Maqkul 7

Milnee uqnee nee cavq khal leevq-a nail aolsaolkovq nail ganl

1Aq-u phao, Yeiqlulsaqlaiq meenq nee lee-a nail Phaq liq sail juq khi aoldaoq kovqdaoq cavq nail cov nail teevq pav ga nav juq, Yeiqsul jaol nail bha jil lee-a nail ngaol. 2Aivq nail yaq laol teevq pav ga nav juq aqlavq maq haol ail aoq jaq nail bhai, aqyu juq ya moel-a nail ngaol. Aqlavq maq haol nail dai, ge nail neq, aol jiav nail khe-ai, aqlavq maq tsiq nail bhai ge nail ngaol. 3Phaq liq sail juq khi Yuldav nail tsaol-aq juq iqsanl, aqphiq aqbhal juq-i mail thaoq khal leevq-a nail aolsaolkovq thaoq thaoq ail, aqlavq maq tsiq haq neq, aoq maq jaq-ail. 4Leiv jiivq ail khi kovq lal-u phao, aqlavq maq tsiq-u phao neq, aoq maq jaq-ail. Al ovqtavq, maiqgaoq kovqlaol iqlaoq haqbhaoq juq bhai tsiq nail aolsaolkovq khi, aol yaoq juq yaoq mao dai aqyu juq thaoq nail ngaol.

5Aq-u phao, Phaq liq sail juq khi aoldaoq kovqdaoq cavq nail cov nail juq, Yeiqsul bhai nal daiq-a nail: “Khul khi mail naoq nail yaq laol juq aqphiq aqbhal juq-i mail thaoq khal leevq-a nail aolsaolkovq maq thaoq nail-aiq. Khul khi mail, aqlavq maq haol ail aoq jaq nail-aiq” dai, nal daiq-a nail ngaol. 6Yeiqsul aqyu juq bhai ge bhiq-a nail: “Goiq bhaoq bhaoq nail tsaol-aq juq-ol, Ilsaqyal-i mail nul juq nail ganl Miqyail nail haqbhoil ge dan-ai thaq nail neq, tsaq dee dee ail nial. Aivq ge nail,

‘Tsaol-aq niil jeq-e

niil jaq-a neq,

moeqthaoq ngaq bhai

ev khi ngaol-aoq,

neema neq,

ngaq-ai nee eqyal yal

dee dee nail ngaol.

7Aqyu juq ngaq bhai

uqhuq thaoq nail neq,

khul teevq phaq ail

ganl maq tsoiq-ail.

Khul khi mail dai

ngal-aq neq,

tsaol-aq-i mail

thaoq khal

leevq thaq nail

aolsaolkovq bhai,

ngaq nail daoq dai

saol-nvq khi,

cavq bhiq cov bhiq-a nail

ngel-i mail ngaol’ dai,

Ilsaqyal ge-ai thaq nail ngaol.

8Nul juq Miqyail-i mail bivq-ai thaq nail daoq juq bhai khaonq ail ceevq khi, tsaol-aq yaq-i mail thaoq khal leevq-a nail aolsaolkovq bhai neq, nul juq ivq dao dai nieivq thaiq-ai thaq nail ngaol” dai, ge bhiq-a nail ngaol.

9Yeiqsul aqyu juq bhai gaoq ge bhiq-a nail: “Miqyail-i mail bivq-ai thaq nail daoq juq bhai khaonq ail ceevq khi, tsaol-aq yaq-i mail thaoq khal leevq-a nail aolsaolkovq bhai nul juq al hai nieivq thaiq nia dai, nul juq neegeel yuq nail ngaol. 10Maolseiq nail aoldaoq kovqdaoq lavqkhoel-ai, ‘Naoq nail aqbhu aqma bhai ya ev naol’ dai, gevq-ai thaq khi, ‘Yovqgavq nail aqbhu aqma bhai ivqkhail yavq nail tsaol-aq, heivq nail bhai ya daq naol’ dai, gevq-ai thaq nail ngaol. 11Thail hai ngaol-aoq, nul juq niail hai cavq nail cov nail ngaol: ‘Tsaol-aq teevq gaq ga nav yovqgavq nail aqbhu aqma bhai, ngaq-i khal jiav nail naoq bhai bivq heeq phaq-ail tsaq nail juq, Miqyail bhai danq bhiq-a nail ngaol’ dai, ge gaq haq neq, 12yovqgavq nail aqbhu aqma bhai maq hel daiq bhiq mail khaonq kivq naol dai, nul juq cavq bhiq cov bhiq nail ngaol. 13Al hai cavq bhiq cov bhiq nail lavqkhoel nee, nul juq neq, nul juq nail aolsaolkovq bhai thaoq nia dai, Miqyail nail daoq bhai aqdeq bhi deq ail-a nail ngaol. Al hai dul nail mao dai phaq iqsanl, nul juq nl nail hal nail ngaol” dai, Yeiqsul ge bhiq-a nail ngaol.

