مَرکاس 15
15
ایسّا و پیلاتوس
(مَتّا 27:1–2، 11–26؛ لوکا 23:1–7، 13–25؛ یوهَنّا 18:28–40)
1سَباها ماهلّه مزنێن دینی پێشوا و کئومئے کماش و شَریَتئے زانۆگر و سرۆکانی دیوانئے سجّهێن باسکان وتی شئور یَکّ کرت. ایسّااِش بَست و بُرت و پیلاتوسئے دستا دات. 2پیلاتوسا چه آییا جُست کرت: ”تئو یَهودیانی بادشاه ائے؟“ ایسّایا پَسّئو دات: ”تئو وت گوَشگا ائے.“ 3مزنێن دینی پێشوا آییئے سرا بازێن بُهتامے جنَگا اَتنت. 4پیلاتوسا پدا جُست کرت: ”پرچا پَسّئوَ ندئیئے؟ بچار، تئیی سرا چینچُک بُهتام جنَگا اَنت.“ 5ایسّایا هچّ پَسّئو ندات. پیلاتوس هئیران اَت.
6پیلاتوسا هر سال ائییدئے وهدا چه یَهودی بندیگان یکّے، هما که مردمان لۆٹتگت، آزاتَ کرت. 7بندیگانی تها بَرَبّاس نامێن مردے هستاَت. گۆن هما یاگیان گِرگ بوتگاَت که شۆرشئے وهدا کُشت و کۆشِش کرتگاَت. 8مردم پیلاتوسئے کِرّا آتکنت و دَزبندیاِش کرت که اَنچۆ که تئو هر وهدا کرتگ، اے رندی هم هما پئیما بکن. 9پیلاتوسا جُست کرت: ”شما لۆٹێت که یَهودیانی بادشاها په شما آزات بکنان؟“ 10آییا زانت که دینی پێشوایان په هَسَدّ ایسّا آییئے دستا داتگ. پمێشکا چُشی گوَشت. 11بله مزنێن دینی پێشوایان مردم شۆرێنتنت که چه پیلاتوسا، ایسّائے بدلا بَرَبّاسئے آزاتیا بلۆٹێت. 12پیلاتوسا پدا جُست کرت: ”گڑا اے مردا که شما یَهودیانی بادشاهَ گوَشێت، اِشیا چۆن بکنان؟“ 13مردمان کوکّار کرت: ”سَلیبی کَشّ!“ 14پیلاتوسا جُست کرت: ”چێا بارێن؟ مئیاری چے اِنت؟“ بله آیان گێشتر کوکّار کرت: ”سَلیبی کَشّ!“ 15گڑا پیلاتوسا بَرَبّاس آزات کرت و ایسّا شلّاک و هئیزران جناێنت و داتی که سَلیب کشّگ ببیت، چێا که آییا لۆٹت که مردم چه من رَزا ببنت.
سپاهیگ ایسّایا کلاگَ زورنت
(مَتّا 27:27–31؛ یوهَنّا 19:1–3)
16سپاهیگان ایسّا والیئے کلاتئے پێشگاها برت و سجّهێن لشکرِش لۆٹاێنت و مُچّ کرت. 17آیان جَمورنگێن#15:17 جَمو، رنگے که پارسیا بنفش و اردوا بنفشی گوَشنتی. کَباهے ایسّائے گوَرا دات و چه ڈنگر و کُنٹگان تاجے اَڈّ کرت و آییئے سرا دات. 18سلامِشَ دات و گوَشتِش: ”سلام و درۆت، او یَهودیانی بادشاه!“ 19سرا لَٹّ و جندا تُکِّشَ جت و سُجدهاِشَ کرت. 20وهدے کَلاگ بندَگِش بسّ کرت، گوَرئے جَمورنگێن کَباهِش کَشّت و آییئے جندئے گُدِش پدا گوَرا داتنت. رندا، په سَلیب کَشّگا برتِش.
ایسّایا سَلیبَ کشّنت
(مَتّا 27:32–44؛ لوکا 23:26–43؛ یوهَنّا 19:17–27)
21کِرینیئے شهرئے#15:21 کِرینیئے شهر اَنّوگێن زمانگئے لیبیائے مُلکا اِنت. شَمون نامێن مردے که سِکندَر و روپُسئے پت اَت، چه ڈگاران پێداک اَت. سپاهیگان په بیگاری گپت و ایسّائے سَلیبِش شَمونئے بَڈّا دات. 22ایسّااِش هما جاگها آورت که نامی ”جُلْجُتا“ اِنت بزان ”کامپۆلئے جاگه“. 23مُرّ مان کرتگێن شرابِش دات بله ایسّایا نئوارتنت. 24گڑا سَلیبِش کَشّت و په لاٹری و کُرَهکشّی#15:24 لاٹری و کُرَهکشّی بزان چِک و پُشت، تَرّ و هُشک. پُچِّش وتمانوتا بهر کرتنت که بارێن کئیا چے رسیت.
