Luká 2

Issá Masihay pédáesh

1Hamá róchán, Rumay bádsháh Kaysar#2:1 Kaysar Rumay bádsháháni lakab butag, hecch bádsháhay jenday nám nabutag. Rumay har bádsháh Kaysar gwashag butag. Águstusá hokm dát ke sarjamén molká#2:1 Asligén Yunáni nebeshtánka gwashit: “sajjahén jahán”. mardomshomári bebit. 2É awali mardomshomári at o á wahdá Kwirinius Suriahay wáli at. 3Harkas pa wati námay nebeshtah kanáénagá wati pet o piroki shahrá shot.

4Issop ham cha Jalilay shahr Náserahá dar kapt o Yahudiahay shahr Bayt-Lahemá shot, hamá shahr ke bázén wahdé pésar ódá Dáud bádsháh pédá butagat. Issop béhá cha Dáuday padréchá at, paméshká pa wati námay nebeshtah kanáénagá ódá shot. 5Issopá, wati deshtár Maryam ham gón at ke á pa chokkéá ométwár at.

6Hamé wahdá ke á Bayt-Lahemá atant, Maryamay chellag bayagay máh o róch sarjam butant o 7mardénchokkéay sará chellag but ke áiay awali chokk at. Maryamá wati nonnok godéá patát o kadimdánéay#2:7 Kadimdán yakk mazanén darpé ke áiay tahá pas o gókáni warákán mána kanant o démá dayant. tahá wápént, chéá ke pa áyán mehmánjáhá jágah néstat.

Pa shepánkán préshtagáni mestág

8Hamá hand o damagá lahtén shepánk hastat ke shapá gyábáná wati ramagesh negahpánia kort. 9Hodáwanday préshtagé áyáni démá záher but o chárén némagán Hodáwanday shán o shawkatay rozhnái drapshagá#2:9 Drapshag, bezán shahm janag, jalashkag. lagget. Áyán sakk torset. 10Bale préshtagá gwasht: “Matorsét, maná pa shomá mestágé gón ent ke pa sajjahén kawmá mazanén shádmánié kárit. 11Dáuday shahrá maróchi pa shomá rakkénóké pédá butag ke Hodáwandén Masih#2:11 Masih, bezán Hodáay hamá gechén kortagén bádsháh. ent. 12Eshiay pajjáh áragay nesháni esh ent ke shomá kadimdánéay tahá godéá patátagén nonnoké gendét.”

13Anágat ásmáni préshtagáni lashkaré Hodáyá názénáná á préshtagay kerrá átk. Gwashtesh:

14“Shán o shawkat borzén arshay Hodáyá bát o

zeminay sará sohl o émeni

hamá mardomán berasát

ke Hodá cha áyán wassh o razá ent.”

15Wahdé préshtagán á esht o ásmáná shotant, shepánkán watmánwatá gwasht: “Byáét Bayt-Lahemá rawén o hamé kár ke butag o Hodáwandá márá hál dátag, áiá wata chárén.” 16Gorhá pa eshtápi shotant o Maryam o Issopesh dar gétkant o nonnokesh kadimdánay tahá dist. 17Nonnokay gendagá rand, shepánkán é chokkay bárawá harché ke cha préshtagán eshkotagat, mardom sahig kortant. 18Á sajjahénán ke shepánkáni habar eshkot, hayrán o habakkah mantant. 19Bale Maryamá é sajjahén habar wati delá dáshtant o esháni sará báz pegr o hayália kort. 20Shepánkán harché ke eshkotag o distagat, pa áyán Hodáyá sepat o saná kanán per tarretant, chéá ke é sajjahén hamá dhawlá atant ke gón áyán gwashag butagat.

Mazanén parasteshgáhá Issáay árag

21Hashtomi róchá, wahdé nonnokay sonnat kanagay wahd átk, áiay námesh Issá kort, hamá nám ke mátay lápá kapagá pésar préshtagá per kortagat.

22Wahdé mát o chokkay chellagshódiay wahd halás but, Mussáay Sharyatay randgiriá Issop o Maryamá Issá Urshalimay mazanén parasteshgáhá áwort ke áiá Hodáwanday bárgáhá pésh bekanant, 23anchosh ke Hodáwanday Sharyata gwashit: Awali har mardénchokk báyad ent pa Hodáwandá nadrigé hesáb kanag bebit.#2:23 Darraw 13:2, 12. 24Pa korbánig kanagá ham átkant tánke hamá dhawlá ke Hodáwanday Sharyatá gwashtag, “jotké shántol#2:24 Shántol, bezán shátórén morg. yá do kasánén kapót” hayrát bekanant.

