کاسِدانی کار 15

اورشَلیمئے دیوان

1چه یَهودیَها لهتێن مردم اَنْتاکیَها آتک و براتِش تالیم داتنت و گوَشتِش: ”تان وهدے شما موسّائے شَریَتئے رَندگیریا سُنّت و بُرُّک مکنێت، رَکّتَ نکنێت.“ 2پولُس و بارنابایا، اے سرهالئے سرا گۆن آیان دَپجاک کرت و سکّ ناتِپاک بوتنت. گڑا شئورِش کرت که پولُس و بارنابا گۆن دگه لهتێنا، اورشَلیما برئونت و گۆن کاسِد و کماشان اے جێڑهئے بارئوا هبر بکننت. 3کِلیسایا آیانی راه دئیگئے چِن و لانچ کرت و آیان چه پینیکیَه و سامِرَهئے راها گوَزان، هر جاه اے وشّێن هال دات که بازێن درکئومان هم چِه پئیما هُدائے راه زرتگ. چه اے هالئے اِشکنگا، سجّهێن برات باز وشّ و شادان بوتنت.

4وهدے اورشَلیما آتک و رَستنت، کِلیسا و کاسِد و کماشان وشّاتک کرتنت. هر کارے که هُدایا چه آیانی دستا کناێنتگ‌اَت، هالِش داتنت، 5بله لهتێن باوَرمند که پێشا پَریسیانی رُمبا بوتگ‌اَتنت، پاد آتکنت و گوَشتِش: ”هما سجّهێن درکئوم که ایمانِش آورتگ، باید سُنّت و بُرُّک کنگ ببنت و هُکم دئیگ ببیت که موسّائے شَریَتئے رَندگیریا بکننت.“ 6گڑا کاسِد و کماشان په اے هبرئے گیشّێنگا دیوان کرت. 7بازێن هبر و هالا رَند، پِتْرُس پاد آتک و گۆن آیان گوَشتی: ”او براتان! شما شَرَّ زانێت که باز وهدا پێسر، هُدایا چه شمئے نیاما منا گچێن کرت که درکئوم چه منی زُبانا ایسّائے وشّێن مِستاگا بِشکننت و باور بکننت. 8هما هُدا که هرکَسئے دلئے هالا زانت، درکئومی هم پاکێن روه بَکشت و په وت زرتنت، اَنچُش که پاکێن روهی مارا بَکشتگ‌اَت. 9هُدایا مئیگ و آیانی نیاما هچّ پرک و پێرے#15‏:9 پرک و پێر، بزان رو و ریا، یکّێا شَرتر و یکّێا هَرابتر زانَگ. نه‌اِشت، وهدے آ باوَرمند بوتنت، هُدایا آیانی دل هم پاک و پَلگار کرت. 10نون شما چێا مریدانی گردنا گرانێن جُگے#15‏:10 بچار: مَتّا 11‏:29. بندێت و هُدایا چَکّاسیت؟ اے بارا، نه ما زرتَ کنێن و نه مئے پیرێنان زرت کرتگ. 11اِنّه! مارا باور اِنت، اَنچُش که ما گۆن هُداوندێن ایسّائے مِهر و رهمتئے تُهپَها رَکّێن، همے ڈئولا آ هم رَکّنت.“ 12پِتْرُسئے هبرانی اِشکنگا رَند، سَرجمێن مُچّی بێتئوار بوت و بارنابا و پولُسئے گپّ و تْرانِش گۆش داشتنت، که هُدایا چه آیانی دستا، درکئومانی نیاما چۆنێن مۆجزه و اَجِکّایی پێش داشتگ.

13وهدے آیان وتی گپّ و تْران هلاس کرت، آکوبا دَرّاێنت: ”او براتان! منی هبران دِلگۆش کنێت. 14شَمون پِتْرُسا گوَشت که هُدایا چِه پئیما ائولی برا درکئومانی نێمگا په مِهر هئیال گوَر کرت که چه آیان هم په وتی ناما کئومے گچێن بکنت. 15اے گۆن نبیانی هبران یکّ و همدَپ اِنت، اَنچُش که نبیسگ بوتگ:

16‏-17 ’آ هُداوند که اے سجّهێن کاران یکجاه سَرجمَ کنت چُشَ گوَشیت: ”چه اِشیا رَند، من پدا کایان و داوودئے کپتگێن تَمبوا # 15‏:16‏–17 داوودئے کپتگێن تَمبو، بزان هُدائے بَکشتگێن بادشاهی. نۆک و مِکَّ کنان.

من آییئے وئیرانێن جاهان پدا جۆڑێنان و راستَ کنان،

تانکه آ دگه کئوم دێم په هُداوندا بیاینت،

بزان آ سجّهێن درکئوم که منی نام آیانی دلا نِشتگ.“

18 اے هبر چه دێریگێن زمانگان زانگ بوتگ.‘ # 15‏:18 آموس نبیئے کتاب 9‏:11‏–12.

