Gaqkhoel 7

Saqteiqphaq daoq cavq daoq cov cov khi mail ya sil-a nail ganl

1Aq-u phao, “Aqyu juq ge nail khe-ai ngel naol laiq” dai, Philma Saqteiqphaq bhai nal daiq-a nail ngaol.

2Saqteiqphaq ge nail: “Aqivq jaqbheq juq khi mail aqphiq aqbhal juq-ol, nal daiq yaoq. Ngadao nail aqbhu Aqbhaqlaqhaq, Haq lanq meenq bhai maq jaol ail-u nee mail, Miqsolbholtaq mil milkhaoq bhai jaol-u phao, seiqleiq khaoqsail eeq nail Miqyail, aivq jaol nail bha dov lee-a nail ngaol. 3Miqyail aivq bhai ge bhiq-a nail: ‘Naoq nail milkhaoq khi mail naoq nail jeq-e jaq-a nail lavqkhoel nee dov-ail khi, ngaq-i mail cavq naq nail milkhaoq bhai ail yaoq’ dai, ge bhiq-a nail ngaol.

4Aq-u phao, aivq Khaqlaqdail tsaol-aq nail mil khaoq#7.4 Khaqlaqdail tsaol-aq neq, Miqsolbholtaq mil milkhaoq bhai jaol daiq-a nail ngaol. nee mail dov-ail khi, Haq lanq meenq bhai jaol ail-a nail ngaol. Aivq nail aqbhu sil gaq-al ngal neq, Miqyail aivq bhai a bhai nee bhi dov-ail khi, niil aq-il nul juq-i mail jaol nail milkhaoq niil khaoq bhai bhi jaol lee-a nail ngaol. 5Aq-u phao, milkhaoq niil khaoq nail lavqkhoel, aivq nail aqkhil teevq naoq daq dai iqsanl maq bivq haq-al. Thail hai ngaol-aoq, aivq yaq maq jaol lee-u nee mail, ‘Milkhaoq niil khaoq naoq bhai iqsanl, naoq-ai nee mail yavq kha lee thaq nail yaq juq bhai iqsanl bivq naol’ dai, Miqyail Aqbhaqlaqhaq bhai daoqma saljial ge bhiq-a nail ngaol. 6Miqyail aivq bhai niail hai gaoq ge bhiq-a nail ngaol: ‘Naoq-ai nee mail yavq kha lee thaq nail yaq juq neq, yu nail milkhaoq bhai daq-i ya jiovq khi, aqyu juq milkhaoq yaq al juq nail kov-uvq bhai liq yal kovq bhee dai, yaqkav ya jiovq nail nee ovqtavq, khoeq nail jiovq nail bhai ya daq nail ngaol. 7Thail hai ngaol-aoq, aqyu juq bhai yaqkav bhi jiovq-a nail jeq-e jaq-a bhai, ngal yalkhaq dal bhiq naol. A bhai nee ngal-aq, aqyu juq dov-ail khi, niil niai ngaq bhai uqhuq thaoq lee nail ngaol’ dai, Miqyail ge-ai thaq nail ngaol. 8Bavkov uqjaq oev nail aol bhai tavq lai nail daoqma saljial, Miqyail Aqbhaqlaqhaq bhai ge bhiq-a nail ngaol. Al heel ngel-i mail, aivq nail yaqyov Ilcav doevq lee khi, eivq n bhee lal-u phao, aivq bhai bavkov uqjaq oev bhiq-a nail ngaol. Al hai dul dai, Ilcav iqsanl, aivq nail yaqyov Yaqkov bhai, bavkov uqjaq oev bhiq-a nail ngaol. Yaqkov iqsanl aivq nail yaqyov tsel-nvq gaq bhai bavkov uqjaq oev bhiq-a nail ngaol. Yaqyov al juq neq, ngadao nail jeq-e jaq-a nail lavqkhoel, aqmil dov nail aqbhal tsel-nvq gaq ngaol.

