Piiligu 42

Yisifu beya we Yijipiti

1Yakubu n daa n ti wumi ni bindira ba Yijipiti paaligu, o boosi o biduusi n ŋa, “Wula n na ya na zi n nyaasira taaba?” 2O daa n lee n yeli ba, “M wumiya maa bindira ba Yijipiti, a zu, ya we niŋi, a wa ti da seesi ta, ti naa n guri ti zu, lala jemani, kom ki lee n ku ti.”

3Niŋi n na, Yisifu beya pii we Yijipiti, ni ba wa ti da chi. 4Yakubu daa n bi ti ba sunzo Benjamin paa ba gaari, a kpali, o daa n zorini dabeem maa, o ni nye daaŋu. 5Kom maa daa n lini Keenan paaligu gba, a zu, Yakubu biduusi maa daa n paani niseesi we bindira maa daabu.

6Yisifu mini n daa niŋi Yijipiti paaligu zaa kpeema, wune n daa n koosira chi maa tira paaligu maa dima. O beya maa n daa n ti paa Yijipiti, ba kpe Yisifu saani, a gba u tiŋŋa, ka zulisi ba zuuri. 7Yisifu n daa n si n nye o beya maa, o baŋŋi ba, ka niŋi maa o bi baŋŋi ba, ka togsi ba saani suuritiri, a boosi ba, “Ya n na ya yi?” Ba yeli u, “Ti yini Keenan, ti tani ti ti da bindira.”

8Yisifu daa n baŋŋi o beya maa nene, ama ba wune daa n bi lee n baŋŋi u. 9Niŋi n na, o teesi o zaasima yi ba pelli, ka yeli ba, “Ya niŋini daatiriba, ya tani kpe, ya ti daari paaligaa, a nye seela ti pugirisim n be.” 10Ba yeli u, “Akai, ti yidaana, pa lala n na, e gurunsi tani, ti ti da bindira. 11Ti zaa niŋini mabiluŋko, dabluŋko biisi, ti niŋini nivumansi, ti bi niŋi daatiriba.”

12Yisifu yeli ba, “Akai, ya tani ya ti daari ti paaligaa, seela ti pugirisim n be.” 13Ba yeli u, “Tirima, e gurunsi, ti zaa daa n bani pii ni bayi, dabluŋko biisi, ka o zi Keenan tiŋgbaŋŋu niŋi, ti luŋko lee n ka niŋi, ka ti bibila daana mi ba ti ba saani.” 14Yisifu yeli ba, “Wune n na ma si n yeli ya la, ya niŋini daatiriba. 15N ŋa n na ma ya n niŋi ya yatoga ŋa nyaasi, a baŋŋi ya yamonsi. M pe Yijipiti naaba nyevuri maa, ya ki yi Yijipiti, ama ya sunzo la gba tani kpe. 16A zu, ya tumi ya yinni, o wa ti mari ya sunzo maa ta, ama, ba ni yo ya seesi n che la dii, lala jemani, ya yatoga puu n na, ti ni naa n baŋŋi maa yamonsi n na ya yetira. Ama, ka lala bi niŋi, a yi naaba maa nyevuri zu, ya niŋini daatiriba.”

17Niŋi n na, Yisifu ti ba yo ba dii dabaa ata. 18Dabaa ata maa daari, Yisifu daa yeli ba, “M niŋini Naawunni zora, ya niŋi seema ni ya n wusiya ŋa, ka nye ya zu. 19Ka ya niŋi yamonsi diriba, ya ti ya luŋko, o na ba diyoorigaa puwa, ka ya seesi n che la, ya naa chi pori n wa ti ti ya yidima, kom n kuura la. 20Ama, ya mari ya sunzobila la ti ti ma. N ŋa ni wusi maa yamonsi ba ya yatoga puwa. Lala jemani, ya ki kpi.” Ba sagi.

