Efesios 6

1Qaq qami' ñaqpiolec, cha'ayi qami' 'amqajnataxanaxaiqa, qaq ÿoqo'oyi ÿataqta qaualaqailguete caua qadta'alli', cha'ayi damayi nachi lataxac. 2Cha'ayi nam nqataxacpi mayi chigoqo'ot co'ollaxa so Moisés, som hua'auchiguiñi mayi huo'o da ÿachaxanapec 'eeta': “Huo'o naq 'enec 'anqa'en ca 'adta'a qataq aca 'adate'e, 3yaqto' ÿataqta 'auamachiguiñi qataq logodaic da 'anachaalataxac da qouetalec ana 'alhua.”

4Qaq qami' mayi huo'o da qadco'oxoqui, sa ishit qome da qaunogoqchichi ca qai'alqui. Chaqdata da nacta'ai' da qauapaxaguiñi, qataq 'ico' qanlaxañiiuec da nachaalataxac, yaqto' i'amaqten so qadataxala' Jesús.

5Qataq qami' nlatacpi ÿataqta qaualaqaiguet qome na qan'aco'oipi mayi huetalec ana 'alhua. Namayipi ÿataqta huo'o naq 'enec qanqashiñi, qataq qayi'iÿai, qataq ÿataqta qanasapachiita, 'eeta'am qanqashiñi da nachiso so Cristo da qau'onataxañiitacot.

6Da qau'onataxañiitac, qalaq sa ishit da chaqdata da qami' ilotaguilo namayipi da chochi qauauoitaique da qami' ÿaÿamaxadeete'. Chaqdata da 'eeta'am da qami' l-lataqa so Cristo da ÿataqta imauec da qadquiyaqteÿaxaqui da qau'ochi 'enauac na 'eetapeguecpi ñi Dios. 7Da qau'ochi ca qad'onataqui, qalaq ÿataqta qanasapachiita, 'eeta'am da nachiso so qadataxala' da qau'onataxañiitacot, qaq sa ishit da nachica ca shiÿaxaua. 8Cha'ayi qami' mashi qauaÿajñi da so qadataxala' ishiiten qome ñi 'oonolec cam ÿaÿamaqchiguiñi l'onataxanaxac, nai'ctaxa ca nlatac, huo'otaq cam sa nlatac.

9Qataq qami' 'aco'pi nataq'en ÿataqta qau'enaxachiiteguet qome na qadlataquiipi. Sa ishit da qauayiñiitalec. Qauennachiÿa'a da qami' qataq namayipi qoviito'ot so qadataxala' mayi neta'ague da piguem, qaq somayi sa ishit da huo'otaq lca'atagui na shiÿaxauapi.

Na l'ogoxonaxatpi saq cha'a cam quetague' so Cristo

10Qaq nagui qami' ÿaqaÿa't, ÿataqta qan'añaxachi qome, cha'ayi qan'ayiitau'a so Cristo da qauachigoqoichigui da l'añaxac somayi mayi qaica ca ÿaqalanapec. 11Qataq qai'añiiñi qome 'enauac na npaqtaxanaxatpi mayi ÿan ñi Dios, yaqto' ishit da qanaloÿa'aguet 'enauac na latenataxanaxacpi so shiÿaxaua lma'na. 12Cha'ayi qomi' sa ishit da huo'otaq seloquiaqtapegue' ca yi'oqchigui qadapachiyaxaua, chaqnata nam n'añaxacpi qauemaicpi saq cha'a mayi hueto'ot na piguem, nam damaxasoxonapecpi, 'añaxaicpi mayi ÿamaqpec nam huetaigui na napalaxa. 13Qaq ÿoqo'oyi qai'añiiñi qome 'enauac na npaqtaxanaxatpi mayi ÿan ñi Dios, yaqto' ishit da qanachaachiÿa'agueta naua na'axa'te mayi qauemaiqa. Qaq da ime, nachi ÿataqta qanaÿamaxachiitai'. 14Nachi ÿataqta qanaÿamaxachiitai', qansaachiichigui da 'eesa lataxac, qataq qaupaqtaxañiÿa da no'on nataxat da 'eeta'am qanqashiñi aca npaxajlec ana ltogue ca ale. 15Qataq qanaÿamaxachiitai', da yaqto' qau'axachi da n'aqtac mayi i'ot da nlagaxayic da qoñiita'am ca ale da ÿaayiñi caua lapela'te da naÿamaxattac. 16Qaq da ime 'enauac ne'enapi, nachi da qadpi'iÿaxaqui 'eeta'am qanqashiñi aca qadpaqtaxanaqchi, da yaqto' ishit da qaualamachi 'enauac anam 'ettaigui lchicnapi som shiÿaxaua lma'na. 17Qataq da qadca'alqai 'eeta'am qanqashiñi aca qanado'oi, da yaqto' npaxajlec na qadqaiqui. Qataq qauacoñiÿa da l'aqtac ñi Dios da 'eeta'am qanqashiñi ca ÿilonec mayi qami' ÿanema so Espíritu Santo. 18Qaq da qau'ochi 'enauac de'eda, nachi qanatamñiitac, chigoqchigui qanqashiñi so Espíritu Santo da nachi 'eetai' da qanqouagaxauñiitac qataq qauÿaxañiitacot ñi Dios. Qaq ÿataqta qanloiteec, da yaqto' ishit da qau'ochi 'enauac de'eda. Sa ishit da qanasamiitapiguiñi. Qataq qanqouagaxauñiitalec 'enauac nam lalamaxatpi ñi Dios. 19Nataq'en aÿim qanqouagaxauñiitalec, yaqto' ñi Dios aÿim ÿanema naua i'aqtaqa da ivita da setaqa, qataq yaqto' aÿim qadamchigui da sa'axat dam saq cha'a co'ollaxa n'aqtaguec da nca'alaxa, da yaqto' qaÿaÿaten. 20Cha'ayi ñi Dios aÿim namaq da aÿim l'aqtaxanaxanec, da sa'axat de'eda n'aqtac. Qaq nachida da huo'o mshi aÿim qaicoñittai' nagui. Qaq ÿoqo'oyi qanqouagaxauñiitac qome, yaqto' da aÿim sa'axat de'eda n'aqtac, qalaq sa ishit da shi'itac.

Da pa'ateec lquinaxanaxac so Pablo

21Qaq ñi Tíquico mayi qanauochaxaua qadqaÿa qataq nachi 'eetai' da saq ÿaxaañi da qomi' itauaata'pe da l'onataxanaxac so qadataxala', ñimayi ima qome da qami' i'axatema da shiita, qataq nam so'ottacpi. 22Qaq ÿoqo'oyi qami' samaxalo ñimayi, da yaqto' qami' i'axatema da 'eetec da shinaqta. Qaq 'eda da 'eetec da qami' i'añaqchi't.

23Qaq ñim qadta'a Dios qataq so qadataxala' Jesucristo, ñiimayi ÿanem qome na qadqaÿañicpi da l-lagaxayic qataq da lsoxoyic da ÿauaxaÿaxanguet da lpi'iÿaxac. 24Qaq ñim Dios ÿanem qome ca no'on 'enauac nam ÿauotec so qadataxala', nam sa ishit da ÿalat da lauochi somayi. Aja', nachi 'eetec.

Currently Selected:

Efesios 6: TBSNT

Highlight

Copy