لوکا 3

پاکشۆدۆکێن یَهیائے کُلئو

(مَتّا 3‏:1‏–12؛ مَرکاس 1‏:1‏–8؛ یوهَنّا 1‏:19‏–28)

1رومئے بادشاه، تیبِریوس کئیسَرئے بادشاهیئے پانزدهمی سال اَت. هما رۆچان، پُنتیوس پیلاتوس، یَهودیَهئے والی اَت. هیرودیس، جَلیلئے هاکم اَت. هیرودیسئے برات پیلیپُس، اِتوریَه و تْراهونیتیسئے هاکم اَت و لیسانیاس، آبیلینیئے هاکم اَت. 2هَنّا و کئیاپا، آ وهدئے مسترێن دینی پێشوا اَتنت. هما رۆچان، هُدائے کُلئو گیابانا زَکرَیائے بَچّ، یَهیائے سرا آتک. 3یَهیا، اُردُنئے کئورئے دوێن پهناتان هر جاگهَ شت و هُدائے کُلئوی په مردمانَ رَسێنت و گوَشتی: ”چه وتی گناهان پشۆمان ببێت، تئوبه بکنێت و پاکشۆدی بکنێت که بَکشگَ بێت.“ 4اَنچُش که اے بارئوا اِشئیا نبیئے کتابا نبشته اِنت:

گیابانا، کَسے گْوانکَ جنت:

”هُداوندئے راها تئیار و

آییئے کِشکا راست و تچک بکنێت.

5 سجّهێن کَنڈ و دَرَگ # 3‏:5 دَرَگ، بزان وادی، گوَتر. پُرّ کنگَ بنت و

سجّهێن کۆه و جُمپ جَهل آرگَ بنت.

چپّ و چۆٹێن راه تچک کنگَ بنت و

سجّهێن سرکپ و اێرکپ همدَپ و هَملَسون کنگَ بنت.

6 جهانئے سجّهێن مردم چه هُدائے نێمگا

رَکّێنگ و رَستگاریَ گندنت.“ # 3‏:6 اِشئیا نبیئے کتاب 40‏:3‏–5‏؛ 52‏:10.

7وهدے مردم په پاکشۆدی کنگا آتک و مُچّ بوتنت، یَهیایا گۆن آیان گوَشت: ”او سْیَه‌مارزادگان! کئیا شمارا ڈاه#3‏:7 ڈاه، بزان هشدار، وارنینگ. داتگ و گوَشتگ که چه هُدائے آیۆکێن کَهر و گَزبا رَکّتَ کنێت؟! 8اَنچێن کار بکنێت چه آیان پَدّر ببیت که شما په دل چه وتی گناهان پشۆمان بوتگێت. وتی دلا پَهر مبندێت که ’ما اِبراهێمئے نَسل و اۆبادگ اێن.‘ من شمارا گوَشان که هُدا چه اے سِنگ و ڈۆکان هم، په اِبراهێما چُکّ و اۆبادگ پێدا کرتَ کنت. 9نون تَپَر تئیار اِنت درچکان چه بُنا بگُڈّیت و هر درچکے که شَرّێن بَرَ نئیاریت، گُڈّگ و آسا دئور دئیگَ بیت.“#3‏:9 همے پئیما هُدا مردمانی سِلّێن کارانی سِزا و پَدمُزّئے دئیگا تئیار اِنت. 10مردمان جُست کرت: ”گڑا ما چے بکنێن؟“ 11آییا پَسّئو دات: ”اگن کَسێا دو جامگ هست، یکّێا هما کَسا بدنت که آییا هچّ نێست و اگن کَسێئے کِرّا وَرد و وراک هست، آیان هم بهر بکنت.“

12 سُنگی # 3‏:12 سُنگ، بزان مالیات، ٹئیکس. و مالیاتگیر هم په پاکشۆدیا یَهیائے کِرّا آتکنت. جُستِش کرت: ”او استاد! ما چے بکنێن؟“ 13گڑا آییا گوَشت: ”چه گیشّێنتگێن کِساسا گێشتر مگرێت.“ 14سپاهیگان هم چه آییا جُست گپت: ”ما چے بکنێن؟“ پَسّئوی دات: ”په زۆر چه کَسێا زَرّ مگرێت و کَسێئے سرا درۆگێن تُهمت مجنێت. وتی مُزّئے سرا گُزران بکنێت.“

