Genesis 37

Iqmoeq 37

Yaolsai nail nvmav juq

1Yaqkov neq, aivq nail aqbhu jaol nail Khaqnanq milkhaoq bhai gaoq jaol-a nail ngaol.

2Yaqkov nail phaqyaq ma yaq nail ganl neq, niail hai ngaol:

Yaolsai nail aqkovq 17 kovq bhee lal-u phao, aivq nail aqbhu nail khaqma yaqkav juq pevq nail, Bhillaqhaq dai khi Sillaqphal nail yaqyov juq nee mail teevq gaq khe-ai, yaol dai khi civqmeiv ya lovq-a nail ngaol. Aivq neq, aivq nail algao juq-i mail nl laiq-a nail ganl, aivq nail aqbhu bhai ge bhiq-a nail ngaol.

3Yaqkov neq, aqkovq jiav lal khi mail pultavq, Yaolsai bhai bhao-a nail ngel-i mail, yaoq gaq yaoq nee maqtsil, aivq bhai gaiq-a jaiq nail ngaol. Aivq neq, Yaolsai nail galduq yu nee maq dul lai dai, aqmeeq meeq dee dee nail phailkhaoq heelma teevq keiv, kovpavq bivq-a nail ngaol.

4Thail hai ngaol-aoq, Yaolsai nail algao juq neq, aqyu juq nail aqbhu-i mail, Yaolsai bhai gaiq-a jaiq nail bhai ya moel-u phao, aivq bhai daoq aqmeeq-ai maq ge tsaoq bhiq dai, bhe-ai bhiq nail ngaol.

5Teevq n neq, Yaolsai bhai nvmav mav lee bhiq khi, aivq nail nvmav al aivq nail algao juq bhai ge bhiq-u phao, aivq nail algao juq aivq bhai, gaoq bhe jaiq lal bhiq-a nail ngaol.

6Yaolsai aqyu juq bhai ge bhiq-a nail: "Ngaq-i mail mav lee-a nail nvmav bhai nal daiq yaoq.

7Ngadao juq daiyal bhai gov aqjeeq jeeq thail thaiq-u phao, ngaq nail gov aqjeeq neq, bavq thaq-ai thaq nail nee, thaiq phuq dai thul lal khi, nul juq nail gov aqjeeq neq, ngaq nail gov aqjeeq nail teevq jaoq jaol lee khi uqhuq thaoq kovq gil lavq-a nail ngaol" dai, ge bhiq-a nail ngaol.

8Aivq nail algao juq ge nail: "Naol neq, nv juq nail heeqphaq jiovq movq nail laiq. Nv juq bhai uv thaiq nail laiq" dai, nal daiq bhiq-a nail ngaol. Aivq nail algao juq neq, Yaolsai nail nvmav khi, aivq-i mail ge-a nail daoq bhaq da nee, aivq bhai gaoq bhe jaiq lal bhiq-a nail ngaol.

9Maq maoq lal nail gaiqlaq bhai, Yaolsai neq, aivq nail nvmav yaoq phaq yaoq aivq nail algao juq bhai gaoq ge bhiq-a nail: "Nal daiq yaoq. Ngaq bhai nvmav gaoq mav lee-aoq nail ngaol. Nv mav nail lavqkhoel bhai nl ma, bhala dai khi aqgil tsel teevq heeq neq, ngaq bhai uqhuq thaoq kovq nail bhai, ngal ya moel-a nail ngaol" dai, ge bhiq-a nail ngaol.

10Aivq nail nvmav nail ganl aivq nail aqbhu bhai iqsanl ge bhiq-u phao, aivq nail aqbhu ge nail: "Naoq nail nvmav neq, khal heel thoq, naoq nail aqbhu aqma dai khi, mailnail juq neq, naoq bhai uqhuq ya thaoq kovq nail laiq" dai, khaq bhiq-a nail ngaol.

11Yaolsai nail algao juq neq, aivq bhai neekhaol maq sil dai, pevq-ail bhiq-a nail ngaol. Thail hai ngaol-aoq, aivq nail aqbhu ganl thoil ganl bhai, noeq thaq gai-a nail ngaol.

Aivq nail algao juq Yaolsai bhai gaoq jaq-a nail ganl

12Teevq n kev lal-u phao, aivq nail algao juq neq, Seiqkhinq nail meenq aqjail bhai, aivq nail aqbhu nail yaol dai khi civqmeiv juq lovq lovq-ail jaol-a nail ngaol.

