Luká 12
12
Ryákáriay homir
(Mattá 10:26–27)
1Hamá wahdá, hazárán mardom mocch but o yakdomiá gwarmósh dayán o lapáshán at. Issáyá pésará dém gón moridán tarrént, wati gapp o tráni bongéj kort o gwashti: “Cha Parisiáni homirá ke ryákári o dotal o dopóstiay homir ent, watá dur bedárét, 2chéá ke hecch chérén káré nést ke záher o paddar mabit o choshén andém o panáhén chizzé nést ke áshkár o démdará mabit. 3Paméshká, har habaré ke shomá shapay taháriá kortag, róchay rozhnáiá eshkonaga bit o har habaré ke shomá dapbandén lógáni tahá pa halwat kortag, cha lóg o bánáni sará jár janaga bit.
Matorsét
(Mattá 10:19–20, 28–33; 12:32)
4Oo mani dóstán! Shomárá gwashán ke cha mardomán matorsét. Á shomay jesm o jáná koshta kanant, bale cha eshiá géshter hecch korta nakanant. 5Man shomárá kaddhana kanán o gwashán ke cha kayá betorsét. Cha hamáiá betorsét ke koshta kant o koshagá rand dózahá dawr dayagay wáki ham hast. Haw! Man shomárá gwashán ke cha hamáiá betorsét. 6Panch jenjeshk pa do paysahá#12:6 Asligén Yunáni nebeshtánk gwashit: “do asariun.” Asariun á zamánagá kamnehádén zarré at. bahá nabit? Bale Hodá cha áyán yakkéá ham béhayála nabit. 7Hodáyá shomay saray mudáni hesáb ham gón ent, gorhá matorsét chéá ke shomay kadr o arzesh cha sajjahén jenjeshkán géshter ent.
8Man shomárá gwashán ke harkas mardománi démá maná bemannit, Ensánay Chokk Hodáay préshtagáni démá áiá mannit. 9Bale harkas mardománi démá maná mamannit, man ham Hodáay préshtagáni démá áiá namannán. 10Hamé dhawlá, agan kasé Ensánay Chokkay helápá habar bekant pahell kanaga bit, bale harkas Hodáay Pákén Ruhay sará kopr bekant, á bakshaga nabit.
11Mardom shomárá gerant o kanisahána barant o hákem o hokumatáni démá pésha kanant. Á wahdá, pa wati démpániá#12:11 Démpáni, bezán wati rakkénagay johd, Arabi o Pársiá “defá'”. paréshán mabét ke ché begwashét, 12chéá ke Pákén Ruh shomárá hamá wahdá wat sója dant ke ché begwashét.”
Nádánén zemindáray mesál
13Cha mardománi mocchiá, yakkéá gón áiá gwasht: “Oo ostád! Mani brátá begwash ke cha petay mirásá mani bahrá begisshénit o bedant.” 14Issáyá passaw dát: “Oo mard! Kaséá maná shomay mirásay bahr kanók nakortag.” 15Gorhá gón mardomán gwashti: “Hozzhár bét! Watá cha har dhawlén tamáh o lálechá dur bedárét, chéá ke mál o dawlatay zyádahi ensánay zenday maksad o morád naent.”
16Áiá yakk mesálé dát o gwashti: “Yakk hastómandén zemindáré hastat ke áiá cha wati dhagár o keshárán bázén dahl o rasadé raset. 17Nun wati delá pegri kort ke ‘ché bekanán? Maná pa esháni ambár kanagá jágah nést.’ 18Gorhá gón wat gwashti: ‘Nun zánton ché bekanán. Wati ambárána karóján o harába kanán o esháni jágahá masterén ambára bandán o sajjahén dán o málán hamódá ambára kanán. 19Padá gón wata gwashán: “Taw pa bázén sálán mazanén málé mocch kortag. Nun ásudag bebay, wassh bwar o benósh o shádehi kan!”’ 20Bale Hodáyá gwasht: ‘Oo nádán! Enshapi tai sáh cha taw geraga bit, gorhá tai é mocch kortagén mál o melkat kaiga bant?’