9-10Yaqkov nail yaqyov juq neq, aqyu juq nail jaqbheq Yaolsai bhai neekhaol maq sil nail ngel-i mail, yu bhai gaoq jaq khi, yu-i mail Iljiltuv milkhaoq bhai yaqkav bhi jiovq ail nail dai khi, gaoq jaq-a nail ngaol. Thail hai ngaol-aoq, Miqyail aivq nee mail jaol khi, aivq ya daq nail haq dee aoq dee dee nail iqsanl bhai, bhi jel ail-a nail ngaol. Yaolsai Iljiltuv nail heeqphaq Phaqlaol nail sivtavq bhai ail-u phao, Miqyail aivq bhai geeqlaoq eel jaol khi mail neenoeq neekha bivq-a nail ngaol. Al heel ngel-i mail, heeqphaq Phaqlaol Yaolsai bhai, Iljiltuv milkhaoq khi mail, aivq jaol nail ilkhaol bhai bhi uv thaiq-a nail ngaol.

11Aq-u phao, Iljiltuv milkhaoq khaoq lao khi mail Khaqnanq milkhaoq khaoq lao ail moevq nail sivq nail phaq kev lee khi, haq dee aoq dee dee nail ngaol. Al heel ngel-i mail, Yaqkov nail yaqyov juq jaq nail daol nail phaq maq hal pov ya nia-ail. 12Thail hai ngaol-aoq, ‘Iljiltuv milkhaoq bhai gov jiav naol geiq’ dai, Yaqkov ya gaiq-u phao, aivq nail yaqyov juq bhai iqmoeq khe pov bhi ail-a nail ngaol. 13Aqyu juq nvq pov teevq pov gaoq ail-u phao, Yaolsai aivq nail aqivq jaqbheq juq bhai, ‘Ngal neq, Yaolsai ngaol’ dai, ge bhiq-a nail ngaol. Phaqlaol iqsanl Yaolsai nail jeq-e jaq-a bhai ya heeq nia-a nail ngaol. 14Aq-u phao, Yaolsai aivq nail aqbhu Yaqkov khi mail, aivq nail jeq-e jaq-a iqsanl bhai bhi hevq lai-a nail ngaol. Aqyu juq iqsanl mail sivq tsel ngaq gaq bhee nail ngaol. 15Yaqkov iqsanl Iljiltuv milkhaoq bhai ail khi, aivq iqsanl, aivq nail yaqyov juq iqsanl, a bhai sil gil-a nail ngaol. 16Aqyu juq bhai, Seiqjeiq meenq bhai bavq kol laivq khi, Seiqjeiq meenq bhai jaol nail, Haq maoq nail yaq juq bhai Aqbhaqlaqhaq-i mail phul bivq khi ul-ai thaq nail luqdaol bhai, duqpheeq-a nail ngaol.

17Miqyail Aqbhaqlaqhaq bhai jaq-ai thaq nail daoqma saljial al daoq bhee lal nail yanq aqjail jail lal-u phao, Iljiltuv milkhaoq lavqkhoel bhai ngadao nail jeq-e jaq-a, mao dee dee lal-a nail ngaol. 18A bhai nee ngal-aq, Yaolsai bhai maq heeq nia nail heeqphaq teevq gaq dov lal khi Iljiltuv milkhaoq bhai uv thaiq-a nail ngaol. 19Heeqphaq al gaq, ngadao nail jeq-e jaq-a bhai jalmul mul goiqbhaoq bhaoq khi, yaqbeiv juq bhai heivq dai, ngadao nail aqphiq aqbhal juq bhai khoeq bhiq jiovq bhiq khi, yaqbeiv juq bhai bhi tsiq ha ail-a nail ngaol.

