Genesis 38

Iqmoeq 38

Yuldav dai khi Taqmaqlav

1Aq-u phao, Yuldav neq, aivq nail aqivq jaqbheq juq nee mail dov-ail khi, Aqdullanq nail jeq-e pevq nail Hiqlav jaol nail bha ail khi, jaol ail-a nail ngaol.

2Jaolduq al duq bhai Yuldav neq, Khaqnanq nail jeq-e pevq nail Sul-aq nail yaqmiq bhai moel khi hevq-a nail ngaol. A bhai nee ngal-aq, aivq nail khaqma nee jaol tavq khi,

3yaq ceiv lai-a nail nee ovqtavq, yaqyov teevq gaq bhao-a nail ngaol. Aq-u phao, yaqyov al gaq bhai Eillav dai, mil bhiq-a nail ngaol.

4Al ovqtavq, yaq gaoq ceiv lai khi, yaqyov teevq gaq gaoq bhao-a nail ngaol. Aq-u phao, yaqyov al gaq bhai Aolnanq dai, mil bhiq-a nail ngaol.

5Haoqnao teevq pov yaqyov teevq gaq gaoq bhao khi Seiqlal dai mil bhiq-a nail ngaol. Seiq lal bhai bhao-u phao, Yuldav aqyu phaq nail phaqyaq ma yaq neq, Kheiqsiq meenq bhai jaol-a nail ngaol.

6Yuldav neq, aivq nail uqbhao yaqyov pevq nail Eillav bhai Taqmaqlav dai, khul nail yaqmai-aq teevq gaq-ai, bhi hevq-a nail ngaol.

7Thail hai ngaol-aoq Eillav neq, Heeqphaq Miqyail nail sivtavq bhai haqeiv nail gaq pevq nail ngel-i mail, Heeqphaq Miqyail neq, aivq nail doevqyeel bhai oil kovq bhiq-a nail ngaol.

8Aq-u phao, Yuldav neq, aivq nail yaqyov Aolnanq bhai ge bhiq-a nail: "Naol neq, naoq nail algao nail khaqma bhai ya hevq nail dol khi, aivq nail galduq yaq bhi jaol lee yaoq" dai, ge bhiq-a nail ngaol.

9Aolnanq neq, aivq nail aqtsu nee jaol khi mail ya nail yaq neq, aivq nail algao nail yaq pevq nail dai, heeq nia nail ngel-i mail, aivq nail algao nail haqbhoil, yaq maq bhi jaol lee nail galduq, aivq nail aqtsu nee mail jaol tavq-u phao, yaqyov-aq nail ullul neq, miltsaq bha bhi khal gil ail-a nail ngaol.

10Aolnanq al hai nl-a nail neq, Miqyail nail sivtavq bhai haqeiv nail ganl pevq nail ngel-i mail, aivq nail doevqyeel bhai oil kovq bhiq-a nail ngaol.

11Aq-u phao, Yuldav neq, aivq nail khiqma Taqmaqlav bhai ge bhiq-a nail: "Ngaq nail yaqyov Seiqlav yovkav eeq lal-u phao kev dai, naoq nail aqbhu nail ilkhaol bha kovq-ail khi mail, miqtsiq miqma teevq gaq khe-ai daonq-ail yaoq" dai, ge bhiq-a nail ngaol. Thail hai ge bhiq-a nail neq, aivq nail yaqyov Seiqlav aivq nail algao juq khe-ai, sil nail bhai gee sil lal bhiq-a nail ngel-i mail ngaol. A bhai nee ngal-aq, Taqmaqlav neq, aivq nail aqbhu nail ilkhaol bhai kovq-ail khi mail daonq ail-a nail ngaol.

12Aqkovq aqyanq maoq lal-u phao, Sul-aq nail yaqmiq pevq nail Yuldav nail khaqma sil-a nail ngaol. Yuldav neq, aivq nail khaqma nail galduq nioil nail aqyanq jel ail-u phao, aivq nail aqtsaoq Aqdullanq nail jeq-e pevq nail Hillav nee mail teevq gaq khe-ai, aivq nail yaol juq bhai aqmevq thaiq nail galduq, Tilmaqnav nail meenq bha ail-a nail ngaol.

