مَرکاس 11

په ایسّائے وشّاتکا

(مَتّا 21‏:1‏–11؛ لوکا 19‏:28‏–40؛ یوهَنّا 12‏:12‏–19)

1وهدے اورشَلیمئے نزّیکّا، زئیتونئے کۆهئے دامُنا بئیت‌پاجی و بئیت‌اَنیائے مێتگان رَستنت، گڑا ایسّایا دو مرید رئوان دات و 2گوَشتی: ”دێمی مێتگا برئوێت. اَنچُش که اۆدا رَسێت، کُرّگێن هَرے گندێت که بستگ. آ کُرّگا اَنگت هچکَس سوار نبوتگ. آییا بۆجێت و اِدا بیارێت. 3اگن کَسێا جُست کرت که ’شما چے کنگا اێت،‘ بگوَشێت که ’واجها اے کُرّگ پکار اِنت و پدا زوتّ پِریَ تَرّێنیت.‘“ 4گڑا دوێن مرید شتنت و کُرّگے دیستِش که دَروازگئے دپا بستگ‌اَت. بۆتکِش. 5چه اۆدا اۆشتاتگێن مردمان لهتێنا جُست کرت: ”شما چے کنگا اێت؟ په چے اے کُرّگا بۆجێت؟“ 6اَنچُش که ایسّایا سۆج داتگ‌اَتنت، آیان هما داب گوَشت. گڑا، داتِش. 7کُرّگِش ایسّائے کِرّا آورت و وتی شال و چادرِش آییئے پُشتا اێر کرتنت و ایسّا سوار بوت. 8بازێنێا ایسّائے وشّاتک کنگا، آییئے راهئے سرا وتی شال و چادر چێرگێجان کرتنت. دگه بازێنێا، چه مَچکدگ و ڈگاران درچکانی ٹال و تاک بُرِّت و راهئے سرا اێر کرت. 9ایسّائے پێش‌رُمب و پدرُمبێن مردم، کوکّار کنانا گوَشگا اَتنت:

”هوشیانا،#11‏:9 هوشیانا، بزان ”مارا انّون برَکّێن“.

مبارک بات هما که په هُداوندئے ناما کئیت!#11‏:9 زَبور 118‏:26.

10شُگر اِنت که مئے بُنپیرُک داوودئے بادشاهی پدا برجاه دارگَ بیت.

هوشیانا، بُرزێن اَرشا!“

11گڑا ایسّا اورشَلیما آتک و مزنێن پرستشگاها شت. اۆدا، آییا پرستشگاهئے چارێن کُنڈانی هر چیزّ چارت. بله بێوهد اَت، پمێشکا گۆن وتی دوازدهێن مریدان بئیت‌اَنیایا شت.

اِنجیرئے درچکئے هُشک بئیگ

(مَتّا 21‏:18‏–19)

12دومی رۆچا، وهدے ایسّا و آییئے مرید چه بئیت‌اَنیایا در کپتنت، راها ایسّا شدیگ بوت. 13آییا چه دورا اِنجیرئے درچکے دیست که تاکی سبز و بَز اَتنت. درچکئے نزّیکّا شت تان بگندیت بارێن بَر اِنت یا نه. بله وهدے رَست، اَبێد چه تاکا دگه هچّی ندیست، چێا که اِنجیرئے بَرئے مۆسم نه‌اَت.#11‏:13 اِنجیرئے بێمۆسمێن بَرے هم هست که آییا سُهئیلیگَ گوَشنت و شدیگێن مردم گێشتر آییا ورنت. اِدا، په ایسّائے مَنّگا اورشَلیمئے تئیار نبئیگ، بێبَرێن اِنجیرئے درچکئے تابیرے. اورشَلیم هم، اے اِنجیرئے درچکئے ڈئولا، سال 70 میلادیا بێران و تباه بوت. 14گڑا گۆن درچکا گوَشتی: ”چه اِد و رَند، هچکَس چه تئو بَرے مئوَرات.“ اے هبر مریدان اِشکت.

