Matayo 13

Imbasi ye muhandi

(Mlk 4:1-9; Luk 8:4-8)

1Dijuwa diya Yesu hoyoleuka ukaya, hoyokwikala hanghingi ye bahali. 2Howomwijila matewa mengi, hoyokwingila mumunhumbwi, hoyokwikala; agaya matewa gose hogokwima kunghingi ye bahali. 3Hoyolonga nawo mbuli nyingi kwa mbasi, hoyogamba,

“Langa, imuhandi yaluta kuhanda. 4Kamei foyendeyonyaga, simbeyu simonga silagala habehi ne njila; ifidege hofikwija hofisidiya; 5simonga hosilagala mwikangalawe, ahechaka ulongo mwingi; hosikota chimwande kosoko ulongo usingile hasi; 6dijuwa dikalike hosilakala; na kosoko sichaka misisi hosinyala. 7Simonga hosilagala ahena imiwa; imiwa iya hoikula, hoisikanhamisa; 8Simonga hosilagala hena ulongo muswanu, hosikweleka, imonga, igana, makumi mutandatu, imonga makumi madatu. 9Iyena singhutwi yahulike!”

Isoko yo kulonga kwa mbasi

(Mlk 4:10-12; Luk 8:9-10)

10Howokwija awefusa wakwe howomugamba, “Nhani ukulonga nawo kwa mbasi?” 11Yabidula, yekugamba, “Anyeye mumotesigwa kufimanya ififiso fyo undewa wa kulanga, ninga awene wasimotesigwe. 12Kosoko wowose iyena ichinhu, yakwenda yongeseligwe, naye yakwenda yamemesiligwe telele: Ninga ayuya iyechaka chinhu; hata achiya choyenacho yakwenda yahokigwe. 13Kosoko iyo nikulonga nawo kwa mbasi; kosoko wanghalanga wasikona, na wanghategelesa wasikuhulika, kahi kumanya. 14Imbuli ye mugonesi Isaya ikuliganiswa ukwawo, iikugamba:

‘Kuhulika mohulika, ninga musimanya;

Kulanga molanga, ninga musikona.

15Kosoko imimoyo ya wanhu wano igaluka misito,

Na kusinghutwi sawo wasikuhulika fiswanu,

Ameso gawo wafinya;

Wangheje wokona kwa meso gawo,

Howohulika kwa nghutwi sawo,

Howomanya mumiyoyo yawo.

Howobiduka honiwahonya.’

16Ninga ibeka ameso genu, kosoko gakona, ne singhutwi senu, kosoko sikuhulika. 17Kosoko chawelu, nikumutamilani, wagonesi wengi na waswanhu hawenda kugona gomukona nyeye, ninga wasagonile, na wasagahulike gomukuhulika nyeye wanghagahulike.”

Yesu yakutamila isoko ye imbasi ye muhandi

(Mlk 4:13-20; Luk 8:11-15)

18“Hulikiseni imbasi ye muhandi. 19Chila munhu nghona yakuhulika imbuli ya undewa nghona nghakuimanya, yakwija ayuya iyehile, yakuidondola iihandigwe mumoyo wakwe. Ayo noyahandigwe habehi ne injila. 20Na yuya iyahandigwe mumakangalawe, no yuya yakuihulika imbuli yakuihokela kwa chinyemi; 21ninga kusiyakwe kechaka misisi, yakugendelela chipisi chiguhi, inghalawanisa nyidaswa kosoko ye imbuli iyo, chimwande yakuileka. 22Iyahandigwe hamiwa, no yuya iyakuhulika imbuli; kamei simbuli se chilunga, na udasi wo ugoli we chilunga, fikuikanhamisa imbuli iya; kamei isikweleka. 23Ayuya yahandigwe haulongo muswanu no yuya yakuhulika iyo imbuli, na kuimanya: Na chawelu yakweleka mamudyo na kulafa igana dimwedu, na makumi mutandatu, na imonga makumi madatu.”

24Hoyowalafila mbasi ingi, yakugamba, “Undewa wa kulanga uligana na munhu yahandile mbeyu swanu mumugunda wakwe: 25awanhu wakagone hakeja imunghondo wakwe na kuhanda mabago mugati ye ingano, na kuleuka. 26Hanyuma, ingano ikakule na kweleka, hogoneka na mabago gengi mugatigati ye ingano. 27Awatumwa wakwe imwenye kaya howoluta kumutamila, ‘Mundewa, nghwahandile mbeyu swanu mu mugunda wako; galawa hoki amabago?’ 28Hakowagamba, ‘Imunghondo noyagolose nhaifi!’ Awatumwa hawamugamba, ‘Ukuhananga chikagalunde hamwedu?’” 29Hakagamba, “Ng'o, Mungheje mung'ola mabago, na kung'ola ingano hamwedu nago. 30Filekeni fyose fikule fifike ku ugele wokududula; nikaniwatamila awakududula, Kongeni kugalunda amabago, madulu na kugasoma; ingano muyigale kukano yangu.”

