یوهَنّا 12

مَریَم ایسّائے پادان اَترَ مُشیت

(مَتّا 26‏:6‏–13؛ مَرکاس 14‏:3‏–9)

1چه سَرگوَزئے ائییدا شَش رۆچ پێسر ایسّا بئیت‌اَنیایا شت که ایلازَرئے لۆگ همۆدا اَت، هما ایلازَر که ایسّایا چه مُردگان زِندگ کرتگ‌اَت. 2آیان په ایسّایا شامے جۆڑ کرت. مَرتا مهمانان آپ و تام کنگا اَت. چه پَرزۆنَگئے#12‏:2 پَرزۆنَگ، بزان سُپره. سرئے نِشتگێن مردمان یکّے ایلازَر اَت. 3نون مَریَما نێم تاسئے کِساسا#12‏:3 اَسلیگێن یونانی نبشتانکَ گوَشیت: ”یکّ لیترا“، بزان کِساس سئے سَد گِرام. هِندی سُمبلئے#12‏:3 سُمبُل، وشبۆێن پُلّے. زَگر#12‏:3 زَگر، بزان اَسیل، هالِس. و گران‌بهاێن اَتر آورت، ایسّائے پادانی سرا پِر رێتک و گۆن وتی مودان ایسّائے پادی هُشک کرتنت. لۆگئے سجّهێن کُنڈان اَترئے وشّێن بۆ تالان بوت.

4یَهودا اِسْکَریوتی چه ایسّائے مُریدان یکّے اَت و همے مرد اَت که رندترا ایسّایی درۆهِت و دژمنانی دستا دات. آییا گوَشت: 5”پرچا اے اَتر په سئے سَد دینارا#12‏:5 سئے سَد دینار کِساس یکّ سالێئے مُزّ اَت. بها کنگ نبوت و زرّ گریب و نێزگاران دئیگ نبوتنت؟“ 6آییا اے هبر په بَزّگێن مردمانی گَمواریا نگوَشت، پمێشکا گوَشتی که دُزّے اَت. کلیتدار#12‏:6 کلیتدار، بزان هَزانگئے هسابدار و سمبالۆک. آییئے جِند اَت و مُدام چه زَرتورَگا#12‏:6 زرتورگ، بزان هما پێلک یا تورگ که زرّی مانَ کننت. چیزّے په وتیَ زرت. 7ایسّایا گوَشت: ”مَریَمئے کارا کار مدار، آییا اے اَتر په منی کبر کنگئے تئیاریا اێر کرتگ‌اَتنت. 8گریب و نێزگار مُدام شمئے کِرّا اَنت، بله من هروهد شمئے کِرّا نه‌آن.“

9بازێن یَهودیے سهیگ بوت که ایسّا همِدا اِنت. مزنێن رُمبے آتک و مُچّ بوت. تهنا ایسّائے سئوَبا نئیاتکنت، ایلازَرئے چارگا هم آتکنت که ایسّایا زندگ کرتگ‌اَت. 10پمێشکا مزنێن دینی پێشوایان ایلازَرئے کُشگئے شئور هم کرت، 11چێا که آییئے سئوَبا بازێن یَهودیے آیانی رندگیریا یله دئیگ و ایسّائے سرا ایمان آرگا اَت.

په ایسّائے وشّاتکا

(مَتّا 21‏:1‏–11؛ مَرکاس 11‏:1‏–11؛ لوکا 19‏:28‏–40)

12اے دگه رۆچا، هما مزنێن رُمب که په ائییدا آتکگ‌اَت، وهدے اِشکُتِش که ایسّا اورشَلیمئے راها اِنت، 13گۆن مَچّانی سرسبزێن پیشّ و تَکان،#12‏:13 تَک، بزان مَچّئے تَرّێن لُٹّ که پیشّ پِر اِنتی. په ایسّائے پێشوازیا در آتکنت. کوکّارِشَ کرت:

”هوشیانا،#12‏:13 هوشیانا، بزان ”مارا انّون برَکّێن“.

مبارک اِنت هما که هُداوندئے ناما کئیت.#12‏:13 زبور 118‏:26.