Tsaol-aq yaq bhai maq haol dai, bhiq pevq-ail nia nail phaq

14A bhai nee ngal-aq, Yeiqsul tsaol-aq munl munl ma bhai gaoq khul jil khi ge bhiq-a nail: “Nul juq iqsanl mail aqmeeq-ai nal daiq khi niil niai heeq kivq thaq-ai yaoq. 15Lavqniil phaoq khe juq neq, tsaol-aq nail lavqkhoel bhai aol lal khi bhi jiivq bhi cavq lal nia nail teevq phaq iqsanl, maq jiav-ail. Tsaol-aq nail neema lavqkhoel nee dov lal nail juq neq, tsaol-aq bhai bhi jiivq bhi cavq lal nail ngaol.

16[Naqkhaol khal covq nail tsaol-aq, nal daiq yaoq” dai, ge bhiq-a nail ngaol.]

17Aivq tsaol-aq munl munl ma nee pav ail khi, ilkhaol bha aol lai-u phao, aivq nail yaq laol juq aivq bhai daoqma uqhuq daoq al daoq nail ganl, nal daiq bhiq-a nail ngaol. 18Yeiqsul aqyu juq bhai ge bhiq-a nail: “Nul juq iqsanl maq gov heeq kivq ail laiq. Lavqniil phao nee tsaol-aq nail lavqkhoel bha khal aol ail nail yaoq phaq yaoq-ao nee, tsaol-aq bhai maq bhi jiivq maq bhiq cavq lal nia-ail. 19Khul khi mail dai ngal-aq neq, neema lavqkhoel bhai maq aol-ail. Ovqmav lavqkhoel bhai kev ail khi, lavqniil dov ha gil nail ngaol” dai, ge bhiq-a nail ngaol. Aivq al hai ge nail neq, jaq nail phaq iqsanl mail aqhaol ngaol dai, ge movq nail ngaol.

20Al ovqtavq, aivq ge nail: “Tsaol-aq nail neema lavqkhoel nee dov lal nail juq neq, tsaol-aq bhai bhiq jiivq bhiq cavq lal nia nail ngaol. 21Khul khi mail dai ngal-aq neq, tsaol-aq nail neema lavqkhoel nee dov lal nail juq neq, niil juq naol: Haq eiv nail phaq saol-nvq nail, khaqmiq sev nail, yu nail yalkav khoiq nail, tsaol-aq bhai heivq nail, 22yu nail miqyaq yovyaq bhai bheeq nail, neekhaol jiav nail, haqeiv nail phaq nl nail, goiqbhaoq bhaoq nail, yu nail uqhuq bhai jaq nail, yu bhai ge doil nail, neema eeq nail heel nail, yaq jaoq jaoq nail, niil heel juq ngaol. 23Maq meeq maq jaq nail niil juq iqsanl mail, tsaol-aq nail lavqkhoel nee dov lal-a nail phaq pevq khi, tsaol-aq bhai bhi jiivq bhi cavq lal nia nail ngaol” dai, ge bhiq-a nail ngaol.

Heiqlaq sal yaqmai-aq teevq gaq neema thaq tsaol nail ganl

24A bhai nee ngal-aq, Yeiqsul a bhai nee dov-ail khi, Dulluv meenq khi Sildoq meenq phao ail-a nail ngaol. Aivq ilkhaol teevq il bhai aol ail-a nail ngaol. Aivq a bhai jaol nail bhai tsaol-aq teevq gaq bhai iqsanl maq bhiq heeq kivq movq khi ngaol-aoq, aivq maq jaol uvq nia-ail. 25Neivq aq cavq aol nail yaqmiq teevq gaq nail aqma Yeiqsul nail ganl ya gaiq khi, teevq pov taivq-ail lal khi mail, Yeiqsul nail aqkhil daoqthaoq bhai peevqceevq kovdoiq doiq khi uqhuq thaoq-a nail ngaol.

