مَتّا 16

آسمانی نشانیئے لۆٹگ

(مَرکاس 8‏:11‏–13؛ لوکا 12‏:54‏–56)

1 پَریسی و سَدوکیانی لهتێن مردم ایسّائے کِرّا په آییئے چَکّاسگا آتک و آسمانی نشانیے لۆٹتِش. 2بله ایسّایا پَسّئو دات: ”وهدے بێگاهَ بیت شما گوَشێت: ’بۆم و هئوا وشَّ بیت چێا که آسمانئے رَنگ سُهر اِنت.‘ 3سباها گوَشێت: ’مرۆچی توپّانَ بیت چێا که آسمانئے رَنگ مُج و هۆنچک اِنت.‘ اے پئیما آسمانئے رنگ و نشانیانی کِساس کنگا زانێت، بله زمانگ و وهدئے نشانیانی کِساس کنگا نزانێت. 4شِرّ و زِنهکارێن نَسل و پَدرێچ نشانیَ لۆٹیت، بله آیان یونُس نبیئے نشانیا اَبێد، دگه هچّ نشانیے دئیگَ نبیت.“ رَندا ایسّایا آ یله داتنت و شت.

پَریسی و سَدوکیانی بدێن هُمیر

(مَرکاس 8‏:14‏–21)

5وهدے مرید مَزَن‌گوَرمئے دومی پهناتا رَستنت زانتِش که نانِش شمُشتگ. 6ایسّایا گۆن آیان گوَشت: ”هُژّار بێت! چه پَریسی و سَدوکیانی هُمیرا پهرێز کنێت.“ 7گڑا آ وت‌مان‌وت هبر کنگا لگّتنت: ”واجه پمێشکا چُشَ گوَشیت که ما نان گۆن وت نئیاورتگ.“ 8ایسّایا زانت که چے گوَشگا اَنت، پمێشکا گوَشتی: ”او کَمباوران! چێا جێڑگا اێت که ’گۆن ما نان نێست،‘ 9اَنگت هچّ سرپد نبوتگێت؟! شما آ پنچێن نان شمُشتگ، که پنچ هزار مردما سێرا وارت و چه سر آتکگێن نگنان چُنت سَپْت پُرّ کرت؟ 10یا هما هپتێن نان که چار هزار مردما وارت و سێر کرت و شما چه سر آتکگێنان چُنت سَپْت پُرّ کرت؟ 11گڑا چۆن سَرکِچَ نئوَرێت که من گۆن شما نانانی بارئوا هبر نکرتگ؟ چه پَریسی و سَدوکیانی هُمیرا پهرێز کنێت.“ 12گڑا مرید سرپد بوتنت که آییا نگوَشتگ چه آرتێن هُمیرا پهرێز بکننت، چه پَریسی و سَدوکیانی تالیما وتا دور بدارنت.

پِتْرُسئے مَنَّگ و گواهی

(مَرکاس 8‏:27‏–30؛ لوکا 9‏:18‏–21)