13Tsaol-aq teevq gaq, Taqmaqlav bhai, "Naoq nail tsaolmaoq neq, yaol nail aqmevq thaiq nail dai khi, Tilmaqnav nail meenq bha ail-aoq nail ngaol" dai, ge bhiq-a nail ngaol.

14Aq-u phao, aivq neq, miqtsiq miqma nail aqgaq aqdoi loev ha-a nail nee ovqtavq, aivq nail maivphaoq bhai lavqsiv-i mail he pheeq khi, Tilmaqnav nail meenq bha ail nail gailkhaol bhai jiav nail, Eiq neiq meenq bhai aol lai nail govkhoiq bhai ail khi, jaol deel-a nail ngaol. Aivq neq, Yuldav nail yaqyov jaqbheq Seiqlav aqkovq kev lal khi mail ngaol-aoq, aivq bhai maq bhi maol-ail lavq nail bhai ya moel-a nail ngel-i mail, al hai nl-a nail phaq pevq nail ngaol.

15Yuldav neq, Taqmaqlav bhai moel-u phao, aivq nail maivphaoq bhai lavqsiv-i mail he pheeq-ai thaq nail ngel-i mail, maimaqlal teevq gaq niil dai, noeq-a nail ngaol.

16Yuldav gailkhaol daolbhaq bhai jaol deel khi jaol nail yaqmai-aq al gaq, aivq nail khiqma pevq nail dai maq heeq nia mail, "Ngal naoq-ai nee iq thaiq movq-il" dai, ail khi ge bhiq-a nail ngaol. Yaqmai-aq al gaq gail, "Ngaq-ai nee mail iq thaiq haq neq, naol ngaq bhai khul bivq lavq nail-aiq" dai, nal daiq bhiq-a nail ngaol.

17Yuldav ge nail: "Ngaq nail jaiqyaq juq nail lavqkhoel khe, civqmeiv maol yaq teevq maol bhi tseel lavq naol" dai, ge bhiq-a nail ngaol. Yaqmai-aq al gaq ge nail: "Civqmeiv maol yaq teevq maol maq tseel lavq nail iqmoeq, yalkav teevq phaq oil thaq-ail ceevq haq neq, neema tsaq nail ngaol" dai, ge bhiq-a nail ngaol.

18Aivq ge nail: "Khal heel nail yalkav teevq phaq phaq ya bivq nail-aiq" dai, nal daiq bhiq-a nail ngaol. Yaqmai-aq al gaq ge nail: "Naoq nail junq deeq-ai thaq nail neeqtsaq dai khi, naoq nail joiqniaoq oil thaq-ail ceevq yaoq" dai, hal bhiq-a nail ngaol. Aivq neq, aivq nail yalkav juq bhai yaqmai-aq al gaq jaol nail bhai oil thaq-ail ceevq khi, yaqmai-aq al gaq nee mail, iq thaiq tavq-a nail ngel-i mail, yaqmai-aq al gaq yaq ceiv lai-a nail ngaol.

19A bhai nee ngal-aq, Taqmaqlav neq, ilkhaol bha kovq-ail khi, aivq nail lavqsiv he ha-a nail nee ovqtavq, miqtsiq miqma nail aqgaq aqdoi gaoq doi kovq-a nail ngaol.

20Yuldav neq, yaqmai-aq al gaq khe, aivq nail yalkav gaoq oil kovq nail galduq, aivq nail aqtsaoq Hillav bhai civqmeiv maol yaq teevq maol bivq khi bhi ail-a nail ngaol. Thail hai ngaol-aoq Hillav neq, yaqmai-aq al gaq maq hal pov moel-al.

21A bhai khe jaol nail juq bhai gail, "Eiqneiq meenq-ai ail nail gailkhaol daolbhaq bhai jaol ga nail maimaqlal neq, khaq bha jaol nail-aiq" dai, nal daiq bhiq-u phao, aqyu juq gail, "Niil niai neq, maimaqlal maq jaol-ail" dai, ge kovq bhiq-a nail ngaol.

