Lulkavq 18

Miqtsiq miqma khi mail yalkhaq dal bhiq nail teevq gaq nail ganl

1Aqyu juq neema maq cov mail khaq mao iqsanl geeqlaoq hal dai, Yeiqsul aivq nail yaq laol juq bhai daoqma uqhuq daoq niil daoq nee cavq bhiq cov bhiq-a nail ngaol: 2“Aq-u phao, meenq teevq meenq nail lavqkhoel bhai yalkhaq dal bhiq nail teevq gaq jaol lao thaq nail ngaol. Aivq neq, Miqyail bhai maq gee sil nail nee ovqtavq, tsaol-aq yaq bhai iqsanl, maq ev nail tsaol-aq ngaol. 3Meenq al meenq bhai miqtsiq miqma teevq gaq jaol nail ngaol. Aivq yalkhaq dal bhiq nail al gaq jaol nail bha teevq yanq ngal-aq, teevq pov lai lai ail khi, ‘Ngaq bhai ge gaq movq ail bhiq nail phao jaol nail gaq, ngaq bhai nl laiq lavq-a nail bhai, tsaq nail daol nail lavqkhoel nee dal ceiv lavq yaoq’ dai, hal nail ngaol.

4Thail hai ngaol-aoq, yalkhaq dal bhiq nail al gaq maq dal bhiq dai, tsaq dai jaol-a nail ngaol. A bhai nee ngal-aq, aivq nail neema lavqkhoel bhai niail hai noeq nail ngaol: ‘Ngal neq, Miqyail bhai maq gee sil nail nee ovqtavq, tsaol-aq yaq bhai maq ev nail teevq gaq pevq khi ngaol-aoq, 5miqtsiq miqma niil gaq ngaq bhai lav suq saq lal nail ngel-i mail, ngal aivq bhai tsaq nail daol nail lavqkhoel nee dal ceiv bhiq naol. Al hai maq ngel haq neq, aivq lal lal ail lav suq saq lal nail bhai bov ail bov lal-aoq nial’ dai, noeq nail ngaol.”

6Al heel ngel-i mail, Yeiqsul gaoq ge nail: “Maq see maq daol nail yalkhaq dal bhiq nail al gaq, aivq nail neema lavqkhoel-ai aol nail bhai saol-nvq daiq yaoq. 7Miqyail-i mail tsel dov-ai thaq nail tsaol-aq, nqkiv n-gaol maqkhaiq, aivq bhai hal haq neq, Miqyail tsaq nail daol nail lavqkhoel nee, aqyu juq nail haqbhoil maq nl bhiq ail laiq. Aivq daonq daonq ail jaol naol laiq. 8Ngal nul juq bhai ge lavq bhel. Aivq aqyu juq nail haqbhoil tsaq nail daol nail phaq lavqtsail mail nl bhiq naol. Thail hai ngaol-aoq, tsaol-aq nail Yaqyov yavq kha lee-u phao, miltsaq bhai, aivq bhai neema thaq tsaol nail phaq jiav nail bhai, ya moel naol laiq” dai, ge bhiq-a nail ngaol.

Phaq liq sail khi mail khaon tavq nail gaq nail ganl

9Yovqgavq bhai yovqgavq neq, tsaq naol daol naol dai saol-nvq khi, yu bhai thaqtheq nail tsaol-aq juq bhai, Yeiqsul daoqma uqhuq daoq niil daoq nee cavq bhiq cov bhiq-a nail ngaol: 10“Tsaol-aq nvq gaq uqhuq thaoq nail ilkhaol il ma nail lavqkhoel bhai geeqlaoq hal lai-a nail ngaol. Teevq gaq neq, Phaq liq sail ngaol. Teevq gaq neq, khaon tavq nail tsaol-aq ngaol. 11Phaq liq sail al gaq thul phaol khi, aivq bhai aivq niail hai ge ge ail khi geeqlaoq hal nail: ‘Miqyail-ol, ngal neq, yu khe-ai maq dul nail ngel-i mail, geeqlaoq eeq naol. Aqyu juq neq, goiqbhaoq bhaoq jaq nail tsaol-aq, maq tsaq maq daol nail tsaol-aq khi mail, yu nail khaqma bhai bheeq nail leel nail tsaol-aq ngaol. Al ovqtavq, ngal neq, khaon tavq nail niil gaq khe-ai maq dul nail ngel-i mail iqsanl, naoq bhai tsiq eeq nail ngaol. 12Jaol n teevq jao nail lavqkhoel bhai ngal maq jaq nail aol nvq pov nl nail ngaol. Ngal khal ya nail yaoq phaq yaoq-ao nee naoq bhai tsel bhoil teevq bhoil danq nail ngaol’ dai, aivq ge nail ngaol.

13Thail hai ngaol-aoq, khaon tavq nail al gaq neq, eqyal bha thul phaol-nvq thaq nail ngaol. Aivq nqtavq phao maq gaollel daiq sal ail, noeq haq dee dee nail lavqkhoel nee, neema bhai deeq deeq ail khi ge nail: ‘Miqyail-ol, ngal oeqbal eeq dee dee nail bhai, gaoq haq lavq yaoq’ dai, hal nail ngaol.