13وهدے ایسّا کئیسَریَه پیلیپیئے سرڈگارا آتک، چه وتی مریدان جُستی کرت: ”مردم انسانئے چُکّئے بارئوا چے گوَشنت، من کئے آن؟“ 14آیان پَسّئو دات: ”لهتێنَ گوَشیت پاکشۆدۆکێن یَهیا ائے، لهتێنَ گوَشیت اِلیاس نبی ائے، دگه لهتێنَ گوَشیت اِرِمیا نبی ائے یا چه آ دگه نبیان یکّے.“ 15گڑا چه آیان جُستی کرت: ”شما وت منی بارئوا چے گوَشێت، من کئے آن؟“ 16شَمون پِتْرُسا پَسّئو دات: ”تئو مَسیه ائے، نمیرانێن هُدائے چُکّ.“ 17ایسّایا دَرّاێنت: ”او شَمون، او یونائے چُکّ! تئو بَهتاورے ائے، چێا که اے هبر انسانێا#16‏:17 اَسلیگێن یونانی نبشتانکَ گوَشیت: ”جِسم و هۆن“. په تئو زاهر و پَدّر نکرتگ، منی پت که آسمانا اِنت، آییا پَدّر کرتگ. 18ترا گوَشان: تئو پِتْرُس#16‏:18 یونانی زبانا، ”پِتْرائے“ مانا ”تَلار“ اِنت. ائے و اے تَلارئے سرا من وتی کِلیسائے بُنیاتا اێرَ کنان که مَرکئے زۆر#16‏:18 اَسلیگێن یونانی نبشتانکَ گوَشیت: ”مُردگانی جهانئے دروازگ“. آییا هچبر پرۆشَ ندنت و آییئے سرا سۆبێنَ نبیت. 19من آسمانی بادشاهیئے کلیتان ترا دئیان، زمینئے سرا هرچے که تئو مکنَ کنئے، آسمانا هم مکن کنگَ بیت، هرچے که زمینئے سرا تئو رئوا کنئے آسمانا هم رئوا کنگَ بیت.“ 20رَندا آییا وتی مرید پرمان کرتنت: ”هچکَسا مگوَشێت که من مَسیه آن.“

وتی مَرک و جاه جنَگئے#16‏:20 جاه جنَگ، بزان چه وتی جاها اَناگتێن پاد آیگ، اَربی و پارسیا ”قیام، رستاخیز“. بارئوا، ایسّائے پێشگۆیی

(مَرکاس 8‏:31‏–33)

21چه هما وهدا رَند ایسّا گۆن وتی مریدان په تچک و پَدّری هبر کنگا لگّت که ”اَلّما، باید اِنت اورشَلیما برئوان، چه کئومئے کماش، مزنێن دینی پێشوا و شَریَتئے زانۆگرانی دستا سکّی و سۆری بسگّان و کُشگ ببان و سئیمی رۆچا زندگ ببان و جاه بجنان.“ 22پِتْرُسا آ یکّ کِرّے کَشّت و په ایراز گوَشتی: ”او هُداوند! هُدا چُش مکنات. گۆن تئو هچبر اے پئیما نبیت.“ 23ایسّایا چَکّ تَرّێنت و گۆن پِتْرُسا گوَشتی: ”او شئیتان! چه منی دێما دور بئے. تئو منی راها بندگا ائے، تئیی هئیال هُدایی هئیالے نه‌اِنت، انسانی هئیالے.“

ایسّائے رَندگیری

(مَرکاس 8‏:34‏—9‏:1؛ لوکا 9‏:22‏–27)

24رَندا ایسّایا مرید لۆٹتنت و گوَشتی: ”اگن کَسے لۆٹیت منی رَندگیریا بکنت، باید اِنت وتی دِلئے سجّهێن لۆٹ و واهگان یله بدنت و په ساهئے نَدر کنگا، وتی جندئے سَلیبا بَڈّا بکنت و منی راها گام بجنت. 25چێا که، اگن کَسے وتی ساهئے رَکّێنگئے جُهدا بکنت، آییا باهێنیت، بله آ که وتی ساها په منیگیَ باهێنیت، آییا رَکّێنیت. 26اگن کَسێا سجّهێن دنیا برسیت، بله وتی ساها بباهێنیت، گڑا آ چۆنێن سۆبے بارت و چے کَٹِّتَ#16‏:26 کَٹَّگ، بزان نپ و سوتّ کنگ، دستا آرگ. کنت؟ مردم وتی ساها په چِه کیمّتے بها زُرتَ کنت؟

27 انسانئے چُکّ گۆن وتی پتئے مزنێن شان و مڑاها پرێشتگانی همراهیا کئیت، گڑا هرکَسا آییئے کرتگێن کارانی مُزّا دنت. 28شمارا راستێنَ گوَشان، اِدا لهتێن مردم اۆشتاتگ که تان آیانی دێما انسانئے چُکّئے بادشاهی زاهر مبیت، مَرکئے تاما نچَشنت.“

Currently Selected:

مَتّا 16: HPKB

Highlight

Copy