20Aq-u phao, Miqyail nail sivtavq bhai mao ail meeq nail Maolseiq dai mil-ai thaq nail yaqyov teevq gaq doevq lee-a nail ngaol. Bhala hail heeq bhee dai, aivq bhai ilkhaol bhai tsu-a nail ngaol. 21Haoqnao aivq bhai tsiq ha ail-u phao, Phaqlaol nail yaq miq-i mail, aivq nail yaq khe-ai, tsi tsu-a nail ngaol. 22Maolseiq neq, Iljiltuv tsaol-aq nail neenoeq neekha iqsanl mail ya saol-a nail ngaol. Aivq neq, daoq ge nail maqkhaiq, ganl nl nail maqkhaiq, gaq kav dee dee nail ngaol.

23Aivq liq tsel kovq bhee lal-u phao, aivq nail aqivq jaqbheq Ilsaqleiqlav nail tsaol-aq bhai hel daiq-ail nail dai, noeq dov lal bhiq-a nail ngaol. 24Aq-u phao, Iljiltuv nail tsaol-aq teevq gaq aivq nail jeq-e jaq-a teevq gaq bhai khoeq bhiq jiovq bhiq nail bhai Maolseiq ya moel-u phao, aivq nail jeq-e jaq-a al gaq bhai tsao jao-ai bhiq khi, Iljiltuv nail tsaol-aq al gaq bhai nl kovq bhiq khi mail, heivq-a nail ngaol. 25‘Miqyail ngaq bhai khoel nail bhai maqkhaiq, ngal ngaq nail jeq-e jaq-a bhai hevq kovq nail khi bhai maqkhaiq, ngaq nail aqivq jaqbheq heeq nia-ail jaol-aq’ dai, Maolseiq noeq khi ngaol-aoq, aqyu juq maq heeq nia-ail. 26Yaoq n yaoq, aivq nail jeq-e jaq-a nvq gaq aqtsaoq khaq pheel jaq nail bhai ya moel khi, ‘Aq tsaoq juq-ol, nul nq nvq gaq neq aqivq jaqbheq ngaol. Khul khi mail khaq pheel jaq nail-aiq’ dai, ge khi, aqyu nvq gaq bhai bhi tsaq bhi jil lai nail dai khi, he phail bhiq-a nail ngaol.

27Thail hai ngaol-aoq, aivq nail aqtsaoq bhai khaq pheel jaq lai-a nail al gaq Maolseiq bhai doeq ha gai khi ge nail: ‘Nv juq bhai uv thaiq khi yalkhaq dal nail gaq jiovq yaoq dai, khaq sil gaq naoq bhai khoel-ai thaq nail-aiq. 28Milgaol naol Iljiltuv tsaol-aq al gaq bhai heivq-a nail khe-ai, ngaq bhai iqsanl heivq movq nail laiq’ dai, ge bhiq-a nail ngaol. 29Maolseiq daoq al daoq ya gaiq-u phao, Mildeiqanq milkhaoq bhai tsaol-aivq khi jaol ail-a nail ngaol. Aivq a bhai jaol-u phao, yaqyov nvq gaq jaol lee-a nail ngaol.

30Liq tsel kovq jel-ail khi, Silnaq gaoqjaoq nail aqjail bhai jiav nail tsalhail dai kav bhai, aqgoe jiavbuv lavqkhoel miqjaq bhaol khi, miqjaq miqlail nail lavqkhoel nqtavq gaqkhoel teevq gaq bhai Maolseiq ya moel-a nail ngaol. 31Aivq al bhai ya moel-u phao, noeq-u maq dov dai pevq-ail khi, hel daiq duq nail dai khi, aqjail bhai jiil laivq-a nail ngaol. Aq-u phao, Miqyail nail aqthel aivq ya gaiq-a nail ngaol. 32‘Ngal neq, naoq nail aqphiq aqbhal nail Miqyail, Aqbhaqlaqhaq, Ilcav, Yaqkov nail Miqyail ngaol’ dai, ge bhiq-a nail ngaol. Aq-u phao, Maolseiq gee sil khi aqjuq juq nail ngel-i mail, maq hel daiq tseq-ail.

