Pédáesh 16

Hájer o Esmáél

1Ebrámay lógi Sáráiá chokka nabut. Sáráiá Mesri móledé hastat ke námi Hájer at. 2Sáráiá gón Ebrámá gwasht: “Hodáwandá mani dém dáshtag o chokk áworta nakanán. Taw beraw o gón mani móledá bwaps ke balkén maná cha áiay némagá chokké bebit.” Ebrámá Sáráiay gapp zort. 3Wahdé Ebrámá dah sál Kanháná gwázéntagat, áiay jan Sáráiá wati Mesri móled Hájer zort o Ebrámárá pa jani dát. 4Ebrámá gón Hájerá wapt o wáb kort o Hájeray láp porr but. Wahdé Hájerá zánt ke mani láp porr ent, wati bánokay mán nayáragi bendát kort. 5Gorhá Sáráiá gón Ebrámá gwasht: “É azáb o sheddat ke mani sará kaptag, eshiay zemmawár taw ay. Man wati móled tai bagalá dát o nun wahdé á zánt ke lápi porr ent, maná mána nayárit. Hodáwand mani o tai nyámá dádras#16:5 Dádras, bezán hakkén paysalah kanók, hamá ke dádgáhan shawra borrit, dáwar. bát.” 6Bale Ebrámá gón Sáráiá gwasht: “Tai móled tai dastá ent, gón áiá hamá paymá bekan ke tai delá sharter ent.” Gorhá Sárái, Hájeray sará trond but o Hájer cha áiá tatk.

7Hodáwanday préshtagá Hájer gyábáná, chammagéay kerrá dist. É hamá chammag ent ke Shuray ráhay sará ent. 8Préshtagá gwasht: “Oo Hájer, Sáráiay móled! Taw cha kojá átkagay o kojá rawagá ay?” Hájerá gwasht: “Man cha wati bánok Sáráiá tachagá án.” 9Gorhá Hodáwanday préshtagá gwasht: “Wati bánokay kerrá wátarr kan o watá hamáiay dastá day.” 10Préshtagá chosh ham gwasht: “Hodáwanda gwashit ke man tai nasl o padréchá anchó báza kanán ke cha hesábá dhanna bant.”

11Hodáwanday préshtagá padá gwasht:

“Nun taw lápporr ay o

mardénchokké káray.

Chokkay námá Esmáél#16:11 Esmáélay máná ent “Hodá eshkont”. bekan

chéá ke Hodáwandá tai peryát eshkotag.

12É bachakk wakshién haré bit.

É sajjahénáni dozhmena bit o

sajjahén eshiay dozhmeniá kanant.

É wati zendá gón wati sajjahén brátán

pa jang o jérhaha gwázénit.”

13Hodáwandá ke gón Hájerá habar kort, Hájerá Hodáwandárá é nám bast: “Taw hamá Hodá ay ke maná genday.” Chéá ke Hájerá gwasht: “Nun man hamá dist ke maná modáma gendit.” 14Paméshká é chát, Behér-Lahái-Rui#16:14 Ebráni zobáná Behér-Lahái-Ruiay máná ent: “Zendagén Hodáay chát, hamá Hodá ke maná gendit”. nám kapt. É chát, Kádesh o Béreday nyámá ent.

15Gorhá Hájerá pa Ebrámá mardénchokké pédá kort o Ebrámá Hájeray áwortagén chokkay nám Esmáél kort. 16Wahdé Hájer pa Esmáélá chellag but, Ebrámay omr hashtád o shash sál at.

Currently Selected:

Pédáesh 16: HPKB

Highlight

Copy