25Á róchán Urshalimay shahrá Shamun námén mardé hastat ke pahrézkár o hodádósté at o Esráiliáni rakkénókay rahchár at o Pákén Ruh gón áiá gón at. 26Pákén Ruhá bashárat dátagat, tán wahdé ke taw Hodáwanday Masihá magenday, nameray. 27Á gón Pákén Ruhay rahshóniá mazanén parasteshgáhá átk. Nun wahdé Issáay pet o mátá pa Sharyatay rasmay sarjam kanagá nonnokén Issá tahá áwort, 28Shamuná Issá zort, dastáni delá dásht, Hodá saná o satá kort o gwashti:

29“Oo zórmandén Hodáwand! Anchosh ke taw wat labz dátag,

nun wati kasterá cha é jaháná pa émeni chest kan o wati gwará bebar,

30chéá ke man gón wati chammán é neját distag

ke cha tai némagá ent o

31taw sajjahén kawmáni démá záher kort.

32Á pa dega kawmán elhámi rozhné o

pa tai Esráili kawmá pahr o sháné.”

33Wahdé Issáay pet o mátá áiay bárawá Shamunay é habar eshkotant, hayrán butant. 34Shamuná pa áyán nékdwái kort o gón chokkay mát Maryamá gwashti: “Hodáyá é chokk ráh dátag ke pa bázén Esráiliéá gári o bégwáhiay sawabsáz bebit o pa bázénéá nejátay sawabsáz. É chokk neshánié bit, bale eshiay helápá gappa bit. 35Hamé paymá bázénéay delay ráz páshka bant. Oo Maryam! Taw baláhén andóhé genday ke zahmay dhawlá tai delá kappa kant.”

36Hamódá Ásheray kabilahay yakk janéné hastat ke nabié at. Áiay nám Hannah at o áiay Petay nám Panwél at. Hannah sakk pir at. Surá rand tán hapt sálá áiay lógwájah zendag at, 37bale randá Hannah janózám but. Nun áiay omr hashtád o chár sál at o áiá cha mazanén parasteshgáhá dhann pád éra nakort. Shap o róch Hodáay saná o satáia kort o wati wahdi pa dwá o róchaga gwázéntant. 38Hamé wahdá átk, Hodáay shogri gept o gón hamá sajjahén mardomán ke Urshalimay nejátay rahchár atant, é chokkay bárawá habari kort.

39Wahdé Issáay pet o mátá Hodáwanday Sharyatay sajjahén ráh o rahband purah kortant, gorhá per tarret o Jalilá, wati shahr Náserahá átkant. 40Chokk rost o mazan but. Cha dánái o hekmatá sarréch at o Hodáay rahmati gón at.

Kasánén Issá mazanén parasteshgáhá

41Issáay pet o mát har sál Sargwazay Aidá#2:41 É aidá Sargwazay Aid paméshká gwashant ke cha Mesriáni chérdastiá Esráiliáni ázátiay wahdá markay préshtag cha Esráili chokkáni koshagá sar gwast. Urshalimá shotant. 42Wahdé Issáyá dwázdah sál but, é sálá ham shotant, anchó ke rasm at. 43Aiday róch ke halás butant, per tarragay wahdá Issáyá Urshalimá dásht, bale mát o peti sahig nabutant. 44Awali róchá áyán gwasht balkén gón kárwáná gón ent, paméshká yakk róchéay menzelá démá shotant. Randá áiay shóházá dar kaptant o cha wati syád o pajjárókán áiay jostesh gept. 45Bale Issáesh ke nadist, per tarretant o áiay shóházá Urshalimá shotant.

46Sayomi róchá, áyán Issá mazanén parasteshgáhá dar gétk ke ódá Sharyatay zánógeráni#2:46 Sharyatay zánóger, bezán dini álem o Mussáay Sharyatay zántkár. nyámá neshtagat o áyáni habarán gósh dáragá at o cha áyán jost o pors kanagá at. 47Sajjahén eshkonók cha áiay sarpadi o passawán hayrán atant. 48Wahdé Issop o Maryamá á dist, hayrán butant. Mátá gón áiá gwasht: “Oo mani chokk! Taw chéá gón má chosh kort? Man o tai pet paréshán butagén o má tará har jágah shóház kortag.” 49Issáyá passaw dát: “Shomá chéá maná shóház kortag? Záná, shomá nazántag ke man báyad ent wati Petay kerrá bebán?”#2:49 Yá: wati Petay káráni randá bebán. 50Bale á Issáay é habarán sarpad nabutant.

51Issá gón áyán padá Náserahá shot o áyáni parmánbardár at. Áiay mátá é sajjahén gapp wati delá dáshtant. 52Issá rodán o cha hekmatá sarréch bayán at o Hodá o mardománi delá jágah kanán at.

Currently Selected:

Luká 2: HPKB

Highlight

Copy