15مردم، هُدائے واده داتگێن رَکّێنۆکئے اِنتزار و وَدارا اَتنت، پمێشکا هئیالِشَ کرت که بلکێن یَهیا هما مَسیه اِنت؟ 16بله یَهیایا آ سجّهێن پَسّئو داتنت و گوَشتی: ”من شمارا تهنا گۆن آپا پاکشۆدیَ دئیان، بله یکّ اَنچێن کَسے آیگی اِنت که آ چه من زۆرمندتر اِنت و من آییئے کئوشبندانی بۆجگئے لاهک هم نه‌آن. آ شمارا گۆن هُدائے پاکێن روه و آسا پاکشۆدیَ دنت. 17آییا چه بوچّ و پُگان دانئے جتا کنگ و گیشّێنگا، هَنشۆنے#3‏:17 هَنشۆن، بزان دارے که په دان و پُگانی جتا کنگا کارمرزَ بیت. دستا اِنت. جۆهانا#3‏:17 جۆهان، بزان کِشارانی مُشگ و دانانی مُچّ کنگئے جاگه. پاک و سَلّهَ کنت و دانان اَمبارا اێرَ کنت، بله پُگ و پلاران اَنچُشَ سۆچیت که آسِش هچبرَ نمریت.“ 18یَهیایا، مردم دگه بازێن سر و سۆج و دِلبڈّی#3‏:18 دِلبڈّی، بزان تسلّا، اُمێتواری. هم داتنت و وشّێن مِستاگ، دئیان کرت.

19بله وهدے یَهیایا، جَلیلئے هاکم هیرودیس په اے هاترا سکّ مئیاریگ کرت که آییا گۆن وتی براتئے جَن هیرودیایا، ناراهێن نزّیکّی هست‌اَت و دگه بازێن رَدێن کاری هم کرتگ‌اَت،#3‏:19 شَریَتا جائز نه‌اِنت که کَسے گۆن وتی زندگێن براتئے جَنا سانگ و سور بکنت (بچار لاویان 18‏:16). 20هیرودیسا وتی گَندگێن کار گێش کرت و یَهیایی گپت و بندیگ کناێنت.

ایسّائے پاکشۆدی

(مَتّا 3‏:13‏–17؛ مَرکاس 1‏:9‏–11)

21وهدے یَهیا بازێن مردمان پاکشۆدی دئیگا اَت، آییا ایسّا هم پاکشۆدی دات. وهدے ایسّا دْوا کنگا اَت، هما وهدا آسمانئے دپ پَچ بوت و 22پاکێن روه، کپۆتێئے دْرۆشما#3‏:22 دْرۆشم، بزان شکل. آییئے سرا اێر نِشت و چه آسمانا تئوارے آتک که ”تئو منی دۆستێن بَچّ ائے، من چه تئو باز وشّ و رَزا آن.“

ایسّائے بێه و بُنیاد

(مَتّا 1‏:1‏–17)

23ایسّایا کمّ و گێش سی سال اَت که وتی کاری بُنگێج کرت. مردمانی هئیال اَت که ایسّا ایسُّپئے چُکّ اِنت. ایسُّپ هالیئے چُکّ اِنت و چه هالیا رَند: 24مَتّات، مَتّاتِ لاوی، لاویِ مَلکی، مَلکیِ یَنّا، یَنّایِ ایسُّپ، 25ایسُّپِ مَتّاتیا، مَتّاتیایِ آموس، آموسِ ناهوم، ناهومِ هَسْلی، هَسْلیِ نَجّای، 26نَجّایِ مَهَت، مَهَتِ مَتّاتیا، مَتّاتیایِ شِمی، شِمیِ ایسُّپ، ایسُّپِ یَهودا، 27یَهودایِ یوهَنان، یوهَنانِ ریسا، ریسایِ زِروبابِل، زِروبابِلِ شیالتیال، شیالتیالِ نیری، 28نیریِ مَلْکی، مَلْکیِ اَدّی، اَدّیِ کوسام، کوسامِ اِلمودام، اِلمودامِ اێر، 29اێرِ یوشا، یوشاِ اِلیازَر، اِلیازَرِ یوریم، یوریمِ مَتّات، مَتّاتِ لاوی، 30لاویِ شَمون، شَمونِ یَهودا، یَهودایِ ایسُّپ، ایسُّپِ یونان، یونانِ اِلیاکیم، 31اِلیاکیمِ مَلیا، مَلیایِ مینان، مینانِ مَتّاتا، مَتّاتایِ ناتان، ناتانِ داوود، 32داوودِ یَسّی، یَسّیِ اۆبئید، اۆبئیدِ بۆازّ، بۆازِّ سَلمون، سَلمونِ نَهْشون، 33نَهشونِ اَمیناداب، اَمینادابِ اَرَم، اَرَمِ هِسْرون، هِسْرونِ پارِس، پارِسِ یَهودا، 34یَهودایِ آکوب، آکوبِ اِساک، اِساکِ اِبراهێم، اِبراهێمِ تێراِ، تێراِ ناهۆر، 35ناهۆرِ سُروج، سُروجِ رئوو، رئووِ پالَج، پالَجِ آبێر، آبێرِ شالَه، 36شالَهِ کئینان، کئینانِ اَرْپَکْشاد، اَرْپَکْشادِ سام، سامِ نوه، نوهِ لَمێک، 37لَمێکِ مِتوشالَه، مِتوشالَهِ هَنوک، هَنوکِ یارِد، یارِدِ مَهَلالێل، مَهَلالێلِ کِنان، 38کِنانِ اێنۆش، اێنۆشِ سئیت، سئیتِ آدم، و آدم چه هُدائے نێمگا اِنت.

Currently Selected:

لوکا 3: HPKB

Highlight

Copy