Piiligu 22

Seema Naawunni n daa n niŋi Ibrahim nyaasi n ŋa

1Jemanso n daa ti paa, Naawunni niŋi Ibrahim yeride nyaasi. A booli u yeli, “Ibrahim.” O sagi, “Mani n ŋa.” 2Niŋi n na, Naawunni yeli u, “Naag e biduluŋko, Yisaaka, so e n kpabira ga la, a gaa Moriya tiŋgbaŋŋu niŋi, a wa ti ku u, a kusi bugum, a nyisi sariga ti ma, a yi zo so ni ya n wusi i ŋa zu.”

3A n chee bee bogufiili, Ibrahim kpabi sariga daari pa o buŋŋu niŋi, ka mari o gurunsi bayi, a naa Yisaaka paasi, a wara seela Naawunni n wusi u la. 4A dabaata daari, cheni maa puwa, Ibrahim nyaasi yii wogila, ka nye seela n na maa. 5Niŋi n na, Ibrahim yeli o gurunsi maa, “Ya ni buŋaa, ya ba kpe, ka m ni biyaa ti gaa sunsuwaa niŋi, a wa ti puusi Naawunni, ka ta.”

6Ibrahim naa daari la ziili o bii Yisaaka, ka mi naa bugum ni suwa mari, ba bayi maa naa n wara. 7Yisaaka booli Ibrahim, “M ba.” O ba sagi, “Mm.” O boosi u, “Ti mari bugum, a ni daari, ka peso ti n ya ku, a kusi u nyisi sariga maa ba ya?”

8Ibrahim yeli, “M biya, Naawunni ni ti ti sariga pee maa.” Niŋi n na, ba lee n gbaa ba soori wara. 9Ba n ti paa seela Naawunni ni wusi Ibrahim la, o maali sariga daaŋu, ka kaasi daari la pa o niŋi, ka gbaag o bii la, a le u pa sariga daaŋu maa niŋi. 10Ka voo suwa, o ku o bii maa. 11Niŋi n na, Naawunni malaaka goo yi saazu tasi n booli u yeli, “Ibrahim, Ibrahim.” O sagi, “Mani n ŋa.”

12Malaaka maa yeli, “Da pa siisi biyaa, a ti u daaŋu. Pimparaŋa m pa baŋŋi e n zora Naawunni, a ni wumintiibu, a kpali e naag e biluŋko nyisi sariga.”

13Ibrahim n wumi goo maa, o lalli o zu, ka nye pedaa siila n gari tipolli za. O gbaa pee maa nyisi sariga maa, ka che o bii la. 14Niŋi n na, Ibrahim digili nisaaniŋi yuuri “Duuma ni ti.” Halli zinni, niriba na yetirini, ni Naawunni zoo zu, o ni ti.

15Niŋi n na, Duuma malaaka goo lee n booli Ibrahim yi saazu buyi daana yeli, 16Duuma yeli, “A kpali, e n bi zagsi e n di naa e biluŋko nyisi sariga ti ma la zu, m pe m maŋŋa yuuri niŋi maa, 17nafa n na ma ni nafa i, e yaŋsi ni zoo maa ŋmeribiisi n ba saazu, a maa teeku noori tambisigu. E yaŋsi ni zabi n nyaŋŋi ba dindima. 18A kpali e ni wumi n ti ma la zu, durinye puu balisi zaa ni nye nafa, a yi e yaŋsi puwa.”

19Niŋi n na, Ibrahim loobi n we o gurunsi saani, ba zaa gaa Beesiiba, Ibrahim zi nisaaniŋi.

Naho yaŋsi yela

20Jemanso n daa ti paa, Ibrahim wumi ni o sunzo Naho poga Milika dogini biisi banii ti u. 21Wuz n daa niŋi wurikoŋ, a naa o sunzo Buz, Kemuwel so n daa dogi Aram. 22Keesi ni Hazo ni Pilidasi ni Jidalap a ni Betuwel. 23Betuwel n niŋi Rabeeka ba. Milika n dogi biduusi banii ŋa ti Ibrahim sunzo Naho.

24Naho pogibila so ba daa n boona Reema gba daa n dogi Teba ni Gaham ni Tahasi a ni Maaka.

Currently Selected:

Piiligu 22: hag

Highlight

Copy