اِسراییلئے بادشاها مبارک بات.“

14ایسّایا کُرّگێن هَرے در گێتک و سوار بوت، اَنچُش که هُدائے پاکێن کتابَ گوَشیت: 15”او سَهْیونئے جنکّ! متُرس. تئیی بادشاه کُرّگێن هَرێئے پُشتا نِشتگ و پێداک اِنت.“#12‏:15 زَکَریا نبیئے کتاب 9‏:9. سَهْیون یکّ کۆهے که اورشَلیمئے شهرئے بُنرِد اے کۆهئے سرا اێر کنگ بوتگ. سَهْیونئے جنکّ، بزان اورشَلیمئے مردم. 16ائولا اے چیزّانی مانا په مُریدان پکّا نه‌اَت، بله رَندا که ایسّائے شان و شئوکت زاهر بوت، مُرید یاتا کپتنت که اے چیزّ آییئے بارئوا نبیسگ بوتگ‌اَنت و مردمان هم گۆن آییا هما پئیما کرتگ. 17وهدے ایسّایا ایلازَر تئوار جت و چه کَبرا زِندگا در کرت، بازێنے همۆدا اَت. آیان اے چیزّانی بارئوا شاهدیَ دات. 18آ مزنێن رُمب پمێشکا ایسّائے پێشوازیا آتک که اِشکتگ‌اَتِش که ایسّایا اے مۆجزه و اَجَبَّتێن نشانی پێش داشتگ. 19گڑا پَریسیان گۆن یکدگرا گوَشت: ”بچارێت، ماشما هچّ کرت کنگا نه‌اێن، سجّهێن دنیا اِشیئے راها اِنت.“

ایسّا وتی مرکئے پێشگۆییا کنت

20هما مردم که ائییدا په پرستشا اورشَلیما آتکگ‌اَتنت، آیانی تها لهتێن یونانی هم مان اَت. 21اے یونانی پیلیپُسئے کِرّا آتکنت. پیلیپُس جَلیلئے شهر بئیت‌سئیدائے مردمے اَت. گۆن آییا گوَشتِش: ”واجه! ما لۆٹێن ایسّایا بگندێن.“ 22پیلیپُس شت و اے هبری گۆن اَنْدْریاسا کرت. آ دوێن شتنت و ایسّااِش هال دات. 23ایسّایا آیانی پَسّئوا گوَشت: ”آ وهد آتکگ که انسانئے چُکّئے شان و شئوکت زاهر کنگ ببیت. 24شمارا راستێنَ گوَشان، اگن گَندُمئے دانَگ هاکئے چێرا مرئوت و ممِریت، هچبر چه یکّ دانَگێا گێشترَ نبیت، بله اگن بمریت، بازێن دانَگے پێدا کنت. 25هرکَسا که وتی زِند دۆست اِنت، گاریَ دنت، و هرکَس که اے جهانا چه وتی زِندا سرَ گوَزیت، آ وتی زندا رَکّێنیت و اَبدمانَ کنت. 26اگن کَسے لۆٹیت منی هِزمتا بکنت، گڑا آ لازم منی رَندگیریا بکنت و هر جاه که منَ بان، منی هِزمتکار همۆدا گۆن من گۆنَ بیت. اگن کَسے منی هِزمتا کنت، منی پت آییا شرپدارَ کنت.

27انّون منی دل پرێشان اِنت، من چے بگوَشان؟ بارێن بگوَشان: ’او منی پت! منا چه اے دمان و ساهتا برَکّێن‘؟ نه، هبر اِش اِنت که منی آیگئے مُراد و مکسد همے دمان و ساهت بوتگ. 28او پت! وتی نامئے شان و شئوکتا زاهر کن.“ پدا تئوارے چه آسمانا آتک که گوَشتی: ”من وتی نامئے شان و شئوکت زاهر کرتگ و اَنگت هم زاهریَ کنان.“ 29مردمانی هما رُمب که اۆدا اۆشتاتگ‌اَت، گۆن اے تئوارئے اِشکُنگا گوَشتِش: ”اے گْرندئے تئوار اَت.“ دگه لهتێنا گوَشت: ”پرێشتگێا گۆن اِشیا هبر کرت.“ 30ایسّایا گوَشت: ”اے تئوار منی هاترا نئیاتک، شمئے هاترا آتک. 31نون اے جهانئے دادرسیئے وهد اِنت و جهانئے سردار شئیتان ڈنّا در کنگَ بیت. 32وهدے من چه زمینا چست کنگَ بان، سجّهێن مردمان وتی نێمگا کَشّان.“ 33گۆن اے هبرا ایسّایا پێشگۆیی کرت که من چۆنَ مِران.

