Pédáesh 22

Ebráhémay chakkás

1É chizzán o rand, Hodáyá Ebráhém chakkáset#22:1 Chakkásag, bezán ázmáesh kanag, emtehán gerag.. Gón Ebráhémá gwashti: “Ebráhém!” Ebráhémá passaw dát: “Ji!” 2Hodáyá gwasht: “Wati bacch, wati yakkén chokk, Esák ke tará dóst ent, bezuri o Muriáay damagá beraw. Hamá kóhá ke man tará pésha dárán, hamódá bar o sóchagi korbánigay hesábá nadri kan.”

3Domi sohbá máhallah, Ebráhém pád átk o wati hari pálám kort. Wati do hezmatkár o Esáki zortant, pa sóchagi korbánigá dári prósht o dém pa hamá jágahá ráh gept ke Hodáyá gwashtagat. 4Nun saparay sayomi róch at. Ebráhémá chamm chest kortant o cha durá á jágahi dist. 5Gón wati hezmatkárán gwashti: “Shomá gón hará hamedá bejallét, man o chokk ódá rawén o Hodáyá parastesha kanén o káén.” 6Ebráhémá sóchagi korbánigay dár zortant o wati chokk Esákay baddhá dátant, ás o kárchi wat zortant o doén ráh geptant. 7Esáká gón wati pet Ebráhémá gwasht: “Mani pet!” Ebráhémá passaw dát: “Ji mani chokk!” Esáká gwasht: “Ás o dár wa esh ant, bale sóchagi korbánigay gwarándh kojá ent?” 8Ebráhémá passaw dát: “Mani chokk! Sóchagi korbánigay gwarándhay kárá Hodá wat chár o gozára#22:8 Chár o gozár kanag, bezán chárag o hayáldári kanag. kant” o á doén rawán butant.

9Wahdé hamá jágahá sar butant ke Hodáyá gwashtagat, Ebráhémá korbánjáhé addh kort, dári sar pa sar kortant o wati chokk Esáki bast o korbánjáhá, dáráni sará ér kort. 10Ebráhémá dast shahárt o kárchi zort ke wati chokká helára kanán, 11bale Hodáwanday préshtagá cha ásmáná Ebráhém tawár kort: “Ebráhém! Oo Ebráhém!” Ebráhémá passaw dát: “Ji!” 12Préshtagá gwasht: “Wati dastá bedár o chokká hecch makan. Nun mana zánán ke taw Hodátorsé ay, chéá ke taw chakk o pad nabutay#22:12 Chakk o pad nabayag, bezán posht nakenzag, ingor o ángor nakanag. o wati bacch, wati yakkén chokk ham maná dát.” 13Ebráhémá chamm chest kortant o poshtá cháret, disti ta gwarándhé ke kánthi dhangarán mán gisshetagant. Ebráhém shot, gwarándhi zort o wati chokkay jágahá sóchagi korbánig kort. 14Ebráhémá á jágahay nám kort “Hodáwand chár o gozára kant”#22:14 Asligén Ebráni nebeshtánka gwashit: “Hodáwanda gendit”. o tán maróchigá gwashaga bit ke: “Hodáwanday kóhay sará, chár o gozár kanaga bit.”

15Hodáwanday préshtagá padá Ebráhém cha ásmáná gwánk jat. 16Gwashti: “Hodáwanda gwashit: ‘Maná wati saray sawgend ent, taw ke wati bacchay, wati yakkén chokkay dayagá chakk o pad nabutay, 17man ham pa rásti tará barkata dayán o tai nasl o padréchá anchó báza kanán ke ásmánay estár o tayábay rék ant. Tai poshpad wati dozhmenáni shahrána gerant o wati melkata kanant o 18zeminay sajjahén kawm tai poshpaday sawabá barkata gerant, chéá ke taw mani habar zortag.’” 19Gorhá Ebráhém wati hezmatkáráni kerrá per tarret o á, hórigá dém pa Bérshébahá ráh geptant. Ebráhém Bérshébahá jahmenend but.

Náhóray chokk

20Chizzé wahdá rand Ebráhémesh sahig kort ke Melkahá ham chokk áwortag, pa tai brát Náhórá chokki pédá kortag. 21Áiay awali chokk Uz ent, Uzay brát Buz o Kemuil ant, Kemuil, Arámay pet ent. 22É dega chokki Kesed o Hazó o Pildásh o Yadláp o Betwél ant. 23Cha Betwélá Rebekká pédá but. Ebráhémay brát Náhóray é hashtén chokk cha Melkahá pédá butant. 24Náhóray soriat#22:24 Soriat, dáshtaw, hamá janén ke bé nekáhá lógá dáraga bit. ke námi Rahumah at, cha áiá Tebah o Gaham o Tahásh o Mákah pédá butant.

Currently Selected:

Pédáesh 22: HPKB

Highlight

Copy