13Aq-u phao, Yaqkov neq, Yaolsai bhai ge bhiq-a nail: "Naoq nail algao juq-i mail yaol dai khi civqmeiv lovq nail Seiqkhinq nail meenq aqjail bhai lai yaoq" dai, ge bhiq-a nail ngaol. Yaolsai iqsanl, "Oeq, ngal lai naol" dai, ge bhiq-a nail ngaol.

14Aivq nail aqbhu ge nail: "Naoq nail algao juq, yaol dai khi civqmeiv juq aqmeeq dai, jaol maq jaol dai, hel daiq lai khi, ngaq bhai gaoq cavq kovq lee yaoq" dai, khoel bhiq-a nail ngaol. A bhai nee ngal-aq, Yaolsai neq, aivq nail aqbhu-i mail khoel bhiq-a nail khe-ai, Heiqbhonq gavqlaovq nee mail lai khi, Seiqkhinq nail meenq aqjail bhai kev lai-a nail ngaol.

15Aivq neq, meenq lavqniil phao hal pov hal pov-ail jaol nail bhai tsaol-aq teevq gaq aivq bhai moel khi ge nail: "Naol khul hal pov nail-aiq" dai, nal daiq bhiq-a nail ngaol.

16Yaolsai ge kovq bhiq-a nail: "Yaol dai khi civqmeiv lovq nail ngaq nail algao juq bhai hal pov nail ngaol. Aqyu juq khaq bha jaol nail dai, heeq kivq naol laiq" dai, ge bhiq-a nail ngaol.

17Tsaol-aq al gaq neq, "Aqyu juq niil niai nee dov ail-aoq nail ngaol. Daoltanq nail meenq phao ail nail dai, ge nail gaiq-a nail ngaol" dai, ge bhiq-a nail ngaol. Al heel ngel-i mail, Yaolsai neq, aivq nail algao nail haoqnao thel-aivq khi Daoltanq nail meenq aqjail bhai moel ail-a nail ngaol.

18Yaolsai eqyal bha lal nail bhai, aivq nail algao juq moel-u phao, aivq maq kev lee-u nee nail, aivq bhai heivq nail galduq maoqbhaoq nl pheel jaq-a nail ngaol.

19Aqyu juq ge nail: "Nvmav nail saqlaq lal-aoq nial.

20Lal yaoq. Aivq bhai heivq khi khaqduq teevq duq bhai aivq nail aqmaol duq pheeq bhiq bhel. Aivq bhai haqtsoiq jaiqyaq-i mail keivq heivq-ao nail dai, aqbhu bhai ge bhiq nail ngaol. Aq-u phao, aivq nail nvmav khe-ai, mal dil maq ngel lao thaq-il dai, bhi heeq nia lal nail ngaol" dai, teevq gaq nee teevq gaq, ge pheel jaq nail ngaol.

21Thail hai ngaol-aoq, Lulbheiq neq, aqyu juq-i mail ge pheel jaq nail bhai ya gaiq-u phao, Yaolsai bhai tsao jao-ai nail galduq lai jai khi ge nail: "Aivq bhai thaq heivq.

22Aivq bhai niil niai haqaiq mildai haqtsoiq haqyal khe jiav nail, ulcuvq maq deq nail lovduq bhai, liv bhoel bhiq bhel. Aivq bhai thaq bhi nal lai" dai, ge bhiq-a nail ngaol. Thail hai ge bhiq-a nail neq, aivq neq, Yaolsai bhai algao juq nail aqlavq nee mail he dov khi, aqbhu jaol nail bha gaoq hevq kovq gai-ail bhiq nail dai, noeq-a nail ngel-i mail ngaol.

23Aivq nail algao juq jaol nail bha Yaolsai kev lal-u phao, aqyu juq neq, aivq nail phailkhaoq heeq ma he loev bhiq-a nail ngaol.

24Al ovqtavq, aivq bhai nieivq thaiq khi ulcuvq maq deq nail lovduq bhai liv bhoel bhiq-a nail ngaol.

25A bhai nee ngal-aq, aqyu juq jaol deel khi jaq jaq daol daol jaq thail thaiq-u phao, Gillav nail meenq nee mail Iljiltuv nail milkhaoq bha ail nail, Ilsaqmeiqlav nail jeq-e teevq munl bhai ya moel-a nail ngaol. Aqyu juq nail laolthao kovtavq bhai neq, Bheiqdeiqlal dai khul nail aqbhaol nee dov lee thaq nail huqbhiq nil nail khaqjiq, Bhaqlaq dai khi Mullaq dai khul nail huqbhiq nil nail aqtseel niil juq thaoq jaol nail ngaol.

