پێدایش 46
46
آکوبَ لَڈّیت و مِسرا رئوت
1اِسراییل گۆن وتی سجّهێن مال و هستیا راه گپت. وهدے بێرشێبَها آتک و رست، په وتی پت اِساکئے هُدایا کُربانیگی نَدر کرتنت. 2هُدایا شپئے اِلهامێئے تها گۆن اِسراییلا هبر کرت. گوَشتی: ”آکوب! او آکوب!“ آییا پَسّئو دات: ”جی!“ 3هُدایا گوَشت: ”من هُدا آن، تئیی پتئے هُدا. مِسرئے رئوگا متُرس که من اۆدا چه تئو مزنێن کئومے اڈَّ کنان. 4من وت گۆن تئو مِسرا کایان و اَلّم ترا پدا کاران. و ایسُّپئے جند ترا دست و چَمَّ کنت#46:4 دست و چمّ کنگ، بزان مُردگئے دست و پادانی تچک کنگ و چمّانی نَزّ کنگ..“
5گڑا آکوب چه بێرشێبَها در کپت. اِسراییلئے چُکّان وتی پت آکوب و کَسانێن چُکّ و وتی جنێن هما اَسپ‌گاڑیان نادێنتنت که پِرئونا په آکوبئے آرَگا راه داتگ‌اَتنت. 6آکوبا وتی رمگ و گۆرُم و هما مال و مَڈّی که کَنهانا مُچّ کرتگ‌اَتنت، زرتنت و گۆن وتی سجّهێن اۆبادگان مِسرا شت. 7آکوبا وتی بَچّ و جنکّ و نماسگ، بزان وتی سجّهێن اۆبادگ مِسرا برتنت گۆن.
8اِسراییل، بزان آکوب که گۆن وتی اۆبادگان مِسرا شت، آییئے مَردێن‌چُکّانی نام اِش اَنت: روبِن، آکوبئے ائولی چُکّ اَت.
9روبِنئے مردێن‌چُکّ هَنوک و پَلّو و هِسرون و کَرْمی اَتنت.
10شَمونئے مردێن‌چُکّ یَموێل و یامین و اوهَد و یاکین و سۆهَر و شاوول اَتنت. شاوولئے مات کَنهانیے اَت.
11لاویئے مردێن‌چُکّ گِرشۆن و کُهات و مِراری اَتنت.
12یَهودائے مردێن‌چُکّ اێر و اۆنان و شێلا و پارِس و زارَه اَتنت. بله اێر و اۆنان کَنهانا مُرتگ‌اَتنت. پارِسئے مردێن‌چُکّ هِسرون و هامول اَتنت.
13ایسّاکارئے مردێن‌چُکّ تولا و پووا و یاشوب و شِمرون اَتنت.
14زِبولونئے مردێن‌چُکّ سِرِد و ایلون و یَهلێل اَتنت.
15آکوب و لیاهئے مردێن‌چُکّ همِش اَتنت که پَدّان‌اَرامئے مُلکا پێدا بوتگ‌اَتنت. آکوب و لیاهئے جنکّ دینَه هم همۆدا پێدا بوتگ‌اَت. آکوبئے اے بَچّ و جنکّ سَرجمیا سی و سئے اَتنت.
16جادئے مردێن‌چُکّ سَپیون و هَگّی و شونی و اِسبون و اِری و اَرۆدی و اَرێلی اَتنت.
17آشِرئے مردێن‌چُکّ یَمنا و یَشوا و یَشوی و بِریا اَتنت و اِشانی گهار سِرَه اَت. بِریائے مردێن‌چُکّ هِبِر و مَلکیێل اَتنت.
18آکوب و زِلپَهئے مردێن‌چُکّ همِش اَتنت که سَرجمیا شانزده اَتنت. زِلپَه هما مۆلد اَت که لابانا وتی جنکّ لیاهارا داتگ‌اَت.
19آکوب و آییئے جَن راهیلئے مردێن‌چُکّ ایسُّپ و بِنیامین اَتنت.
20ایسُّپئے چُکّ مَنَسی و اِپراێم مِسرئے مُلکا چه اَسِناتا پێدا بوتنت. اَسِنات پوتیپێرائے جنکّ اَت و پوتیپێرا اونئے شهرئے دینی پێشوا اَت.
21بِنیامینئے مردێن‌چُکّ بێلا و باکِر و اَشبیل و گیرا و نَهمان و اێهی و رُش و مُپّیم و هُپّیم و اَرْد اَتنت.
22آکوب و راهیلئے مَردێن‌چُکّ سَرجمیا چارده اَتنت.
23دانئے مردێن‌چُکّ هوشیم اَت.
24نَپتالیئے مردێن‌چُکّ یَهسئیل و گَنی و یاسِر و شیلِّم اَتنت.
25آکوب و بِلَّهئے چُکّ همِش اَتنت. اے سَرجمیا هپت اَتنت. بِلَّه هما مۆلِد اَت که لابانا وتی جنکّ راهیلارا داتگ‌اَت.
26اے سجّهێن مردم که گۆن آکوبا مِسرا شتنت و آییئے جندئے اۆبادگ اَتنت، اَبێد چه آییئے نِشاران شَست و شَش اَتنت.
27ایسُّپئے مردێن‌چُکّ که مِسرا پێدا بوتگ‌اَتنت، دو اَتنت. آکوب که مِسرا آتکگ‌اَت، آییئے هاندان سَرجمیا هپتاد مردم اَت.
آکوب و ایسُّپئے گِند و گِدار
28آکوبا چه وت و پێسر یَهودا ایسُّپئے کرّا راه دات که گۆشِنئے راها جُست بکنت. گڑا آکوب گۆن وتی مردمان گۆشِنئے دَمگا سر بوت. 29ایسُّپا وتی اَرّابه تئیار کناێنت و گۆشِنا، وتی پت اِسراییلئے چارگا شت. اَنچۆ که ایسُّپ پتئے کِرّا سر بوت، پتی گلاێش کرت و تان دێرا گرێتی. 30اِسراییلا گۆن ایسُّپا گوَشت: ”نون من په مِرَگا تئیار آن، چێا که گۆن وتی جندئے چمّان دیستُن که تئو زندگ ائے.“
31ایسُّپا گۆن وتی براتان و گۆن وتی پتئے لۆگئے مردمان گوَشت: ”منَ رئوان و پِرئونا هالَ دئیان. گوَشانی که منی برات و منی پتئے لۆگئے مردم که کَنهانئے مُلکا نِندۆک بوتگ‌اَنت، نون منی کرّا آتکگ‌اَنت. 32شپانک و مالدار#46:32 اِدا مالدار بزان هما مردم که رمَگ و گۆرُمِش هست. اَنت. وتی رمگ و گۆرُم و سجّهێن مال و هستی‌اِش آورتگ گۆن. 33و پدا پِرئون که شمارا لۆٹاێنیت و چه شما جُستَ کنت که ’شمئے کار و رۆزگار چے اِنت؟‘ 34شما بگوَشێت که ’تئیی کَستر چه کَسانیا شپانک و مالدار بوتگ‌اَنت، وتی پت و پیرُکانی پئیما.‘ گڑا شمارا اے اجازتَ رسیت که گۆشِنئے دَمگا جَهمنند ببێت که مِسریانی نِزّا سجّهێن شِپانک بَژّناکێن مردم اَنت.“
Currently Selected:
پێدایش 46: HPKB
Highlight
Share
Copy
Want to have your highlights saved across all your devices? Sign up or sign in
© 2016-22 Wycliffe Bible Translators, Inc.
