Markás 13

Áyókén zamánagay bárawá Issáay péshgói

(Mattá 24:1–14; Luká 21:5–19)

1Wahdé Issá cha mazanén parasteshgáhá dar áyagá at, cha moridán yakkéá gwasht: “Oo ostád! Bechár, chónén shawkén seng o dhok ant o chónén dhawldárén parasteshgáhé.” 2Issáyá gwasht: “É dhawldárén parasteshgáhá genday? Eshiay yakk sengé ham domi sengay sará namánit, sajjahén próshag o dawr dayaga bant.”

3Wahdé Issá mazanén parasteshgáhay dém pa démá Zaytunay Kóhay sará neshtagat, Petros o Ákub o Yuhanná o Andriás áiay kerrá átkant o ehwatá jostesh kort: 4“Márá begwash, bárén é prosht o prósh kadéna bit o eshiay nazzikk bayagay nesháni ché ent?” 5Issáyá habar bendát kort: “Hozzhár bét, kasé shomárá gomráh makant. 6Bázéné mani námá kayt o gwashit: ‘Man hamá án#13:6 Hodá watá gón Mussáyá hamé námá pajjárénit. Bechár Dargwaz 3:14.’ o bázénéá gomráha kant. 7Wahdé shomá jangáni tawárá eshkonét o jangáni hál somárá sara bit, delá tors mayárét. Allam é dhawlá bit, bale gón é neshániáni záher bayagá halásiay wahd nayayt. 8Yakk kawmé dega kawméay helápá o yakk molké dega molkéay helápá páda kayt. Bázén jágahéá zeminchandha#13:8 Zeminchandh, bezán zeminjomb, zelzelah. bit o kahta kapit. É tahná chellagiay dardáni bendát ent.

9Hozzhár bét! Shomárá hakdiwánáni#13:9 Hakdiwán, bezán ámidges, dádgáh. démá pésha kanant, kanisaháni tahá janant o pa manigi, hákem o bádsháháni démá óshtárénant. Gorhá shomárá sharrén móhé rasit ke pa man gwáhi bedayét. 10Bale pésará báyad ent wasshén mestágay jár sajjahén kawmáni kerrá janag bebit. 11Harwahd ke shomárá gerant o hakdiwánána barant, cha péshá paréshán mabét ke má ché begwashén. Á wahdá, har chizzé ke shomárá sój dayaga bit, hamá habará bekanét. Chéá ke gwashók shomá naét, Pákén Ruh ent. 12Brát wati brátá dróhit o kóshárénit o pet wati chokká. Chokk wati pet o mátáni helápá páda káyant o áyána kóshárénant. 13Harkas mani námay sawabá cha shomá naprata kant, bale hamá ke tán áherá bardáshta kant, á rakkit.

Torsnákén wahd o jáwar

(Mattá 24:15–28; Luká 21:20–24)

14Wahdé shomá á ‘palit o bérán kanókén bazzhenáká’#13:14 “Palit o bérán kanókén bazzhenák” yakk chizzé ke báyad ent mazanén parasteshgáhá mayayt. hamá jágahá gendét ke áiay jágah naent,” – wánók sarpad bebit – “hamá ke Yahudiahá ant dém pa kóhán betachant. 15Á ke lógay sará ent, pa chizzéay zuragá ér makapit o lógay tahá marawt o 16á ke dhagáray sará ent, wati kabáhay zuragá lógá marawt. 17Á róchán, lápporrén janén o hamá ke chokka méchénant sakk bazzaga bant. 18Dwá kanét ke é chizz zemestáná mabit. 19Chéá ke á róchán anchén mosibaté kayt ke cha bendátá, cha hamá róchá ke Hodáyá jahán addh kortag tán é wahdá, áiay mesál nayátkag o hechbara nayayt. 20Agan Hodáwandá á sakkiáni róch kamter makorténant, hecch mardomé narakketagat. Bale áiá wati gechén kortagénáni háterá á róch kamter kortagant. 21Á wahdá agan kasé shomárá begwashit: ‘Bechár, Masih esh ent’ yá ‘bechár, á ent,’ báwar makanét. 22Chéá ke drógén masih o drógén nabi jáha janant o ajabbatén nesháni o mójezah pésha dárant. Wati sajjahén zórá janant ke Hodáay gechén kortagénán ham gomráh bekanant. 23Hozzhár bét, man shomárá cha pésará é sajjahén chizzán hál dayagá án.

Issáay per tarrag

(Mattá 24:23–44; Luká 21:25–38)

24Á róchán, cha é mosibatán o rand, róch tahára bit, máha nadrapshit#13:24 Drapshag, bezán shahm janag, jalashkag., 25estár ham cha ásmáná kapant o ásmánay zór o wák larzénaga bant. 26Á wahdá, mardom Ensánay Chokká gendant ke gón mazanén wák o twán o shán o shawkaté jambaráni tahá ent o kayt. 27Gorhá préshtagán ráha dant o cha chárén némagán, bezán cha zeminay har kondhá tán ásmánay goddhi marz o simsarán, wati gechén kortagén mardomán yakjáha kant.

28Nun cha enjiray drachká dars o sabakk begerét. Anchosh ke áiay thál narma bant o táka trokkant, shomá zánét ke garmág nazzikk ent. 29Hamé dhawlá, wahdé shomá é chizzána gendét, wata zánét ke mani áyagay wahd nazzikk ent, darwázagay dapá ent. 30Shomárá rásténa gwashán, tán é sajjahén jáwar#13:30 Jáwar, bezán hálat. mayáyant, é nasl o padréch halása nabit. 31Ásmán o zemin gára bant, bale mani habar hechbar gára nabant. 32Hechkasa nazánt ke á róch o á sáhat kadéna rasit, na ásmánay préshtaga zánant o na Chokka zánt, bass Peta zánt. 33Hozzhár bét! Hayálá gwar kanét chéá ke nazánét á wahd o damán kadéna kayt. 34Mani per tarrag hamé dhawlá ent ke mardé saparéá berawt, roksat kanagay wahdá har hezmatkáray kár o zemmawáriá begisshénit o darwázagpáná hokm bedant: ‘Hozzhár bay!’

35Gorhá hozzhár bét chéá ke shomá nazánét ke lógay hodábond shapay kojám pásá kayt; sarshapá, shapay némá, korósbángá yá bámgwáhá? Paméshká hozzhár bét. 36Chó mabit ke hodábond anágat byayt o begendit ke shomá wáb ét. 37Anchosh ke man shomárá gwashán, gón drostána gwashán: ‘Hozzhár bét!’”

Currently Selected:

Markás 13: HPKB

Highlight

Copy