Lulkavq 2

Aqmil gevq bhoel-ai thaq nail ganl

1Yanq yaq lao al nail lavqkhoel, “Milkhaoq yaq iqsanl, aqmil ya gevq bhoel ail naol” dai, heeqphaq Gailsaq Aol gul tuv daoq bivq-a nail ngaol. 2Niil thal khe pov, aqmil gevq nail neq, iqmoeq ilmoeq khe pov ngaol. Aq-u phao, Sulliv milkhaoq bhai Gulleiqnil joiq jaq nail ngaol. 3Tsaol-aq iqsanl mail, aqmil gevq ail nail dai khi, yovqgavq nail meenq bhai yovqgavq ail-a nail ngaol.

4-5Yaolsai iqsanl, Daq bhil nail jeq-e jaq-a ngel-i mail, aivq-i mail hevq naol dai, ge ceiv-ai thaq nail Maq lil hevq khi, aqmil gevq lai-a nail ngaol. Gaq liq lail milkhaoq Naq saq lail meenq nee mail Heeqphaq Daq bhil doevq lee-a nail meenq pevq nail Yuldav milkhaoq Bhaiqlaiqhaiq meenq bhai lai-a nail ngaol. Aq-u phao, Maq lil neq, aqhaq aqmaol liq nail ngaol. 6Aqyu nvq maolyaq Bhaiqlaiqhaiq meenq bhai jaol-u phao, Maq lil neq, yaq tsiq nail yanq tsaq lal-aoq nail ngaol. 7A bhai nee ngal-aq, Maq lil yaq tsiq-a nail ngaol. Aivq iqmoeq ilmoeq doevq lee-a nail Yaqyov al gaq bhai tsiqdaq daq khi, niaoqjal laoqkhaiq lavqkhoel bhai tsiq iq thaiq-ai thaq nail ngaol. Khul khi mail dai ngal-aq neq, daq-i yavq duq bhai aqyu nvq maolyaq nail haqbhoil yavq duq maq jiav-ail.

Yaol lovq nail juq khi mail nqtavq gaqkhoel nail ganl

8Milkhaoq al khaoq nail lavqkhoel bhai yaol lovq nail juq neq, nqkiv phao yalphiq bhai aqyu juq nail yaol bhai lovq nail ngaol. 9Aq-u phao, Heeqphaq Miqyail nail nqtavq gaqkhoel teevq gaq dov lee khi, aqyu juq nail aqjail bhai thul phaol lee-a nail ngaol. Miqyail nail aqbhaq aqyu juq jaol nail teevq jaoq bhaq lee-a nail ngel-i mail, aqyu juq gee sil dee dee lal bhiq-a nail ngaol. 10Nqtavq gaqkhoel aqyu juq bhai ge bhiq-a nail: “Thaq gee sil. Khul khi mail dai ngal-aq neq, tsaol-aq iqsanl nail haqbhoil lavqkhiq tsail dee dee lal nail daoq, ngal nul juq bhai cavq gaiq lee-a nail ngaol. 11Yaq n n-gaol heeqphaq Daq bhil nail meenq lavqkhoel bhai, nul juq nail haqbhoil Hevq kovq nail gaq doevq lee-aoq nail ngaol. Aivq neq, Heeqphaq Khali#2.11 Khali dai ge nail neq, Miqyail-i mail tsel dov-ai thaq nail heeqphaq. ngaol. 12Nul juq aivq bhai niail hai ya moel naol. Yaqbeiv bhai tsiqdaq daq khi, niaoqjal laoqkhaiq lavqkhoel bhai tsiq iq thaiq-ai thaq nail bhai, nul juq ya moel nail ngaol. Al hai ya moel-u phao al gaq neq, Khali ngaol” dai, aqyu juq bhai ge bhiq-a nail ngaol.

13Nqtavq gaqkhoel al gaq jaol nail bha, nqtavq gaqkhoel munl munl lao ail thaiq phuq dai, dov lee-a nail ngaol. Aqyu juq Miqyail bhai niail hai tsiq eeq nail ngaol: 14“Nqtavq kovtavq bha jaol nail Miqyail bhai tsiq eeq tsiq heel bhel. Miltsaq kovtavq bhai iqsanl, aivq neema tsaq nail tsaol-aq juq nee, nee sal ovq dei-eiq” dai, ge nail ngaol.

