مَتّا 25

ده نِشتگێن جنکّئے مِسال

1آ وهدا آسمانی بادشاهی، هما دَهێن نِشتگێن جنکّانی پئیما بیت که وتی چِراگِش زرتنت و سالۆنکئے پێشوازیا#25‏:1 پێشوازی، بزان مردمێئے دێما رئوگ و شرپ دئیگ. در آتکنت. 2چه آیان پنچ جنکّ نادان اَتنت و پنچ دانا. 3نادانێن جنکّان وتی چِراگ زرتنت بله گێشێن ٹێلِش نزرت گۆن. 4داناێن جنکّان چِراگان و اَبێد، ٹێلدانانی تها هم ٹێل زرت گۆن. 5سالۆنکا آیگا دێر کرت، گڑا آ سجّهێن کۆچَنڈگا لگّتنت و واب کپتنت.

6شپئے نێما کوکّار مَچِّت که ’بچارێت، سالۆنک پێداک اِنت. آییئے دێما در آێت.‘ 7گڑا آ سجّهێن جنکّ آگه بوتنت و وتی چِراگانی شَرّ کنگا لگِّتنت. 8نادانێن جنکّان گۆن داناێن جنکّان گوَشت: ’چه وتی ٹێلان کَمُّکے مارا بدئیێت، مئے چِراگ مِرَگی اَنت.‘ 9داناێن جنکّان پَسّئو دات: ’نه، بلکێن په ماشما سجّهێنان بَسّ مبنت، شما برئوێت چه دُکّانان ٹێل بزورێت.‘ 10بله وهدے آ ٹێلئے گِرگا شتگ‌اَتنت، سالۆنک آتک و رَست. هما جنکّ که تئیار اَتنت، سالۆنکئے همراهیا سورئے داوَتا شتنت و دروازگ بند بوت. 11رَندا اے دگه جنکّ هم آتکنت و گوَشتِش: ’واجه، او واجه! دروازگا په ما پَچ کن.‘ 12بله سالۆنکا پَسّئو تَرّێنت: ’شمارا راستێنَ گوَشان، من شمارا نزانان.‘

13پمێشکا هُژّار بێت چێا که شما نه آ رۆچا زانێت و نه آ ساهتا.

بادشاه و هِزمتکارانی مِسال

(لوکا 19‏:11‏–27)

14همے ڈئولا آسمانی بادشاهی هما مردئے پئیما اِنت که سپرێا شت. هِزمتکاری لۆٹاێنتنت و وتی مال و مَڈّی‌ای همایانی دستا داتنت. 15آییا هر هِزمتکارئے بود و توانئے کِساسا آییارا زَرّ دات، یکّێارا پنچ تالانت،#25‏:15 تالانت زرّے اَت. یکّ تالانتے، کساس بیست سالئے کارئے مُزّ بوتگ. دومیارا دو تالانت و سئیمیارا یکّ تالانتے داتی و وتی سپرا شت. 16هما هِزمتکارا که پنچ تالانت رَستگ‌اَت، مهتل نبوت و زَرّی کار و بارا جتنت و دگه پنچ تالانتی کٹّت#25‏:16 کَٹَّگ، بزان نپ و سوتّ کنگ، دستا آرگ.. 17همے پئیما، هماییا که دو تالانت رَستگ‌اَت، دگه دو تالانتی کٹّت. 18بله هماییا که یکّ تالانتے رَستگ‌اَت، آ شت و زمینا کَلّے جتی و واجهئے زَرّی چێر داتنت.

19بازێن وهدێا رَند هِزمتکارانی واجه آتک و چه آیان هسابی لۆٹت. 20هماییا که پنچ تالانت رَستگ‌اَت، دگه پنچ تالانتی آورت و گوَشتی: ’او واجه! تئو منا پنچ تالانت داتگ‌اَت، بچار، من دگه پنچ تالانت کَٹِّتگ.‘ 21واجها گوَشت: ’شاباش، او شرّ و وپادارێن هزمتکار! تئو گۆن کَمُّکا تچک و راست بوتگئے، نون من تئیی زِمّها باز چیزَّ دئیان، بیا منی شاتکامیا گۆن بئے.‘ 22هما که دو تالانتی رَستگ‌اَت هم آتک و گوَشتی: ’او واجه! تئو منا دو تالانت داتگ‌اَت، بچار، من دگه دو تالانت کَٹِّتگ.‘ 23آییئے واجها گوَشت: ’شاباش، او شَرّ و وپادارێن هِزمتکار! تئو گۆن کَمُّکا تچک و راست بوتگئے، من تئیی زمّها باز چیزّ دئیان، بیا منی شاتکامیا گۆن بئے.‘