26Aq-u phao, Yuldav neq, aivq nail mailnail juq bhai ge bhiq-a nail: "Ngadao juq nail jaqbheq pevq nail Yaolsai bhai, heivq khi oil-uvq khi mail ngaol-aoq, ngadao juq nail haqbhoil khul nail ganl tsoiq nail-aiq.

27Ngadao juq aivq bhai maq lav nal dai, Ilsaqmeiqlav nail tsaol-aq bhai gaoq jaq nail neq, tsaq jaiq nail ngaol. Aivq neq, ngadao nail jaqbheq, ngadao nail aqsivq haqjoil pevq nail maq ngel-ail laiq" dai, ge bhiq-a nail ngaol. Aivq nail mailnail juq gail, neema tsaq gil nail ngaol.

28A bhai nee ngal-aq, Mildanq nail jeq-e pevq nail jaiqgaiq gaiq nail Ilsaqmeiqlav nail tsaol-aq al juq, kev lee-a nail ngaol. Aq-u phao, aivq nail algao juq, Yaolsai bhai lovduq nee mail he dov khi, aqyu juq bhai, phul 20 bavq nee mail gaoq jaq-a nail ngaol. Ilsaqmeiqlav nail tsaol-aq juq gail Yaolsai bhai Iljiltuv nail milkhaoq bha hel-aivq-a nail ngaol.

29Lulbheiq kovq lal-u phao, Yaolsai neq, lovduq bhai maq aol-aoq thaq nail bhai ya moel-a nail ngel-i mail, noeq haq nail lavqkhoel nee, aivq nail phailkhaoq he pav-a nail ngaol.

30A bhai nee ngal-aq, aivq nail jaqbheq juq jaol nail bha kovq lee khi, "Lovduq bhai yaqyov maq jaol-aoq thaq-il, ngal khal hai ya khi nail-aiq" dai, ge bhiq-a nail ngaol.

31Aq-u phao, aqyu juq, civqmeiv teevq maol heivq khi Yaolsai nail phailkhaoq heelma, civqmeiv nail aqsivq bhai doeq deev-a nail ngaol.

32A bhai nee ngal-aq, phailkhaoq al keiv, aqyu juq nail aqbhu bha he kol leevq bhiq khi, "Aqbhu-ol, nv juq phailkhaoq niil keiv ya moel-a nail ngaol. Naoq nail yaqyov nail phailkhaoq ngel naol laiq" dai, nal daiq bhiq-a nail ngaol.

33Yaqkov neq, phailkhaoq al keiv bhai aqmeeq dai heeq nia nail ngel-i mail, "Ngaq nail yaqyov nail phailkhaoq ngaol. Haqtsoiq jaiqyaq-i mail keivq heivq-aoq thaq nail niil. Ngaq nail yaqyov nail aqmaol he pav he sav gil-aoq thaq nial" dai, ge nail ngaol.

34Yaqkov neq, neema noeq haq dee dee nail lavqkhoel nee, aivq nail phailkhaoq he pav khi jinq daqiq doi-a nail ngaol. Aivq neq, aivq nail yaqyov nail galduq al hai aqyanq mao dai, noeq haq khi jaol-a nail ngaol.

35Aivq nail yaqmiq yaqyov juq iqsanl mail, aivq bhai heiv tsul bhiq khi mail ngaol-aoq, aivq-i mail noeq haq nail phaq, maq peivq-ail bhiq-ail. Aivq ge nail: "Ngal neq, sil thao thaiq dai, ngaq nail yaqyov nail haqbhoil ya noeq haq ail nial" dai, ge ge ail nioil-a nail ngaol.

36Aq-u phao, Iljiltuv nail milkhaoq bhai kev ail-a nail Mildanq nail jeq-e neq, Yaolsai bhai heeqphaq Phaqlaol nail ganl bhai hel daiq phail nail aqivq aqtsu teevq gaq pevq nail Paoltilphaq bhai, gaoq jaq bhiq-a nail ngaol. Al ovqtavq, aivq neq, genl dev nail phao iqsanl, aqivq teevq gaq pevq nail ngaol.

Currently Selected:

Genesis 37: aeu

Highlight

Copy