34مردمان درّاێنت: ”شَریَت مارا گوَشیت که مَسیه تان اَبدَ مانیت. گڑا تئو چۆنَ گوَشئے که انسانئے چُکّ چست کنگَ بیت؟ انسانئے چُکّ کئے اِنت؟“ 35ایسّایا گوَشت: ”تهنا یکّ گوَنڈێن وهدێا رُژنایی گۆن شما گۆن اِنت. تان وهدے که رُژنایی گۆن شما گۆن اِنت، گام جنانا دێما برئوێت. چۆ مبیت که تهاری شمئے سرا بالادست ببیت. کَسے که تهاریا گامَ جنت، نزانت کجا رئوت. 36تانکه رُژن گۆن شما گۆن اِنت، رُژنئے سرا ایمان بیارێت که رُژنئے چُکّ ببێت.“ ایسّایا اے هبر کرتنت و چه آیانی کِرّا شت و چێر و اَندێم بوت.

یَهودیانی ناباوری

37ایسّایا آیانی دێما بازێن مۆجزه و اَجَبَّتێن نشانیے پێش داشتگ‌اَت، بله اَنگت آییئے سرا ایمانِش نئیاورت. 38اِشئیا نبیئے هبر همے پئیما راست و سَرجم بوت که آییا گوَشتگ‌اَت: ”او هُداوند! مئے کُلئو کئیا باور کرتگ و هُداوندئے واک و کدرت#12‏:38 اَسلیگێن یونانی نبشتانکَ گوَشیت: ”هُداوندئے دست“. په کئیا زاهر بوتگ؟“#12‏:38 اِشئیا نبیئے کتاب 53‏:1. 39گڑا آیان باور کرت نکرت، چێا که اِشئیایا دگه جاگهے هم گوَشتگ‌اَت:

40 ”آیانی چمّی کۆر و

دلی سنگ کرتگ‌اَنت

که گۆن چمّان مگندنت،

گۆن دلان سَرپد مبنت و

دێم په من پِر مترّنت.

اگن منی کِرّا بیاتکێننت،

من دْراه کرتگ‌اَتنت.“ # 12‏:40 اِشئیا نبیئے کتاب 6‏:9 و رَند.

41اِشئیایا ایسّائے شان و شئوکت دیست، پمێشکا آییئے بارئوا اے هبری کرت. 42اَنگت هم یَهودیانی بازێن سرۆکێا آییئے سرا ایمان آورت. بله چه همے تُرسا که پَریسی آیان چه کَنیسَها در مکننت، نامِشَ نگپت. 43چێا که آیان انسانئے داتگێن اِزَّت و سَتا چه هُدائے داتگێن اِزَّت و سَتایا دۆست‌تر اَت.

44پدا ایسّایا گۆن بُرزێن تئوارێا گوَشت: ”هرکَس که منی سرا ایمانَ کاریت، تهنا منی سرا نه، منی دێم دئیۆکئے سرا هم ایمانَ کاریت. 45هرکَس که منا گندیت، منی دێم دئیۆکا هم گندیت. 46رُژن من آن و اے جهانا پمێشکا آتکگان که هرکَس که منی سرا ایمان بیاریت تهارۆکیا ممانیت. 47بله اگن کَسے منی هبران بِشکنت و آیانی سرا کار مکنت، اَنگت هم من آییا مئیاربارَ نکنان. چێا که من په جهانئے مئیاریگ کنگا نئیاتکگان، په جهانئے رَکّێنگا آتکگان. 48البت په هما مردما که منا نمَنّیت و منی هبرانَ نَزوریت، دادرَسے هست که آییا مئیاریگ بکنت. هما هبر که من کرتگ‌اَنت، آهِرتئے رۆچا آییا مئیاریگَ کننت. 49چێا که من وتسرا هبر نکرتگ، هما پتا که منا رئوان داتگ، آییا هُکم داتگ که چے بگوَشان و چۆن هبر بکنان. 50منَ زانان که آییئے هُکم و پرمان اَبدمانێن زِند اِنت. اے هبران که منَ کنان، هما هبر اَنت که پتا منا گوَشتگ‌اَنت.“

Currently Selected:

یوهَنّا 12: HPKB

Highlight

Copy