21Esh ent á mardomay ásar o ákebat ke pa wat mál ambára kant bale Hodáay gwará hastómand naent.”
Ásudagén zend
(Mattá 6:25–33)
22Issáyá gón wati moridán gwasht: “Paméshká shomárá gwashán ke pa wati zendá paréshán o deltaparkah mabét ke ‘Ché bwarén?’ na pa wati jesm o jáná ke ‘Ché bepóshén?’ 23chéá ke zend, cha waráká o jesm o ján, cha pósháká géshtera karzit. 24Gwarágán bechárét, na keshant o na ronant o na kahdán o ambáresh hast. Bale angat Hodá áyán róziga dant. Shomay arzesh o kimmat cha morgán báz géshter ent. 25Kasé gón pegr o hayáláni zórá wati zenday róchán sáhaté ham gésh korta kant?#12:25 Yá: wati báládá yakk dasté borzter korta kant. 26Agan shomá inchokén kasánén káré korta nakanét, gorhá chéá zenday dega chizzáni bárawá pegra kanét?
27-28Oo kambáwarán! Gol o polláni némagá delgósh kanét ke chón rost o rodóma kanant. Na zahmaté kasshant o na résant o gwapant, bale man shomárá gwashán ke Solaymán bádsháhá gón wati mazanén shán o shawkatá, hechbar choshén dhawldárén póshák gwará nabutag, chosh ke é poll zébá o brahdár ant. Wahdé Hodá gyábánay káhán ke maróchi hastant o bándá taruná sóchaga bant, é dhawlá zébá o brahdára kant, gorhá shomárá che paymá sharterén pósháka nadant? 29Paméshká pa ward o warákay shóházá watá delsyáh makanét. 30Donyáay sajjahén Hodánábáwarén mardom é chizzáni randá tachant, bale shomay ásmáni Peta zánt ke shomárá é chizz pakár ant. 31Shomá Hodáay bádsháhiay shóházá bebét, é sajjahén wat shomárá dayaga bant.
32Oo mani kasánokén romb o thóli! Matorsét chéá ke shomay ásmáni Petay razá o wáhag hamesh ent ke bádsháhiá shomárá bedant. 33Wati mál o melkatá bahá kanét o nézgáráni sará bahr kanét. Pa wat anchén zarturag addh bekanét ke hechbar kwahn mabant, nahallagi o abadmánén ásmáni ganjé ambár kanét ke na dozz áiá bárt o na warók o raméz#12:33 Warók o raméz, bezán gwandhén kerm o lullok ke dár o poccha wárt. áiá wárt. 34Shomay del hamá jáhá rawt ke mál hamódá ent.
Pa Issáay per tarragá tayár bebét
(Mattá 24:42–51)
35Lánká bebandét o wati cherágá rók o rozhnág bedárét. 36Hamá hezmatkár o dazbójáni paymá bebét ke rahchár ant áyáni hodábond kadén cha sur o árósay shádehián pera tarrit o anchosh ke kayt o darwázagá thokkit, á darwázagá pacha kanant. 37Bahtáwar ant hamá hezmatkár ke áyáni hodábonda kayt o gendit ágah o hozzhár ant. Báwar kanét hodábond wat pa áyáni hezmatá lánka bandit, áyána nendárénit o warag démá dant. 38Bahtáwar ant hamá hezmatkár agan áyáni wájah shapay domi yá sayomi pásá byayt, begendit ke ágah ant. 39Shomá sharra zánét, agan lógay hodábondá bezántén dozz kojám wahdá kayt, gorhá áiá hechbar dozz wati lógá pa dozziá naeshtagat. 40Hamé paymá tayár bebét, chéá ke Ensánay Chokk anchén wahdéá kayt ke shomá áiay entezár o wadárá nabét.”