15Nqtavq gaqkhoel juq nqtavq bha kovq dav lai gaq-u phao, yaol lovq nail juq ge nail: “Ngadao Bhaiqlaiqhaiq meenq bhai ail khi, pevq lal-a nail ganl niil, Miqyail-i mail ngadao bhai ge lavq-a nail khe-ai, hel daiq-ail bhel” dai, teevq gaq nee teevq gaq tsaoq-a nail ngaol.

16A bhai nee ngal-aq, aqyu juq lavqtsail mail ail khi, Maq lil khi Yaolsai bhai maqkhaiq, niaoqjal laoqkhaiq lavqkhoel bhai tsiq iq thaiq-ai thaq nail yaqbeiv bhai maqkhaiq, ya moel-a nail ngaol. 17Aqyu juq ya moel gaq-u phao, yaqbeiv al gaq nail ganl nqtavq gaqkhoel-i mail aqyu juq bhai ge bhiq-a nail khe-ai, aqyu juq iqsanl, yu bhai ge bhiq-a nail ngaol. 18Khal ya gaiq-a nail tsaol-aq juq iqsanl mail, yaol lovq nail juq-i mail ge bhiq-a nail bhai noeq-u maq dov dai, pevq ail-a nail ngaol. 19Maq lil neq, ganl al juq iqsanl mail, noeq thaq-ai thaq khi, aivq nail neema lavqkhoel bhail saol-nvq saol-nvq ail jaol nail ngaol. 20Yaol lovq nail juq, nqtavq gaqkhoel-i mail aqyu juq bhai ge bhiq-a nail khe-ai, iqsanl bhai ya gaiq, ya moel-a nail ngel-i mail, Miqyail bhai seiqleiq khaoqsail bivq khi tsiq eeq tsiq eeq ail kovq ail-a nail ngaol.

Yeiqsul uqhuq thaoq nail ilkhaol il ma bhai tsil laivq-a nail ganl

21Eivq n bhee lal khi, yaqbeiv bhai bavkov uqjaq oev bhiq-u phao, aivq bhai Yeiqsul dai, mil bhiq-a nail ngaol. Aqmil al neq, aqma nail ovqmav lavqkhoel bhai maq ceiv lai-u phao nee mail nqtavq gaqkhoel-i mail mil-ai thaq nail ngaol.

22Maolseiq nail aoldaoq kovqdaoq lavqkhoel bhai gevq-ai thaq nail khe-ai, aqmaol lav haol nail aol nl nail aqyanq kev lal-u phao, aqyu nvq maolyaq yaqbeiv bhal khi, Heeqphaq Miqyail nail sivtavq bhai tsiq ha lai nail haqbhoil Yeiqlulsaqlaiq meenq khe uqhuq thaoq nail ilkhaol il ma bhai lai-a nail ngaol. 23Khul khi mail dai ngal-aq neq, Miqyail nail aoldaoq kovqdaoq lavqkhoel bhai gevq-ai thaq nail khe-ai, iqmoeq ilmoeq doevq lee nail yaqyov gaq neq, Heeqphaq Miqyail nail haqbhoil ya meeq ya haol khi, aivq bhai ya av bhiq nail ngaol. 24Al ovqtavq, Miqyail nail aoldaoq kovqdaoq lavqkhoel bhai gevq-ai thaq nail khe-ai, khaoq khoiq teevq gu maq ngel haq neq, salmilkhaoq khoiq maol yaq teevq gu, ya laol bhiq nail ngaol.

Silmiqoq Miqyail bhai tsiq eeq nail ganl

25Aq-u phao, Silmiqoq dai mil-ai thaq nail tsaol-aq teevq gaq, Yeiqlulsaqlaiq meenq bha jaol nail ngaol. Aivq neq, tsaq nail daol nail tsaol-aq teevq gaq pevq khi, Miqyail bhai ev nail tsaol-aq teevq gaq ngaol, Ilsaqleiqlav nail jeq-e jaq-a hevq kovq nail phaq ya nail bhai daonq nail teevq gaq ngaol. Meeq nail Haol nail Aqhaqlal aivq nail lavqkhoel bhai jaol nail ngaol. 26“Miqyail nail Khali bhai, naol maq ya moel-u kev dai, naol maq ya sil ail” dai, Meeq nail Haol nail Aqhaqlal aivq bhai phao daiq-ai bhiq thaq nail ngaol. 27Aqhaqlal Miqyail aivq bhai bhi noeq dov-a nail ngel-i mail, aivq aq-u n-gaol uqhuq thaoq nail ilkhaol il ma bhai dav lai-a nail ngaol. Aol daoq kovq daoq jiav nail khe-ai, nl bhiq nail dai khi mail, yaqbeiv nail aqbhu aqma yaqbeiv Yeiqsul bhai uqhuq thaoq nail ilkhaol il ma bhai bhal laivq-a nail ngaol. 28Aq-u phao, Silmiqoq al gaq yaqbeiv bhai tsiq khi, Miqyail bhai tsiq eeq tsiq eeq ail, niail hai ge nail ngaol:

