2 Corintios 12

Da lauanaqchic qataq da qaÿaÿajnaxanaxanec so Pablo

1Ÿataqta qaica ca nauec ca shiÿaxaua da maichi ñi'oxodeetapeguela't. Qalaxayi nachi 'en'am aÿim sa'axat na ÿauanaqchicpi qataq dam aÿim ÿaÿajnaxanaxanec so qadataxala'. 2Aÿim sauatton so ÿale mayi i'amaqten so Cristo. Somayi mashi ivi' nagui naua catorce vi'iyi da qaÿauega yim piguem mayi pa'atchiguem. Aÿim sa saÿaten da ima da l'oquiaxac co'ollaq qaÿauec, huo'otaq sa ishit. Qalaxayi chaqñita ñim Dios mayi ÿaÿaten. 3Qalaxayi aÿim saÿaten da qaÿauec se'eso shiÿaxaua, nai'ctaxa da huo'otaq imashiguem co'ollaxa da l'oquiaxac, huo'otaq sa ishit. Damayi sa saÿaten, qalaxayi chaqñita ñi Dios mayi ÿaÿaten. 4Somayi qaÿaueegue co'ollaxa da piguem dam lma' na qanca'alaxateec. Qaq co'ollaq hueta'ague damayi, nachi hua'axaÿalo soua n'aqtaqa mayi sa qai'axaÿapiguilo, mayi sa qaichitapec da detaxaiguilo ca chochi shiÿaxaua. 5Aÿim ishíttaxa da ñi'amaqten da shiita'am se'eso shiÿaxaua, qalaxayi aÿim sa ishit da maichi ñi'amaqteela't. Chaqdata da ñi'amaqchingui dam i'ot da qaica ca i'añaxac. 6Qaq nai'ctaxa da huo'otaq ñi'oxodeela't, qalaq sa ishit da 'ico' huo'o da ñi'onataxac, cha'ayi aÿim ÿataqta 'eesa cam sa'axat. Qalaxayi aÿim sa ishit da nachi shiitec de'eda, yaqto' sa ishit da huo'o ca ÿagaqnapeguec da lmejnaxanaxac da shiita, huo'otaq cam hua'aqchigui i'aqtac.

7Qaq de'eda ÿauanaqchic ÿataqta qaica ca 'en'am da lli'oxoyic. Qalaxayi da yaqto' sa ishit da sagaqten da ñi'amqajñigui, nachi aÿim qoÿanem da ñiqui'ic, 'eeta'am aca ÿaxat le da huo'otaq i'attaigui da i'oquiaxac. Damayi lamaxashic so shiÿaxaua lma'na da aÿim iuaxan. 8Qaq ÿoqo'oyi tres da shi'iguelaxalec da seÿaxanot so qadataxala' da ña nqat. 9Qalaxayi somayi aÿim 'enapega, 'eeta': “Da ÿoqouagaxanaqtaic mashi 'am hueto'ot, qaq saqca ca lÿa 'aueetac. Cha'ayi da i'añaxac yi'oq da nachattaigui ca shiÿaxaua qaica ca l'añaxac.” Qaq ÿoqo'oyi ÿataqta samachiguiñi da saqca ca i'añaxac, yaqto' da l'añaxac so Cristo yi'oq da aÿim nachattaigui. 10Qaq ÿoqo'oyi samachiguiñi da huo'otaq qaica ca i'añaxac, huo'otaq da aÿim qaishiueetac, huo'otaq da huo'o da iuenaxanaxa, huo'otaq da aÿim qaicaatac, huo'otaq da souaigui ca lqalaic, sasoilec so Cristo. Cha'ayi da huo'otaq ÿapacteec da qaica ca i'añaxac, qalaq ÿacteec da aÿim 'añaxaic.

Ÿataqta saq maguiñi so Pablo souaxat so 'amqajnataxanaxaicpi mayi netaña yi Corinto