24رندا هما هِزمتکار آتک که آییا یکّ تالانتے رَسِتگ‌اَت، گوَشتی: ’او واجه! من زانتگ که تئو تْرندێن مردے ائے، هما که تئو نکِشتگ‌اَنت، آیانَ رُنئے و چه همۆدا مُچَّ کنئے و برئے که تئو تُهمی دانگے نچَنڈِتگ. 25پمێشکا چه تُرسا من شتان و تئیی داتگێن تالانت زمینا کلّ کرت، اِش اِنت تئیی زَرّ.‘ 26آییئے واجها پَسّئو دات: ’او سِلّ و جاندُزّێن#25‏:26 جاندُزّ، بزان تَمبَل. هِزمتکار! وهدے تئو زانت که من نکِشتگێنَ رُنان و چه همۆدا مُچَّ کنان و بران که من تُهمی دانگے نچَنڈِتگ، 27گڑا باید اِنت تئو منی داتگێن زَرّ تاجرانی کِرّا اێر بکرتێننت تانکه چه سَپرا پِر ترّگا رند من وتی زَرّ و زَرّانی سوتّ بزُرتێننت. 28پمێشکا تالانتا چه اِشیا پَچ گرێت و هماییا بدئیێت که آییئے کِرّا ده تالانت هست. 29چێا که هرکَسا هست، آییا گێشتر دئیگَ بیت که مالامال ببیت، بله هرکَسا که نێست، هرچے که هستی هم چه آییا پَچ گِرگَ بیت. 30اے بێکارێن هِزمتکارا ڈنّا تَهاریا دئور بدئیێت. اۆدا گرێوَگ و پریات و زاریَ بیت.‘

انسانئے چُکّئے اِنساپ

31وهدے انسانئے چُکّ گۆن وتی شان و مَڑاها پرێشتگانی همراهیا کئیت، گڑا وتی پرشئوکتێن تَهتئے سرا نندیت. 32سجّهێن کئومانی مردم آرگ و بادشاهئے دێما یکجاه کنگَ بنت و آ، آیان اَنچُشَ گیشّێنیت و دو بهرَ کنت که شپانک وتی مێشان چه بُزان جِتا کنت. 33مێشان وتی راستێن نێمگا کنت و بُزان چَپّێن نێمگا.

34گڑا بادشاه گۆن آیان که راستێن نێمگا اَنت، گوَشیت: ’او بَهتاوران که شمارا چه منی پتا برکت رَستگ! اے بادشاهی که چه دنیائے بِنداتا په شما تئیار کنگ بوتگ، بیاێت و اِشیا وتی میراس بکنێت. 35چێا که من شدیگ اَتان و شما منا ورگ دات، تُنّیگ اَتان و شما منا آپ دات، درپَدَر اَتان و شما منا جاگه دات، 36جاندَر اَتان و شما منا پۆشاک گوَرا دات، نادْراه اَتان و شما منی هئیالداری کرت، بَندیگ اَتان و شما منی چارگا آتکێت.‘ 37گڑا نێک‌کار چه بادشاها جُستَ کننت: ’او واجه! ما کدی دیستگ که تئو شدیگ ائے و ما ترا ورگ داتگ، تئو تُنّیگ ائے و ما ترا آپ داتگ؟ 38ما کدی ترا دَرپَدَر دیستگ و جاگه داتگ یا جاندرا دیستگ و پۆشاک گوَرا داتگ؟ 39ما کدی دیستگ که تئو نادْراه ائے یا بَندیگ ائے و تئیی چارَگا آتکگێن؟‘ 40بادشاه پسّئوَ دنت: ’شمارا راستێنَ گوَشان، هرچے که شما په منی یکّ کَستر کَسترێن براتێا کرتگ، بزان په من هم کرتگ.‘

41رندا گۆن همایان که چَپّێن نێمگا اَنت، گوَشیت: ’او نالَتیان! گُم بێت چه منی دێما و هما جمبورێن آسئے#25‏:41 جمبورێن آس، بزان هما آس که سکّ رۆک اِنت. نێمگا برئوێت که هچبرَ نمریت و په شئیتان و آییئے همراهان#25‏:41 اَسلیگێن یونانی نبشتانکَ گوَشیت: ”شئیتان و آییئے پرێشتگان“. رۆک کنگ بوتگ. 42چێا که من شدیگ اَتان و شما منا ورگ ندات، تُنّیگ اَتان و شما منا آپ ندات، 43درپَدَر اَتان و شما منا جاگه ندات، جاندر اَتان و شما منا پۆشاک گوَرا ندات، نادْراه و بَندیگ اَتان و شما منی هئیالداری نکرت.‘ 44گڑا آ هم جُستَ کننت: ’او واجه! ما کدی ترا شدیگ یا تُنّیگ یا دَرپَدَر یا جاندر یا نادْراه یا بَندیگ دیستگ و تئیی هِزمت نکرتگ؟‘ 45گڑا بادشاه آیان اے ڈئولا پَسّئوَ دنت: ’شمارا راستێنَ گوَشان، هرچے که شما په منی هچّ کَسترێنێا نکرتگ، بزان په من هم نکرتگ.‘ 46پمێشکا اے مردم دێم په اَبدمانێن سِزایا رئونت، بله نێک‌کارێن مردمان اَبدمانێن زِندَ رَسیت.“

Currently Selected:

مَتّا 25: HPKB

Highlight

Copy