Maqthaiq 14

Ulcuvq saol bhiq nail Yaol haq sil-a nail ganl

1Yanq al yanq bhai, Yeiqsul nail aqmil dov nail ganl Gaq liq lail milkhaoq bhai uv thaiq nail heeqphaq Heiq lol Aqgilpav ya gaiq-a nail ngaol. 2Aq-u phao, aivq nail yaqkav juq bhai ge bhiq-a nail: “Tsaol-aq al gaq neq, ulcuvq saol bhiq nail Yaol haq nial. Aivq gaoq doevq kovq lal thaq nail ngel-i mail, bhaqaoq eeq dee dee nail al juq nl dol lavq nia nail niil” dai, ge bhiq-a nail ngaol.

3Ganl al neq, niail hai ngaol; Jel lal-u phao, Heiq lol neq, yovqgavq nail jaqbheq Pillilpuv nail khaqma Heiq loldil bhai hevq-a nail ngaol. Yaqmai-aq al gaq bhaq da nee, aivq Yaol haq bhai bhi nieivq ail khi thaonq bhai bhi laol-a nail ngaol. 4Khul khi mail dai ngal-aq, “Naol yaqmai-aq thoil gaq bhai hevq nail neq, maq tsaq ail” dai, Yaol haq Heiq lol bhai mee nia pov ge bhiq-a nail ngaol. 5Heiq lol Yaol haq bhai heivq movq khi ngaol-aoq, milkhaoq yaq juq bhai gee sil nail ngaol. Khul khi mail dai ngal-aq, Yaol haq neq, Miqyail nail haqbhoil ge dan nail gaq ngaol dai, milkhaoq yaq juq saol-nvq-ai thaq nail ngaol.

6Teevq n neq, Heiq lol doevq lee-a nail aqn bhai noeq kev khi aqbhee lav sav-u phao, Heiq loldil nail yaqmiq tsaol-aq a dai nail sivtavq bhai bhoeloe nioi daiq bhiq-a nail bhai Heiq lol neekhaol sil dee dee nail ngaol. 7Al heel ngel-i mail, “Naol khal hal nail khe-ai, ngal naoq bhai bivq naol” dai, Heiq lol yaqmiq al gaq bhai khanq bhiq-a nail ngaol. 8Yaqmiq al gaq neq, aivq nail aqma-i mail ge bhiq-ai thaq nail khe-ai, “Ulcuvq saol bhiq nail Yaol haq nail uqhuq, thailphail phail ma bhai oil bhoel khi niil aq-il bhi tsil lavq yaoq” dai, hal-a nail ngaol. 9Heiq lol noeq haq dee dee khi ngaol-aoq, aivq-i mail khanq-ai thaq nail daoq bhaq da nee maqkhaiq, aivq nee mail jaol khi jaq thail thaiq nail daq-i juq bhaq da nee maqkhaiq, “Yaq miq thoil gaq hal nail khe-ai nl bhiq yaoq” dai, daoq bivq-a nail ngaol. 10A bhai nee ngal-aq, aivq yu bhai khoel gai aivq khi, thaonq bhai aol nail Yaol haq nail uqhuq bhi dev ceiv ail-a nail ngaol. 11Uqhuq al, thailphail phail ma bhai oil bhoel khi, yaqmiq al gaq bhai tsiq bhiq-a nail ngaol. Yaqmiq al gaq iqsanl, aivq nail aqma bhai tsiq bhiq ail-a nail ngaol. 12Aq-u phao, Yaol haq nail yaq laol juq lal khi, aivq nail aqmaol bhai duqpheeq ail-a nail ngaol. A bhai nee ngal-aq, ganl al Yeiqsul bhai ge gaiq lai bhiq-a nail ngaol.

