Malako 3
3
Yesu Ekonia Muntu Wabezaga na Kuboko Kuoma Busi Bua Sabato.
Mat. 12:10-14; Lk. 6:6-11.
1Nu eingide lingo mu numba za musanganano; nu muabezaga muntu woma kuboko. 2Nu bamulolaga buno, ndi amonie busi bua sabato; buno bamusongele. 3Nu amutendile wozo muntu woma kuboko bune, Zanzuka. 4Nu ababuzizie bune, Ndi buakulungana ku mulembe kukita busoga busi bua sabato aba kukita bubi? kuita, aba konia? Tondo beikede kibibi. 5Nu abakakile meiso, nu abeide na kabebe ku kabamba ka mitima zabo mibibu nu atendile wozo muntu bune, Lambia kuboko kuobe, nu akulambizie; nu kuboko kuage konine. 6Kazanga kongo baFalese nu baHelode batukile bamukalide luango bubanamuita.
Yesu Ekonia Bantu ba Nsambo za Nkita na Nkita.
Mat. 12:15, 16; Lk. 6:17-19.
7Nu Yesu endile na beigisibua bage ku kiziba: nu musanganano munene wamuyangile kutuka ku Galela; nu ku Yudaya, 8nu ku Yelusalema, nu ku Edoma, nu ku lisilia lia Yadene, nu buigi na Tula nu Sidona, musanganano munene, gabongule ku misagu za buakitaga bamuendeide. 9Nu asambalide beigisibua bage buno kulumiziazi buato bukeke, kubuno musanganano gukuvua kumulimbania: 10kubuno onezie bantu beingi; babo babezaga na nsambo mbibu, bamukakanine buno beitubie kueli. 11Nu basumbu ba nsese gabamumonineko bamuguilide, nu balalukile, batendile bune, Uwe umuana wa Kalaga. 12Nu abakakizizie nunse buno tabamusaganizie buno uwamonia.
Yesu Ekusombola Beigisibua Bage.
Mat. 10:1-4; Lk. 6:12-16.
13Nu abakamine ku muiduko, nu amanine babo batundaga; nu bamukundile. 14Nu asombueide ikumi na babili buno babe nage, nu abasinge buno basambale, 15nu babe na buangato bua kutikia basumbu: 16nu akasile Simona izina buno, U Petelo; 17nu Yakobo muana wa Zebedayo, nu Yoana muto wa Yakobo; nu abakasile izina Bonagete, buisulilua bualio buli bana ba mukulumino: 18nu Andele, nu Filipo, nu Batolomayo, nu Matayo, nu Toma, nu Yakobo muana wa Alufayo, nu Tadayo, nu Simona mu Kananayo, 19nu Yudasa Isakaliote, u wozo wamugabuide. Nu eingide mu numba.
Buagi Butanasigililua.
Mat. 12:24-29; Lk. 11:14-20.
20Nu musanganano wakundamene lingo, nu tabamenyine bubalia kampampa. 21Nu gongule beida bage ku musagu wozo bendile kumutola, kubuno babatendile bune, Eseli muluba. 22Nu basanzi batukile ku Yelusalema batendile bune, Eli na Belezebula, mukota wa basumbu, nu mu magala mage ekutikia basumbu. 23Nu abamanine, nu abeisile misumo bune, Ndi Satana anavuama kutikia Satana? 24Nu ndi bukota buneidekanukia bubuenyene, kasi bunakua. 25Nu ndi numba zalekanukibua tazinasimba. 26Nu ndi Satana ekuitikia, kasi asila kulekanuka, nu ntanavuama lingo kuemana, kasi nti asila. 27Tondo muntu ntanavuama kuingila mu numba za uli na magala, nu kubigia bikulo biage, tondo alinge tanga kukanda wozo uli na magala; nu kusila nti anavuama kubigia numba zage. 28Lebelebe nkumubula, misako za buagi insania za bantu zikasigililua nu bilingano bibakulingana; 29tondo wozo walinga Muuza Wasililila ntakasigililua nunse, tondo eli na katati ka buagi butanakuzinda: 30kubuno batendile bune, Eli na musumbu wa nsese.
Bantu Bakasuaga ku Kabamba ka Yesu.
Mat. 12:46-50; Lk. 8:19-21.
31Nu nina nu bato bage; bemanine kumbuga, nu basingile muntu kumumana. 32Nu musanganano wamutimbikanizie; nu bamutendile bune, Nyoko nu bato bobe beli kumbuga bekukulonda. 33Nu abakuide bune, Nazi mane nu banazi bato bane? 34Nu alolile babo babezaga bamutimbikania, nu atendile bune, Lolazi, mane nu bato bane! 35Kubuno unsania ukukita kusombola kua Kalaga, we nti muto wane, nu mubitu wane, nu mane.
Currently Selected:
Malako 3: NTKI57
Highlight
Share
Copy
Want to have your highlights saved across all your devices? Sign up or sign in
Nouveau Testament en Kilega © Bible Society of the Democratic Republic of Congo, 1957.