21Ba yeli taaba, “O doni soori maa yaso ti n daa n niŋi ti sunzo Yisifu la zu n na, ti nye n ŋa tubidarigirisim la. Ti daa n nye nimbirimoso n daa n paag u, o suusi ti, ni ti cheli u, ka ti zagsi, lala nimbirimoo n paa ti gba la.” 22Ka Rubin boosi ba, “M daa n bi yeli ya, ni ya da pa ti niŋi biyaa sen, ka ya zagsi? To, bunso ti n daa n niŋi u la, o zeem maa samini n yoora ti la.” 23Ba daa bi baŋŋi maa Yisifu wumini ba yatoga la, a kpali, nira n daa n loobira ba yatoga maa tiri u.

24Ba n daa n togsira, Yisifu gaa seela kumi, ka n lee n loobi n ti togsi ba saani. O daa n ti ni ba gbaa Simiyon yi ba puwa, a le u, ba zaa nufu niŋi.

Yisifu beya pori n gaa Keenan

25Yisifu ti ba niŋi chi niŋi o beya bowatesi niŋi, ka pori ba ligiri niŋi ba bowatesi puusi, ka lee n ti ba soori puu bindira. O n niŋi ba n ŋa baasi, 26ba kaasi ba ziiri pa ba buŋsi niŋi, a gbaa soori. 27Ba n wa ti paa seela ba n ya n do n kaa bee, yindaana lerigi o bowate, ka o niŋi bindira ti o buŋŋu, ka nye o ligiri n pa saa. 28O yeli o mabiisi la, “Ba pori m ligiri la niŋi ma, ŋarima n ba m bowate puu la.” Dabeem gbaa ba, ba niŋa ŋme taaba niŋi, ka ba boosi, “Bo yela n na Naawunni niŋi ti ŋa?”

29Ba n ta ba ba Yakubu saani yi Keenan paaligu, ba yeli u yatogso zaa n paa ba, ba yeli, 30“Dabso n niŋi paaligu maa kpeema maa togsi ti halibee yatoga ga, ka niŋi ti maa ti n niŋi daatiriba yi paaligu maa niŋi. 31Ama, ti yeli u maa, ti bi niŋi daatiriba, ti niŋini jilima dima. 32Ka yeli u, ti daa n bani pii ni bayi, dabluŋko biisi, yindaana lee n ka niŋi, ka ti bibila daana ba ti ba saani yi Keenan. 33Niŋi n na, dabso n niŋi Kpeema yi paaligu maa yeli ti, ‘N ŋa n na ma ni baŋŋi maa ya niŋini jilima niriba, ya ti ya yindaana o zi m saani, ka ya seesi n che la, ya naa chi la wara yiri, kom la zu. 34Ama, ya mari ya sunzobila la ta, lala m ni baŋŋi maa, ya bi niŋi daatiriba, ama jilima niriba, ka m pori ya mabii ti ya, ka ya dira yawu yi kpe.’”

35Ba n daa n kpaagira ba chi yi ba bowatesi puwa, ba zaa nye ni ba ligiri borosi n ba niŋi. Jemanso ba ni ba ba n nye ligiri borosi maa, dabeem gbaa ba. 36Ba ba Yakubu yeli ba, “Ya naa m biisi, ka che ma. Yisifu lee n ka, Simiyon gba ka, pimparaŋa, ya lee n ya n naa Benjamin gaari. Mani n na bunso zaa ziina!” 37Rubin yeli o ba, “Ka m si n bi mari u pori n ta, e ku m biduusi bayi ŋa. Naag u pobi m nuusi, m ni mari u pori n ta.” 38Ama Yakubu yeli u, “M biduwa ki pa ya zu gaa niŋi. O beeri kpiya, ka che o ko. Ka garidama ti gbaag u soori puwa, m zuaa peligini jaga, ya ni pi m ni sufusaaŋu.”

Currently Selected:

Piiligu 42: hag

Highlight

Copy