Yeiqsul tsaol-aq ngaq hinl gaq bhai bhi jaq-a nail ganl

13Yeiqsul Yaol haq nail ganl al ya gaiq-u phao, jaol duq al dao nee laovq jeeq khi, tsaol-aq maq jaol nail bha ail-a nail ngaol. Aivq al hai ail-a nail ganl tsaol-aq munl munl ma juq heeq nia-u phao, aqkhil tsao tsao ail meenq nee mail dov-ail khi, Yeiqsul nail haoqnao tsao thel aivq-a nail ngaol. 14Yeiqsul laovq nee mail dov lal-u phao, tsaol-aq munl munl ma juq bhai ya moel-a nail ngaol. Aivq aqyu juq bhai gaoq haq khi, aqyu juq nail lavqkhoel khe nal nail tsaol-aq juq bhai lav meeq bhiq-a nail ngaol.

15Kivq hail hail lee-u phao, yaq laol juq Yeiqsul jaol nail bha lal khi, “Niilniai neq, haqtsoiq haqyal niil, nqkivq iqsanl kivq lee aiq nial. Tsaol-aq munl munl ma niil juq bhai phaiq kovq bhiq khi, jul gu doi dai jaqjaq daoldaol bhi ul jaq ail yaoq” dai, ge bhiq-a nail ngaol.

16“Aqyu juq ail nail maq loq-ail. Nul juq aqyu juq bhai bhi jaq yaoq” dai, Yeiqsul yaq laol juq bhai ge bhiq-a nail ngaol.

17“Nv juq neq, khaqmul ngaq heeq khi mail delgil nvq maol aol ail teevq-eel ngaol” dai, ge kovq bhiq-a nail ngaol. 18“Al juq ngal jaol nail bha oil lavq yaoq” dai, Yeiqsul ge bhiq-a nail ngaol. 19“Daikhaoq aqsal nail bhai jaol deel yaoq” dai, Yeiqsul tsaol-aq munl munl ma juq bhai ge bhiq-a nail ngaol. Yeiqsul khaqmul al ngaq heeq khi mail delgil al nvq maol oil khi aivq nqtavq phao gaollel khi, Miqyail bhai tsiq eeq-a nail ngaol. A bhai nee ngal-aq, khaqmul al ngaoqpav khi, yaq laol juq bhai bivq-a nail ngaol. Yaq laol juq iqsanl tsaol-aq munl munl ma juq bhai bhoil bhiq-a nail ngaol. 20Aqyu juq iqsanl mail teevq bov jaq gaq khi, maq jaq gil ail jaiq lal-a nail juq bhai yaq laol juq gov kovq daiq-u phao, pheeq deel nee mail tsel-nvq deel bhee nail ngaol. 21Jaq-a nail tsaol-aq juq neq, yaqmai-aq khi mail yaq juq maq saol-nvq dai, ngaq hinl gaq nii dai bhee nail ngaol.

Yeiqsul ulcuvq kovtavq bhai gailkhaol tsao-a nail ganl

22Aq-u phao, Yeiqsul neq, aivq nail yaq laol juq bhai: “Nul juq laovq jeeq khi, ngaqkha a phao lel khel bha ngaq nail iqmoeq nee ceiv ail yaoq” dai, ge bhiq-a nail ngaol. A bhai nee ngal-aq, Yeiqsul neq, tsaol-aq munl munl ma juq bhai bhi kovq ail-a nail ngaol. 23Yeiqsul neq, tsaol-aq munl munl ma juq bhai bhi kovq-ail gil gaq-u phao, aivq teevq gaq taivq-ail geeqlaoq hal nail dai khi, gaoqjaoq bha dav lai-a nail ngaol. Nqkivq kivq lee-u phao, aivq teevq gaq taivq-ail, a bhai jaol nail ngaol. 24Aq-u phao, Yaq laol juq-i mail jeenq thaq nail laovq al laovq iqsanl, ngaqkha gaoltsi bhai ail kev khi, lilmoel lil ma bhoe lal-a nail ngel-i mail, ulcuvq eel khaol laovq bhai tsiq thaoq tsiq tuv dee dee nail ngaol.