22A bhai nee ngal-aq, aivq neq, Yuldav jaol nail bha kovq lal khi, "Ngal yaqmai-aq al gaq bhai maq moel-al. Meenq yaq juq gail, jaolduq al dao bhai neq, maimaqlal maq jaol-ail dai, ge nail ngaol" dai, ge bhiq-a nail ngaol.

23Yuldav ge nail: "Yalkav al, aivq bhai bhi oil thaq gai yaoq. Ngal aivq bhai aqphoiq bivq nail dai khi, bhi hal pov gaoq neq, naol aivq bhai maq moel-al. Ngadao bhai yu maq bhi hel sil movq-il" dai, ge bhiq-a nail ngaol.

24Bhala hail heeq bhee lal-u phao, tsaol-aq teevq gaq, Yuldav jaol nail bha lal khi ge nail: "Naoq nail khiqma Taqmaqlav neq, yaqyov-aq teevq gaq nee mail jaol tavq khi, yaq ceiv lai bhiq khi jaol nail ngaol" dai, ge bhiq-a nail ngaol. Yuldav ge nail: "Aivq bhai ilkhaol lavqniil phao he dov khi mail miqjaq mail kheq heivq yaoq" dai, dal bhiq-a nail ngaol.

25Thail hai ngaol-aoq, aqyu juq, Taqmaqlav bhai lavqniil-ai he dol leevq-u phao, aivq ge nail: "Ngal neq, yalkav niil nail aqheel gaq nee mail yaq ceiv lai-a nail ngaol. Niil junq deeq-ai thaq nail neeqtsaq dai khi, joiqniaoq niil neq, khaq sil gaq nail yalkav dai, hel daiq yaoq" dai, aivq nail tsaolmaoq jaol nail bha cavq bhoel-ai laivq-a nail ngaol.

26Yalkav al juq bhai hel daiq khi aivq nail yalkav pevq nail bhai, Yuldav ya moel-u phao, "Ngal neq, ngaq nail yaqyov Seiqlav bhai bhi maol naol dai, ge-ai thaq nail daoq bhai lav cov-a nail bhaq da nee, niil aq-il khe-ai nl thaq nail neq, ngaq-ai nee maqtsil tsaq nail ngaol" dai, Yuldav ge nail ngaol. Yuldav neq, haoqnao teevq pov aivq nee mail maq iq thaiq tavq-al.

27Taqmaqlav neq, yaq bhao lee nail aqyanq kev lal-u phao, aivq nail ovqmav lavqkhoel-ai yaq nvq gaq aol nail ngaol.

28Yaq bhao thail thaiq-u phao, yaqbeiv teevq gaq neq, aivq nail aqlavq gaoq dov-ai leevq-a nail ngaol. Yaq tsiq nail aqma neq, aqlavq bhai nieivq thaiq khi neeqtsaq aqnel phee thaiq bhiq khi ge nail: "Yaqyov niil gaq neq, aqivq pevq nail ngaol" dai, ge bhiq-a nail ngaol.

29Thail hai ngaol-aoq, yaqbeiv al gaq aqlavq gaoq tsaoq bhoel laivq khi yaqbeiv yaoq gaq yaoq iqmoeq bhao-a nail ngaol. Aq-u phao, yaq tsiq nail aqma, "Khul thol-oq. Naol neq, khoeq jaq kav jaq khi dov lee thaq nail niil" dai, ge bhiq-a nail ngaol. Al heel ngel-i mail, yaqyov al gaq bhai Phaqlail#38.29 Phaqlail Phaqlail dai, ge nail daoqceevq neq, khoeq jaq kav jaq dai dov lee thaq nail dai, ge movq nail ngaol dai, mil bhiq-a nail ngaol.

30A bhai nee ngal-aq, aqlavq bhai neeqtsaq aqnel phee thaiq-ai thaq nail jaqbheq gaq bhao doevq lee-a nail ngaol. Aivq bhai Seiqlav#38.30 Seiqlaq Seiqlaq dai, ge nail daoqceevq neq, aqnel dai ge movq nail ngaol dai mil bhiq-a nail ngaol.

Currently Selected:

Genesis 38: aeu

Highlight

Copy