Efesios 2

Qomi' qanca'alaxatreec souaxat da lqouagaxanaqtaic ñi Dios

1Ñi Dios qami' ÿanema da qadca'alaxauai naq'en so Cristo co'ollaq qami' ñaq qoviitaigui da 'ico' qadleuaqai, souaxat nam sa ÿaÿamaxañisat qataq nam qadasouaxashichi 2mayi qoviitaigui, qataq souaxat da qoquiitague' da lataxac nam i'ottac na 'onataxacpi mayi huetalec ana 'alhua qataq qau'ochiitac na 'eetapegueguesat som saq cha'a damaxasoxonapec mayi lma'na, som i'añaqchittac nam sa ishit da ÿalaxaguet ñi Dios. 3Qaq nataq'en 'enauac da shinaqta nachi shinaqta'am namayipi som hua'a'u vi'iyi, da qolaqtague' nam maichi shinaqtapeguecpi, qataq so'otaqtac dam lqopitaxanaqtaic da qadapachiyaxac qataq nam maichi qadhuennataxacpi. Qaq ÿoqo'oyi ÿataqta 'itchiguiñi da qomi' huetalguete da qaica ca 'en'am lchic lalemataic ñi Dios da shinaqta'am 'enauac nam laÿipi shiÿaxauapi. 4Qalaxayi ñi Dios ÿataqta lta'adaic da lchoxonnataxanaxa da qomi' ÿataqta ÿauoteque, 5nachi qomi' ÿanema da qadca'alaxaua naq'en so Cristo, nai'ctaxa da ñaq souaqtaigui co'ollaxa da 'ico' qomi' leuaxaiqa souaxat na qadasouaxashitpi. Qaq damayi maichi chigoqchigui da lqouagaxanaqtaic ñi Dios da huo'o mshi qami' nca'alaxatreec. 6Ñi Dios nataq'en qadÿatchiguem naq'en so Cristo Jesús co'ollaq nca'alaxateeguesop naq'en somayi da nleuaxa. Ime, nachi qomi' nso'onaxana'ai'salo naq'en somayi da piguem. 7Qaq i'ot de'eda ñimayi, cha'ayi nshitaique da ÿachaxan da 'eetec cam ñaq natrauo na'axa'te da lta'adaic lauotaxanaqtaic da shinaqta qataq dam lqouagaxanaqtaic mayi ÿachigoxotchigui naq'en so Cristo Jesús. 8Cha'ayi nachida da lqouagaxanaqtaic ñi Dios da huo'o mshi qami' nca'alaxatreec, cha'ayi huo'o da qadpi'iÿaxaqui ñimayi. Qaq damayi sa ishit da qami' chigoqchiguilo, cha'ayi damayi maichi lachitaqtaxanaxat ñi Dios. 9Qaq damayi sa ishit da chigoqchigui ca ÿaÿamaqchiguiñi i'ottac ca shiÿaxaua, yaqto' sa ishit da huo'o ca n'amqajñigui. 10Cha'ayi ñi Dios qomi' l'onataqa, qataq qomi' nañaxateu'alo naq'en so Cristo Jesús, cha'ayi nshitaique da so'otaq ca ÿaÿamaqchiguiñi. Qaq damayi nal'eno' da lapaqtapiguiñi da ÿauotaique qoyiquiaxac.