11Aÿim 'ico' huo'o da ñi'onataxac souaxat da maichi ñi'amaqten, qalaxayi qami' mayi qauayiñiÿa'a aÿim. Qamaq qamí'ctaxa mayi qavi'oxoyiñiitac aÿim, cha'ayi sela'a da sa ishit da aÿim napacalec nam qoquiitague'pi mayi 'eetega da nataÿaña nam Jesús lamaxashicpi, nai'ctaxa da aÿim qaica ca shinec. 12Cha'ayi da ñiualaxaunaxac co'ollaq qami' sootapegueto, qataq nam n'anecpi, qataq nam sa qaÿauanapigui, qataq nam i'ot da n'aalaxa, nachina na ichoxot da ÿoqta 'eesa da aÿim lamaxashic so Jesús. 13Cha'ayi da qoñiita sa ishit da huo'otaq se'enaxatteguem cam 'ico' qaica ca naigui da sa ishit da qoñiÿa'am ñaqashin nam laÿipi 'amqajnataxanaxaicpi, chaqdata da aÿim maichi ñalligoxottela't da sa ishit da huo'o ñaq'en ca nsallaxaueetapegue' aÿim da qoñiita. Qaq ¡qauchoxoyiñi qome aÿim souaxat da 'ico' qami' so'ota'n!

14Qaq nagui qataq sogote da ñaÿamaxattai' da qaltaq tres da shi'iguelaxalec da qami' ñamaqtegalo, qalaxayi sa ishit qome da huo'o ca aÿim nsallaxaueetapegue' da qoñiita. Cha'ayi aÿim sa ishit da ñimittaique cam qami' hueto'oto, cha'ayi nachiqami' mayi qami' saÿa'alo. Cha'ayi cam nta'a mayi nachica ca laÿon aca alom da yaqto' talec cam llalec, qaq sa ishit da nachica cam ñalec da laponaxaalec cam lta'a. 15Qaq aÿim ÿataqta huo'o ca ñasapattelec da sematteuo na aÿim hueto'ot, ivitta'a da sematteuo da i'añaxac, da yaqto' ishit da ÿaÿamaxañi da qanachaalataxaqui. Qalaxayi nai'ctaxa da huo'otaq nquictashiguem da qami' sauoteque, qalaq nachi 'en'am da nquictashiguem da sa ishit da aÿim qauauochiic.

16Qaq huo'o da qoñiita na ÿaÿateeta da sa ishit da aÿim qautauañiitac, qalaq nachi 'en'am 'eetega da aÿim sa ñaqalaat da chochi qami' ñoqovi'n. 17Qaq ¿peta'a ishit co'ollaxa da qami' satenachi't da huo'otaq huo'o ca sachigoxotchigui ca 'oonolec soua shiÿaxa'u mayi qami' samaxalo? 18Co'ollaq seÿaxanot so Tito da yaqto' qami' namaqtegalo, qalaq samaxague so lÿa qadqaÿa. Qaq ¿peta'a qami' ÿatenachi't co'ollaxa so Tito? Qaq ¿peta'a saq 'en da qomi' nachi 'eeta'a't da qadataxac, qataq 'eeta'a't da qadhuennataxac?

19Qalqo' ¿qami' qaupi'itaxañiÿa peta'a da qomi' shinaqpec de'eda, da chochi qami' ñoqolguetaqtagueto? 'A'i, sa ishit. Chaqdata da qomi' ÿaÿateete' ñi Dios nagui da qomi' itaxaÿaxanaxa'n so Cristo. Qaq 'enauac de'eda so'otaq, qami' ÿaqaÿadolqa, damayi naigui da yaqto' ishit da qanquiquiitashiguem. 20Cha'ayi aÿim huo'o da itelaxa da huo'otaq ivita da qami' ñoqo'onalo, qaq sa iuena'a da sa ishit da tachigui cam tatapigui yi iuel da qami' ñauaneto, qataq sa iuena'a, da qami' nataq'en sa ishit da tachigui cam tatapigui yi qadvilli da aÿim qanauañi'. Cha'ayi aÿim huo'o da icolanaxa da huo'otaq qami' quetanguilo ca cotaxac, pa'aguenaxac, nalemataic, shiÿaxaua sa iuen ca lÿa, qaÿasaxalec ca lasouaxashit ca nÿa, nvidaqtaxanaxac, 'amqajnaxac, qataq qaica ca naÿamaxa. 21Qataq ÿataqta huo'o da itelaxa da qom ivita da qami' ñamaqtegalo, qalaq ñi ita'a Dios ÿataqta huo'o naq'en da i'aloxo souaxat da qoñiita, qataq da ÿataqta lta'adaic da ñinoinaxac souaxat nam qalota da qoñiita mayi mashi qaÿoqtegue da huo'o na lasouaxashitpi, qalaq sa ishit da ÿaxaneec ca ishipaxanaqchit da nachaalataxac, qataq dam quishiguetaxac, qataq nam nqopitaxanaqtaiguesat mayi qai'ottac.

Currently Selected:

2 Corintios 12: TBSNT

Highlight

Copy