14Ngal nul juq bhai ge lavq bhel. Khaon tavq nail al gaq tsaq nail daol nail tsaol-aq pevq lal khi, ilkhaol bha kovq ail-a nail ngaol. Phaq liq sail al gaq neq, tsaq nail daol nail tsaol-aq maq pevq lal-al. Khul khi mail dai ngal-aq neq, yovqgavq bhai yovqgavq thaq eeq nail tsaol-aq yaoq gaq yaoq-ao nee mail, thaqtheq nail bhai ya daq naol. Yovqgavq bhai yovqgavq thaqtheq nail tsaol-aq, thaq eeq nail bhai ya daq naol” dai, ge bhiq-a nail ngaol.

Yeiqsul yaqnoil juq bhai geeqlaoq bivq nail ganl

15Aq-u phao, Yeiqsul-i mail yaqbeiv juq bhai bhi thoiq tsi nail haqbhoil, yu aivq jaol nail bha bhal lavq-a nail ngaol. Yaq laol juq al bhai ya moel-u phao, yaqbeiv bhal lavq-a nail juq bhai khaq bhiq-a nail ngaol. 16Thail hai ngaol-aoq, Yeiqsul yaq laol juq bhai khul khi ge nail: “Yaq noil juq ngal jaol nail bha bhi lal yaoq. Aqyu juq bhai thaq lav tsoiq. Khul khi mail dai ngal-aq neq, Miqyail Milkhaoq neq, aqyu juq kheel yaqnoil juq bhai ovq nail ngaol. 17Ngal nul juq bhai mal dil dai, ge lavq bhel. Yaq noil khe-ai Miqyail Milkhaoq bhai maq hav bhoel nail tsaol-aq khul gaq maqkhaiq, a bhai maq ya aol lai ail” dai, ge bhiq-a nail ngaol.

Yuldav nail tsaol-aq nail aqivq jiovq nail hulmeeq hul bhao teevq gaq nail ganl

18“Meeq nail saq laq-ol, ngal nqmaq maqluv halyeel doevq nail phaq ya dai, khal hai ya nl nail-aiq” dai, Yuldav nail tsaol-aq nail aqivq teevq gaq, Yeiqsul bhai nal daiq lal-a nail ngaol.

19Yeiqsul ge nail: “Khul khi mail, naol ngaq bhai, meeq nail saq laq dai, khul nail-aiq. Miqyail maq ngel nail neq, meeq nail teevq gaq ail maq jaol-ail. 20Naol aoldaoq kovqdaoq heeq nia nail ngaol. Yu nee thaq bheeq thaq leel. Tsaol-aq yaq bhai thaq lav heivq. Yu nail nlmaoq thaq khoiq. Yu bhai maq tsaq nail salkhil thaq khanq. Naoq nail aqbhu aqma bhai ev yaoq” dai, ge bhiq-a nail ngaol.

21“Ngal yaqnoil ail jiav-u phao nee, aoldaoq kovqdaoq al juq iqsanl mail, nal daiq gil-aoq nail ngaol” dai, tsaol-aq al gaq Yeiqsul bhai ge kovq bhiq-a nail ngaol.

22Yeiqsul daoq al daoq ya gaiq-u phao, “Naol teevq phaq loq ail haq nail niil” dai, ge bhiq-a nail ngaol. “Naol khal jiav nail nlmaoq iqsanl mail gaoq ha gil khi, haq yaq aoq yaq juq bhai bhoil bhiq yaoq. Al hai nl haq neq, nqtavq kovtavq bhai mao ail phoiq nail naoq nail phul heel ildaoq maoqgaiq jiav lal naol. Aq-u phao, naol kovq lal khi, ngaq nail haoqnao tsao thel lavq yaoq” dai, Yeiqsul tsaol-aq al gaq bhai ge bhiq-a nail ngaol.

23Tsaol-aq al gaq daoq al daoq ya gaiq-u phao, noeq haq dee dee lal bhiq-a nail ngaol. Khul khi mail dai ngal-aq neq, aivq neq, hulmeeq hul bhao teevq gaq ngaol. 24Aivq noeq haq nail bhai Yeiqsul ya moel khi ge nail: “Hulmeeq hulbhao juq Miqyail Milkhaoq lavqkhoel bhai aol lai nail neq, kha dai haq nail ngel-ail. 25Laolthao geevqjieivq geeq naq bhai aol lai nail neq, hulmeeq hul bhao juq Miqyail Milkhaoq lavqkhoel bhai aol lai nail nee maq tsil ngaq aiq jaiq nail ngaol” dai, ge bhiq-a nail ngaol.

26Ya gaiq-a nail tsaol-aq al juq ge nail: “Thail hai phal-iq neq, khaq sil gaq hevq kovq nail phaq ya nia nail-aiq” dai, nal daiq-a nail ngaol. 27“Tsaol-aq yaq maq nl nia nail phaq bhai, Miqyail nl nia nail ngaol” dai, Yeiqsul aqyu juq bhai ge bhiq-a nail ngaol.