26-27“Ngaq nail yaqmiq bhai aol lai thaq nail neivq bhai the dov lee lavq yaoq” dai, aivq Yeiqsul bhai hal nail ngaol. Aivq neq, Sulliv milkhaoq bhai jaol nail Heiqlaq sal tsaol-aq ngel-i mail, Yeiqsul ge kovq bhiq-a nail: “Iqmoeq yaq juq bhai teevq bov ya bhi jaq nail ngaol. Yaq nail aoq tsiq khi, kheeq bhai bhi jaq nail maq tsaq ail” dai, ge bhiq-a nail ngaol.

28Yaqmai-aq al gaq ge kovq bhiq-a nail: “Heeqphaq-ol, naol ge nail tsaq nail ngaol. Thail hai ngaol-aoq, kheeq neq, yaq juq-i mail kovqkhail kov-uvq bhai jaq khal-ai thaq nail juq bhai mevq jaq nail ngaol” dai, ge bhiq-a nail ngaol.

29“Naol thailhai ge nail ngel-i mail, kovq-ail yaoq. Naoq nail yaqmiq bhai aol nail neivq dov ail-aoq nail ngaol” dai, Yeiqsul aivq bhai ge bhiq-a nail ngaol.

30Yaqmai-aq al gaq aivq nail ilkhaol bha kovq kev ail-u phao, aivq nail yaqmiq bhai aol daiq-a nail neivq al maol dov-ail khi, aivq nail yaqmiq iqjial bhai iq thaiq nail bhai ya moel-a nail ngaol.

Naqthaoq teevq gaq bhai lav meeq bhiq-a nail ganl

31A bhai nee ngal-aq, Yeiqsul Dulluv meenq aqjail nee mail dov ail-a nail ngaol. Aivq Sildoq meenq khi Deiq gaq bhaol lil milkhaoq nee ail pav khi, Gaq liq lail ngaqkha bhai ail kev-a nail ngaol. 32Aq-u phao, naqthaoq thaoq khi daoq aqmeeq-ai maq ge nia nail tsaol-aq teevq gaq bhai, yu Yeiqsul jaol nail bha hel lavq-a nail ngaol. “Aivq nail kovtavq bhai aqlavq bhaq dav bhiq yaoq” dai, aqyu juq Yeiqsul bhai hal nail ngaol.

33Yeiqsul aivq bhai tsaol-aq munl munl ma nail lavqkhoel nee hevq dol aivq khi, yu maq moel nail bha hel aivq-a nail ngaol. Yeiqsul tsaol-aq al gaq nail naq khaol bhai lavqnoil tsaoq bhoel-a nail ngaol. Al ovqtavq, thaiqkhaq thaiq khi aivq nail moevqlal bhai thoiq leivq bhiq-a nail ngaol. 34A bhai nee ngal-aq, Yeiqsul nqtavq phao gaollel khi, aqhaq haq ma gaol kha nail lavqkhoel nee, “Ilphaqdaq” dai, ge nail ngaol. Daoqceevq neq, phao lal yaoq dai, ge nail ngaol. 35Tsaol-aq al gaq naq khaol gaiq nia lal khi, daoq aqmeeq-ai ge nia lal-a nail ngaol.

36“Ganl niil teevq gaq bhai iqsanl thaq ge bhiq dei-eiq” dai, Yeiqsul aqyu juq bhai daoq bivq-a nail ngaol. Thail hai ngaol-aoq, aivq aqyu juq bhai daoq nia-al bivq haq neq, niaq-al gaoq ge bhiq-a nail ngaol. 37Aqyu juq noeq-u maq dov-ail pevq-ail khi ge nail: “Aivq khul phaq nl khi ngaol-aoq, aqmeeq phaq teevq-eel ngaol. Naqthaoq thaoq nail tsaol-aq bhai gaiq nia lal dai, nl bhiq khi, daoq maq ge nia nail tsaol-aq bhai daoq ge nia lal dai iqsanl, nl bhiq-a nail ngaol” dai, ge nail ngaol.

Currently Selected:

Maqkul 7: aeu

Highlight

Copy