Pédáesh 11

Bábelay borj

1Sajjahén donyáay zobán yakkén at o labz yakkén atant. 2Mardom ke cha ródarátká laddhetant, Shináray sardhagárá dashté distesh o hamódá jahmenend butant. 3Gón yakdomiá gwashtesh: “Byá, heshta janén o sharriay sará pachénesh.” Áyán sengay jáhá hesht kára bast o gelay jáhá dhámbar. 4Gwashtesh: “Byá pa wat shahré addha kanén, anchén borjé máni bebit ke sartholli ásmáná sar bebit, tánke pa wat námé ér bekanén ke sajjahén zeminay sará sheng o sháng mabén.” 5Hodáwand ér átk tánke hamá shahr o borjá bechárit ke mardomi addh kanagá atant. 6Hodáwandá gwasht: “Edá bechár, nun é yakkén ráj o kawm ant o sajjahénáni zobán yakk ent. Agan é káresh bendát kortag, cha ed o dém é harché kanag belóthant, pa eshán nabutenia nabit. 7Byá, jahláda rawén o esháni zobáná garh o manja#11:7 Garh o manj kanag, bezán mán gisshénag, hór o tahór kanag. kanén ke é, yakdomiay habarán sarpad mabant.”

8Hodáwandá, é mardom cha ódá sajjahén zeminay sará sheng o sháng kortant o eshán shahray addh kanagay kár band kort. 9Paméshká á shahray nám Bábel#11:9 Bábelay labz gón Ebráni zobánay labz “balalá” nazzikk ent ke mánái garh o manj ent. but ke Hodáwandá ódá sajjahén donyáay yakkén zobán garh o manj kort. Áiá mardom cha ódá zortant o sajjahén zeminay sará sheng o sháng kortant.

Sámay nasl o padréch

10Sámay nasl o padréchay kessah chosh ent:

Tuppáná do sálá rand wahdé Sámay omr 100 sál at, cha áiá Arpakshád pédá but. 11Arpaksháday pédáeshá rand, Sámá 500 sál omr kort o áiá dega mardénchokk o janénchokk ham but.

12Arpaksháday omr 35 sál at ke cha áiá Shelah pédá but. 13Shelahay pédáeshá rand, Arpakshádá 403 sál omr kort o áiá dega mardénchokk o janénchokk ham but.

14Shelahay omr 30 sál at ke cha áiá Eber pédá but. 15Eberay pédáeshá rand, Shelahá 403 sál omr kort o áiá dega mardénchokk o janénchokk ham but.

16Eberay omr 34 sál at ke cha áiá Péleg pédá but. 17Pélegay pédáeshá rand, Eberá 430 sál omr kort o áiá dega mardénchokk o janénchokk ham but.

18Pélegay omr 30 sál at ke cha áiá Rahu pédá but. 19Rahuay pédáeshá rand, Pélegá 209 sál omr kort o áiá dega mardénchokk o janénchokk ham but.

20Rahuay omr 32 sál at ke cha áiá Serug pédá but. 21Serugay pédáeshá rand, Rahuá 207 sál omr kort o áiá dega mardénchokk o janénchokk ham but.

22Serugay omr 30 sál at ke cha áiá Náhór pédá but. 23Náhóray pédáeshá rand, Serugá 200 sál omr kort o áiá dega mardénchokk o janénchokk ham but.

24Náhóray omr 29 sál at ke cha áiá Térá pédá but. 25Téráay pédáeshá rand, Náhórá 119 sál omr kort o áiá dega mardénchokk o janénchokk ham but. 26Téráay omr 70 sál but o randá cha áiá Ebrám o Náhór o Hárán pédá butant.

Téráay nasl o padréch

27Téráay nasl o padréchay kessah chosh ent:

Cha Téráyá Ebrám o Náhór o Hárán pédá butant. Cha Háráná Lut pédá but. 28Háránay pet, Térá angat zendag at o Hárán mán Kaldániáni shahr Urá mort, hamódá ke pédá butagat. 29Ebrám o Náhór, doénán sur o sáng kort. Ebrámay lógiay nám Sárái at o Náhóray lógiay nám Melkah. Melkah, Háránay jenekk at o Hárán, Melkah o Yaskáhay pet. 30Sárái santh at o chokki néstat. 31Téráyá wati chokk Ebrám o nomásag Lut, ke Háránay chokk at o wati neshár, bezán Ebrámay jan Sárái zortant o cha Kaldániáni shahr Urá dar átk. É sajjahén dém pa Kanhánay sardhagárá ráh geptant, bale wahdé Háránay shahrá rasetant, hamódá neshtant. 32Téráyá do sad o panch sál omr kort o Háráná mort.

Currently Selected:

Pédáesh 11: HPKB

Highlight

Copy