Ngadao juq ya nail phaq

28Aq-u phao, Bheiqtuvluv ge nail: “Nv juq yaoq phaq yaoq-ao nee khaonq ha ail ceevq khi, naoq nail haoqnao tsao the nail ngaol” dai, ge bhiq-a nail ngaol.

29Yeiqsul ge nail: “Ngal nul juq bhai mal dil dai, ge lavq bhel. Miqyail Milkhaoq nail haqbhoil, yovqgavq nail ilkhaol, khaq ma, aqivq jaqbheq, aqbhu aqma khi mail, yaqmiq yaq yov, niil juq bhai khaonq ha ail ceevq-a nail khul gaq maqkhaiq, 30niil yeel nail lavqkhoel, a dai nee maq tsil ya nail nee ovqtavq, yaqhao khe yeel nail lavqkhoel neq, nqmaq maqluv halyeel doevq nail phaq iqsanl ya naol” dai, ge bhiq-a nail ngaol.

“Ngal ya sil naol” dai, Yeiqsul teevq pov gaoq ge bhiq-a nail ganl

31Aq-u phao, Yeiqsul gaqkhoel tsel-nvq gaq bhai khul khi ge bhiq-a nail: “Ngadao juq Yeiqlulsaqlaiq meenq bha lai thail thaiq nail ngaol. Tsaol-aq nail Yaqyov nail ganl, Miqyail nail haqbhoil ge dan nail juq-i mail gevq-ai thaq nail iqsanl mail, ya bhee lal nail ngaol. 32Aivq bhai yu nail jeq-e nail aqlavq lavqkhoel bhai av bhiq khi, meel naq meel naq ail hel sil khi, khal nl movq ail nl bhiq khi mail, thaiqkhaq thaiqbav nail bhai, aivq ya daq nail ngaol. 33Aqyu juq, aivq bhai neeqtsaq-i mail jiivq gaq khi, heivq nail ngaol. Thail hai ngaol-aoq, hail n bhee lal haq neq, aivq gaoq doevq kovq lal nail ngaol” dai, Yeiqsul aqyu juq bhai ge bhiq-a nail ngaol.

34Thail hai ngaol-aoq, ganl al juq gaqkhoel juq teevq peivq ail maq nal daiq heeq nia-ail. Aqyu juq bhai ge bhiq-a nail daoq al juq neq, aqyu juq nail sivtavq bhai oil uvq-ai thaq nail phaq pevq khi, Yeiqsul-i mail ge nail bhai, aqyu juq teevq peivq ail maq nal daiq heeq nia-ail.

Maivpeivq teevq gaq bhai maivneev bhi moel lal-a nail ganl

35Yeiqsul Yeiqlilkhol nail meenq meenq jail bhai ail kev-u phao, maiv peivq teevq gaq gailkhaol gailbhaq bhai jaol deel khi hal jaq nail ngaol. 36Maivpeivq al gaq, tsaol-aq munl munl ma ail nail lal nail bhai ya gaiq-u phao: “Khul pevq thail thaiq nail-aiq” dai, nal daiq-a nail ngaol. 37“Naq saq lail meenq yaq Yeiqsul lee thail thaiq nail ngaol” dai, aqyu juq maiv peivq al gaq bhai ge bhiq-a nail ngaol.

38Aq-u phao, “Daq bhil nail Yaqyov Yeiqsul-ol, ngaq bhai gaoq haq lavq yaoq” dai, aivq gul-a nail ngaol.

39Iqmoeq phao tsao nail juq aivq bhai, “Aq tsi tsu dai jaol yaoq” dai, khaq khi ngaol-aoq, aivq maq nal daiq dai, “Daq bhil nail Yaqyov-ol, ngaq bhai gaoq haq lavq yaoq” dai, iqmoeq-u nee maq tsil gaoq gul-a nail ngaol.

40-41Yeiqsul naq lai khi, “Aivq ngal jaol nail bha hel lavq yaoq” dai, ge bhiq-a nail ngaol. Maivpeivq al gaq, aivq nail aqjail bhai lai kev-u phao, Yeiqsul ge nail: “Ngal naoq nail haqbhoil khul bhi nl bhiq movq nail-aiq” dai, aivq bhai nal daiq-a nail ngaol. Aq-u phao, “Heeqphaq-ol, ngaq nail maivneev moel lal dai, bhi nl lavq movq ail nial” dai, hal bhiq-a nail ngaol.

42Yeiqsul ge nail: “Moel lal yaoq. Naol ngaq bhai neema thaq tsaol nail ngel-i mail, meeq lai-a nail ngaol” dai, aivq bhai ge bhiq-a nail ngaol. 43Tsaol-aq al gaq teevq pov nee mail, maivneev moel lal khi, Miqyail bhai tsiq eeq tsiq eeq ail, Yeiqsul nail haoqnao tsao thel aivq-a nail ngaol. Tsaol-aq iqsanl mail al bhai ya moel-u phao, Miqyail bhai tsiq eeq nail ngaol.

Currently Selected:

Lulkavq 18: aeu

Highlight

Copy