalaq ¿chaq négue't cam chigoqchigui da huo'o mshi qami' qai'axañiiñi da qaualaqailec dam 'eesa lataxac? 8Qaq damayi sa ishit da chigoqchigui ñim Dios mayi qami' iÿaxanalo. 9Qaq sa ishit qome da qaucouai'ai da “acatai' saq 'amaqtaqole mayi ÿashiidaxachigui ana pan, da acamayi ishit da quichigui 'enauac cam nvigoxoshic.” 10Qaq nachiso som qadataxala' so chigoqo'ot da ñaquitaxac da qoñiita da sa ishit da ÿaqa'a ca qadhuennataxaqui. Qalaxayi ñi Dios ÿauo'o qome ca nhuaxanaguec ca camachaqca shiÿaxaua mayi sa ishit da qami' ÿalemaxa't.
11Qaq aÿim, qami' ÿaqaÿa't, da huo'otaq ñaq saqattega da qaÿauo'o ca n'anaxat ca shiÿaxaua, qaq na judiopi sa ishíttaxa da aÿim icaatac. Cha'ayi da nachi 'eetec de'eda, nchi n'aqtaguec da l-leuaxa so Cristo co'ollaq qaiuaxaneuo, damayi sa ishit da huo'otaq inogoqchit namayipi. 12Qaq nam shiÿaxauapi mayi sa ishit da qami' ÿalemaxa't da qami' ÿileeta'pe da qau'ochi ca qan'anaxachi, ¡no'ono' namayipi da ña imauec da n'aqchit da l'oquiaxac!
13Cha'ayi qami' ÿaqaÿa't, qami' qaiÿaxanalo da yaqto' qami' huesochiyiñi. Qalaxayi chaqdato' qome da sa ishit da qau'ashaxañiÿai' de'eda qansoxoqui da yaqto' qau'ochi cam 'eetapeguec dam qadapachiyaxaqui. Chaqdato' da ñi 'oonolec da qoñiita huapegue' ca lÿa, souaxat dam qadsoxoyiqui. 14Cha'ayi 'enauac na nqataxacpi 'oonolec da lataxac imatta't, 'eeta': “'Auauotec ca 'adÿa, 'eeta'am 'anqashin da maichi 'anauojla't.” 15Qalaxayi qami' da maichi qannaquiita'a't, qataq ñi 'oonolec da maichi chictac ca lÿa, qaq damayi ÿataqta qadvichiÿa'a qome. Ten, qom 'ico' maichi qanlaxachiitapeguela't.
Cam 'eetapeguec da lapachiyaxac ca shiÿaxaua qataq da nachaalataxac mayi chigoqo'ot so Espíritu
16Da shiitega 'eeta': Ÿataqta qoquiitegue qome ca 'eetapeguec so Espíritu Santo, yaqto' sa ishit da qoquiitague' cam 'eetapeguec da qadapachiyaxaqui. 17Cha'ayi na 'eetapeguecpi ca shiÿaxaua sa ishit da nhuoteete' cam 'eetapeguec so Espíritu mayi chigoqo'ot ñi Dios. Qataq som Espíritu nataq'en sa ishit da iuoteeteguet cam 'eetapeguec ca shiÿaxaua. Qanachi naamayi sa ishit da nhuoteeta't. Qaq ÿoqo'oyi qami' sa ishit da qau'ochi cam maichi qoñiitapeguec. 18Qalaxayi da nachiso so Espíritu da qami' ÿauecta'agueta, nachi sa ishit da qoviito'ot na nqataxacpi.
19Huaña, nachi ishit da saq alaq da qaila'a na n'onataxacpi cam quetague' da maichi lapachiyaxac, 'eeta': lauatapiguiñi' aca sa ishit da lhua, qataq i'ottac nam ishit da deshipaxanaqtaxan, qataq qopitaxanaqtaqaic, 20qataq da qanatameetacot na nqolacpi, qataq da qaÿi'en ca nÿa, qataq da nquiÿaxanaqtaic, loquiaxac, qataq da nca'alaxanaxac, saq ÿoxonguit da nalemataic, qataq da chochi huo'o ca qanaquittaique da huo'o ca qai'ot, qataq da ÿotaxac da qoÿida't na shiÿaxauapi. 21Namayipi ÿataqta quiÿaxanaqtaqaicpi, laataxanaxaicpi, nÿomaxaicpi, qataq qui'axaicpi, qataq huo'o na laÿipi i'ottacpi 'eeta'am de'eda. Qaq ÿataqta qami' secoyigueete', 'eeta'am da shiitec co'ollaq qami' sa'aqtaxaatema, da huo'otaq huo'o ca i'ottac ca 'eeta'am de'eda, nachi camayi sa ishit qome da inoxoneu'a ca l'onataxanaxac ñi Dios da ilo'ogue 'enauacna.
22Qaq dam alaÿaxac ca netanguit so Espíritu Santo, qalaq 'eeta': Huo'o da lsoxoyic, ntonaxac, l-lagaxayic, lhualaxavic, lauotaxanaqtaic, i'ot ca ÿaÿamaqchiguiñi, qataq npe'et, 23sa n'amqajnaxaic, qataq ntel-la't. Qaq ca 'eeta'am de'eda qaica ca ishit da illapeguem ca shiÿaxaua. 24Qataq ca shiÿaxaua mashi sogote da lalamaxat so Cristo, nachi camayi 'eeta'am da sogote da qaiuaxaneuo da l'oquiaxac, lÿatchiguem 'enauac na lqopitaxanaqtaic qataq nam 'eetapeguecpi. 25Cha'ayi da qanachaalataxac chigoqo'ot so Espíritu, qaq ÿoqo'oyi no'on da sauaxasoqta'a somayi da qomi' ÿaueca'agueta 'enauac na so'otaqpi.
26Qaq sa ishit qome da qomi' ñi'oxonnaxaiqa, qataq ñi 'oonolec sa ishit da inogoqchittac ca lÿa, qataq sa ishit da maichi ñiquiÿaqta'a't.
Currently Selected:
Gálatas 5: TBSNT
Highlight
Share
Copy
Want to have your highlights saved across all your devices? Sign up or sign in
Nuevo Testamento Toba Qom, Dios Nvita Na Shiỹaxauapi © Sociedades Bíblicas Unidas, 1981.
