Dányál 7
7
Dányál chár jánwar wábá gendit
1Bábelay bádsháh Belsházaray dawray awali sálá Dányálá wábé dist, wahdé wati nepáday sará tachk at, shobén o elhám áiay saray tahá chakarragá atant. Áiá wati wábay hásén habar nebeshtah kortant. 2Dányálá gwasht: “Man shapá elhám o shobén gendagá atán o man dist ke ásmánay chárén gwátán mazanén daryá mast kort. 3Padá chár baláhén jánwar cha daryáyá dar átk. Har yakkéay dróshom cha é degarán jetá at.
4Awali, shéray dhawléné at o wakábi bánzoli per at. Man chamm sakk kortag o tán hamá wahdá cháragá atán ke eshiay bánzol gwajag butant o jendi cha zeminá chest kanag o mardoméay warhá do páday sará óshtárénag but o eshiá ensáni delé dayag but.
5Padá dega jánwaré záher but, é domi, mammay dhawléné at o kash waptagat o say pahlugi#7:5 Pahlug, bezán delbanday báragén haddh, ke Pársiá dandeh o Orduá pasli ent. dantánáni nyámá dapá at. Eshiárá gwashag but: ‘Pád á, watá cha góshtá sérláp kan.’
6Eshiá rand, man angat cháragá atán o diston dega yakké, polangay dhawléné at o eshiay poshtá chár morgi bánzol per at. É jánwará chár sarag per at o hákemi ehtiáré eshiá dayag but.
7Eshiá pad, man angat shapay elhám o shobénán gendagá atán o cháromi jánwaron dist. É torsnák, haybatnák o sakk zórmand at. Eshiá drájén ásenén dantán per at. Wati shekári prósht o ér bort o saráróki pádáni chérá lapáshtant. Cha á pésarigén sajjahén jánwarán jetá at o dah kánthi per at. 8Man eshiay kántháni bárawá jérhagá atán, diston esháni nyámá dega kasánén kánthé dar átk o cha jánwaray awali kánthán say kánth eshiay démá cha boná gwajag but. Man dist ke é kánthá mardomi chammay paymén chamm per at o dapé per ati ke bathák janagá at.
Hamá ke cha zamánagán hastent
9Man angat cháragá atán ke
bádsháhi taht árag o ér kanag butant o
hamá ke cha zamánagán hastent, átk o nesht.
Áiay póshák chó barpá o
saray mud, pazhmay dhawlá espét atant.
Áiay taht, ásay bránzé at o
tahtay chahr warókén pádag,#7:9 Chahr warókén pádag, bezán parrag, Engréziá “wheel”. rókén ás atant.
10Ásay kawré tachagá at o
cha áiay bárgáhá dar áyagá at.
Hazáráni hazár áiay hezmatá at o
lakkáni lakk áiay démá óshtátagat.
Diwán pa dádrasiá nesht o
ketáb pach butant.
11Hamá bathákán ke kánthesh janagá at, man áyáni sawabá angat é nedáragá#7:11 Nedárag, bezán sayl, tamáshá. cháragá atán. Tán hamá wahdá cháragá atán ke jánwar koshag but o áiay jón zawál kanag o rókén ásá dawr dayag but. 12É dega jánwaráni hákemi pach gerag butagatant bale áyáni zendá lahtén róch gésh kanag but.
13Man shapay elhámán cháragá atán ta diston,
gón ásmáni jambarán ensáni chokkéay dhawléné áyagá at o
hamáiay némagá pédák at ke cha zamánagán hastent o
áiay démá árag o pésh kanag but.
14Hákemi, shán o bádsháhi hameshiá dayag but
ke sajjahén kawm o ráj o har zobánay mardom eshiay hezmatá bekanant.
Eshiay hokmráni abadmánén hokmránié ke hechbar halása nabit o
eshiay bádsháhi hechbar zawála nabit.
Wábay máná
15Mane Dányálay arwáh paréshán at. Mani del o damágay shobén o elhámán maná torsént. 16Man cha hamáyán yakkéay kerrá shotán ke ódá óshtátagatant o joston kort ke é sajjahén chizzáni asli máná ché ent? Gorhá áiá gón man habar kort o maná esháni mánái sarpad kort.
17‘É chárén baláhén jánwar, donyáay chár bádsháh ant ke chesta bant. 18Bale bádsháhi, borzén arshay Hodáay pákén mardomán dayaga bit o abad tán abad hamáyáni melkata bit. 19Padá man cháromi jánwaray pakkáén máná zánag lóthet, hamá ke gón wati ásenén dantán o brenjén panjagán cha é dega sajjahénán jetá o sakk báz torsnákter at, hamá ke wati shekári prósht o ér bort o pasht kaptagéni pádáni chérá lapáshtant. 20Man áiay saray dahén kántháni máná ham zánag lóthet o é dega kánthay máná ham ke randá rost o áiay démá cha áyán say kánth kapt, bezán hamá ke chamm o dapi per at o bathák janagá at o gendagá cha é degarán master at. 21Man angat cháragá atán o á kánth gón pákén mardomán jangá at o áyán chérdast kanagá at, 22tánke hamá átk ke cha zamánagán hastent o borzén arshay Hodáay pákénáni hakká dádrasii kort o hamá wahd raset ke é pákénán bádsháhi wati melkat kort.’
23Gorhá áiá gwasht: ‘Cháromi jánwar, zeminay sará cháromi bádsháhié bit ke chó é dega sajjahén bádsháhiána nabit. É, sajjahén jaháná lagatmála kant, próshit o éria bárt. 24Dahén kántháni máná esh ent ke cha é bádsháhiá dah bádsháh chesta bit o dega yakké cha eshán o rand chesta bit o é, pésarigénáni dhawléné nabit o say bádsháh prósha dant. 25É, borzén arshay Hodáay helápá habara kant o áiay pákén mardomán ázára dant. Eshiay erádaha bit ke kánun o wahdán badal bekant o Hodáay pákén mardom pa wahdéá eshiay dastá dayaga bant, bezán tán wahdéá, wahdán o ném wahdá.#7:25 Pákén Ketábay bázén zántkáréay gománá eshiay máná say o ném sál ent.
26Bale diwán pa dádrasiá nendit. Áiay hákemi pach geraga bit o tán abad sarjamiá tabáh o barbád kanaga bit. 27Padá bádsháhi, hákemi o ásmánay chéray sajjahén bádsháhiáni shawkat o mazani, borzén arshay Hodáay pákén mardomán dayaga bit. Hodáay bádsháhi abadi bádsháhié bit o sajjahén bádsháhi o molk, Hodáay hezmat o parmánbardáriá kanant.’
28Habar hamedá halás but. Mane Dányál cha wati hayálán sakk paréshán bután o mani dém zard tarret. Bale man é gapp gón wat dásht.”
Currently Selected:
Dányál 7: HPKB
Highlight
Share
Copy
Want to have your highlights saved across all your devices? Sign up or sign in
© 2015-2022, Wycliffe Bible Translators, Inc. and the Balochi Bible Translation Team. All rights reserved.