Yohana 13
13
Yesu yekusunha wefusa wakwe migulu
1Hambiya dijuwa dikulu dye Pasaka fodowile disinati difike Yesu hakamanya fina ichigele chokuleuka muchilunga na kuluta kwe Baba chifika. Hakawenda awakwe wowile muchilunga, hakawenda mpaka ndumo.
2Ichigele chokudiya, Ishetani yakowe kaguma muchidoga cha Yuda Isikalioti, mwana wa Simoni, kumusongesa. 3Yesu yakamanye fina Baba kamwingha ifinhu fyose mumikono yakwe, na fina kalawa kwe Mulungu, 4hoyokwinuka hoyekale, hakeka sisuke sakwe hanghanda, hoyokiyoha na chitambala. 5Kameyi hoyogida ameji mwibakuli, hakakonga kusunha imigulu ya wefusa wakwe, na kuwahamusa ne chitambala chakwe choyakiyohile muchuno. 6Hakeja kwa Simon Petulo, iPetulo hoyomugamba, “Mundewa agweye ukunisunha migulu?”
7Yesu hakamubidula, “Chonikugolosa nghukudaha kumanya hambiya, ninga hanyuma ukaumanya.”
8Petulo hoyomugamba, “Agweye ukwija uninashe migulu yangu nghukunasha ng'oo.” Yesu hoyomubidula, “Ninghaleka kukunasha nghumuhangi naniye.”
9Simoni Petulo hoyomugamba, “Mundewa si imigulu yangu du ninga ne mikono yangu ne ditwi dyangu.” 10Yesu hoyomugamba, “Iyafuluse kiyoga kechaka soko ya kiyoga kahi nanga kunawa migulu ninga musafi umutufi wose; nanye mwa wasafi, ninga si nyeye mose.”
11Kosoko hakamanya no nani yakwende yamusongese; nochileka yagambile, “Anye mose musi safi.”
12Yakafuluse kusunha migulu yawo, na kulonda si suke sakwe, na kwikala haukalo wakwe, hoyowagamba, “Mumanya chonigolose ukwenu? 13Mukuninanga, ‘Mwalimu’ na ‘Mundewa,’ na mukulonga chelu, nofo nuwile. 14Honaga aniye ni Mundewa ne Mwalimu wenu, niwanashani migulu yenu, anye nanye imwagilani kinasha migulu nyeye kwa nyeye. 15Kosoko nifulusa kumonesani nanye mugolose fonimoneseni. 16Chawelu lugano, nikumutamilani imutumwa si mukulu kusuma iMundewa wakwe, kahi ayuya yatumigwe si mukulu kusuma iyamutumile. 17Hona munghamanya, ifinhu fino, ibeka ukwenu hona mukufigolosa.
18“Sikulonga kosoko yanyeye mose; niwamanya woniwasaguleni; uleke simbuli sa Mulungu simemelesigwe, ‘Ayuya yadiyile umukate wangu kanyinulila ichisinyagilo chakwe.’ 19Nikumutamilani ino hambiya, ugele isinati ilawanise, uleke hona ikulawanisa, muhuwile fina aniye no nene. 20Chawelu, chawelu, nikumutamilani, iyakumuhokela wowose wonikumutuma yakunihokela niye; naye yakunihokela niya yakuhokela iyanitumile niye.”
Yesu yakulonga muchanha yo kosongesigwa kwake
(Mat 26:20-25; Mlk 14:17-21; Luk 22:21-23)
21Yesu yakalonge nheifo, hoyokuwa na lwidaso muchidoga chakwe hoyohomelela, “Chawelu, chawelu nikuwatamilani, yumwedu wenu yakwenda yanisongese.” 22Awefusa wakwe howokilanga, wasatangile chawelu fina yakulonga nani. 23Mwifusa wakwe yumwedu, yendigwe na Yesu, hakegemila muchifa cha Yesu. 24Baho Simon Petulo hoyomukonyesa, na kugamba, “Chitamile no yehoki imwene woyakulonga.” 25Iyegamile muchifa cha Yesu hoyomugamba, “Mundewa, no yehoki?”
26Yesu hoyobidula, “No yuya yonikwenda nimwinghe ichibendu cho mukate chonichanise mwibakuli.” Kamei yakachanise ichibendu chiya, hoyomwingha Yuda, mwana wa Simon Isikalioti. 27Yakalonde ichibendu chiya, Shetani hoyomwingila, Yesu hoyomugamba, “Dyo ukuhanga kugolosa, golosa chimwande.” 28Hamesa hachaka yatangile nhani yalongile nheifo ukwakwe. 29Wamonga hawana nhagela kosoko Yuda noyowile ne chisanduku cha mapesa, Yesu yendeyomutuma, Kagule fyene fyochikuhananga kosoko ye sikukuu ino; Nhagela chinhu cha kuwengha wakiwa.
Dilagiso disha
30Kwa nheifo yakahokele ichibendu chiya, chimwande hoyolawa kunje; hachuwa chilo.
31Yakaleuka, Yesu hoyogamba, “Hambiya Mwana we Mulungu yakutunyigwa, na mugati yakwe Mulungu yakutunyigwa. 32Mulungu yanghatunyigwa u mwakwe, Mulungu naye yakwenda ya mutunye umwakwe imwecho, na kumutunya chimwande. 33Wana wadodogi, kwa chipisi chiguhi na hamwedu nanye. Mwonihananga; fina fonalongile kuwayahudi nikulonga ukwenu nako, Konikuluta misikudaha kunyandamila. 34Dilagiso disha nikumwinghani, mukiyende, fina fonimwendileni niye anye nanye mukiyende nheifo. 35Munghakiyenda awanhu wose womanya fina anyeye mwa wefusa wangu.”
Yesu yekulonga fina Petulo komukana
(Mat 26:31-35; Mlk 14:27-31; Luk 22:31-34)
36Simoni Petulo hoyomugamba, “Mundewa, ukwijahe?” Yesu hoyomubidula, “Konikuluta nghukudaha kunyandamila hambiya; ninga ukudaha kunyandamila hanyuma.”
37Petulo hoyomugamba, “Nhani nileke kukwandamila hambiya? Nikuulafa uumi wangu kosoko yako.”
38Yesu hoyomubidula, “Kolafa uumi wako kosoko yangu? Chawelu chawelu, nikukutamila, ugele dijogolo disinati dike, ukuwa unikanile kadatu.”
Currently Selected:
Yohana 13: DDKWW
Highlight
Share
Copy
Want to have your highlights saved across all your devices? Sign up or sign in
Kaguru New Testament © Bible Society of Tanzania, 2008.
