Luká 17
17
Gonáh, báwar, zemmah
(Mattá 18:6–7, 21–22; Markás 9:42)
1Issáyá gón wati moridán gwasht: “Nabit ke mardom rad majant o thagal mawárt, bale apsóz pa hamá kasá ke degarán dém pa gonáhá bebárt. 2Cha é kasánokénán yakkéay dém pa gonáhá baragay badalá, gehter hamesh ent ke áiay gardená jenteri táé bebandant o daryáyá chagali bedayant. 3Cha wati kár o kerdán hozzhár bét. Agan tai brát gonáhé bekant, áiá sarkech day o mayárig kan, agan pashómán but, bebakshi. 4Toré róché hapt randá gonáh bekant o hapt randá tai gwará byayt o begwashit: ‘man pashómán án,’ bebakshi.”
5Issáay kásedán gón Hodáwandén Issáyá gwasht: “Wájah! May setk o báwará gésh kan.” 6Gwashti: “Agan shomay báwar arzonéay kesásá#17:6 Asligén Yunáni nebeshtánka gwashit: “thélkáhay tohmay kesásá”. Thélkáh bezán hardalay tohm báz gwandh ant. ham bebit, shomá tuday é drachká hokm korta kanét ke ‘watá cha boná begwaj o beraw zeray#17:6 Zer, bezán daryá. tahá berod o besabz’. Á wahdá, drachk shomay hokmá mannit.
7Cha shomá á kas kay ent ke áiay hezmatkár cha dhagáráni nangár kanag, ramagay chárénag o káray halás kanagá byayt, wáhond áiá begwashit: ‘Zutt byá o benend o warag bwar?’ 8Gón áiá nagwashit: ‘Pésará pa man warag addh kan, tán man nawártag taw mani hezmatá bósht, wahdé man halás kort gorhá taw bwar?’ 9Hodábond, wati hezmatkáray shogr o mennatá gipt ke ‘taw mani hokm mannetag?’ Na, hechbar. 10Hamé paymá shomá ham, á sajjahén hokmán ke shomárá dayag butagant sarjam bekanét o begwashét ke ‘má tai hezmatkár bayagay láhek ham naén, tahná wati zemmah o dhobbah#17:10 Dhobbah, bezán ogdah, zemmah, Arabi o Pársiá “wazifah”. sarjam kortagant.’”
Dah garriay drahbakshi
11Issá dém pa Urshalimay rawagá, cha Sámerah o Jalilay simsarán gwazagá at. 12Wahdé dém pa yakk métagéá pédák at, dah syahgarrién mardom gón áiá dochár kapt. Dur óshtátant o 13gón borzén tawáré gwashtesh: “Oo wájah Issá! Tará may sará bazzag bát.” 14Issáyá ke distant gwashti: “Berawét watá pa dini péshwáyán pésh bedárét.”#17:14 Tawrátá garray nádráh palit o nápák zánag butagant. Agan kasé cha é nájórhiá dráh bebit báyad ent gón Mussáay Sharyatay randgiriá dini péshwáéay gwará berawt o hayráté bekant. Á, ráh geptant o ráhay nyámá, pák o palgár butant.
15Cha áyán yakkéá, wahdé dist ke nun dráh ent, gón borztawári Hodáyá satá kanán, per tarret o átk, 16Issáay pádán kapt o shogri gept. Á, cha Sámerián#17:16 Yahudián Sámeri gomráh zántagant o gón áyán dayger o badal o bándát nakortag. at. 17Issáyá jost kort: “Záná, har dahén cha garrá pák o palgár nabutét? Á dega nohén kojá ant? 18É yakkén darkawmá#17:18 “Darkawm” bezán á ke Yahudi naant. abéd, cha áyán dega yakké pa Hodáay sepat o sanáyá nayátk?” 19Gorhá Issáyá gón á mardá gwasht: “Pád á, beraw, ke tai setk o báwará tará dráh kortag.”
Hodáay bádsháhi
(Mattá 24:37–40)
20Yakk róché, lahtén Parisiá cha Issáyá jost kort: “Hodáay bádsháhi kadéna kayt?” Issáyá gwasht: “Hodáay bádsháhi chamzáherá gendaga nabit. 21Gwashaga nabit ke Hodáay bádsháhi edá ent yá ódá. Chéá ke Hodáay bádsháhi, shomay delá ent.”#17:21 Yá: shomay nyámá ent.
22Padá gón wati moridán gwashti: “Yakk wahdé kayt ke shomá pa Ensánay Chokkay rócháni yakk róchéay gendagá armán o árzua kanét, bale á róchá nagendét. 23Mardom shomárá gwashant ke ‘á edá ent’ yá ‘á ódá ent,’ bale shomá áyáni habará gón makapét. 24Anchosh ke gerók cha yakk kondhéá jant o sajjahén ásmáná jalashkénit o rozhnága kant, Ensánay Chokk ham wati á róchá, anchosh záher o paddara bit. 25Bale awalá báyad ent bázén sakki o sóri besaggit o é zamánagay nasl o padréch áiá mamannant.
26Hamá dhawlá ke Nuhay bárigá butag, Ensánay Chokkay róch ham anchosha bit. 27Á róchán, mardom ward o nósh o sáng o surá dazgatth atant tán hamá róchá ke Nuh bójigá swár but. Randá, mazanén hár o tuppáná sajjahén mardom gár o bégwáh kortant.
28Lutay zamánagá ham hamé dhawlá at, mardom pa warag o charag o badal o bándát o kesht o keshár o lóg o jágahay bandagá goláésh atant, 29bale á róchá ke Lut cha Sodumay shahrá dar átk, Hodáyá cha ásmáná ás o rókén gókort gwárént o Sodumay sajjahén mardom gár o bégwáh kortant.
30Ensánay Chokkay paddar bayagay róchá, hamé dhawlá bit. 31Á róchá, agan kasé wati lógay sará bebit o áiay ord o poténk lógá ér bant, pa áyáni zuragá jahlá ér makapit. Hamé dhawlá, agan kasé wati dhagáráni sará kesht o keshárá ent, á ham padá lógá per matarrit. 32Lutay lógbánokay sargwastá yát bekanét.#17:32 Lutay janá wati mál o manál dóst at, Hodáay habari nazort o paméshká mort. 33Harkas wati sáhay rakkénagay randá bebit, áiá báhénit. Harkas wati sáhá bebáhénit, áiá rakkénit. 34Shomárá gwashán ke á wahdá, agan do mardom yakkén taht o nepáday sará waptag, yakké baraga bit o domi hamódá pasht géjaga bit.#17:34 Pasht géjag, bezán nazurag, yalah dayag, gechén nakanag. 35Cha do janéná, ke hórigá jenteray sará dánay droshagá bant, yakké baraga bit o domi hamódá pasht géjaga bit. 36Do mard ke dhagáráni sará bit, yakké baraga bit o domi hamódá pasht géjaga bit.”#17:36 Lahtén daznebeshtá, band 36 nést. 37Jostesh kort: “Oo Hodáwand! Kojá chosha bit?” Passawi dát: “Har jáh ke jóné kapit, ódá gittó#17:37 Gittó yakk morgé ke dhundh, bezán gahetagén jóna wárt. o dhundhwárén morg moccha bant.”
Currently Selected:
Luká 17: HPKB
Highlight
Share
Copy
Want to have your highlights saved across all your devices? Sign up or sign in
© 2015-2022, Wycliffe Bible Translators, Inc. and the Balochi Bible Translation Team. All rights reserved.
