Mattá 8

Garray nádráhéay drahbakshi

(Markás 1:40–44; Luká 5:12–14)

1Wahdé Issá cha kóhá ér kapt, mardománi mazanén rombé áiay randá gón kapt. 2Yakk mardé ke áiá garray#8:2 Asligén Yunáni zobánay labz, pa syahgarr o bag o sohrbád o pa dega tahr tahrén pósti nádráhián kár bandaga bit. nádráhi at Issáay kerrá átk, áiay pádán kapt o gwashti: “Oo wájah! Agan taw belóthay, maná dráh o palgár#8:2 Palgár, bezán sáp o sallah, bepóleng. korta kanay.” 3Issáyá dast shahárt, dasti per mosht o gwashti: “Mana lóthán. Dráh o palgár bay!” Hamá damáná mard cha garrá dráh but. 4Gorhá Issáyá gón áiá gwasht: “Bechár, hechkasá hál maday, bale beraw, watá dini péshwáyá pésh bedár o hamá korbánigá bekan ke Mussáay Sharyatá nebisag butag, tánke pa mardomán sháhedié bebit.”

Pawji apsaray imán

(Luká 7:1–10)

5Wahdé Issá Kaparnáhumay shahrá raset, pawji apsaré áiay kerrá átk, dazbandi kort o 6gwashti: “Oo wájah! Mani hezmatkárén bachakk lang o mondh ent o lógá kaptag, sakk dard o dór ent.” 7Issáyá gwasht: “Sharr, mana káyán o áiá dráha kanán.” 8Pawji apsará darráént: “Oo wájah! Mana nakarzán ke taw mani lógá byáay. Taw tahná hokm bekan, mani hezmatkár dráha bit. 9Chéá ke man ham wati masteráni hokmay chérá án o mani dastay chérá ham sepáhig#8:9 Sepahig, bezán pawji, arteshi, lashkari. hast. Agan kaséá hokm bekanán ‘beraw,’ á rawt o agan kaséá begwashán ‘byá,’ á kayt. Agan wati hezmatkárá begwashán ‘pelán kárá bekan,’ á kanti.” 10Wahdé Issáyá é habar eshkot, hayrán but o gón wati hamráhán gwashti: “Shomárá rásténa gwashán ke Esráiliáni tahá ham man choshén mohrén imán nadistag. 11Bezánét ke cha ródarátk o rónendá bázén mardomé kayt o gón Ebráhém o Esák o Ákubá ásmáni bádsháhiay mehmániá yakkén parzónagay#8:11 Parzónag, bezán soprah, kopár. sará nendit, 12bale é bádsháhiay chokk o óbádag#8:12 É bádsháhiay chokk o óbádag, bezán Esráiliáni chokk o óbádag. dhanná taháriá dawr dayaga bant. Ódá gréwag o peryát o zária bit.” 13Gorhá Issáyá gón pawji apsará gwasht: “Beraw, anchosh ke tai báwar ent, gón taw hamá dhawlá bit.” Áiay hezmatkár hamá damáná dráh but.

Nádráháni drahbakshi

(Markás 1:29–34; Luká 4:38–41)

14Wahdé Issá Petrosay lógá shot, disti ke Petrosay wassig tapig ent o kaptag. 15Issáyá wati dast áiay dastay sará per mosht. Áiay tap sest, á pád átk o Issáay hezmat kanagá lagget.

16Magrebtahárá mardomán bázén jenni ganóké Issáay kerrá áwort, áiá gón wati yakk habaréá jenn kasshetant o sajjahén nádráh wassh o dráh kortant. 17É dhawlá Eshayá nabiay kortagén é habar rást o sarjam but: Áiá may nezóri dur kortant o nádráhi bortant.#8:17 Eshayá Nabiay Ketáb 53:4.

Kay Issáay morid buta kant?

(Luká 9:57–60)

18Wahdé Issáyá wati chapp o chágerdá mardománi mocchi dist, parmán dát o gwashti: “Byáét, gwarmay á dastá rawén.” 19Sharyatay zánógeré áiay kerrá átk o gwashti: “Oo ostád! Har jáh ke taw raway, man tai randgiriá kanán.” 20Issáyá gwasht: “Róbáhán hóndh#8:20 Hóndh, bezán zeminá mazanén thong. hast o báli morgán kodóh#8:20 Kodóh, bezán kodám, báli morgay lóg., bale Ensánay Chokká#8:20 Dányál nabiá “Ensánay Chokk” pa anchén hastiéá kármarz kortag ke cha ásmáná éra kayt. Issáyá watá “Ensánay Chokk” gwashtag tánke mardom bezánant ke á cha ásmáná átkag o hamá wádah dátagén Masih ent. pa saray ér kanagá hecch jágah nést.” 21Dega yakk moridéá gwasht: “Oo wájah! Maná ejázat beday ke pésará berawán o wati petá kabr o kapan bekanán.” 22Issáyá gwasht: “Byá, mani randgiriá bekan, bell ke mordag wati mordagán wat kabr o kapana kanant.”

Tuppánay érmósh kanag

(Markás 4:36–41; Luká 8:22–25)

23Issá bójigá swár but, morid ham swár butant. 24Anágat trondén tuppáné átk o chawl o mawján bójig mán ropt, bale Issá wáb at. 25Morid áiay kerrá átkant, cha wábá pád kort o gwashtesh: “Oo Hodáwand! Márá berakkén ke meragá én.” 26Gón áyán gwashti: “Oo kambáwarán! Shomárá chéá torsit?” Nun pád átk, gwát o ápi hakkal dátant o tuppán pahk érmósh but. 27Morid hayrán butant o gwashtesh: “É chónén mardomé ke gwát o áp ham eshiay hokmá mannant.”

Do jenniay drahbakshi

(Markás 5:1–17; Luká 8:26–37)

28Wahdé Issá mazangwarmay á dastá, Gadáriáni#8:28 Lahtén daznebeshtá átkag: “Gerásiáni” yá “Gergesiáni”. molká raset, do mardom cha kabrestáná dar átk o gón áiá dochár kaptant.#8:28 Dochár kapag, bezán dhikk warag, yakdegará gendag. Áyán jenn per at o á haminchok wakshi o torsnák atant ke kassá cha á ráhá gwasta nakort. 29Áyán kukkár kort o gwasht: “Oo Hodáay Chokk! Tará gón má che kár ent? Cha wahdá#8:29 Edá wahday máná áheratay róch ent. pésar, pa may azáb dayagá átkagay?”

30Cha áyán kammé dur, hukkáni ramagé charagá at. 31Palitén ruhán cha Issáyá dazbandi kort o gwasht: “Agan taw márá cha é mardomán dara kanay, gorhá márá é ramagay hukkáni jesmá ráh beday.” 32Issáyá gwasht: “Bepoterét!” Gorhá á dar átk o hukkáni jesmá potertant o hukkáni sajjahén ramag cha kóhdémá jahlagá tachán but o gwarmá kapt o mort. 33Hukkáni chárénók tacháná shahrá shotant o é sajjahén hál o jenni ganókáni sargwastesh raséntant. 34Nun shahray sajjahén mardom Issáay cháragá átkant o gón áiá dazbandiesh kort ke cha may molká dar á o beraw.

Currently Selected:

Mattá 8: HPKB

Highlight

Copy