41Petrosá gwasht: “Oo Hodáwand! É mesál taw pa má áwort yá pa sajjahénán?” 42Hodáwandén Issáyá gwasht: “Wapádár o shiwwárén kármaster hamá ent ke hodábond áiá wati é dega sajjahén hezmatkáráni master bekant tán áyán pa wahd ward o warák bedant. 43Bahtáwar ent hamá hezmatkár ke wahdé hodábonda kayt, áiá hamá káráni sará gendit. 44Shomárá rásténa gwashán, hodábond hamá hezmatkárá wati sajjahén mál o hastiay kármastera kant.
45Bale agan hamá kármaster wati delá begwashit: ‘Angat mani hodábonday áyagá báz wahd hast’ o paméshká warag o charagá malár o hanósh bebit o wati hamkárén golám o móledán latth o kotth bekant. 46Áiay hodábond anchén róch o sáhatéá kayt o rasit ke á nazánt o wadárá naent. Gorhá hodábond áiá thokkor thokkora kant o béwapá o nábáwaráni nyámá dawra dant.
47Á hezmatkár ke wati hodábonday wáhag o delkasshiána zánt, bale angat áiay razá o morádáni sará kár kanagá watá tayára nakant, bázén latthé wárt. 48Bale hamá ke pa názánti anchén radé jant ke latth o kotthay sezáwár ent, kamter lattha wárt. Chéá ke cha masterén mansabdárá géshter jost o porsa bit o kaséá ke géshter zemmawári dayag butag, cha áiá géshter hesáb geraga bit.
Issáay randgiri
(Mattá 10:34–36)
49Man donyáyá átkagán ke ásé rók bekanán. Drégatá é wahdi á ás rók butén. 50Bale cha áiá pésar, maná pákshódié zalurat ent,#12:50 Issáay máná wati mark ent. ke pa áiay sarjam kanagá báz paréshán o bétáhir#12:50 Bétáhir, bezán náárám, békarár. án. 51Gomána kanét man átkagán tán zeminay sará tepáki o sohl byárán? Na, man pa jetáiay áragá átkagán. 52Cha é damáná o rand, har lógay panchén mardománi nyámá jetáia kapit, say doay helápá o do sayay helápá bit. 53Pet gón chokká nátepáka bit o chokk gón petá, jenekk cha mátá jetá bit o mát cha jenekká, wassig gón neshárá nátepáka bit o neshár gón wassigá.”
Neshániáni pajjár
(Mattá 5:25–26; 16:2–3)
54Gorhá Issáyá gón mardomán gwasht: “Wahdé shomá dém pa rónendá gendét ke jambaréá bastag, hamá damáná gwashét ke hawra bit o hawr ham gwárit. 55Wahdé cha jonubá gwáta kasshit, gwashét ke maróchi garm o lewára bit o hamé dhawlá ham bit. 56Oo dopóstén shatalkárán! Wahdé shomá zemin o ásmánay rang o neshániána zánét ke ché bayagi ent, gorhá chón é annugén zamánagay neshánián kesás korta nakanét?
57Shomá pa ché rástiá wat kesás korta nakanét? 58Wahdé gón wati daynkárá hakdiwáná#12:58 Hakdiwán, bezán ámidges, dádgáh. raway, johd kan ráhá gón áiá pa sohl o saláh berasay. Chosh mabit ke tará káziay kerrá bebárt o á tará sepáhigay dastá bedant o sepáhig tará bandijáhá bebárt o jél bekant. 59Tará gwashán, tán wahdé ke taw zarráni goddhi pai o paysahá porr makanay, cha ódá ázáta nabay.”
Currently Selected:
Luká 12: HPKB
Highlight
Share
Copy
Want to have your highlights saved across all your devices? Sign up or sign in
© 2015-2022, Wycliffe Bible Translators, Inc. and the Balochi Bible Translation Team. All rights reserved.