25Yavphoil doil thao phao naqli hail lavq nii dai jel ail-u phao, Yeiqsul ulcuvq kovtavq bhai gailkhaol tsao tsao ail, yaq laol juq jaol nail bha ail-a nail ngaol. 26Aivq ulcuvq kovtavq bhai gailkhaol tsao tsao ail lee nail bhai yaq laol juq ya moel-u phao, gee sil dee dee lal bhiq-a nail ngaol. A bhai nee ngal-aq, “Teevq phaq ga nav nail aqheel khul-il” dai, noeq khi, gee sil nail lavqkhoel nee gul dee dee nail ngaol.

27“Neema ivq dao dai, jaol yaoq. Ngal ngaol. Nul juq thaq gee sil” dai, teevq pov taivq-ail Yeiqsul aqyu juq bhai ge bhiq-a nail ngaol.

28“Heeqphaq-ol, naol ngel haq neq, ngaq bhai ulcuvq kovtavq bhai tsao tsao ail naol jaol nail bha bhi lal lavq yaoq” dai, Bheiqtuvluv Yeiqsul bhai ge bhiq-a nail ngaol.

29Aq-u phao, “Lal aiq thoil” dai, Yeiqsul aivq bhai ge bhiq-a nail ngaol. Al heel ngel-i mail, Bheiqtuvluv laovq nee mail dov-ail khi, ulcuvq kovtavq bhai tsao tsao ail, Yeiqsul jaol nail bha lai-a nail ngaol. 30Thail hai ngaol-aoq, lilmoel lil ma bhoe lal nail bhai Bheiqtuvluv ya moel-u phao, gee sil nail neema aol lal bhiq khi, ulcuvq bhai ga nevq ail-a nail ngaol. Aq-u phao, “Heeqphaq-ol, ngaq bhai hevq kovq lavq yaoq” dai, aivq mail ma-ail gul nail ngaol.

31Teevq pov taivq-ail, Yeiqsul aqlavq gaol tsaoq khi, aivq bhai he dov bhiq-a nail ngaol. “Neema thaq tsaol nail phao, gaq bhaq nail gaq-ol. Khul khi mail naol pov pov lav lav ail noeq nail-aiq” dai, Bheiqtuvluv bhai ge bhiq-a nail ngaol.

32Aqyu nvq gaq laovq lavqkhoel bhai aol lai-u phao, lilmoel maq bhoe dai, naq lai-a nail ngaol. 33A bhai nee ngal-aq, laovq lavqkhoel bhai jaol nail yaq laol juq, Yeiqsul bhai uqhuq thaoq thaoq ail, “Naol neq, mal dil Miqyail nail Yaqyov nial” dai, ge bhiq-a nail ngaol.

Geiqneiqsaqlail milkhaoq bhai jaol nail tsaol-aq bhai nalgoel lav meeq bhiq-a nail ganl

34Aqyu juq ngaqkha a phao lel khel bhai ceiv ail khi, Geiqneiqsaqlail dai khul nail dao bhai ail kev-a nail ngaol. 35A bhai jaol nail tsaol-aq juq, Yeiqsul niil dai, hel daiq heeq nia-u phao, milkhaoq doi dai khoel gai aivq khi, nal nail goel nail tsaol-aq iqsanl bhai Yeiqsul jaol nail bha bhi hel lavq-a nail ngaol. 36“Naoq nail phailkhaoq phail daoq bhai taivq-ail ngaol-aoq, bhi thoiq tsi lavq yaoq” dai, nal nail tsaol-aq al juq Yeiqsul bhai hal-a nail ngaol. Khal thoiq tsi-a nail tsaol-aq iqsanl mail, meeq lai-a nail ngaol.

Currently Selected:

Maqthaiq 14: aeu

Highlight

Copy