Yuhanná 19

Yahudiáni kénag o Pilátusay dodeli

(Mattá 27:27–31; Markás 15:16–20)

1Randá Pilátusá Issá zort o shallák o hayzarán janáént. 2Pawjián cha dhangar#19:2 Dhangar, bezán bétákén konthagi drachk o dár. o konthagán tájé jórh kort o Issáay sará dát, jamurangén#19:2 Jamu, rangé ke Pársiá banafsh o Orduá banafshi gwashanti. kabáhé ham gwará dátesh. 3Issáay kerrá shot o átkant o gwashtesh: “Salám o drót, oo Yahudiáni bádsháh!” Shahmátesh ham jat. 4Pilátus padá Yahudiáni kerrá dhanná dar átk o gwashti: “Bechárét, eshiá shomay kerrá dhanná kárán tánke shomá bezánét ke man pa eshiay mayárig kanagá hecch bonyádé nagendán.” 5Issáyá konthagén táj sará at o jamurangén kabáh gwará at o dhanná dar átk. Pilátusá gón Yahudián gwasht: “Bechárét, é mard hamedá ent!” 6Wahdé mazanén dini péshwáyán o áyáni sepáhigán dist, kukkáresh kort: “Salibi kassh! Salibi kassh!” Pilátusá gwasht: “Shomá wat eshiá bezurét o salib bekasshét. Man pa eshiay mayárig kanagá hecch bonyádé nagendán.” 7Yahudián gwasht: “Márá Sharyaté hastent ke áiay redá,#19:7 Redá, bezán motábeká. é mard allamá koshag bebit, chéá ke gwashtagi: ‘Man Hodáay Chokk án.’” 8Wahdé Pilátusá é habar eshkot, ganter torseti.

9Pilátus padá wati kalátá shot o ódá cha Issáyá josti kort: “Taw cha kojá átkagay?” Issáyá passaw nadát. 10Pilátusá gwasht: “Gón man habara nakanay? Taw nazánay ke tai ázát kanag o salib kasshagay ehtiár mani dastá ent?” 11Issáyá passaw dát: “Agan Hodáyá tará é ehtiár madátén, mani sará tará hecch wák o ehtiáré néstat. Paméshká hamá ke maná tai dastá dáti géshter mayárbár ent.” 12Cha ed o rand, Pilátusá johda kort ke áiá ázát bekant, bale Yahudián kukkára kort: “Agan taw é mardá ázát bekanay, Kaysaray#19:12 Kaysar Rumay bádsháháni lakab butag, hecch bádsháhay jenday nám nabutag. Rumay har bádsháh Kaysar gwashag butag. dóst naay. Harkas watá bádsháh sarpad bebit, Kaysaray dozhmen ent.”

13Wahdé Pilátusá é habar eshkot, Issái dhanná áwort o wat yakk jáhé pa dádrasiá nesht ke áiá “Sengparsha” gwashant o Aramái zobáná “Jabbátá” bit. 14Sargwazay Aiday tayáriay róchá, némróchay wahdá,#19:14 Asligén Yunáni nebeshtánka gwashit: “shashomi sáhatay wahd”. Pilátusá gón Yahudián gwasht: “Bechárét, esh ent shomay bádsháh!” 15Bale áyán kukkár kort: “Gár o gomsári kan! Gár o gomsári kan! Salibi kassh!” Pilátusá gwasht: “Shomay bádsháhá salib bekasshán?” Mazanén dini péshwáyán gwasht: “Cha Kaysará abéd, márá dega bádsháhé nést.” 16Áherá, Pilátusá Issá pawjiáni dastá dát ke salib kasshag bebit. Gorhá áyán Issá bort.

Issáyá saliba kasshant

(Mattá 27:32–37; Markás 15:21–26; Luká 23:32–38)

17Issáyá salibesh baddhá dát o “Kámpól” námén jágahéá bortesh. É jágah Aramái zobáná “Joljotá” gwashaga bit. 18Hamódá salibesh kasshet. Gón áiá dega do mardomesh ham salib kasshet, yakké é kashá o yakké á kashá. Issá, á doénáni nyámá at. 19Pilátusay hokmá, mayárnámagé#19:19 Mayárnámag, bezán nebeshtah kortagén mayár. nebeshtahesh kort o salibay sará dratkesh. Nebeshtah é dhawlá at: “Issá Náseri - Yahudiáni bádsháh.” 20Cha Yahudián bázénéá é mayárnámag wánt, chéá ke Issáay salib kasshagay jágah cha shahrá dur naat o mayárnámag Ebráni o Látini o Yunáni zobánán nebisag butagat. 21Gorhá Yahudiáni mazanén dini péshwáyán gón Pilátusá gwasht: “‘Yahudiáni bádsháh’ nebeshtah makan, nebeshtah kan ke é mardá gwashtag man Yahudiáni bádsháh án.” 22Pilátusá gwasht: “Á chizz ke man nebeshtah kortag, badala nabit.”