Da qadlagaxayic mayi chigoqo'ot so Cristo

11Qaq ÿoqo'oyi qami' qauennachi co'ollaxa da 'eetec da qadataxaqui, da sa ishit da qami' lauo' lashi' na judiopi. Qaq ÿoqo'oyi nam judiopi mayi ÿauo'o ca n'anaxat naq'en na l'oc na llalaqpi, nachi ÿauo'o da l'enaxat, 'eeta': huo'o n'anaxashit. Nachi namayipi qami' ÿamata'aque qaica n'anaxashit. 12Nachi qami' co'ollaxa sa ishit da qauauattoñi so Cristo, qataq sa ishit da qanqachiu'a na llalaqpi so Israel, qataq sa ishit da qauaÿajñi nam aÿamaxataxacpi qataq dam ÿachaxanapec ñi Dios co'olloxochiyi. Qaq chochi qoviitalec ana 'alhua, qaica ca qanaquitaxaqui qataq sa ishit da qauauattoñi ñi Dios. 13Qalaxayi nagui da qan'ayiitau'a so Cristo Jesús, nachi qami' mayi ÿataqta qami' qaÿoqtalo co'ollaxa, qalaq nagui ÿataqta qami' sa qaÿapigui, souaxat da l-leuaxa so Cristo. 14So Cristo nachiso so i'ot da qadlagaxayic. Cha'ayi somayi i'oteguet na judiopi qataq nam sa ishit da judiopi da 'eeta'am da maichi nhuo' l'ecpi, cha'ayi mashi ime da nlaxajñi som npaqtaxanaxat mayi i'ot da sa ishit da nhuojna't naq'en na shiÿaxauapi. 15Cha'ayi so Cristo nachida da maichi l'oquiaxac da chigoqchigui da imeuo naq'en 'enauac da lapaxaguenataxanaxac na nqataxacpi. Ime, nachi ÿauaxaÿaxanguet na judiopi qataq na sa ishit da judiopi da 'eeta'am ca dalaxaic nhuo' l'ecpi, qataq da n'attau'a naq'en somayi. Qaq 'eda da 'eetec somayi da i'ot da qadlagaxayic. 16Qaq de'eda 'eetec so Cristo co'ollaq qaiuaxanguet so npe'enaxaqui. Huaña, nachi sa ishit da npa'aguena't ne'enaua dos mayi sa nhuo' lashi'. Qataq nmaneto naq'en ñi Dios, nachi naamayi 'eeta'am naq'en ca 'oonolec n'oquiaxac.

17So Cristo anac da i'axatem 'enauac na shiÿaxauapi da no'on qad'axaÿaxac mayi i'ot da nlagaxa, qaq ividauga da qoñiita mayi sa ishit da qami' judío lashi' qataq nam judío l'ecpi. 18Qaq chigoqchigui so Cristo da 'enauac da shinaqta, nai'ctaxa ca judío l'ec huo'otaq ca sa ishit da judío l'ec, da qomi' ÿaueegueta ñi qadta'a da sachigoxosoqchigui naq'en so Espíritu Santo. 19Qaq ÿoqo'oyi qami' sa ishit da 'ico' ÿaqa'a ca qauachigoqÿa'ague da qoñiitalec ca 'alhua mayi sa qadalamaxachi. Cha'ayi ÿataqta qami' lmayi'shi 'enauac nam lalamaxatpi ñi Dios, qataq ÿataqta qami' lauo' lashi' na llalaqpi ñimayi. 20Qataq qami' qoñiita'am ca noÿic mayi qan'oxootapiguishiguem, n'oxootelec qanqoÿin som lapaxañi co'olloxochiyi na lamaxashicpi so Jesús qataq na l'aqtaxanaxanecpi ñi Dios. Qaq nachiso so Jesucristo som 'ico' coma' mayi nllañi ca noÿic. 21Somayi nachiso som n'oxonaxala' cam noÿic mayi qan'oxootapiguishiguem. Camayi ÿataqta n'atta't qanqoÿin, chochi ivitta'a da 'eeta'am ca noÿic mayi taiguet da qaÿi'oxoden so qadataxala' Jesús. 22Qaq nachi 'eeta'am nagui da qoñiita qataq 'enauac na laÿipi 'amqajnataxanaxaicpi 'enauac da qan'ayiitau'a so Cristo, qoñiita'am ca noÿic mayi lauo' naq'en ñi Dios so n'Espíritu Santo.

Currently Selected:

Efesios 2: TBSNT

Highlight

Copy