33Miqyail aivq bhai gaoq ge bhiq-a nail: ‘Naoq nail saiqnaov loev yaoq. Khul khi mail dai ngal-aq neq, naoq-i mail thul phaol-nvq thaq nail jaol duq niil dao neq, meeq nail haol nail aqduq ngaol. 34Iljiltuv milkhaoq lavqkhoel-ai ngaq nail tsaol-aq bhai yu khoeq bhiq jiovq bhiq nail bhai ngal mal dil ya moel khi, aqyu juq maq daq tsaol ail dai, gul nail aqthel bhai ngal ya gaiq-a nail ngaol. Aqyu juq bhai bhi jel-ail nail dai khi, ngal yavq kha lee-a nail ngaol. Niil aq-il lal yaoq. Ngal naoq bhai Iljiltuv milkhaoq bhai khoel gai aivq naol’ dai, ge bhiq-a nail ngaol.

35‘Nv juq nail kovtavq bhai uv thaiq khi, yalkhaq dal nail gaq jiovq yaoq dai, khaq sil gaq naoq bhai khoel-ai thaq nail-aiq’ dai, Maolseiq al gaq bhai aqyu juq ge khi khaonq ha-a nail ngaol. Thail hai ngaol-aoq, aivq uv thaiq nail gaq khi mail Hevq kovq nail gaq bhi jiovq nail khi mail, Miqyail khoel gai aivq-a nail ngaol. Aq goe jiavbuv lavqkhoel bhai Maolseiq-i mail moel-a nail nqtavq gaqkhoel al gaq bhai Miqyail juq khi Maolseiq bhai khoel gai aivq-a nail ngaol. 36Maolseiq neq, Ilsaqleiqlav nail tsaol-aq bhai hevq dov-a nail ngaol. Iljiltuv milkhaoq lavqkhoel nee maqkhaiq, aqnel dai khul nail iqyaq iqma lavqkhoel nee maqkhaiq, liq tsel kovq bhee dai, tsaol-aq maq jaol nail tsalhail dai kav bhai jaol-u phao maqkhaiq, aivq bhi heeq bhi moel nail phaq khi mail noeq-u maq dov nail phaq nl-a nail ngaol.

37Maolseiq al gaq, ‘Miqyail ngaq bhai bhi dov lal lavq-a nail khe-ai, nul juq nail jeq-e jaq-a lavqkhoel aivq nail haqbhoil ge dan nail teevq gaq nul juq nail haqbhoil bhi dov lal naol’ dai, Maolseiq Ilsaqleiqlav nail tsaol-aq bhai ge bhiq-a nail ngaol. 38Ilsaqleiqlav nail tsaol-aq juq tsalhail dai kav bhai jil lal khi jaol-u phao, aqyu juq nee mail jaol nail al gaq, Maolseiq ngaol. Ngadao nail aqphiq aqbhal juq nee mail jaol nail tsaol-aq al gaq iqsanl, aivq ngaol. Silnaq gaoqjaoq bhai nqtavq gaqkhoel daoq ge tsaoq lee-u phao jaol nail gaq iqsanl, aivq ngaol. Ngadao bhai bivq nail haqbhoil, aqdoevq bhi doevq nail daoq ya-a nail gaq iqsanl aivq ngaol.