25سُهبئے نُه اَت#15:25 اَسلیگێن یونانی نبشتانکَ گوَشیت: ”سئیمی ساهت“، بزان ساهت نُها. یَهودیانی رۆچئے هساب، ساهت سُهبئے شَشا بُنگێجَ بوت. که ایسّااِش سَلیب کَشّت. 26مئیارنامگئے#15:26 مئیارنامگ، بزان نبشته کرتگێن مئیار. سرا آییئے مئیار اے پئیما نبشتگاَت: ”یَهودیانی بادشاه.“ 27ایسّائے همراهیا دو ڈُنگِش هم سَلیب کشّت، یکّے آییئے راستێن کشا و دومی چَپّێنا. 28اے ڈئولا، پاکێن کتابئے هما پێشگۆیی راست و سَرجم بوت که گوَشیت: آ مان گُنهکاران هساب کنگ بوت.#15:28 اِشئیا نبیئے کتاب 53:12. لهتێن دَزنبشتا بَند 28 نێست. 29رهگوَزان دژمان دات، وتی سرِش چَنڈێنت و گوَشتِش: ”هان بارێن! تئو گوَشت که مزنێن پرستشگاها کرۆجان و سئے رۆچا پدا اڈّیَ کنان، 30نون وتا برَکّێن و چه سَلیبا اێر آ.“
31همے پئیما مزنێن دینی پێشوا و شَریَتئے زانۆگر وتمانوتا ایسّائے بارئوا په کلاگ و ریشکند گوَشگا اَتنت: ”آ دگه مردمی رَکّێنتنت، بله وتا رَکّێنتَ نکنت. 32اِسراییلئے بادشاه مَسیه نون چه سَلیبا اێر بکپیت که ما بگندێن و باور بکنێن.“ آ دوێن که گۆن ایسّایا سلیب کَشّگ بوتنت، آ هم ایسّایا بَد و رَد گوَشگا اَتنت.
ایسّائے مَرک
(مَتّا 27:45–56؛ لوکا 23:44–49؛ یوهَنّا 19:28–30)
33نێمرۆچا سجّهێن مُلکا تهاریا مان شانت و اے تهاریا تان بێگاهئے ساهت سئیا#15:33 اَسلیگێن یونانی نبشتانکَ گوَشیت: ”ششمی ساهتا بگر تان نُهمی ساهتا“، بزان مرۆچیگێن ساهتانی هسابا، نێمرۆچئے دوازدها بگر تان بێگاهئے سئیا. داشت. 34ساهت سئیا،#15:34 اَسلیگێن یونانی نبشتانکَ گوَشیت: ”نُهمی ساهتا“. ایسّایا کوکّار کرت: ”اِلویی، اِلویی، لِما سَبَکْتَنی؟“ بزان: او منی هُدا، او منی هُدا! تئو چێا منا یله دات؟#15:34 زَبور 22:1. 35اۆدا نزّیکّا اۆشتاتگێن لهتێن مردما که اِشکت، گوَشتِش: ”بچارێت، اِلیاسا تئوار کنگا اِنت.“ 36چه آیان یکّے تچانا شت، اِسْپنجے زرت و تْرُپشێن شرابا میسّێنتی. اِسْپنجی دارێئے سرا بست و په چوسّگا ایسّائے نێمگا شهارت و گوَشتی: ”سَبر کنێت، چارێن بارێن اِلیاس اِشیئے جهلا اێر کنگا کئیت یا نه؟“ 37گڑا، ایسّایا پریاتے جت و ساهی دات. 38همے وهدا مزنێن پرستشگاهئے پرده سرا بگر تان بُنا دِرت و دو نێم بوت. 39هما پئوجی اَپسر که ایسّائے دێم په دێما اۆشتاتگاَت، وهدے دیستی که ایسّایا چۆن ساه دات، گوَشتی: ”بێشکّ اے مرد هُدائے چُکّ اَت.“
40لهتێن جنێن دور اۆشتاتگ و چارگا اَت. مَریَم مَگدَلینی، کَسترێن آکوب و یوشائے مات مَریَم و سالومه هم گۆن اَتنت. 41وهدے ایسّا جَلیلا اَت، اے جنێن آییئے همراه اَتنت و آییئے هئیالداریاِشَ کرت. اَبێد چه اِشان دگه بازێن جنێنے هم همۆدا اَت که آییئے همراهیا اورشَلیما آتکگاَتنت.
ایسّائے کَبر و کَپن
(مَتّا 27:57–61؛ لوکا 23:50–56؛ یوهَنّا 19:38–42)
42جُمَهئے رۆچ اَت و مردم شَبَّتئے تئیاریا کنگا اَتنت. شپ که بوت 43ایسُّپ نامێن مردے که اَریماتیائے شهرئے نندۆک و سرۆکانی دیوانئے شرپمندێن باسکے اَت و وت هم هُدائے بادشاهیئے وداریگ#15:43 وداریگ، بزان رهچار، انتزار کنۆک. اَت، پیلاتوسئے کِرّا شت و په نَتُرسی دزبندیای کرت که ایسّائے جۆنا منا بدئے.
44پیلاتوس هئیران بوت که ایسّا دمانا مُرتگ. پئوجی اَپسری لۆٹاێنت و جُستی کرت که بارێن ایسّایا ساه داتگ یا نه؟ 45پئوجی اَپسرئے سجّهێن هال و هبرانی اِشکنگا رَند، پیلاتوسا ایسّائے جۆن ایسُّپارا دات. 46ایسُّپا لیلُمێن گُدے بها زُرت، ایسّائے جۆنی چه سَلیبا اێر گێتک و همے گُدئے تها پَتات و کَبرێئے تها اێری کرت که کۆهێئے تها جنَگ بوتگاَت. پدا ڈۆکے لێٹی دات و کَبرئے دپا داتی. 47مَریَم مَگدَلینی و یوشائے مات مَریَم، هر دوێنان دیست که ایسّااِش کجا کَلّ کرت.
Currently Selected:
مَرکاس 15: HPKB
Highlight
Share
Copy

Want to have your highlights saved across all your devices? Sign up or sign in
© 2016-22 Wycliffe Bible Translators, Inc.