29“Heeqphaq-ol,

naoq-i mail

ge-ai thaq nail khe-ai,

naoq nail yaqkav

nee sal ovq nail lavqkhoel

naoq-ai nee jaol lal naol.

30Khul khi mail dai

ngal-aq neq,

naoq-i mail

lav sav-ai thaq nail

hevq kovq nail phaq bhai,

ngal teevq bhee

ya moel-aoq nail ngaol.

31Jeq-e jaq-a iqsanl nail

sivtavq bhai

hevq kovq nail niil phaq

naol lav sav-ai

thaq nail ngaol.

32Hevq kovq nail niil neq,

laol kivq yaq bhai

bhaq bhiq nail

aqbhaq pevq khi,

naoq nail jeq-e jaq-a

Ilsaqleiqlav nail

tsaol-aq nail haqbhoil

eeq dee dee nail

seiqleiq khaoqsail

pevq nail ngaol” dai,

ge nail ngaol.

33Silmiqoq yaqbeiv al gaq nail ganl niail hai ge nail ngel-i mail, yaqbeiv nail aqbhu aqma noeq-u maq dov dai, pevq ail-a nail ngaol. 34Silmiqoq aqyu juq bhai geeqlaoq bivq khi, aqma Maq lil gaq bhai ge bhiq-a nail: “Yaqbeiv niil gaq bhaq da nee, Ilsaqleiqlav nail tsaol-aq mao dai gaq tsuq ail khi, mao dai gaq thul lal nail ngaol. Tsaol-aq teevq pav ga nav juq neq, aivq bhai khaonq khi aivq neq, yu bhai bhi heeq bhi moel nail phaq pevq lal nail ngaol. 35Al ovqtavq, tsaol-aq mao dai gaq nail neema lavqkhoel-ai noeq nail juq phao dov daiq lavq nail ngaol. Naoq nail neema bhai thaoma-i mail coevpav lavq nail khe-ai, naol ya noeq haq dee dee nail ngaol” dai, ge bhiq-a nail ngaol.

Haq naq Miqyail bhai tsiq eeq nail ganl

36Aqseiqlav nail jeq-e jaq-a Phaq noeqlal nail yaqmiq Haq naq dai mil-ai thaq nail, Miqyail nail haqbhoil ge dan nail yaqmai-aq teevq gaq jaol nail ngaol. Aivq neq, joiqmaoq maoq dee dee lai-aoq nail ngaol. Aivq maol ail khi, aivq nail yovjil nee mail sivq kovq taivq-ail ya jaol khi mail, miqtsiq miqma pevq ail-a nail ngaol. 37Aivq neq, eivq tsel liq kovq bhee lal-aoq nail ngaol. Aivq neq, uqhuq thaoq nail ilkhaol il ma bhai taivq-ail jaol jaol ail, nqkiv n-gaol maqkhaiq, Miqyail bhai uqhuq thaoq khi teevq yanq ngal-aq, teevq pov maq jaq nail aol nl nl-ail khi, geeqlaoq hal nail ngaol. 38Al teevq yanq nail lavqkhoel bhai, aivq Maq lil khi Yaolsai jaol nail bha lal khi, Miqyail bhai tsiq eeq nail ngaol. Yeiqlulsaqlaiq meenq bha hevq kovq lavq dai noeq thunq nail tsaol-aq iqsanl bhai yaq al gaq nail ganl, aivq ge bhiq-a nail ngaol.

Naq saq lail meenq bha kovq ail-a nail ganl

39Yaolsai khi mail Maq lil, Miqyail nail aoldaoq kovqdaoq jiav nail khe-ai, iqsanl bhai nl gil-u phao, aqyu nvq maolyaq, yaq bhal khi mail, yovqgavq nail jaol duq, Gaq liq lail milkhaoq bhai jiav nail Naq saq lail meenq bha kovq ail-a nail ngaol. 40Yaqyov al gaq eeq lal khi, gaq iqsanl kav lal-aoq nail ngaol. Nee noeq nee kha teevq bhee aol lal khi, Miqyail nail geeqlaoq eel jaol iqsanl aivq nail kovtavq-ai jiav nail ngaol.