39Thail hai ngaol-aoq, ngadao nail aqphiq aqbhal juq neq, Maolseiq nail daoq maq nal daiq ail, Maolseiq bhai khaonq-a nail ngaol. Aqyu juq Iljiltuv milkhaoq bhai kovq lai movq nail neema taivq-ail aol nail ngaol. 40Aqyu juq Aqlonq#7.40 Aqlonq neq, Maolseiq nail aqivq ngaol. bhai ge bhiq-a nail: ‘Iqmoeq phao nv juq bhai hevq daiq lavq nia dai, nv juq nail haqbhoil miqyail juq nail maolkhoel lav sav lavq yaoq. Khul khi mail dai ngal-aq neq, Iljiltuv milkhaoq lavqkhoel nee mail nv juq bhai hevq dol leevq lavq-a nail Maolseiq al gaq, khal hai pevq ail-aoq meeq’ dai, ge bhiq-a nail ngaol. 41Yanq al yanq nail lavqkhoel, aqyu juq niaoqnel niaoq yaq nail maolkhoel teevq maol teivq-a nail ngaol. A bhai nee ngal-aq, maolkhoel al maol bhai danq bhiq danq bhiq ail, aqyu juq nail aqlavq-i mail teivq-a nail maolkhoel bhai thaq eeq nail aqbhee lav sav-a nail ngaol. 42Al heel ngel-i mail, Miqyail aqyu juq bhai khaonq ail ceevq khi, aqgil juq bhai uqhuq bhi thaoq-a nail ngaol. Al hai dul dai, Miqyail nail haqbhoil ge dan nail juq nail haoqgavq lavqkhoel bhai niail hai gevq-ai thaq nail ngaol:

‘Ilsaqleiqlav nail

jeq-e jaq-a juq-ol,

nul juq tsalhail dai kav bhai

liq tsel kovq jaol-u phao,

ngaq bhai jaiqyaq

laol lavq-a nail laiq.

Danq nail phaq

danq lavq-a nail laiq.

Maq ngel ail dei-eiq.

43Uqhuq thaoq nail

haqbhoil nul juq-i mail

lav sav-ai thaq nail

Maollov miqyail nail

maolkhoel yavqtsoel

khi mail

Leiqphaq miqyail nail

aqgil maolkhoel bhai

nul juq thaq eeq khi,

bavq bavq ail,

tsao-a nail ngaol.

Al heel ngel-i mail,

ngal nul juq bhai

Bhaq bhul loq mil khaoq

a phao bal-nvq bhai

pheethaiq khi

hel aivq naol’ dai,

gevq-ai thaq nail ngaol.

44Ngadao nail aqphiq aqbhal juq, tsalhail dai kav bhai jaol-u phao, salkhil khanq nail haqphal yavqtsoel jiav nail ngaol. ‘Naoq-i mail ya moel-a nail khe-ai cov yaoq’ dai, Miqyail Maolseiq bhai ge bhiq-a nail khe-ai, Maolseiq cov-a nail ngaol. 45Ngadao nail aqphiq aqbhal juq nail sivtavq nee, milkhaoq al khaoq bhai jaol nail tsaol-aq juq bhai, Miqyail the dov-a nail ngaol. Ngadao nail aqphiq aqbhal juq, Yaolsu nee mail milkhaoq niil khaoq oil nail dai khi aol lal-u phao, haqphal nail yavqtsoel al tsoel iqsanl bavq bhoel laivq-a nail ngaol. Haqphal nail yavqtsoel al tsoel neq, Daq bhil nail yeel bhai kev dai, jiav nail ngaol. 46-47Daq bhil neq, Miqyail nail geeqlaoq eel jaol bhai hal pov moel-a nail tsaol-aq teevq gaq pevq khi, ‘Naoq nail haqbhoil jaol duq bhi cov lavq yaoq’ dai, Yaqkov nail Miqyail bhai hal khi ngaol-aoq, Miqyail nail haqbhoil ilkhaol cov-a nail gaq neq, Saollavmoq ngaol.

48Thail hai ngaol-aoq, eeq dee heel dee dee nail Miqyail neq, tsaol-aq-i mail cov-a nail ilkhaol bhai jaol nail maq ngel-ail. Miqyail nail haqbhoil ge dan nail teevq gaq-i mail ge-ai thaq nail jiav nail ngaol:

49‘Nqtavq neq,

ngal joiq jaq nail

doiqbev bev ma ngaol.

Miltsaq neq,

ngaq nail aqkhil

tsaoq thaq duq ngaol.

Ngaq nail haqbhoil

nul juq ilkhaol

khal hai cov heeq.

Ngaq nail naq duq

khul dao bhai

jiav nail-aiq’ dai,

Miqyail ge nail ngaol.