23Salib kasshagay wahdá, pawjián Issáay pocch zortant, chár bahrá bahr kortant, pa har pawjiéá yakk bahré. Bale Issáay jámag mant ke hecch cháki per naat, sará tán pádá yakgwáp at. 24Gorhá áyán watmánwatá gwasht: “Byáét, eshiá naderrén, eshiay sará korakasshia#19:24 Láthari o korakasshi, bezán chek o posht, tar o hoshk. kanén, chárén bárén kayá rasit?” Hamá dhawlá ke Hodáay Pákén Ketába gwashit, hamá dhawlá but:

“Mani pocchesh watmánwat bahr kortant o

jámagay sará korakasshiesh kort.” # 19:24 Zabur 22:18.

Pawjián hamé kár kort.

25Salibay nazzikká Issáay mát o mátay gohár o Kliupásay jan Maryam o Maryam Magdalini óshtátagatant. 26Wahdé Issáyá wati mát dist ke hamá dóstigén moriday kerrá óshtátag, gón mátá gwashti: “Oo bánok! É tai chokk ent.” 27Randá gón wati moridá gwashti: “É tai mát ent.” Á moridá cha hamá wahdá Maryam bort o wati lógá dásht.

Issá sáha dant

(Mattá 27:45–50; Markás 15:33–37; Luká 23:44–46)

28Nun Issáyá dist ke sajjahén chizz sarjam butagant. Gorhá Pákén Ketábay habaray rást o sarjam bayagay háterá gwashti: “Tonnig án.”#19:28 Bechár: Zabur 22:15; 69:21. 29Cha tropshén sharábá porrén kunzagé ódá ér at. Áyán espanjé#19:29 Espanj, bezán pozzh, pokki. zort o sharábén kort, zupáay#19:29 Zupá kasánén drachké ke Engréziá “hyssop” o Pársiá “zufá” gwashanti. tháléay sará bast o Issáay lonthán per mosht. 30Wahdé Issáyá sharáb dap jat, gwashti: “Kár halás but!” Randá sari jahl kort o sáhi dát.

Issáyá nayzaha janant

31Á róch, Shabbatay tayáriay róch at. Yahudián nalóthet ke salib kasshetagénáni jón o jasad Shabbatay róchá salibay sará lónján bebant, chéá ke é hásén Shabbaté at. Paméshká cha Pilátusá dazbandiesh kort ke á sayénáni pádán prósh o cha salibáni sará éresh géj. 32Gorhá pawji démá átkant o hamá doénáni pádesh próshtant ke gón Issáyá salib kasshag butagatant, pésará yakkéay o padá domiay. 33Issáay kerrá ke átkant, distesh ke áiá sáh dátag. Paméshká áiay pádesh napróshtant. 34Bale cha pawjián yakkéá, nayzahé#19:34 Nayzah, bezán nézah. Issáay kash o pahnátá jat o hamá damáná cha áiay jóná hón o áp dar átk. 35Hamá kasá ke chamme wat é chizz distagant, sháhedia dant tánke shomá imán byárét. Áiay sháhedi rást ent. Á zánt ke man rásta gwashán. 36É kár hamá dhawlá but tánke Pákén Ketábay é habar rást o sarjam bebit ke gwashit: “Áiay hecch haddh próshaga nabit.”#19:36 Darraw 12:46. 37Pákén Ketáb dega yakk jágahé ham gwashit: “Á hamáiá chárant ke áiay jánesh thong thong kortag.”#19:37 Zakaryá Nabiay Ketáb 12:10.

Issáay kabr kanag

(Mattá 27:57–61; Markás 15:42–47; Luká 23:50–56)

38Randá, Issop námén mardé ke Arimátiáay shahray nendók at, Pilátusay kerrá shot o Issáay jóni lóthet. Á Issáay moridé at bale chérokái, chéá ke cha Yahudiána torseti. Pilátusá ejázat dát o áiá jón bort. 39Nikudimus, hamá ke pésará shapé Issáay gendagá shotagat, átk o gón wat lahtén hór o hawárén morr o aud o karzarwáhi áwort ke si kiluay kesásá#19:39 Asligén Yunáni nebeshtánka gwashit: “sad litrá”. Yakk litráé kesás say sad gerám ent. atant. 40Nun áyán Issáay jón zort o Yahudiáni kabr o kapanay rasmáni redá, gón á washbóán lilomén#19:40 Lilom, goday tahré ke Engréziá “linen” gwashaga bit. patthián patát. 41Hamá jágahay nazzikká ke Issá salib kasshag but, bágé hastat ke ódá nókén kabré jatagatesh o angat kass áiay tahá kabr kanag nabutagat. 42Yahudiáni tayáriay róch at o kabr nazzikká at, paméshká Issáay jónesh hamódá kabr kort.

Currently Selected:

Yuhanná 19: HPKB

Highlight

Copy