Yaqyov Yeiqsul uqhuq thaoq nail ilkhaol il ma bhai dav lai-a nail ganl

41Yeiqsul nail aqbhu aqma neq, yaoq kovq yaoq-ao nee Bhaqsaqkhaq#2.41 Ilsaqleiqlav nail tsaol-aq Iljiltuv nail milkhaoq nee bhuq ail jel ail-a nail bhai noeq kev khi lav sav nail aqbhee. aqbhee kev lal haq neq, Yeiqlulsaqlaiq meenq bha lai nail ngaol. 42Yeiqsul tsel-nvq kovq bhee lal-u phao, aqyu juq nail aolsaolkovq jiav nail khe-ai, Yeiqlulsaqlaiq meenq bha lai-a nail ngaol. 43Aqbhee lav sav gaq khi, aqyu juq kovq ail-u phao, Yeiqsul neq, Yeiqlulsaqlaiq meenq bha jaol-ail ceevq-a nail ngaol. Thail hai ngaol-aoq, Maq lil khi Yaolsai maq heeq nia-ail. 44“Yeiqsul neq, tsaol-aq munl munl ma nee mail kovq lee thail thaiq naol” dai, aqyu nvq maolyaq noeq khi, teevq n yaoq yal bha kev ail-a nail ngaol. A bhai nee ngal-aq, aqivq jaqbheq khi aqtsaoq aqlaol jaol nail bha hal pov daiq lai-a nail ngaol. 45Maq hal pov moel-a nail ngel-i mail, aqyu nvq maolyaq Yeiqsul bhai Yeiqlulsaqlaiq meenq bha hal pov lai-a nail ngaol. 46Hail n bhee lal-u phao, uqhuq thaoq nail ilkhaol il ma nail lavqkhoel-ai, Yeiqsul bhai ya moel-a nail ngaol. Yeiqsul neq, saq laq juq nee mail jaol deel khi, aqyu juq-i mail cavq bhiq cov bhiq nail phaq bhai nal daiq khi, aqyu juq bhai mee nia phaq gaoq nal daiq kovq bhiq-a nail ngaol. 47Aivq nail daoq ya gaiq-a nail tsaol-aq iqsanl mail, aivq nail neenoeq neekha bhai maqkhaiq, aivq-i mail ge kovq-ai leevq nail daoq juq bhai maqkhaiq, noeq-u maq dov ail, pevq ail-a nail ngaol. 48Yeiqsul nail aqbhu aqma Yeiqsul bhai ya moel-u phao, noeq-u maq dov dai pevq-ail khi, aivq nail aqma aivq bhai ge bhiq-a nail: “Yaqyov-ol, khul khi mail, naol naoq nail aqbhu nv-nvq gaq bhai niail hai nl lavq-a nail-aiq. Naoq nail aqbhu nv-nvq gaq noeq haq dee dee nail lavqkhoel nee naoq bhai hal pov nail ngaol” dai, ge bhiq-a nail ngaol.

49“Nul nq nvq gaq khul khi mail, ngaq bhai hal pov nail-aiq. Ngal ngaq nail Aqbhu nail ilkhaol bhai ya jaol nail ngaol dai, nul nq nvq gaq maq heeq kivq ail laiq” dai, aqyu nvq gaq bhai ge kovq bhiq-a nail ngaol. 50Aivq-i mail ge movq nail daoq ceevq bhai aqyu nvq maolyaq maq gov heeq nia-ail.

51Yeiqsul neq, aqyu nvq maolyaq nee mail Naq saq lail meenq bha kovq-ail khi, aqyu nvq maolyaq nail daoq aqmeeq-ai nal daiq nal daiq-ail jaol nail ngaol. Aivq nail aqma neq, pevq lal-a nail ganl juq iqsanl mail, neema lavqkhoel bhai saol-nvq-ai thaq nail ngaol. 52Yeiqsul neq, neenoeq neekha khi aqmaol eeq lal khi, Heeqphaq Miqyail nail sivtavq bhai maqkhaiq, tsaol-aq nail sivtavq bhai maqkhaiq, aivq bhai neema tsaq nail ngaol.

Currently Selected:

Lulkavq 2: aeu

Highlight

Copy