چه مزنێن پرستشگاها سئوداگرانی در کنگ

(مَتّا 21‏:12‏–17؛ لوکا 19‏:45‏–48؛ یوهَنّا 2‏:13‏–22)

15اَنچُش که اورشَلیما سر بوتنت، ایسّا مزنێن پرستشگاهئے پێشگاها#11‏:15 پێشگاه، بزان پێشجاه، پێژگاه، لۆگئے چاردیوال، سَهن. شت و اۆدا سئوداگر و گْراکانی#11‏:15 گْراک، بزان آ که سئودا زوریت. اَربی و پارسیا ”مشتری، خریدار“. گلّێنگ و در کنگا گُلاێش بوت. زَرّ بدل کنۆکێن سَرّاپانی ٹێبَلی چپّی کرتنت و کپۆت بها کنۆکانی کُرسی و تَهتگی دئور داتنت. 16مزنێن پرستشگاهئے پێشگاها، تاجرانا مالئے برگ و آرگی هم نه‌اِشت. 17مردمی تالیم داتنت و گوَشتی: ”زانا، هُدائے کتابا نبیسگ نبوتگ: منی لۆگ سجّهێن کئومانی دْوا و پرستشئے جاگه ببیت،#11‏:17 اِشئیا نبیئے کتاب 56‏:7. بله شما دُزّبازارے کرتگ.“ 18وهدے مزنێن دینی پێشوا و شَریَتئے زانۆگران اے هبر اِشکت، آییئے کُشگئے جُهدِش کرت. بله تُرستِش، چێا که سجّهێن مردم چه ایسّائے تالیمان هئیران و هبکّه اَتنت. 19بێگاه که بوت، ایسّا و آییئے مرید چه شهرا در کپتنت.

اِنجیرئے درچکئے اِبرت

(مَتّا 21‏:20‏–22)

20دومی سُهبا، راها هما اِنجیرئے درچکِش دیست که نون چه بُنا هُشک بوتگ‌اَت. 21پِتْرُس، ایسّائے پێسریگێن هبرئے یاتا کپت و گوَشتی: ”واجه! بچار، اے درچک که تئو بددْوایی کرت گیمُّرتگ.“ 22ایسّایا پَسّئو دات: ”هُدائے سرا باور کنێت، 23شمارا راستێنَ گوَشان، اگن کَسێا سِتک و باور ببیت و اے کۆها بگوَشیت: ’وتا چه اِدا چست کن و دریائے تها دئور بدئے‘ و وتی گوَشتگێن هبرئے سرا دلا شکّ مئیاریت و باور بکنت، آ وهدی په آییا اَنچُشَ بیت. 24پمێشکا شمارا گوَشان، هرچے که وتی دْوایانی تها لۆٹێت، باور کنێت که شمارا رسِتگ و شمارا دئیگَ بیت. 25هر وهدا که په دْوایا اۆشتێت، اگن شمارا گۆن یکّێا گِلَگے هست، وتی دْوائے تها آییا ببَکشێت تانکه شمئے آسمانی پت هم، شمئے گناه و مئیاران ببَکشیت. 26بله اگن شما مبکشێت، شمئے آسمانی پت هم شمئے گناه و مئیارانَ نبکشیت.“#11‏:26 لهتێن دَزنبشتا، بَند 26 نێست.

ایسّائے واک و اِهتیار

(مَتّا 21‏:23‏–27؛ لوکا 20‏:1‏–8)

27ایسّا و آییئے مرید، پدا اورشَلیما آتکنت. اَنچُش که ایسّا مزنێن پرستشگاهئے پێشگاها گام جنَگا اَت، مزنێن دینی پێشوا، شَریَتئے زانۆگر و کئومئے کماش آییئے کِرّا آتکنت. 28جُستِش کرت: ”تئو گۆن کجام هَکّ و اِهتیارا اے کارانَ کنئے؟ کئیا ترا اے کارانی کنگئے اِهتیار داتگ؟“ 29ایسّایا پَسّئو دات و گوَشت: ”منا هم چه شما جُستے هست، منی پَسّئوا بدئیێت، تان من هم شمارا بگوَشان که گۆن کجام هَکّ و اِهتیارا اے کارانَ کنان. 30یَهیایا پاکشۆدی دئیگئے اِهتیار، چه آسمانا رَستگ‌اَت یا چه انسانئے نێمگا؟ پَسّئو بدئیێت!“ 31آیان وت‌مان‌وتا شئور و سَلاه کرت و گوَشتِش: ”اگن بگوَشێن چه آسمانا اَت، گڑا گوَشیت: ’په چے آییئے سرا ایمانۆ نئیاورت؟‘ 32اگن بگوَشێن چه انسانئے نێمگا اَت...؟“ اے هبرِش دێما نبرت چێا که آیان چه مردمان تُرست، په اے هاترا که مردم یَهیایا بَرهَکّێن نبیے هساب کنگا اَتنت. 33پمێشکا پَسّئوِش دات: ”ما نزانێن.“ ایسّایا گوَشت: ”گڑا من هم شمارا نگوَشان که گۆن کجام هَکّ و اِهتیارا اے کارانَ کنان.“

Currently Selected:

مَرکاس 11: HPKB

Highlight

Copy