Imbasi ya imbeyu ya haladali

(Mlk 4:30-32; Luk 13:18-19)

31Hakawalafila mbasi ingi: Yakugamba, “Undewa wa kulanga ukifana ne imhule ye haladali, imunhu yailonda, hoyoihanda mumugunda wakwe; 32nayo ndodogi kusuma simbeyu sose; amba inghakula ikuwa nghulu kusuma mabiki gose, dikuwa ibiki ikulu fidege fya kulanga fikwija na kujenga mafulu gawo mumanhambi gakwe.”

Imbasi ya inungo

(Luk 13:20-21)

33Hoyowatamila mbasi ingi: “Undewa wa kulanga ukifana inungo yoyalondile imwanamuke, hoyoiguma mu simhishi ndatu so usage, kamei usage wose housasa.”

Yesu ne nonga ye simbasi

(Mlk 4:33-34)

34Ago gose Yesu hoyowatamila amatewa kwa mbasi, ninga bila mbasi nghawatamile mbuli. 35Uleke iliganile imbuli iyalongwa ne mugonesi, iyagamba,

“Nogubula umulomo wangu kwa mbasi;

Nikugatambula agakifisile kulawa kunghonga.”

Yesu yakuwagubulila imbasi ye mabago

36Kamei Yesu yakawaleke amatewa, hoyokwingila munyumba; awefusa wakwe howomwijila, wakugamba, “Chibulile imbasi ya mabago ga mumugunda.”

37Hoyowabidula, hoyowagamba, “Iyakunyaga asiya simbeyu si swanu no Imwana we Munhu; 38umugunda uya no chilunga; simbeyu siswanu no wana wa undewa; agaya amabago no wana wa yuya yehile; 39ayuya imunghondo yahandile no Luhoma; kukududula no kuhela kwe chilunga, na waya awakududula no malaika. 40Kamei; fina mabago fogakulundigwa na kusomigwa mumoto; nofo ikwenda yuwe kukuhela kwe chilunga. 41Imwana we Munhu yakwija yakutuma malaika wakwe, nawo wakwenda wawakonghole kulawa mu undewa wakwe wose awena uwihi, na wose awakugolosa gehile, 42na kuwaguma mwililimba dyo umoto; kukwende kuwe chililo na kugwegwejula meno. 43Noho awanhu awaswamu wakwenda wake fina dijuwa mu undewa we Baba yawo. Yena singhutwi yahulike!”

Imbasi ya ugoli ufisigwe

44“Kahi undewa wa kulanga ukifana na ugoli ukifisile mumugunda; imunhu yakawone, hoyoufisa; na kwa chinyemi chakwe hoyoluta hoyolafa ifinhu fyakwe fyose hofiguligwa, kamei hoyogula umugunda uya.”

Imbasi ye lulu

45“Kahi undewa wa kulanga ukifana munhu mwambasi iyekuhananga lulu swanu. 46Kamei yakone lulu imwedu ya iliho lugano, hakaluta na kulafa ifinhu fyakwe fyose figuligwe, hoyoigula.”

Imbasi ya ulwafu na sisomba

47“Kahi undewa wa kulanga ukifana ulwafu lugumigwe mubahali, kamei houkwega sisomba sa matalago gose. 48Lukameme, howolukwega kunje; howokwikala, howosagula si swanu howosiguma mufiya, isihile howositaga. 49Nofo ikaikuwa kukuhela kwe chilunga; malaika wakwenda walawanise na kuwabagula awehile na awaswanu, 50na kuwakubita mwililimba dyo umoto; kukwende kuwe chililo na kugwegwejula meno.”

Finhu fisha na filalile

51Yesu hoyowosa, “Mugamanya agano gose?” Howomugamba, “Heye.”

52Hoyogamba, “Ninga kosoko iyo chila mutulumi yena umanyi wa undewa wa kulanga, kakifana imunhu imwenyenyumba iyakulafa mufinhu fyakwe ifingi ifinhu fisha ne figono.”

Yesu yekulemigwa Nasaleti

(Mlk 6:1-6; Luk 4:16-30)

53Kamei Yesu yakamale simbasi siso, hoyolawa, 54Yakafike kuiisi yakwe, hakawafusa mwisinagogi dyawo, howojuma, wakugamba, “Ayuno kapata hoki imisungu ino na amajumo gano? 55Ayuno si mwana we muselemala? Ing'ina si yuya yekwinangwa Maliamu? Na awandugusakwe si cha Yakobo, na Yusufu, na Simoni, na Yuda? 56Na walumbuse wose wasibaha ahetu? Hambiya yuno kapata hoki gose gano?” 57Hawamusula. Yesu hakawagamba, “Imugonesi nghakuswela chogoho, ninga kuisi yakwe imwecho na munyumba yakwe.” 58Kamei nghagolose majumo mengi makulu uko, kosoko yakuleka kuhuwila kwawo.

Currently Selected:

Matayo 13: DDKWW

Highlight

Copy