50‘Al juq iqsanl

ngaq-i mail

teivq-ai thaq nail

maq ngel laiq’ dai,

ge-ai thaq nail ngaol.

51Nul juq nail neema kha dai dai ail gaol nail-aiq. Naqkov kha dai dai ail thul nail-aiq. Miqyail bhai maq heeq nia nail tsaol-aq juq khe-ai kha dai dai ail jaoq nail-aiq. Nul juq neq, nul juq nail aqphiq aqbhal juq khe-ai dul khi, Meeq nail Haol nail Aqhaqlal bhai lav tsoiq nail ngaol. 52Nul juq nail aqphiq aqbhal-i mail maq khoeq maq jiovq daiq-a nail, Miqyail nail haqbhoil ge dan nail khul gaq jaol nail-aiq. ‘Tsaq nail daol nail gaq lee naol’ dai, ge nail juq bhai, aqyu juq deeq heivq-a nail ngaol. Niil aq-il nul juq iqsanl, tsaq nail daol nail al gaq bhai yu nail aqlavq lavqkhoel bhai av bhiq khi tavq heivq-a nail ngaol. 53Nqtavq gaqkhoel-i mail bivq lee-a nail, Miqyail nail aoldaoq kovqdaoq bhai ya-a nail tsaol-aq juq neq, nul juq ngaol. Thail hai ngaol-aoq, aoldaoq kovqdaoq al bhai nul juq maq nal daiq-al” dai, Saqteiqphaq ge bhiq-a nail ngaol.

Saqteiqphaq bhai lovmav-i mail liv heivq-a nail ganl

54Saqteiqphaq al hai ge nail bhai ya gaiq-u phao, maoq bhaoq nl nail munl lavqkhoel khe aol nail tsaol-aq juq aivq bhai neema phail dee dee lal bhiq khi, haoq gil keivq nail ngaol. 55Aq-u phao, Saqteiqphaq nail lavqkhoel Meeq nail Haol nail Aqhaqlal teevq bhee jaol khi, aivq nqtavq phao gaollel daiq-u phao, Miqyail nail seiqleiq khaoqsail bhai maqkhaiq, Miqyail nail lavqmal phao Yeiqsul thul phaol-nvq thaq nail bhai maqkhaiq, ya moel-a nail ngaol. 56A bhai nee ngal-aq, aivq ge nail: “Hel daiq! Nqtavq phao-ai thaq khi Miqyail nail lavqmal phao Tsaol-aq nail Yaqyov thul phaol nail bhai ngal moel thail thaiq nail ngaol” dai, ge bhiq-a nail ngaol.

57Aq-u phao, aqyu juq gul gul ail, yovqgavq nail naq khaol bhai yovqgavq daqtsoiq khi, Saqteiqphaq jaol nail bha tsaol laivq-a nail ngaol. 58A bhai nee ngal-aq, meenq meenq jail-ai aivq bhai he dol aivq khi, lovmav-i mail liv-a nail ngaol. Salkhil khanq nail tsaol-aq juq, yovqgavq nail phailkhaoq yovqgavq loev khi, Saol luv dai mil-ai thaq nail yaqyov-aq yaqnoil teevq gaq nail aqkhil daoqthaoq bhai oil thaq-a nail ngaol.

59Aqyu juq Saqteiqphaq bhai lovmav liv thail thaiq-u phao, Saqteiqphaq geeqlaoq hal hal ail, “Heeqphaq Yeiqsul-ol, ngaq nail aqhaqlal bhai hav bhoel lavq yaoq” dai, ge-a nail ngaol. 60A bhai nee ngal-aq, aivq peevqceevq kovdoiq doiq khi, “Heeqphaq-ol, aqyu juq nl thail thaiq nail oeqbal niil, aqyu juq nail kovtavq bhai thaq thaq dei-eiq” dai, mail ma-ail ge-a nail ngaol. Al hai ge gaq khi sil-a nail ngaol.

Currently Selected:

Gaqkhoel 7: aeu

Highlight

Copy