19پمێشکا منی هئیالا، ما آ درکئومانی راها جنجال اَڈّ مکنێن که هُدائے راهِش زرتگ، 20په آیان بنبیسێن: چه هما کُربانیگان که گۆن بُتانی نامئے گِرگا ناپاک بوتگ‌اَنت، چه زنا و بێننگیا، چه مُردارێن دَلوَتانی#15‏:20 دَلوَت، بزان لۆگئے دَپی جانوَر چۆ که پَس و گۆک. گۆشتا، اَنچُش هم چه هۆنئے ورگا پهرێز بکننت. 21چێا که چه کوَهنێن زمانگان، هر شهرا موسّائے شَریَتئے جار پِرّێنۆکێن مردم بوتگ‌اَنت که هر شَبَّتئے رۆچا مردمِش کَنیسَهانی تها وانێنتگ‌اَنت.“

په درکئومێن باوَرمندان، اورشَلیمئے کِلیسائے کاگد

22گڑا گۆن سَرجمێن کِلیسایا هۆریگا، کاسِد و کماشان شئور کرت که چه وتی نیاما لهتێن مردم گچێن بکننت و پولُس و بارنابائے همراهیا اَنْتاکیَها رئوان بدئینت. آیان چه وتی نێمگا یَهودا که بَرسابا گوَشگ بوتگ‌اَت و سیلاس، گچێن کرتنت که براتانی نیاما، اے دوێن سرۆکێن مردم اَتنت. 23آیانی دستا کاگدے داتِش که اے ڈئولا اَت:

”ما، کاسِد و کِلیسائے کماشێن مردم و شمئے برات، شمارا، بزان اَنْتاکیَه، سوریه و کیلیکیَهئے درکئومێن باوَرمندێن براتان دْرۆت و دْرَهباتَ#15‏:23 دْرۆت و دْرَهبات، بزان سلام و اَلئیک. دئیێن. 24ما اِشکتگ که بے مئے پرمانا چه مئے نیاما لهتێن باوَرمند همانگُر آتکگ و گۆن وتی هبران شمارا دِلتپرکه#15‏:24 دِلتَپَرکَه، بزان پرێشان، دِلتْرَکّ. و پرێشانِش کرتگ. 25پمێشکا ما په همدلی شئور کرت که چه وت لهتێن مردم گچێن بکنێن و گۆن وتی دۆستێن پولُس و بارنابائے همراهیا، په شما راه بدئیێن، 26هما دوێن براتانی همراهیا که په مئے هُداوندێن ایسّا مَسیهئے ناما وتی ساهئے نَدر کنگا چَکّ و پَد نبوتگ‌اَنت. 27مئے اے دوێن کاسِد یَهودا و سیلاس، هما هبران که ما په شما نبشتگ‌اَنت، سرزبانی هم گوَشنت. 28پاکێن روه و ما، همے شرتر زانتگ که لهتێن بُنیادی گپّان و اَبێد، گرانێن بارے شمئے کۆپگان مَلَڈّێن. 29شما چه بُتانی ناما کُربانیگ کرتگێن گۆشتا، چه هۆنئے ورگا، چه مُردارێن دَلوَتانی گۆشتا و چه زنا و بێننگیا پهرێز بکنێت. چه اے کاران وتا دور دارگ، په شما باز شَرّ اِنت. وشّ و سلامت باتێت.“

30رَندا، اے گچێن کرتگێن برات اَنْتاکیَها دێم دئیگ بوتنت. اۆدا شت و کِلیسائے سجّهێن مردمِش یکجاه کرتنت و کاگدِش په آیان رَسێنت. 31آیان اے کاگد وانت و چه اِشیئے دلجمی و دِلبڈّی دئیۆکێن کُلئوا باز وشّ بوتنت. 32یَهودا و سیلاس که وت هم نبی اَتنت، اۆدئے براتِش گۆن بازێن هبران دِلبڈّی دات و آیانی باوَرِش مُهرتر کرت. 33چیزّے وهدا اۆدا منتنت و رَندا، براتان آ په وشّی و سلامتی رُکست کرتنت و چه همۆدا که دێم دئیگ بوتگ‌اَتنت، هما جاها پِر ترّتنت. 34#15‏:34 بازێن دَزنبشتا بَند 34 آتکگ که گوَشیت: ”بله سیلاسا شئور کرت همۆدا بمانیت“ نێست‌اِنت. 35پولُس و بارنابا، اَنْتاکیَها مهتل بوتنت و گۆن دگه بازێن مردمان هۆر بوت و هُداوندئے هبرِش تالیم دئیان و شِنگ کنانَ کرت.

پولُسئے دومی مِستاگی سپر

پولُس و بارنابائے جێڑه

36لهتێن رۆچا و رَند، پولُسا گۆن بارنابایا گوَشت: ”سجّهێن هما شهران که ما هُداوندئے هبر رسێنتگ، بیا پدا همۆدا برئوێن و براتان بچارێن که بارێن آ چۆن اَنت.“ 37بارنابائے واهگ اَت، یوهَنّایا که مَرکاس هم گوَشگ بوتگ‌اَت، همراه بکنت، 38بله پولُس آییئے همراه کنگا رَزا نه‌اَت چێا که آییا، پَمْپیلیَهئے دَمگا آ یله داتگ‌اَتنت و اے کارئے تها آیانی همراه نبوتگ‌اَت. 39اے ڈئولا، پولُس و بارنابا وت‌مان‌وتا تِپاک نبوت، نٹهتنت و چه یکدومیا جتا بوتنت. بارنابا، مَرکاسئے همراهیا، بۆجیگێا سوار بوت و کِبْرِسا شت. 40بله پولُسا، سیلاس گچێن کرت و براتان آ، هُداوندئے مِهر و رهمتانی باهۆٹ کرتنت. نون پولُس راه گپت. 41کِلیسایان مُهر و زۆرمند کنان، چه سوریَه و کیلیکیَهئے دَمگان ترّ و تاب کنانا شت.

Currently Selected:

کاسِدانی کار 15: HPKB

Highlight

Copy