Luká 15
15
Gárén mésh
(Mattá 18:12–14)
1Nun sajjahén songi o máliátgir o gonahkárén mardom, Issáay gwará átkant tán áiay habarán beshkonant. 2Bale Parisi o Sharyatay zánóger, norondhán o iráz geráná gwashagá atant: “É mard gón gonahkárán nend o nyáda kant o gón áyán hór waraga wárt.”
3Gorhá Issáyá pa áyán é mesál áwort o gwashti: 4“Cha shomá agan kaséá sad mésh bebit o cha áyán yakké gár bebit, gorhá nawad o nohén méshán charágáhá yalaha nadant o hamá gárén méshay shóházá narawt tán áiá dar begéjit? 5Wahdé gárén méshá dara géjit pa galé wati kópagá kanti, 6lógá rawt, dóst o hamsáhegána lóthit o gwashit: ‘Gón man gal o shádehi kanét ke man wati á gárén mésh dar gétkag.’ 7Man shomárá gwashán, hamé dhawlá pa yakk pashómánén gonahkáréá ásmáná mazanén jashné geraga bit, bale pa nawad o noh pahrézkárá ke áyán pashómáni darkár naent choshén jashné geraga nabit.
Gárén kaldár
8Yá ke agan janénéá dah kaldár bebit o cha á dahén kaldárán yakké gár bebit, gorhá pa wati gárén kaldáray shóházá, cherág róka nakant o lógá narópit? Tán áiá dar magéjit cha wati shóházá dasta kasshit? 9Anchosh ke á kaldárá dara géjit, dóst o hamsáhegána lóthit o gwashit: ‘Gón man gal o shádehi kanét chéá ke wati gárén kaldáron wadi kortag.’ 10Hamé paymá man shomárá gwashán, agan yakk gonahkáré cha wati gonáhán tawbah bekant o Hodáay ráhá byayt, Hodáay préshtagáni bárgáhá jashn o shádehi geraga bit.”
Gár o gomráhén bacch
11Issáyá gésh kanán kort o gwashti: “Yakk mardéá do mardénchokk hastat. 12Kasteréná yakk róché gón petá gwasht: ‘Oo mani pet! Cha tai mál o melkatá, harché ke mani bahr o wandhá kapit maná annun beday.’ Gorhá petá wati sajjahén mál o maddhi doén chokkáni sará bahr kort.
13-14Lahtén róchá o rand, kasterén chokká wati sajjahén bahr yakjáh kort, zort o durén molkéá shot o sajjahén zarri pa hawasnáki gár kortant. Randá, á molká sakk dhokkál kapt o á dastang o mohtáj but. 15Hamá molká, yakk mardoméay kerrá shot o pa káréay geragá watá lecchénti. Gorhá, áiá wati dhagáráni sará hukkáni chárénók kort. 16Ódá haminchok shodig but ke delia lóthet hamá kósagán#15:16 Kósag, bezán karó o bánkalénkay hamá drájén póst ke dánagi mán ent. bwárt o wati lápá sér bekant ke hukkáni warák atant, bale kassá pa waragá hecch nadát.
17Wahdé hóshi kort o zánti, gón wat gwashti: ‘Mani petay bázén nawkar o kárdárá lápay sérá waráka rasit o man edá shodá mark án. 18Nun wati petay kerrá pera tarrán o áiá gwashán: Oo mani pet! Man tai o ásmánay Hodáay gonahkár án o 19nuna nakarzán ke tai chokk gwashag bebán. Maná wati hezmatkáráni dhawlá yakk hezmatkáré bekan.’
20Gorhá pád átk o dém pa petay lógá rahádag but. Petá ke cha durá dist deli pa áiá sotk o pa eshtápi áiay démá tachán but o gwarambázi kort o chokketi. 21Chokká gwasht: ‘Oo mani pet! Man tai o ásmánay Hodáay gonahkár án o nuna nakarzán ke tai chokk gwashag bebán.’
22Bale petá wati hezmatkár gwashtant: ‘Eshtáp kanét, pa áiá gehterén kabáhá byárét o gwarái bedayét. Challah o mondrikki dastá o kawshi pádá bedayét. 23Á pábondi#15:23 Pábondi, bezán hamá pas o gók ent ke pa helár kanagá lógay dapá dáranti. gwaská#15:23 Gwask, bezán góló, gókay chokk. byárét o bekoshét tánke jashné bekanén o wasshén waráké bwarén. 24Chéá ke mani é chokk mortagat bale nun padá zendag butag, gár at o nun wadi butag. É dhawlá áyán gal o shádehi kort.’
25Bale masterén chokk dhagáráni sará at. Wahdé lógay nazzikká raset o sáz o zémeli tawári eshkot, 26cha hezmatkárán yakké lóthet o josti kort: ‘Edá ché bayagá ent?’ 27Hezmatkárá passaw dát: ‘Tai brát padá lógá átkag o nun ke á pa wasshi o salámati rasetag tai petá jashné geptag o á pábondi gwaski koshtag.’ 28Gorhá, masterén brát sakk zahr gept o nalótheti lógá berawt. Bale pet dhanná átk o áiay wasshán kanagá#15:28 Wasshán kanag, bezán sohl kanag, áshti kanag. mennatwár but.
29Chokká petay mennatgiriay passawá gwasht: ‘Wati delá bechár, man inchok sálá tai kerrá goláméay dhawlá kár kortag, hechbar cha tai hokmá dar nabutagán o taw maná yakk shenekké ham nadátag ke gón wati dóst o hambalán shádehi bekanán. 30Bale tai é chokká tai mál gón kahbagén janénán gár o gárat kortag o taw pa áiay per tarragá pábondi gwask koshtag.’ 31Petá gwasht: ‘Oo mani chokk! Taw harwahd mani kerrá ay o harché ke maná hast á sajjahén taig ant, 32bale annun márá paméshká jashn o shádehi kanagi ent ke tai é brát mortagat o nun zendag butag, gár o bégwáh at o nun wadi butag o átkag.’”
Currently Selected:
Luká 15: HPKB
Highlight
Share
Copy
Want to have your highlights saved across all your devices? Sign up or sign in
© 2015-2022, Wycliffe Bible Translators, Inc. and the Balochi Bible Translation Team. All rights reserved.
